Yuh 13

Mbazanata Yesu ta səla duhwalha ni

1Ta kɗavakta fitik lu, ga mahtsima ni dzaʼa skala lu ta skala *Pak. Nda sna *Yesu kazlay: Sagha sa fitik dzaʼa kəl tsi ka zlanatá na ghəŋa haɗik na, ka laghu da Da kəʼa. Ɗvu ɗva tsatsi ta gwal ta zlghafta ma na ghəŋa haɗik na, haɗ kɗavakta ɗvuta ni ta həŋ wa. 2Ka zə Yesu ta skwa zay nda duhwalha ni ga hawu. Nziya nza tsi, ghada ghada halaway ta hbutá Zudas zwaŋa Simuŋ Iskaryut ŋa skwaptá Yesu. 3Nda sna Yesu ka ghəŋa ni kazlay: Sa daga da Lazglafta yu, dzaʼa vru da Lazglafta yu kəʼa. Nda sna guli kazlay: Fanam fa Lazglafta ta inda skwi ma dzva ni kəʼa. 4Ka sliʼavatá tsi ma tsa vla za skwi ya, ka suɗatá tsi ta lguta ni, ka klaftá tsi ta ira gwada ka hbivta misti. 5Ka tamtá tsi ta imi ma glifiŋ, ka mbambazə tsi ta səla duhwalha ni. Ka ta takaɗ tsi nda tsa ira gwada hbiv tsi misti ya kay. 6Ka lagha tsi ta Simuŋ *Piyer. Ka Simuŋ Piyer mantsa: « Mghama ɗa! Kagha ná, ŋa mbaza səla ɗa! » kaʼa nda tsi. 7« Ta kɗa a snaŋta gha ta na skwi ta mag yu na karaku wu, dzaʼa nda sna ka dazlay, » ka Yesu nda tsi. 8« Kadzeŋkadzeŋ, haɗ ka ta walaŋtá mbaza səla ɗa wu, » ka Piyer nda tsi. « Ka mbazagha a yu ta səla gha wu, haɗ ima gha ma iʼi wu, » ka Yesu nda tsi. 9Kaʼa mantsa: « Mghama ɗa! Səlaha ɗa kweŋkweŋ a dzaʼa ka mbazihata tama wu, nda dzvuha ɗa nda ghəŋa ɗa tani, » ka Simuŋ Piyer nda tsi. 10Ka Yesu mantsa: « Ka nda mbazambaza mndu, haɗ ta zbəgəltá mbaza wa. Ba səlaha kweŋkweŋ dzaʼa mbambazanaghuta tsi, kabga tsuweɗaka vgha ni. Tsuweɗaka vgha ghuni, tsaw kaghuni demdem a wu, » ka Yesu nda tsi. 11Nda sna Yesu ta mndu dzaʼa skwapta, tsaya kəl tsi ka mnay kazlay: Kaghuni demdem a tsuweɗaka wu kəʼa ya.

12Tahula mbambazanatani ta səlaha taŋ, ka suɗglavatá tsi ta lguta ni, ka nzəgladatá ka zəgəltá skwi. Kaʼa nda həŋ mantsa: « Nda sna kuni ta tsa skwi mag yu ŋa ghuni ya ra? 13“Mndu ta tagha skwi” ŋa ŋni ka, “mghama ŋni” ka, ka kuni ta hga iʼi. Ta ŋa ghuni tsaya, manda va tsaya yu. 14Ka si iʼi ta nzakway ka mgham, mndu ta tagha skwi ŋa mndu, mbaza ghuna mbaza yu ta səla ya ní, kaghuni guli ŋa mbazay ghuni mantsa ta ŋa sani nda sani. 15Maraghunatá tsaya maraghuna yu, ŋa magay kaghuni guli manda tsa magaghuna yu ya. 16Kahwathwata ka yu ta mnaghunata, haɗ kwalva ta malaghutá mghama ni wu, haɗ mnda ghunay guli ta malaghutá mndu taghunafta wa. 17Ka nda sna kuni ta tsaya, dzaʼa rfu kuni kata magay kuni ta slna nda tsi. 18Nda kaghuni demdem a ta gwaɗa yu ta tsa gwaɗa ya wu, nda sna yu ta gwal zabap yu. Tsa gwaɗa nda vinda ma defteri ya ná, ɗina ka magata ni mantsa. “Mndu ta zə ŋni ta skwa zay kawadaga nda tsi ta liɗista.#13:18 Ngha ta Zabura 41:10.” 19Ka yu ta mnaghunata daga ndanana ma kɗaku skwi ka slata. Mantsa tama ka sla sla skwi ya, ŋa zlghafta ghuni kazlay: “Iʼi ná, iʼi ya” kəʼa. 20Kahwathwata ka yu ta mnaghunata, ka tsuʼaf tsuʼa mndu ta mndu dzaʼa ghunafta yu katsi ná, iʼi tsuʼaf tsi. Ka tsuʼaf tsuʼa tsi ta iʼi, tsuʼaf tsuʼa guli ta mndu ta ghunigihata, » kaʼa.

Sliʼa Zudas skwaptá Yesu

Mat 26:20-25, Mak 14:17-21, Luk 22:21-23

21Tahula kɗiŋta *Yesu ta mana tsa gwaɗaha ya, ka ghudzavaftá ŋuɗufa ni, kaʼa mantsa: « Kahwathwata ka yu ta mnaghunata, mamu sani ma kaghuni dzaʼa skwaptá iʼi, » kaʼa mnanaŋta həŋ baz. 22Ghur ghur ghur, ka duhwalha ni ka nanagha vgha taŋ. Sew sna a həŋ ka ta wa ta mna tsi wa. 23Tsaw sani turtuk mataba duhwalha ni, tsa ta mamə Yesu ya, ta vata Yesu nzanavata tsi. 24« Wa na mndu ta gwaɗ ka ta ghəŋa ni na na? ka ka ɗawaŋta da tsi ɓa? » ka Simuŋ *Piyer nda tsi nda dzvu. 25Mantsa ya tama, « Wa ya ní mghama ɗa, » ka tsa duhwal ya fadaghatá ghəŋ da ghuva Yesu ka ɗaway. 26Ka Yesu mantsa: « Tsa mndu dzaʼa niʼagafta yu ta ndurzla ɗafa ka vlaŋta ya ná, va ni tsaya, » kaʼa nda tsi. Ka niʼagaftá tsi ta ndurzla ɗafa ka vlaŋtá Zudas zwaŋa Simuŋ Iskaryut. 27Na gi tsa zlghafta Zudas ta tsa ndurzla ɗafa ya, gi lama halaway dida tsa. « Maga misimmisim ta skwi ta kum ka ta magay, » ka Yesu nda tsi. 28Haɗ mndu dər ka turtuk mataba tsa gwal ta nzata ka za skwi ya nda sna ka kabgawu kəl tsi ka mnay ŋa ni mantsa wa. 29Zlah la skwaktá skwi ŋa za skalu, ka la valaŋtá skwi ta gwal ka pɗu a ka Yesu nda tsi, ka sanlaha ta ndanay, kabga da Zudas zliba tska skwa taŋ. 30Na zlghafta Zudas ta tsa ndurzla ɗafa ya, ka gi sab tsi dzibil. Rviɗik vli ta tsa luwa ya.

Ɗvuwa ɗva ta vgha ghuni

31Tahula saghwa Zudas dzibil, ka *Yesu mantsa: « Ndanana ŋlanafta lu ta *Zwaŋa mndu. Ka ŋlanaftá lu ta Lazglafta guli nda ma tsatsi. 32Ka nda ma tsatsi zlagigiŋta Lazglafta ta glakwa ni ya, dzaʼa marigiŋ mara ma vərɗa tsatsi ta glakwa zwaŋ guli, dzaʼa gi magay ndana ndana. 33Zwana ɗa, ta ɓats yeya nzɗa ɗa kawadaga nda kaghuni, dzaʼa zbay kuni ta iʼi. Manda va ya mnana yu ta la *Yahuda kazlay: Laviŋ a kuni ta ɓhata ma vli ta dzaʼa yu wu kəʼa ya, manda tsaya ta mnaghunaŋta yu ta kaghuni guli ndana. 34Wana lfiɗa zlahu ta vlaghunata yu. Ɗvuwa ɗva ta vgha ghuni sani nda sani. Manda va ya ɗvu iʼi ta kaghuni ya, ɗvuwa ɗva kaghuni guli ta vgha ghuni sani nda sani. 35Ka ta ɗvu ɗva kuni ta vgha ghuni sani nda sani katsi, ta tsaya dzaʼa snaŋta mnduha kazlay: Duhwalha ɗa kuni kəʼa, » kaʼa.

Mnay Yesu ta krughuva Piyer

Mat 26:31-35, Mak 14:27-31, Luk 22:31-34

36Ka *Piyer mantsa: « Mghama ɗa! dzaʼa diga ka na? » kaʼa nda tsi. « Laviŋ a ka ta ɓhata da tsa vli ta dzaʼa yu ya ndanana wu, dazlay ya, dzaʼa ɓhaɓha ka mista ɗa, » ka *Yesu nda tsi. 37Ka Piyer mantsa: « Mghama ɗa! kabgawu dzaʼa kwal yu laviŋtá ɓhata mista gha ndanana? Dər ŋa dzatá iʼi tsi, fa fa yu ta vgha ɗa ka ŋa gha, » kaʼa nda tsi. 38Ka Yesu mantsa: « Va kahwathwata, fa fa ka ta vgha gha ŋa ɗa ra? Kahwathwata ka yu ta mnaghata, ma kɗaku vazak wahata ná, hkən səla dzaʼa mnata ka kazlay: Sna a yu ta na mndu na wu, kəʼa nda iʼi, » kaʼa.

Currently Selected:

Yuh 13: xed

Highlight

Copy