Mwanzo 48
48
Yankubu awalebelela meema wana wa Yusufu
1Pavisire piya vire, Yusufu akija akambiriwa kuwa: “Wawayo nlwere.” Yusufu akilawa pamoja na wanawe wawiri Manase na Efraimu akuka kumona wawaye. 2Pafikire ka wawaye, wakimwambira Yankubu: “Mwanawo Yusufu kaja kukuwona.” Iziraeli akiririmbisa akilamuka akikala pakinanda pake. 3Yankubu akimwambira Yusufu akamba: “Mwenyezimungu Mwenyé Uwezo, kaninang'aniza sana kaya ya Luzu kure nkati ya inti ya Kanaa, kanijanliya vyema sana. 4Kanambira javi: ‘Ona! Nukujanliya uwe na wanawo mongezeke na nukutenda uwe munu nkulu wa wanu na inti-yi níwapa wajukuluwo wamiliki daima milele.’ 5Fala sambi, ona! Wana wawiri wauwapongore Miswiri, kábula saninamba kuja omi kuno, wanangu! Efraimu na Manase wanangu kamba vyawari Rubeni na Ansumani. 6Fala wana wausaka kuwapongola nakisa, wakuwa wanawo. Wakifika pakuriti, ewo novyo wáriti kwa zina ra wanduzawo. 7Canambira javyo, konta omi wakati wanikiludi inti ya Padani, mamayo Rakeli kanifwira munjira karibu ya kufika kaya ya Efrata (Efrata inti ya Betlehemu), inti ya Kanaa. Nikinzika nopo.”
8Basi, Iziraeli wakati wawafaamire wana wa Yusufu, akindairi: “Wanawo ndi nowa?” 9Yusufu akinjibu wawaye akamba: “Ndi nowa wanangu, ewa ndi wana wanipere Mwenyezimungu niwapongola nkaya-mu.” Akilawa Yankubu akamba: “Tafadali njo nawo kuno niwalebelele meema.” 10Wakati-wo Iziraeli ânremera maso sababu ya uzee, aâkikidiri kuwona sana. Wakati wawafikisiwe wana ware karibu yake, akiwakola makono ákiwakapata akiwapa beju. 11Iziraeli akimwambira Yusufu javi: “Wé! Omi síkidanizira kuwa nukuwona tena, fala Mwenyezimungu katisimánisa tiwonana pamoja na wanawo.” 12Yusufu akiwalavya wana ware pakitondo pa wawaye, akinamisa uso wake akisujudi. 13Yusufu akiwatwala wanawe wawiri Manase na Efraimu, Manase nkono sonto, Efraimu nkono nriro, akiwasengereza ka babu yawo. Kwa javyo, Manase ákiwa upande wa nkono nriro wa babuye na Efraimu ákiwa upande wa nkono sonto. Ware akiwatula makono. Efraimu akintula nkono nriro na Manase akintula nkono sonto. Fala upande wa Iziraeli Efraimu kekala nkono sonto, Manase kekala nkono nriro. Javyo Yusufu ire akiwasengereza wana ware ka Iziraeli. 14Iziraeli akolosa makono akisiyanisa! Nkono nriro akitula julu ya kiswa ca Efraimu (iye ndi ákiwa kifindi), na nkono sonto akitula julu ya kiswa ca Manase. 15Akilebélela meema rikolo ra Yusufu akisema: “Mwenyezimungu wawákenenda wakimwaza babu zangu Iburahima na Izaki, Mwenyezimungu Nsunga wangu tangu mwanzo wa mainsha angu mpaka rero, 16Laika wanikingire omi vitendo vibaya piya, noyo Mwenyezimungu-yo akujanliyeni umwe wasimana-mwe! Zina rangu rivume pamoja na wazee wangu Iburahima na Izaki, na mupongolane muwe wengi mulumwengu-mu!”
17Yusufu, pamonire wawaye akolosa nkono nriro akitula julu ya kiswa ca Efraimu, mmoyo mwake akiwona kuwa vibaya. Akinyanyula nkono wa wawaye kiswa ca Efraimu akitula pakiswa ca Manase. 18Yusufu akimwambira wawaye akamba: “Wawa sivyo! Konta eyu ndi anzire kupongoriwa. Mújuzi mulamuse nkono nriro wenu muture pakiswa pake.” 19Wawaye ire akikatala akisema javi: “Nikwijiwa mwanangu! Nikwijiwa sana-sana. Manase-yu akuja kuwa na rikolo rake, nakisa akuja kuwa munu nkulu, fala nduye kisimana wake, akuja kuwa munu nkulu wa kuinshimiwa zaida ya nyenyeye, na rikolo rake rikuja kuwa ringi rikwenera mulumwengu.” 20Basi ire suku ire, akiwalebelela meema tena akisema: “Mbere yenu, wanu wa Iziraeli wakuja kutumira mazina enu kwa kulebelelana, wakwamba javi: Mwenyezimungu akuture uwé kamba Efraimu au uwé kamba Manase.” Novirevire Iziraeli kântula Efraimu mbere ya Manase. 21Nakisa, Iziraeli akimwambira Yusufu: “Ona! Omi niwa karibu ya kufwa, fala Mwenyezimungu akuwa pamoja na uwe, na ákuludisira inti ya babuzo. 22Omi nukupa uwe upande mmoja wa inti, zaida wanduzo, inti ya nipatire mmakono mwa waAmori kwa upanga na upinde wangu.”
Currently Selected:
Mwanzo 48: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
