Yuh 12

Pghafta Mari ta urdi ta səla Yesu

Mat 26:6-13, Mak 14:3-9

1Ta pɗakwa fitik mkuʼ ka maga skala *Pak, ka Lagha *Yesu da luwa Betani, ma tsa luwa ta nzaku Lazar, tsa mndu sliʼaganap tsi ma mtaku ya kay. 2Ka danatá lu ta skwa zay hada, ka dgə Marta. Tekw tsa Lazar ya mataba tsa mnduha ta nzata ŋa za skwa zay kawadaga nda Yesu ya. 3Ka klaftá Mari ta hwaraka urda sana fu ta hgə lu ka Nar, nda bla dzva ni, ka rita litər. Ka pghə tsi ta səla Yesu, ka takaɗay nda swida ghəŋa ni. Ka vərtikanaftá tsa urdi ya ta vli ma inda tsa həga ya. 4Ka Zudas Iskaryut zwaŋa Simuŋ, ta nzakway tekw mataba duhwalha Yesu ta dzaʼa skwapta ya mantsa: 5« Haɗ lu si ta skwaptá na Urdi na ka tseda vagha mnduha hkən dərmək#12:5 Ngha ta Yuhwana 6:7. ka daganaftá gwal ka pɗu ra? » kaʼa. 6Vərɗa gwaɗa ta la pɗu a gwaɗ tsi wa. Vərɗa tsatsi ná, ghali ya kabga ta dzaʼa tsatsi nda klaʼatá tsa skwi ta tskə lu ma zlibi da tsi ya. 7Ama ka Yesu mantsa: « Zlana zla! Ka fata tsi ŋa baɗu paɗa iʼi. 8Gwal pɗu ná, ta vata kaghuni hahəŋ. Iʼi, nzata a yu ta vata kaghuni ŋa ɗekɗek wu, » kaʼa.

Mal dzatá Lazar, ka gwal dra skwi ŋa Lazglafta

9Snaŋta ndəghata la *Yahuda kazlay: Waʼa *Yesu ma Betani kəʼa, ka sliʼadaghatá həŋ. Tsa sliʼadaghata sliʼadagha həŋ ya ná, ta ghəŋa gwaɗa ta Yesu nda ghəŋa ni a wu, ta kumay həŋ ta nghaŋtá tsa Lazar sliʼaganap Yesu mataba gwal nda rwa ya guli. 10« Dzatá Lazar guli! » ka la mali ta ghəŋa gwal dra skwi ŋa Lazglafta kurata, 11kabga nda ndəgha la Yahuda ta sliʼapta mataba taŋ ka laghu da zlghaftá Yesu ta ghəŋa gwaɗa ta Lazar.

Lama Yesu da luwa Ursalima

Mat 21:1-11, Mak 11:1-11, Luk 19:28-40

12Ga mahtsima ni, ka snaŋtá dəmga ta sliʼadaghata da tsa vla skalu ya kazlay: Waʼa *Yesu ta sagha da Ursalima kəʼa. 13Ka ɓal həŋ ta sluhwa zlizlam ka dzaʼa da guyay ta tvi. Ka həŋ mantsa: « Ŋa Lazglafta glaku! Ka tfanagha tfa Lazglafta ta wi ta mndu ta sagha nda hga Mgham. Ka tfanagha tfa Lazglafta ta wi ta Mghama la Israʼila, » ka həŋ ka hla wi. 14Manda ya nda vinda, ka mutsaftá Yesu ta zwaŋa kəɗih, ka laf tsi tida.

15« Ma zləŋ kuni ta zləŋ mnduha ma luwa Ursalima,

waʼa Mghama ghuni ta sagha

ta zwaŋa kəɗih#12:15 Ngha ta Zakari 9:9., » kaʼa.

16Inda tsa skwiha ta magaku ya ná, ta sna a duhwalha ni ta klatá ghəŋa ni karaku wa. Tahula kapanafta lu ta Yesu ma glakwa ni, ka havaktá həŋ kazlay: Ta ghəŋa tsatsi vindafta lu ta tsa skwi ya kəʼa, ka sagha tsa skwi mna lu ma gwaɗa Lazglafta ya magata manda va tsaya guli, ta ghəŋa Yesu. 17Ka rusu inda tsa mnduha si kawadaga nda Yesu ya ta skwi nghaŋ həŋ, ma fitika sliʼaganaptani ta Lazar ma kulu, mataba gwal nda rwa ya. 18Tsaya kəl mnduha ka sliʼadaghata da guyay kabga snaŋta taŋ ta tsa mazəmzəm maga tsi ya. 19« A haɗ sana skwi dzaʼa magata mu ya na! Nghawa ɓa ta inda mnduha ta dzaʼa mista ni, » ka la *Farisa mataba taŋ.

Maganatá slna ta Yesu, ka dzaʼa mista ni

20Mamu la Grek#12:20 Ngha ta Yuhwana 7:35. mataba tsa gwal ta sliʼadaghata da Ursalima ŋa tsəlɓu da Lazglafta ma tsa fitika skalu ya. 21Ka həŋ mantsa: « Mghama ɗa! Ta kumay ŋni ta guyata nda *Yesu, » ka həŋ nda Filip ta nzakway ka mnda luwa Betsayda ta haɗika Galili. 22Ka laghu Filip mnanatá Andre, ka sliʼaftá həŋ kawadaga ka laghu mnanatá Yesu. 23Ka Yesu nda həŋ mantsa: « Nda maga fitik dzaʼa kəl lu ka kapanaftá *Zwaŋa mndu ma glakwa ni. 24Kahwathwata ka yu ta mnaghunata, ndleŋw manda va tsaya ta nzata hya nimaya ka dəɗam a tsi da haɗik ka rwutani. Ka rwu rwa tsi, dzaʼa yaf ya dagala. 25Mndu ta ɗva ghəŋa ni ná, dzaʼa zaɗiŋ zaɗa. Ala, ka malaghu mala ɗvafta tsa mndu ya ta Lazglafta ka skwiha ma ghəŋa haɗik katsi, dzaʼa nzulana nzula tsa mndu ya ta hafa ni ŋa kɗekedzeŋ. 26Ka ta kumay mndu ta magihatá slna ná, ka sawi tsi mista ɗa, ma tsa vli dzaʼa nzata iʼi ya, hada dzaʼa nzata tsa mndu ta magihatá slna ɗa ya guli. Ka ta magiha maga mndu ta slna, dzaʼa ŋlanaf ŋla Da ɗa ta tsa mndu ya, » kaʼa nda həŋ.

Mnay Yesu ta gwaɗa ta dzaʼa ni mtaku

27Ka *Yesu mantsa: « Ndanana ná, wana nda tsa ŋuɗufa ɗa. Sna a yu ta skwi ŋa mnay ɗa wa. Da! Klap kla ta iʼi ma na ghuya ɗaŋwa na ka yu, tsaw ta ghəŋa tsa ghuya ɗaŋwa ya klə yu ka saha ta ghəŋa haɗik da ghuyay kay guli. 28Da! Maraŋ mara ta glakwa gha, » kaʼa. « Ghada ghada yu ta maraŋtá glakwa ɗa, dzaʼa kɗay yu ta maray guli, » ka lwi gwaɗagata daga ta luwa. 29« Luwa ya ta ŋəzlata, » ka dəmga ta snay. « Duhwalha Lazglafta ya ta gwaɗganata, » ka sanlaha. 30Ama ka Yesu mantsa: « Tsa lwi ta gwaɗagata ya ná, ka ŋa ɗa a wa, ka ŋa ghuni gwaɗagata tsi. 31Ndanana tama, nda maga fitika tsanaghatá guma ta na ghəŋa haɗik na. Ndanana dzaʼa wuɗidiŋta lu ta mghama na ghəŋa haɗik na. 32Iʼi, baɗu kapaɗifta#12:32 Ngha ta Yuhwana 3:14. lu ta na ghəŋa haɗik ya, dzaʼa tɗaktɗak yu ta inda mnduha da iʼi, » kaʼa. 33Tvi kəʼa dzaʼa mtaku ta mnə tsi ma tsa gwaɗa ni ya. 34« Dzaʼa nzata ŋa kɗekedzeŋ *Kristi, ka aŋni taghafta ma deftera zlahu ná, waká kagha tama ta mnay kazlay: Dzaʼa kapanaf kapa lu ta *Zwaŋa mndu kəʼa. Wa tsa Zwaŋa mndu ya? » ka tsa dəmga ya. 35Ka Yesu mantsa: « Ta ɓats nzɗa tsuwaɗak karaku mataba ghuni. Ta takeʼa tsuwaɗak na ná, Mbaɗawambaɗa ta mbaɗa ma tsuwaɗak, yaha vli da kuzaghunaghata. Mndu ta mbaɗa ma grum ná, sna a ta vli ta dzaʼa tsi wa. 36Zlghafwazlgha ta tsuwaɗak ta da kaghuni tsi na, kada nzakwa kuni ka zwana tsuwaɗak, » kaʼa nda həŋ. Gwaɗata Yesu ta tsa gwaɗa ya, ka laghu tsi ka zaghuta diʼiŋ nda həŋ, ka ɗifaghuta.

Kwalaghuta la Yahuda ta zlghaftá Yesu

37Kulam nda tsa mazəmzəmha mamaga tsi ta wa ira taŋ ya, ka kwalaghutá həŋ ta zlghafta. 38Mantsa ya dzaʼa kəl tsi ka nzakway taɓta gwaɗa manda ya mna anabi Isaya kazlay:

« Mghama ɗa, wa ta zlghaftá gwaɗa ya gwaɗa ŋni?

Wa maranaŋ Mgham Lazglafta ta mbrakwa ni#12:38 Ngha ta Isaya 53:1.? »

39Skwi kwal həŋ zlghafta ná, wya tsi ka Isaya mnata guli:

40« Lazglafta ta ghulpiŋtá ira taŋ,

ka təŋanaftá ghəŋa taŋ,

ŋa kwala taŋ nghaŋta nda ira taŋ,

ŋa kwala taŋ tsatsafta da mbəɗaktá həŋ ta vgha təv iʼi

ŋa mbanafta ɗa ta həŋ#12:40 Ngha ta Isaya 6:9-10. kəʼa, » ka Lazglafta.

41Ma tsa fitika nghaŋta Isaya ta glakwa *Yesu ka mnə tsi ta gwaɗa ta ghəŋa ni#12:41 Ngha ta Isaya 6:1. ya, mnata tsi ta tsa gwaɗa ya. 42Ma va tsaya ná, mamu ndəghata la mali ta ghəŋa la *Yahuda ta zlghaftá Yesu. Ama ka kwalaghutá həŋ ta maraŋtá ghəŋa taŋ, kabga zləŋa gwaɗa da la *Farisa, da taliŋtá lu ta həŋ ma həga tagha skwa taŋ. 43Malaghu mala ɗvafta taŋ ta ghubu da mnduha ka ya da Lazglafta.

Yesu ná, tsuwaɗak ya

44Ka *Yesu klaŋtá lwi mantsa: « Mndu ta zlghaftá iʼi, iʼi a zlghaf tsi wu, tsa mndu ta ghunigihata ya zlghaf tsi. 45Mndu nda ngha ta iʼi, nda ngha ta mndu ta ghunigihata. 46Iʼi ná, tsuwaɗak yu, ka saha yu ta ghəŋa haɗik kada kwala mndu ta zlghaftá iʼi da nzata ma grum. 47Ka nda sna mndu ta gwaɗa mna yu, ka kwalaghutá tsi ta maga slna nda tsi katsi, iʼi a dzaʼa tsa guma ta ghəŋa ni wu, kabga sa a yu ta ghəŋa haɗik ŋa tsa guma wu, sasa yu ŋa mba mnduha ta ghəŋa haɗik. 48Mndu ta vziɗta ka kwalaghutá tsi ta zlghaftá gwaɗa ɗa, dzaʼa tsanagha tsa lu ta guma. Tsa gwaɗaha gwaɗa yu ya dzaʼa tsanaghatá guma baɗu kɗakwa ghəŋa haɗik. 49Iʼi ná, gaghəŋ gaghəŋa ɗa a ta gwaɗa yu ta gwaɗa wa. Tsa Da ta ghunigihata ya ta mnihatá gwaɗa ŋa gwaɗay ɗa, nda ya ŋa ta taghay ɗa ŋa mnduha. 50Nda sna yu kazlay: Skwi ta mnə tsi ná, ta vlay ta hafu ŋa kɗekedzeŋ kəʼa. Inda skwiha ta mnə yu ná, manda va skwi mniha Da ɗa ta mna yu, » kaʼa.

Currently Selected:

Yuh 12: xed

Highlight

Copy