Yuh 5

Mbanafta Yesu ta sana mndu nda raghwa səla ni

1Tahula tsaya, ka slatá skala la *Yahuda ma Ursalima. Ka laf *Yesu da hada. 2Tsaw ma Ursalima, mamu sana ghwa tsap lu ndusa nda wa tgha saba tuwakha. Betsayda ta hga lu ta tsa ghwa ya nda gwaɗa *Hebru. Ta wa tsa ghwa ya mamu glakamha hutaf. 3Ma tsa glakamha ya, mamu ndəghata gwal kul ɗughwanaku mida, manda gwal nda ghulpa, nda gwal ta dzəgiɗi, nda gwal nda rwa səla taŋ nda dzva taŋ ta kəzla gigɗavata imi. 4Tsaw ta sasa duhwala Lazglafta tazlay da tsa imi ya ŋa gigɗanafta. Ka gigɗavafgigɗa tsa imi ya, ka tiŋəl wa ta gi laha dida tahula gigɗavaftani ya, nda mba tsa mndu ya dər kinawu tsa ɗaŋwa ni ya. 5Hkən mbsak tghas mida vakwa sana mndu ma ɗaŋwa ni ta nzaku hada. 6Kəʼa ka Yesu ná, ta hani tsa mndu ya. Nda sna guli kazlay: Nda kɗa fitika ni ta ɓasa tsa ɗaŋwa ya kəʼa. « Ta kumay ka ta mbafta gha ra? » kaʼa nda tsi. 7« Mghama ɗa! Haɗ mnda ɗa ŋa fadihata da imi gigɗavafər tsi wa. Ka dzaʼa yu, ka yu ya ná, gi tiŋlaghuta sani ta laha ka iʼi, » ka tsa mndu kul ɗughwanaku ya nda tsi. 8« Sliʼaf sliʼa gha kla ta skwa hana gha, ka sliʼa ka, » ka Yesu nda tsi. 9Gi hada hada ka mbaftá tsa mndu ya, sləŋaɗ klaftá skwa hana ni, ka sliʼi. Tsaw, baɗu *Sabat magakwa tsa skwi ya. 10Ka la mali ma la Yahuda nda tsa mndu mbanaf lu ya mantsa: « Sabat a vli gita kay ra? Wa ta mnaghatá kla skwa hana gha na? » ka həŋ. 11« “Kla ta skwa hana gha, ka sliʼa ka” ka tsa mndu ta mbaɗifta ya nda iʼi, » kaʼa nda həŋ. 12« Wa tsa mndu ta mnaghata kazlay: Kla ta skwa hana gha ka sliʼa ka kəʼa ya na? » ka həŋ ɗawaŋta da tsi. 13Tsaw sna a tsa mndu mbanaf lu ya ta tsa mndu ta mbanafta ya wu, kabga zaɗamzaɗa Yesu mataba tskata mnduha ma tsa vli ya. 14Ɓats nzɗa, ka guyaftá Yesu ta vgha nda tsa mndu ya ma daɓa həga Lazglafta. « Wana nda mba ka ndana tama, yaha ka walglaŋta maga dmaku da slaghaghatá ya katakata ta malaghutá tsaya, » ka Yesu nda tsi. 15Ka sliʼaftá tsa mndu ya, ka laghu da mnay ŋa la mali ma la Yahuda kazlay: Yesu tsa mndu ta mbiɗifta ya kay kəʼa. 16Tsaya kəl la mali ma la Yahuda ka zba htsiŋa Yesu, kabga magata ni ta tsa skwi ya baɗu Sabat.

17Ka Yesu nda həŋ mantsa: « Tata maga slna Da ɗa kulam ndanana, mantsa iʼi guli, tata maga slna yu kulam ndanana, » kaʼa. 18Ta ghəŋa tsa gwaɗa gwaɗa tsi ya, ka zbəgəlta la mali mataba la Yahuda ta Yesu ŋa dzata. Ta ghəŋa vəl ɓlanapta ni ta zlaha Sabat kweŋkweŋ a ta zba həŋ wu, kabga mnay ni kazlay: Vərɗa Lazglafta na Da ɗa kəʼa ta gra ghəŋa ni nda Lazglafta guli ya.

Vlaŋta da ni ta inda mbrakwa ni ta zwaŋa ni

19Ka *Yesu vrəgliŋtá gwaɗa ni nda həŋ mantsa: « Kahwathwata ka yu ta mnaghunata, laviŋ a zwaŋ ta magatá skwi gaghəŋ gaghəŋani, ka ngha a tsi ta skwi ta mag Da wa. Ka kinawu ta maga Da ta inda skwi ya, ka gragra mantsa ya ta maga zwaŋ guli. 20Ta ɗvay Da ta zwaŋ. Tsaya ta kəl tsi ka maranaŋtá inda skwi ta mag tsi, ŋa maranaŋta ni ta slnaha ta malaghutá nana, kada nghaŋta kuni ta skwa ndərmimay. 21Manda ya ta sliʼaganapta Da ta gwal nda rwa nda hafu ya, mantsa ya ta vlaŋta zwaŋ ta hafu ŋa mndu ta kum tsi. 22Tsa a Da ta guma ta ghəŋa mndu wu, ma dzva zwaŋ fanamta tsi ta inda guma ŋa gumay, 23kada vla inda mndu ta glaku ŋa zwaŋ, manda ya ta vlə həŋ ta glaku ŋa Da ya. Ka vla a mndu ta glaku ŋa zwaŋ wu katsi, haɗ tsa mndu ya ta vla glaku ŋa Da ta ghunagatá tsa zwaŋ ya wa.

24« Kahwathwata ka yu ta mnaghunata, mndu ta sna gwaɗa ɗa, ka zlghaftá tsi ta mndu ta ghunigihata, mamu hafu ŋa kɗekedzeŋ ma tsa mndu ya. Haɗ lu dzaʼa tsanaghatá guma ta tsa mndu ya wa. Nda ghada *Pak tsa mndu ya ta mtaku ka laghu da hafu. 25Kahwathwata ka yu ta mnaghunata, dzaʼa sagha sa fitik, nda ghada va sagha ni, dzaʼa kəl gwal nda rwa ka snaŋtá lwa Zwaŋa Lazglafta. Tsa gwal dzaʼa snaŋta ya dzaʼa nzakway nda hafu. 26Manda ɗaslakwa hafu ta nzaku ma Da ya, manda tsaya vlaŋta tsi ta zwaŋ ŋa mutsakwa hafu ma tsatsi guli. 27Ka vlaŋtá tsi ta mbrakwa tsa guma, kabga nzakwa ni ka *Zwaŋa mndu. 28Tsaya a skwi ŋa ndərmimay ghuni wu, dzaʼa sagha sa fitik dzaʼa kəl inda gwal ma kulu ka snaŋtá lwa ni 29ŋa sliʼagapta taŋ. Gwal ta maga skwi ɗina ya, dzaʼa sliʼagapta ŋa nzata nda hafu hahəŋ. Gwal ta maga skwi kul ɗinaku ya guli, dzaʼa sliʼagapta ŋa tsanaghatá guma ta həŋ hahəŋ. »

Nzakwa Zwaŋ ka masləmtsək

30Ka *Yesu mantsa: « Haɗ sana skwi dzaʼa magata iʼi gaghəŋ gaghəŋa ɗa wa. Manda ya mniha Lazglafta ta tsa yu ta guma. Nda tva ni ta tsa yu ta guma kabga zba a yu ta skwi ta kum ghəŋa ɗa wu, skwi ta zɗəganatá mndu ta ghunigihata ta zbə yu.

31« Ka iʼi katsi mnatá gwaɗa ta ghəŋa ɗa katsi ná, haɗ ghəzliwa tsa gwaɗa ɗa ya nda tsa wa. 32Ka sana mndu katsi mna gwaɗa ta ghəŋa iʼi katsi, nda sna yu kazlay: Tsa gwaɗa ta mnə tsi ta ghəŋa iʼi ya ná, kahwathwata nzakwa ni kəʼa. 33Ghunaf ghuna kuni ta mnduha da Yuhwana ka mnaghunatá tsi ta kahwathwata. 34Iʼi taɗa ná, zbaŋ a yu ta mndu ŋa mna gwaɗa ta ghəŋa ɗa wa. Tsaya kweŋkweŋ mnaghuna yu ŋa mutsay ghuni ta hafu. 35Yuhwana ná, pitirla ta zlghaku ka tsuwaɗaka vli ya. Kumaŋ kuma kuni ta nzəɗavata nda rfu ma tsuwaɗaka ni.

36« Iʼi, mamu ŋa ɗa ma gwaɗa ta ghəŋa ɗa ta malaghutá ŋa Yuhwana. Tsa gwaɗa ya ná, slnaha vliha da ŋa kɗanafta ɗa ta magay ya. Tsa slnaha ta kəɗ yu ta magay ya, ta maraŋta tsiɗiɗ kazlay: Da ya ta ghunigihata kəʼa. 37Tsa Da ta ghunigihata ya, ta mnaŋtá gwaɗa ta ghəŋa ɗa. Aŋ mndani ta walaŋ a kuni ta snaŋtá lwa ni wa. Ta walaŋ a kuni ta nghaŋtá kuma ni guli wa. 38Nza a gwaɗa ni ma ŋuɗufa ghuni wu kabga zlghaf a kuni ta mndu ya ghunaga tsi wa.

39« Ta ndiʼa ndiʼa kuni ka tagha skwi ya nda vinda ma gwaɗa Lazglafta kabga mida dzaʼa mutsa ŋni ta hafu ŋa kɗekedzeŋ ka kuni. Tsa gwaɗa Lazglafta nda vinda ya ná, ta ghəŋa iʼi ta gwaɗa tsi. 40Sew va a kuni ta sagha da iʼi ŋa mutsa vərɗa hafu wa.

41« Da mnda səla a ta mutsa iʼi ta glakwa ɗa wa. 42Tsaw nda sna iʼi ta kaghuni tsiɗiɗ kazlay: Ɗvu a kuni ta Lazglafta wu kəʼa. 43Da ɗa ta ghunigihata, ka kwalaghutá kuni ta tsuʼaftá iʼi. Ka ma sana mndu ta klaftá ghəŋa ni ka ghəŋa ni ka sagha katsi ná, má tsuʼaf tsuʼa kuni. 44Kaghuni gwal ta ɗva glaku da sani nda sani, ka kwalaghutá zba glaku daga da Lazglafta turtukwa ni, waká kuni má dzaʼa zlghafta na?

45« Yaha kuni da uwalay kazlay: Dzaʼa wlay yu ta kaghuni da Lazglafta kəʼa. Tsa Musa faf kaghuni ta ghəŋ tida ya dzaʼa wla kaghuni. 46Ka má zlghaf zlgha kuni ta Musa katsi ná, má zlghaf zlgha kuni ta iʼi guli, kabga vindafta ghəŋa iʼi tsatsi ta gwaɗa. 47Ka si zlghaf a kaghuni ta skwi vindaf tsatsi ya wu ní, waká kuni dzaʼa zlghaftá gwaɗa ɗa na? » kaʼa.

Currently Selected:

Yuh 5: xed

Highlight

Copy