Yuh 18

Ksafta sludziha ta Yesu

Mat 26:47-56, Mak 14:43-50, Luk 22:47-53

1Tahula kɗiŋta *Yesu ta tsa gwaɗaha ya, ka sliʼaftá tsi nda duhwalha ni ka laghwi ta ɓla lika Sedruŋ. Mamu sana kwambalu mantsa vli ya, ka lam tsi dida kawadaga nda həŋ. 2Nda sna tsa Zudas ta dzaʼa skwapta ya guli ta tsa vli ya, kabga snu sna Yesu ta lagha da tsa vli ya kawadaga nda həŋ. 3Ka hlanaftá la mali ta ghəŋa gwal dra skwi ŋa Lazglafta, nda la *Farisa ta sludziha, nda gwal ta ngha həga Lazglafta, ta Zudas. Ka sliʼaftá həŋ nda huzla vulu nda huzla vulu, nda pelapela nda pelapela, nda pinatá vu nda pinatá vu. Ka lagha həŋ da tsa gam ya. 4Manda ya nda sna Yesu ta skwi dzaʼa slanaghata, ka sliʼaftá tsi da gəma həŋ. Kaʼa mantsa: « Wa ta zbə kuni na? » kaʼa nda həŋ. 5Ka həŋ mantsa: « Yesu mnda la Nazaret ya ta zbə ŋni, » ka həŋ nda tsi. « Iʼi nana, » kaʼa nda həŋ. Ta sladu tsa Zudas ta dzaʼa skwapta ya kay ta vata həŋ. 6Na tsa mnay Yesu nda həŋ kazlay: Iʼi nana kəʼa ya, dəm turtuk ka həŋ vraghuta nda ga muhul hul, ka zlambutá həŋ siy ta haɗik. 7« Wa ta zbə kuni ka kuni ka na? » kaʼa ɗawglaŋta da həŋ. « Yesu mnda la Nazaret ya ta zbə ŋni, » ka həŋ. 8« Va ɗa nana a ka yu nda kaghuni kay ra! Ka si iʼi ta zbə kuni ya ní, zlanawa nanaha na tsa, ka laghwa hahəŋ, » ka Yesu nda həŋ.

9Kəl tsi ka mnay mantsa ya ná, ŋa nzakwa ni manda va tsa gwaɗa mnə tsi kazlay: Haɗ ya dər turtuk zaɗanaghu yu mataba gwal ya vliha ka wu kəʼa ya, ya. 10Mamu kafay da Simuŋ *Piyer, ka tsəhagaptá tsi ka tsanamtá sani ma kwalva mali ta ghəŋa gwal dra skwi ŋa Lazglafta, ka tsaghutá sləməŋa ni nda ga zeghwi. Malkus hga tsa kwalva ya. 11Ka Yesu mantsa: « Vranam vra ta kafaya gha da kupaka ni. Ra a ka say ɗa ta leghwa ghuya ɗaŋwa ya vliha Da ɗa wu ka ka rki na? » kaʼa nda Piyer.

Kladaghata la sludzi ta Yesu da Hana

12Lagha tsa tskatá sludziha ya nda mghamha taŋ tani, nda la *Yahuda ta ngha həga Lazglafta ya, ka ksaftá *Yesu, ka habaghutá həŋ ta dzvuha ni. 13Ka klaghatá karaku da *Hana ta nzakway ka dzidza *Kayifa. Tsa Kayifa ya ta nzakway ka mali ta ghəŋa gwal dra skwi ŋa Lazglafta ma tsa vaku ya. 14Tsa Kayifa ya tsa ta vlaŋtá hiɗaku ta la Yahuda kazlay: Draŋ mtuta mndu turtuk da mnaka mnduha, ka ya da zaɗanata lu ta inda mndəra mndu#18:14 Ngha ta Yuhwana 11:49. kəʼa ya kay.

Duhwala Yesu a yu wu, ka Piyer

Mat 26:69-70, Mak 14:66-68, Luk 22:55-57

15Ka sliʼaftá i *Piyer nda sna duhwal, ka dzaʼa ta hula *Yesu ta hula Yesu. Tsa sana duhwal ya ná, nda sna tsa mali ta ghəŋa gwal dra skwi ŋa Lazglafta ya. Ka lam tsi mista Yesu da daɓi ma huɗa həga ga tsa mali ta ghəŋa gwal dra skwi ŋa Lazglafta ya, 16ta sladaghutá Piyer mabli ta wa tgha. Ka vragaptá va tsa duhwal snaŋ mali ta ghəŋa gwal dra skwi ŋa Lazglafta ya, da gwaɗganatá tsa marakw ta ngha wa tgha ya. Ka hgadamtá tsi ta Piyer. 17Kaʼa nda tsi mantsa: « Tekw a kagha mataba duhwalha tsəna mndu na guli wu ri? » ka tsa marakw ka kwalva ta ngha wa tgha ya nda Piyer. « Tekw a iʼi mataba taŋ wu, » ka Piyer.

18Ka vanaghatá kwalvaha nda gwal ta ngha həga Lazglafta ta vu, ka slinə həŋ, kabga mtasl vli. Ka lagha Piyer guli da slinganatá həŋ.

Ɗaway Hana ta gwaɗa da Yesu

Mat 26:59-66, Mak 14:55-64, Luk 22:66-71

19Kaʼa nda tsi mantsa: « I wa duhwalha gha na? Nahgani ta tagh ka ŋa mnduha na? » ka tsa mali ta ghəŋa gwal dra skwi ŋa Lazglafta ya, nda *Yesu. 20Ka Yesu nda tsi mantsa: « Baŋluwa si ta mna yu ta gwaɗa ŋa inda mndu ma həga tagha skwa la *Yahuda nda ya ma həga Lazglafta. Ma vli ta tskavata inda la Yahuda si ta gɗata yu ta tagha skwiha. Haɗ sana skwi mna yu kɗekkɗek wa. 21Kabgawu ta kəl kagha ka ɗaway da iʼi na? Ɗawa da gwal si ta sna tsa skwi ta mnə yu ŋa taŋ ya ɓa. Nda sna hahəŋ ɗina ɗina ta skwi mnana yu ta həŋ, » kaʼa nda tsi. 22Na tsa mnata Yesu mantsa ya, ka sliʼaftá sani mataba tsa gwal ta ngha həga Lazglafta ya, ka lagha dgharuŋtá Yesu. « Mantsa ta zlgha ka ta wi ŋa mali ta ghəŋa gwal dra skwi ŋa Lazglafta ra? » kaʼa nda tsi. 23Ka Yesu mantsa: « Ka mamu ghwaɗaka skwi mna yu ya kay, mnamaŋmna. Ala ka si tɗukwa gwaɗa mna yu, kabgawu ta kəl lu ka dza iʼi na? » kaʼa nda tsi. 24Ka ghunaftá *Hana nda va tsa habatá dzvuha ni ya da tsa *Kayifa ta nzakway ka mali ta ghəŋa gwal dra skwi ŋa Lazglafta ya.

Duhwala Yesu a yu wu, ka Piyer kay guli

Mat 26:71-75, Mak 14:69-72, Luk 22:58-62

25Ma tsa fitik ya, hada Simuŋ *Piyer ta slinutá vwa ni. « Tekw a kagha mataba duhwalha tsəna mndu na guli wu ri? » ka lu nda tsi. « Siga! haɗ iʼi mataba taŋ wu, » ka Piyer ka waɗutá vli. 26« Ngha a yu ta kagha kawadaga nda tsəna mndu na ma gam ra? » ka sani mataba kwalvaha tsa mali ta ghəŋa gwal dra skwi ŋa Lazglafta ya. Tsatsi ná, la taŋ ma tsa mndu tsanaghu Piyer ta sləməŋa ni ya, ya. 27« Siga yu, iʼi a wu! » ka Piyer ka waɗutá vli kay guli. Ka gi wahatá vazak.

Ɗaway Pilat ta gwaɗa da Yesu

Mat 27:1-2, 11-14, Mak 15:1-5, Luk 23:1-5

28Ga sərɗək, ka klaftá həŋ ta *Yesu ga *Kayifa, ka klaghata da həga dagala ga ŋumna la Ruma. Lam a vərɗa hahəŋ da tsa həga ya wu, da ŋəriŋtá həŋ ta vgha taŋ makəɗ həŋ ka za skala *Pak. 29Tsaya kəl Pilat ŋumna la Ruma ka sabi dzibil da slanaghatá həŋ. Kaʼa nda həŋ mantsa: « Nu va ghwaɗaka skwi maga na mndu na ka kuni ka na? » kaʼa. 30Ka həŋ mantsa: « Ka má nza a tsi ka mndu ta magatá dmaku wu katsi ná, má klaghak a ŋni wu, » ka həŋ nda tsi. 31« Klawa kla va kaghuni, ka dzaʼa kuni da tsanaghatá guma manda ya mna zlaha ghuni, » ka Pilat nda həŋ ta ghəŋa ni. « Vlaŋna a lu ta tva dzatá mndu wu, » ka la *Yahuda zlghanaftá wa ni.

32Mantsa ya dzaʼa magakwa skwiha na ya gwaɗ Yesu ta ghəŋa ni kəʼa dzaʼa mtaku ya. 33Ka vraghatá Pilat da daɓa həga, ka hgadamtá tsi ta Yesu. « Mghama la Yahuda kagha ra? » kaʼa ɗawaŋta da tsi. 34Ka Yesu mantsa: « Kagha ta ndanapta ma ghəŋa gha re, ari sanlaha a ta mnaghatá iʼi na? » kaʼa nda tsi. 35« Iʼi! La Yahuda yu ra? La ghuni, nda maliha ta ghəŋa gwal dra skwi ŋa Lazglafta ta klaktá kagha da iʼi, nahgani maga ka ya katək na? » ka Pilat nda tsi. 36Ka Yesu mantsa: « Ga mghama ɗa ná, ŋa na ghəŋa haɗik na a wa. Ka má ŋa na ghəŋa haɗik na tsi katsi, má lma lma kwalvaha ɗa, má ŋa kwala lu kladaghatá iʼi da gwal dagala dagala mataba la Yahuda. Tsaw ŋa na ghəŋa haɗik na a ga mghama ɗa wu, » ka Yesu. 37« Tsaw va mgham kagha rke? » ka Pilat nda tsi. « Manda va tsa mna ka ya, Mgham yu. Yaya lu ta iʼi ŋa sagha mnaŋtá kahwathwata ma na ghəŋa haɗik na. Inda mndu ta nzakway ka ŋa kahwathwata ná, ta snay ta gwaɗa ɗa, » ka Yesu. 38« Nahgani kahwathwata na? » ka Pilat nda tsi.

Guma dzatá Yesu

Mat 27:15-31, Mak 15:6-20, Luk 23:13-25

Tahula tsa, ka səglap tsi dzibil slanaghatá la Yahuda. Kaʼa mantsa: « Slanagha a yu ta skwi prək ŋa dzatá tsəna mndu na wa. 39Ya wya ta snu sna yu ta gɗata ta zlighunistá mndu turtuk ma gamak ma fitika skala *Pak ya, ta kumay kuni ta slighunista ɗa ta mghama la *Yahuda ra? » kaʼa nda həŋ. 40Ka həŋ mantsa: « Tsatsi a ŋa zliŋta wa, Barabas katsi, » ka həŋ hləglaftawi. Tsaw tsa Barabas ya ná, gənda ya.

Currently Selected:

Yuh 18: xed

Highlight

Copy