Yuh 21

Maraŋta Yesu ta ghəŋa ni da duhwalha ni

1Tsəɓakw fitik tahula tsa, ka marglavatá *Yesu da duhwalha ni ta wa drəfa Tiberyad. Wya kəʼa maravata: 2Ta nzaku i Simuŋ *Piyer nda Tuma ta hgə lu ka mbuhwali ya, nda Natanayel mnda luwa la Kana ta haɗika Galili, nda zwana Zebedi, nda sanlaha ma duhwalha ni his, ka skwa turtuk. 3« Dzaʼa tuma klipa ɗa yu, » ka Simuŋ Piyer nda həŋ. « Nda sliʼa aŋni mista gha guli, » ka hahəŋ guli nda tsi. Ka sliʼaftá həŋ ka laghu, ka lam həŋ da kwambalu. Kurzliŋ hana taŋ ndiri baɗu tsa, ksaf a həŋ ta klipi dər ka turtuk wa. 4Tsaɗakwa vli ga sərɗək, ka lagha Yesu sladata ta wa tsa drəf ya. Tsəmaf a duhwalha ni kazlay: Tsatsi ya kəʼa wa. 5« Mamu klipi ksaf kuni ri zwani? » ka Yesu nda həŋ. « Haɗ wu, » ka həŋ nda tsi. 6« Wuɗadawa kadəŋa ghuni ta slərpa kwambalu nda ga zeghwi ya, dzaʼa mutsay kuni, » kaʼa nda həŋ. Ka wuɗadatá həŋ. Ka traptá həŋ ta tɗagafta kabga ndəghata ni nda klipi. 7« Mgham Yesu ya tane, ka tsa duhwal ta ɗvu Yesu ya, » nda Piyer. Na tsa gi snaŋta Simuŋ Piyer kazlay: Mgham Yesu ya kəʼa ya, ka favatá tsi ta lguta ni kabga si suɗiŋsuɗa ka tuma klipi, ka vzadatá tsi ta vgha da drəf. 8Ka vragaghutá tsa sanlaha ma tsa duhwalha ya ma kwambalu, nda tɗa tsa kadəŋ nda ndəghata ni nda klipi ya. Si diʼiŋaghu a həŋ katakata wa. Ka mitər dərmək yeya ri kaki nzakwa taŋ nda wa sgam. 9Ta sliʼagaptá həŋ ma kwambalu, kəʼa ka həŋ ná, mamu tsatá vu hada nda klipi tida nda buradi. 10« Kligiswakla ta tsa klipiha kasaf kuni ya, » ka Yesu nda həŋ. 11Ka lam Simuŋ Piyer da kwambalu, ka tɗagaptá tsi dzibil ta tsa kadəŋ nda ndəghata ni nda klipi ɓərzləzla ya. Dərmək nda hutaf mbsak hkən mida gwagwata ni. Kulam nda va tsa nzakwa ni mantsa ya ná, ratsanap a ta tsa kadəŋ ya wa. 12« Sawa da za skwa zay! » ka Yesu nda həŋ. Haɗ ya mataba tsa duhwalha ya ta walaŋtá ɗawaŋta kazlay: Wa kagha na kəʼa wu, kabga nda sna həŋ kazlay: Mgham Yesu ya kəʼa. 13Ka lagha Yesu klaftá tsa buradi ya, ka daganaftá həŋ, daganafha ta klipi ta həŋ guli. 14Mahkəna maravata Yesu tsaya da duhwalha ni manda sliʼagaptani nda hafu mataba gwal nda rwa.

I Yesu nda Piyer

15Tahula zuta taŋ ta skwa zay, ka *Yesu mantsa: « Simuŋ zwaŋa Yuhwana! Ɗvu ɗva ka ta iʼi, ka malaghutá ŋa nanaha na ra? » kaʼa ɗawaŋta da Simuŋ *Piyer. « Aŋi Mghama ɗa, nda sna kagha kazlay: Ta ɗvay yu ta kagha kəʼa, » kaʼa zlghanaftá wa ni. « Ka ngha ka ta zwana tuwakha ɗa, » ka Yesu nda tsi. 16« Simuŋ zwaŋa Yuhwana! Ɗvu ɗva ka ta iʼi? » ka Yesu nda tsi ka mahis. « Aŋi Mghama ɗa! Nda sna kagha kazlay: Ta ɗvay yu ta kagha » kəʼa, ka Piyer nda tsi. « Ka ngha ka ta tuwakha ɗa, » ka Yesu nda tsi. 17« Simuŋ zwaŋa Yuhwana! Ta ɗvay ka ta iʼi? » kaʼa nda tsi ka mahkən. Ka kuzlanaftá tsi ta Piyer ta ŋuɗuf na tsa ɗaway Yesu ka mahkən kazlay: Ta ɗvay ka ta iʼi ra kəʼa ya. « Mghama ɗa, nda sna kagha ta inda skwi, nda sna kagha guli kazlay: Ta ɗvay yu ta kagha kəʼa, » kaʼa nda tsi. « Ka ngha ka ta tuwakha ɗa, » ka Yesu nda tsi. 18« Kahwathwata ka yu ta mnaghata, ma fitika nzakwa gha ka duhwal, kagha ka ghəŋa gha ta hba ɓanava gha misti, ka dzaʼa gha da vli ta kum ka. Ka hwaluhwala ka, dzaʼa pgha pgha ka ta dzvuha gha ŋa nzɗaghafta sana mndu ta ɓanava gha, ka kla kagha da vli kul kum ka ta dzaʼa, » kaʼa. 19Tsa gwaɗaha mnə tsi ya, tvi ka Piyer dzaʼa mtaku ŋa vla glaku ŋa Lazglafta ya mnə tsi. « Mbaɗa mista ɗa, » kaʼa nda tsi tahula tsa.

I Yesu nda sana duhwal ya ɗvu tsi

20Kəʼa ka *Piyer mbəɗavata ná, ta sagha sa tsa duhwal ɗvu *Yesu ya mista taŋ. Tsatsi tsa duhwal ta fadaghatá ghəŋ da ghuva Yesu, ma fitika nzata taŋ ka za skwa zay, ka ɗaw tsi kazlay: Mghama ɗa! Wa va na mndu dzaʼa skwaptá kagha na na? kəʼa yeya. 21« A ki na duhwal na tama Mghama ɗa, nahgani dzaʼa slanaghatá tsatsi? » ka Simuŋ Piyer nda Yesu, nghər tsi ta sagha tsa duhwal ya. 22« Ka nza nza nda hafu ha ka vrakta ɗa, ka yu nda tsi ní, nu ta nghaghata mida na? Sliʼa kagha mista ɗa ŋa gha ɓa, » ka Yesu nda tsi. 23Ka tutá tsa gwaɗa ya mataba gwal zlghay nda ŋuɗuf kazlay: Mtəta a tsa duhwal ya wu kəʼa. Mtəta a wa a mna Yesu ŋa Piyer wa. Wya kəʼa mnay: « Ka nza nza nda hafu ta vragatá yu, a ka ka yu nda tsi ní, nu ta nghaghata mida na » kəʼa skwi mna tsi.

24Va na duhwal ta mna na gwaɗaha na ta vindafta. Nda sna mu guli kazlay: Kahwathwata gwaɗa ni kəʼa.

Dzatá ghəŋa gwaɗa

25Nda ndəgha sanlaha ma skwiha magəgla *Yesu. Ka má ka vivindaf vivinda lu ta inda ni ká lu katsi ná, graf a yu kazlay: Má dzaʼa ŋafŋa ghəŋa haɗik ta tsa defteriha má dzaʼa vivindafta lu ya kəʼa wa.

Currently Selected:

Yuh 21: xed

Highlight

Copy