Mwanzo 47
47
1Sambi Yusufu akuka akimpa habari nfalume Firyauna, akamba: “Nfalume wangu, baba na wanduzangu waja kulawa Kanaa, mwanisowera-mu, wawa Gosheni. Waja nawo ng'ombe zawo, na makondoo wawo, pamoja na vinu vyawo piya.” 2Yusufu akiwatwala wanduze watanu, akuka akiwolota ka nfalume. 3Firyauna akiwadairi wanduze Yusufu: “Umwe kazini yamwijiwa?” Ewo wakijibu: “Ofwe kazi yetu kufuwa na kusunga makondoo, kamba vyawákitendanga wababu zetu.” 4Ikisa wakamba tena: “Tija kwikala eyi inti-yi, konta Kanaa hapana anta minyani ya kurya mifuwo na kuwa njala núsura. Tendani fadili na huruma, mutipe riusa tikare kaya ya Gosheni.” 5Firyauna ire kamwambira Yusufu kaamba: “Epa wawayo na wanduzo wakujira. 6Eyi kaya-yi iwa mmakono mwako, útenda vyausaka vyonse. Wape kaya ya Gosheni wekare, konta ndi kaya ngema ya kupunda kaya piya ziri nkati ya Miswiri. Na uwatunze kamba wawapo wanu wa kwaminika uwape mifuwo yangu wanisungire.”
7Yusufu akuka akintwala Yankubu wawaye, akuka naye ka nfalume Firyauna kumolota. Yankubu ire, akinlebelela meema nfalume. 8Firyauna akindairi Yankubu: “Kuwa nawo myaka myengapi?” 9Akinjibu: “Nanawo umuri wa myaka miya na talatini. Fala myaka yangu aba na mainsha a tabu. Sinamba kufika myaka yawainshire wazee wangu.” 10Pawesire kupakanira, Yankubu akinlebelela meema Firyauna ka Mola wetu, na kwisa akilawa akuka vyake. 11Yusufu akitondola inti ngema iri nkati ya Miswiri yakwitiwa Ramesesi akimpa wawaye na wanduze, na ewo wakanza kuinshi, kamba vyaambire nfalume Firyauna. 12Yusufu akanza kuwarisa piya, wawaye pamoja na wanduze na jamaa zake na piya kila cakurya cawakisaka wasimana conse.
Njala izidi inti ya Miswiri
13Cakurya acíkiwapo anta mahala pamoja, na njala kila suku íkizidi! Wanu wa Miswiri na wanu wa Kanaa wakikuna mashaka a njala pakulu futi. 14Yusufu akikusanya nzuruku piya wa Miswiri na Kanaa, wakiuzanyanga tirigu, akuka akipereka ka nfalume Firyauna. 15Sambi pawisire nzuruku Miswiri na Kanaa, wakilawa wanu wa Miswiri wakuka ka Yusufu wakimwambira: “Tenda fadili utipe tirigu! Utasa mwaja tikifwa njala konta atina nzuruku?” 16Yusufu akiwajibu akamba: “Ikiwa ukwisirani nzuruku, njoni nawo mifuwo yenu tikakanye na tirigu.” 17Basi, wanu ware wakamba: “Novyo! Wakiwatwala makavalu, ng'ombe, makondoo na maburu wawo wakuka nawo, Yusufu akikakanya nawo tirigu mpaka mwaka ukisa.” 18Paupinduke mwaka, wakimukira tena Yusufu wakamba: “Ofwe nzuruku wetu wisa piya na mifuwo yetu piya iwa mmakono mwako. Sambi atina ca kukupa. Tibaki ofwe na masamba etu basi. 19Utasaja novi tikifwa njala? Basi tiuze ofwe pamoja na masamba etu, utipe tirigu tipate mainsha. Ofwe tikuwa watwana wa Firyauna na iye átwala masamba etu. Utipe mbeyu tivyare inti isitaduke langa.”
20Noure wakati ure Yusufu akimuzira mamasamba are piya Firyauna konta njala ízidi kuwa nyingi. Basi mamasamba are piya akigwirira kuwa a nfalume Firyauna. 21Basi, Yusufu akiwatenda watwana wa Firyauna kulawa mwanzo mpaka mwinsho wa inti. 22Ila mamasamba a wakulungwa wa dini ozire, kamana ewo wákirya poso rawo, wákiwa na poso rawo ra kulawa ka Firyauna. Ntamana awozanye mamasamba awo.
23Akilawa Yusufu akiwambira wanu ware akamba: “Epa sambi, piya-mwe muwa wanu wa nfalume pamoja na masamba enu piya. Basi twalani mbeyu-yi mukavyare mmasamba mwenu. 24Sambi, ikuwa javi: mukivuna mwawanye mafungu matanu. Mulavye fungu rimoja mumpe Firyauna, mafungu mane akuwa enu mupate mbeyu ya kuvyala mmasamba, na mupate cakurya cenu wanyewe na wanenu pamoja na wanu wari mmanyumba mwenu.” 25Ewo wakijibu: “Mwenye, kutivusha, kutolotera wema wako, na ofwe tiwa radi kuwa watwana wa nfalume.” 26Kwa javyo, Yusufu akilavya noire shariya ire piya inti ya Miswiri, iri kutumiriwa mpaka rero kuwa: kila munu nkati ya mafungu matanu alavye fungu rimoja ampe Firyauna. Ila masamba a wakulungwa wa dini oziwe kuwa a Firyauna.
Furaha ya mwinsho ya Yankubu
27Basi wanu wa Iziraeli na jamaa zake piya, wakanza kwikala Gosheni, wakipata ruwa nyingi zawenye, wakipongolana wakizidi kuwa wengi. 28Yankubu kekala inti ya Miswiri muda wa myaka kumi na saba, mpaka akifika umuri wa myaka miya na arubaini na saba.
29Paafikire karibu ya kufwa, Yankubu akimwita mwanawe Yusufu, akimwambira javi: “Kamba kweli únipenda, núkulebela uture nkono wako sini ya mpaja wangu unipe ukweli kamba útenda kwa inshima na kauli: usinizike inti ya Miswiri-yi! 30Nikifwa, unilavye nkaya-mu ukanizike kawazikiwe wakulungwa wangu.” Yusufu akinjibu: “Nítenda baba kamba vyamunámbira novyo.” 31Yankubu kaamba: “Samini mpaka ulape.” Yusufu akilapa, ikisa Yankubu akinamira upande wa kukiswa ca kinanda.
Currently Selected:
Mwanzo 47: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
