Mwanzo 37
37
Yusufu na wanduze
1Yankubu ákikalanga inti ya Kanaa, inti yékare wawaye suku aba sana. 2Epa ndi pailunga hadisi ya Yankubu na wanawe. Yusufu paafikire nnemba wa myaka kumi na saba, ákisunganga makondoo a wawaye, pamoja na wanduze, wana wa Biliya na Zilpa, waka wa wawaye. Yusufu akiludi ákimwambiranga wawaye vitendo vyawakiténdanga wanduze. 3Iziraeli ákimwajibu pakulu mwanawe Yusufu zaidi ya wanawe piya, sababu yake kampongola olúvare. Basi, kânsonesera anzu ya kifalume. 4Wanduze ware, wakati wawammonire wawa yawo kuwa ámpenda pakulu Yusufu zaidi ya ewo, wengira kukimiyana naye pakulu, anta habari awákindairi.
Kulota ka Yusufu
5Suku moja Yusufu akilota. Akilawa akúka akiwereza wanduze. Na kuwereza, wazidi kukimiyana naye kupunda pakwanza. 6Akilawa Yusufu kawambira kaamba: “Sikirizani kwanza nloto wanilotire! 7Uwa javi: Ofwe tíkiwa masamba tíkifunga vinyang'anya. Noparepare, cangu cire cilamuka cimira, sambi vyenu piya vinámira kinyang'anya cangu!” 8Wanduze ware piya wakamba: “Epo iwe mwaja? Titure kamba uwe ndi usaka kuwa nfalume wetu!” Basi ware wakizidi kuwa na nyongo sababu ya nloto ure vyereze vire.
9Yusufu akilota tena. Akanza kuwereza wanduze akamba: “Onani! Nilota nloto mwengine tena javi: Nilota juwa, mwezi, pamoja na nondwa kumi na moja, piya vire vininamira omi!” 10Wakati wamwereze nloto ure wawaye na wanduze, wawaye ire kamwinyukira kaamba: “Kú? Uwe? Ewu ndi nlotoni waulotire-wu? Tíjuzi omi na mamayo tinamire pansi tukusujudire uwe?” 11Kwa piya vire, wanduze ware piya wazidi kuntendera wiyana, fala wawa yawo katula nloto ure mmoyo mwake.
Kuuzanyiwa ka Yusufu
12Suku moja, wanduze Yusufu wôka kusunga mifuwo ya wawa yawo upande wa kwitiwa Shekemu. 13Iziraeli akimwambira Yusufu: “Epa Wanduzo woka kusunga mifuwo Shekemu, basi omi vínajibu uke ukawawone.” Yusufu akinjibu wawaye: “Aye, nukuka.” 14Yankubu akimwambira Yusufu akamba javi: “Uka ukawawone wanduzo na uwone vyawari kwenendesa mifuwo, uje unambire kinu kimojawapo.” Yankubu ákikalanga nanyenje ya muto wa Heboroni, wakati waákintuma Yusufu. Fala karibu ya kufika Sikemi, 15Yusufu imwasika njira, akilawirira munu kansingana akipayapaya, akindairi: “Uwe, kwankupita ukisakula kinani?” 16Akinjibu: “Nankupita nikiwasakula wanduzangu, tenda fadili unambire mahala pawari kusunga mifuwo.” 17Munu ire akinjibu Yusufu: “Wanduzo awapo-pa walawa, konta niwasikira wakamba ‘Tankuka Dotani.’ ” Sambi Yusufu akilawa akúka Dotani kuwasakula wanduze, kweli, wanduze ware akiwasingana Dotani nokure.
18Wanduze ware, wammona akija baidi na sánamba kufika karibu, wawaza namuna ya kumulaya. 19Mpunde noure wengira kwambirana javi: “Munu Cakúlota ire kankuja. 20Tukeni timulaye sambi nopa timwefye munrimbu uri pare ure, nakisa tikambe katafuniwa na ndudu. Sambi timmone kulota kwake-ko.” 21Na kusikira, Rubeni kawakataza wanduze ware wasimulaye. Iye kawambira javi: “Musimulaye! 22Musimwasise mainsha ake, wala musintende vibaya, fadari mumwefye munrimbu uri mulanga ure.” Konta Rubeni akisakula anvushe nduye mmakono mwa wanduze ware, ampereke ka wawaye. 23Basi, Yusufu na kufika pawekare wanduze pare, wakinvula anzu yaavarire ire, 24wakinkola wakimwefya munrimbu wa kukakama maji ure.
25Na kwisa, wakikala kurya. Sambi, pawesire kurya, wakinula uso wakiwona nkonjo mmoja wa rikolo ra Sumaila ukija kulawa inti ya Giliyadi na ngamiya zawo na vinu vyawo. Wasukula vilungo vya munsuzi, mafuta a kunuwira na lubani. 26Basi Yuda kawambira wanduze: “Wanduzangu, tikimulaya nduyetu-yu, tikifisa kufwa kwake típata faidani? 27Fadari timuzanye na ewa wanu wa rikolo ra Sumaila-wa, tisintende ubaya nduyetu, kamana damu yetu moja.” Wanduze ware wakubali. 28Ewo wakati wawapitire matajiri wa rikolo ra Sumaila ware, wanlavya Yusufu munrimbu mure wakimuzanya kwa beyi ya bwara shirini za parata, newo wakinsukula Yusufu ire mpaka Miswiri.
29Rubeni paludire koka kasungurira munrimbu mure, kawona kuwa Yusufu aapo. Mamá! Basi akipapula anzu yake piya, konta ya kukimiwa. 30Sambi, akiludi akuka ka wanduze akiwambira: “Nnemba ire mure aapo, sambi nísaka kutenda mwaja?” 31Basi wantwala mbuzi wansinja, damu watingíndira muanzu ya Yusufu. 32Wakitwala anzu ire wakisukula mpaka ka wawa yawo. Na kufika wamwambira javi: “Ofwe tilokota anzu-yi, nang'anizani sana-sana kamba siyo anzu ya mwanenu?” 33Yankubu nakuwona akishanga akamba: “Ndi noyi-noyini anzu ya mwanangu! Yusufu ire katonyiwa na ndudu! Aaa!” 34Yankubu akipapula mavazi ake, akitwala guniya akivala ntunda sababu ya úzuni wa kunkumbukira mwanawe. Basi, akiwa mmatanga suku nyingi zawenye. 35Sambi, wana piya waka na walume, wakola kunnyamaza wawa yawo, fala iye aavumirire, noparepare kanza kwamba: “Nirira konta ninsikitikira mwanangu mpaka Kuzimu.” Basi Yankubu akingira kurira novire.
36Wakati wawafikire Miswiri, wanu wa rikolo ra Sumaila ware, waMidiyani ware, wamúzanya Yusufu ire Miswiri ka Potifa nkulungwa wa manakola wa Firyauna.
Currently Selected:
Mwanzo 37: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
