Kulawa 7
7
Musa na Aruna mbere ya Firyauna
1Sambi, Mola akimwambíra Musa: “Ngasikira sana-sana! Omi nukutenda kuwa kamba Nlungu mbere ya Firyauna, na nduyo Aruna akuja kuwa nabii wako. 2Uwe-po mwambire nduyo Aruna piya ámuri zanukwambira, na iye amwámbire Firyauna awase waIziraeli walawe muinti mwake. 3Fala níntenda Firyauna moyo wake uwe ngumu. Inti ya Miswiri nízidisa maajuza angu a ajabu, 4fala Firyauna aakusikirizani. Ikisa nukolosera nkono wangu Miswiri, na kwa hukumu ulu-ulu, nilavya marikolo a wanu wangu, waIziraeli, walawe inti ya Miswiri. 5Panisaka kolosa nkono wangu nikiwalávya waIziraeli-wo kati yawo, waMiswiri ndi pawasaka kwijiwa kuwa omi niwa Mola!” 6Musa na Aruna wakiténda novire, kamba Mwenyezimungu vyawamúrire vire. 7Pawasowere na Firyauna, Musa ákiwa na úmuri wa myaka tamanini, Aruna na úmuri wa myaka tamanini na mitatu.
8Ikisa Mola kawámbira Musa na Aruna javi: 9“Firyauna ákukwambirani kuwa ‘ Akwakikishani julu ya kutenda maajuza mamoja’, mwambire Aruna javi: ‘Twala ngombo wako, wefye pansi kumaso ka Firyauna. Newo útaduka nyoka.’ ” 10Basi Musa na Aruna pawafikire ka Firyauna, waténda vyawâmuriwe na Mola novire. Aruna akéfya ngombo yake pansi, kumaso ka Firyauna pamoja na watumisi wake, neyo ikitaduka nyoka. 11Ikisa Firyauna akiwetísa wejiwifu pamoja na wasawi wa Miswiri, newo wakiténda novire-novireni kwa mitigadi yawo ya kisawi. 12Piya ware wakéfya ngombo zawo pansi, zikitadúka nyoka. Falakini ngombo ya Aruna ikimíza kídyo ngombo nyengine zire piya. 13Novyo-sivyo Firyauna, moyo wake uzídi kuwa ngumu, aawasikirize vyawâmuriwe na Mola vire.
Hukumu ya kwanza: damu
14Mola kamwambira Musa kaamba: “Firyauna mbishi, aawasa kulawa waIziraeli. 15Pwesera makeshamungu subuu namapema, uke ka Firyauna paalawa kuka kumuto. Ukanrinde nanyenje ya muto wa Nilu, urisukuze mmakono ngombo îtaduke nyoka-yo. 16Na umwambire kuwa ‘Mola, Nlungu wa Waebraniya, kânituma nukwambire javi: “Wase wanu wangu walawe, wakanitendere kafara kulanga.” Fala mpaka sambi-pa, aunamba kunsikiriza. 17Ndi ntamana, Mola akwamba javi: “Nítenda alama ipate wijiwe kuwa omi niwa Mola. Ona, na ngombo iri mmakono-yi, omi nukwibiya maji a Nilu-ya, maji-ya átaduka damu. 18Inswi ziri mmuto-mu zukufwa, muto-wu únuwa kituti, na waMiswiri awakidiri kunywa awasimbusa moyo.” ’ ”
19Mola kamwámbira Musa tena: “Mwambire Aruna, ‘Atware ngombo yake, olosere maji a Miswiri piya, mifereji, myuto ya kusimbiwa, matanda, na piya paapitire mivulo ya maji, ipate ataduke damu. Kwa javyo, inti ya Miswiri ire piya kila mahala íkiwepo damu, mpaka mvyombo vya mbawo na mawe piya.’ ” 20Musa na Aruna wakiténda kamba vyawámuriwe na Mola. Kumaso ka Firyauna pamoja na watumisi wake, Aruna akilamúsa ngombo yake, akibíya maji a mmuto wa Nilu are. Maji are piya akitadúka meundu pyũ. 21Inswi zíkiwa mmuto mure zikífwa, maji a mmuto are akánza kunuwa kituti pé, na waMiswiri awakikidiri kunywa maji a wenye are piya. Kweli, inti nzima ire piya íkiwa damu nupu. 22Fala wasawi wa Miswiri newo waténda novire-novireni kwa mitigadi yawo ya kisawi. Ndi ntamana Firyauna akizídi ubishi, aasikirize kamba vyaâmbire Mola. 23Firyauna akúka vyake kunyumba yake ya kifalume, na vikuníre vire anta kummweri. 24WaMiswiri piya wakisímba mirimbu nnanyenje ya Nilu wapate maji meema, kamana maji a mmuto are aakinywéka. 25Bandi ya Mola kwibiya maji a muto wa Nilu, zipíta suku saba nzima.
Currently Selected:
Kulawa 7: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
