Luk 1

Zlrafta Lukwa ta gwaɗa ni

1Ari ŋərma Tawfilus, nda ndəgha mnduha ta ŋavata ka vinda gwaɗa ta ghəŋa skwiha ta luta mataba ŋni. 2Ka vindaftá həŋ manda va skwi nghaŋ gwal ta nzakway ka masləmtsəka tsa skwi ya, ta nuta ka gwal mna gwaɗa Lazglafta daga taŋtaŋ. 3Ka ŋavatá iʼi guli ka psa snaŋta ɗina ta skwiha ta luta daga taŋtaŋ ŋa vindaghafta nda tva ni a mala ɗa Tawfilus, 4kada snaŋta ka ta kɗavakta vərɗa skwiha mutsaf ka ta tagha skwi ta ghəŋa ni.

I Zakari nda Elizabet

5I Zakari nda Elizabet mantsa tama, ma fitika nzakwa mgham Hiridus ta ga mgham ta haɗika Zudiya, mamu sana mnda dra skwi ŋa Lazglafta, Zakari hga ni mataba mndəra la Aviya mndəra gwal ta dra skwi ŋa Lazglafta. Elizabet hga markwa taŋ ta sabi nda ma mndəra la *Haruna. 6Tɗukwa mndu həŋ his his ta wa ira Lazglafta. Ta snay həŋ ta zlaha Lazglafta nda skwa dzahayha ni, haɗ maslivinza ta ksaŋtá həŋ wa. 7Mutsaf a həŋ ta zwaŋ ɗekɗek wa, kabga ka dzəghəŋ Elizabet, lula ima taŋ guli.

Dzaʼa ŋatsay ka ta zwaŋ, ka duhwala Lazglafta nda Zakari

8Ma sana fitik, ta maga slna tsa dra skwi ya Zakari ta kəma Lazglafta, kabga mbəɗagagha mbəɗa fitik ŋa magay mndəra taŋ ta tsa slna ya, 9ka zbaptá lu nda vindima ta Zakari ŋa lami da həga Lazglafta da dra urdi manda ya snu gwal ta dra skwi ŋa Lazglafta ta magay. 10Magatá tsa fitika dra urdi ya, ka sliʼaftá tsi ka lami da həga Lazglafta da dra tsa urdi ya, ta mag dəmga ta duʼa mabli. 11Má tsa tama, gi ka zlagaptá duhwala Lazglafta ta kəma Zakari, ka sladata nda ga zeghwa tsa gwir ta drə lu ta urdi ya. 12Na gi nghaŋta Zakari, ka ghudzaftá tsi da zləŋ, sraw vgha ni. 13« Ma zləŋ ka ta zləŋ Zakari, wana tsuʼaf tsuʼa Lazglafta ta ndəɓa dzva gha. Dzaʼa yagha ya markwa ghuni Elizabet ta zwaŋa zgun ŋa tsanaftá gha ta hga ni ka Yuhwana, 14dzaʼa rfay ka ta rfu katakata, dagala gwal dzaʼa rfu ta ghəŋa ni guli. 15Ka mndu dagala dzaʼa nzakwa tsi ta kəma Lazglafta. Haɗ dzaʼa sa ima inabi dər skwi ta ghuya mndu wa. Dzaʼa ndəghundəgha nda Sulkum nda ghuɓa daga ma huɗa ma ni. 16Dzaʼa nda ndəgha zwana la Israʼila dzaʼa vranakta tsi da Lazglafta Mghama taŋ. 17Ta kəma ta kəma dzaʼa dzaʼa tsi nda slna ni ta kəma Lazglafta nda Sulkum, nda mbraku manda ŋa Iliya ŋa dzranaftá#1:17 Ngha ta Malatsi 4:6 nzakw mataba dadaha nda zwana taŋ, ŋa vranaktá ghəŋa gwal ta maga ghwaɗaka skwi ka ŋərma mnduha. Mantsa ya dzaʼa payafta#1:17 Ngha ta Malatsi 3:23-24. tsi ta mnduha ŋa fata taŋ ta vgha ŋa Lazglafta, » ka tsa duhwala Lazglafta ya nda tsi. 18« Waká yu dzaʼa snaŋtá skwi mantsa? Wana iʼi halata mndu yu, markwa ini guli nda hala, » ka Zakari nda tsi. 19Ka tsa duhwala Lazglafta ya zlghanaftá wi mantsa: « Iʼi Gabriyel#1:19 Tsaya duhwala Lazglafta ghunaf lu. ya, ta sladu ta kəma Lazglafta ŋa maganatá slna. Tsatsi ta ghunigihata ŋa gwaɗgaghata, ka mnaghatá tsa Lfiɗa Gwaɗa ya. 20Ndana tama, wana ka dzaʼa nuta ka rgha. Laviŋta a ka ta gwaɗa ha ka sagha fitika magata tsa skwiha ya wu, kabga zlghaf a ka ta tsa skwi dzaʼa magaku ma fitika ni mna gha yu ya wu, » kaʼa.

21Ta nzatá mnduha ka kəzla saba Zakari, sew sab a wa. Ka ndanu həŋ ta ndanu: « Nu ta slanaghata ma həga Lazglafta tama? » ka həŋ. 22Manda saba ni, ka traptá tsi ta gwaɗa nda tskata mnduha, gi ka tsatsaftá həŋ kazlay: Mamu mazəmzəm ta slanaghata ma həga Lazglafta kəʼa. Laviŋ a ta gwaɗa nda wi nda həŋ wu, mbaɗa ka mnay nda dzvu ŋa taŋ.

23Tahula kɗuta fitika maga slna ni, ka sliʼaftá tsi ka laghu dzagha ni. 24Nzəɗava a tahula tsa wu, ka zlghaftá markwa taŋ Elizabet ta huɗi. Ka zatá Elizabet ta tili hutaf ta ɗifa vgha. Kaʼa mantsa: 25« Zɗakatahuɗi ya magiha Mgham Lazglafta, ka skwa hula si nzakwa ɗa ta kəma mnduha ɗa, kabga ta ya a yu ta zwaŋ wa. Ama ka tawatá Lazglafta ta hiɗahiɗa ta iʼi ndana, ka klaghutá tsa hula ya ta ghəŋa ɗa, » kaʼa.

Dzaʼa ŋatsay ka ta zwaŋ, ka duhwala Lazglafta nda Mari

26Ta mamkuʼ a tila ni, ka ghunaftá Lazglafta ta duhwala ni Gabriyel da sana luwa ta hgu lu ka Nazaret ma haɗika Galili, 27da sana daghali ta hgu lu ka Mari ta dzəgu sana mndu Yusufu hga ni ta sab nda ma mndəra la Dawuda. 28Ka lam tsi slanaghata: « Zgu tsa, tfaghagha tfa Lazglafta ta wi katakata. Kawadaga Mgham Lazglafta nda kagha, » kaʼa nda tsi. 29Kɓanafta tsa gwaɗa ya ta Mari, « nu mndəra nana ma ga zgu tama, » kaʼa ma ghəŋa ni. 30Ka duhwala Lazglafta nda tsi mantsa: « Ma zləŋ ka ta zləŋ Mari, zbap zba Lazglafta ta kagha ka tfaghaghatá wi. 31Wana dzaʼa zlghaf zlgha ka ta huɗi, ŋa yata gha ta zwaŋa zgun, ŋa tsanafta gha ta hga ni ka *Yesu. 32Dzaʼa nzakway ka mndu dagala, dzaʼa hgay lu ka Zwaŋa Lazglafta Dagala ŋa vlaŋta Lazglafta ta ga mgham manda ŋa dzidza ni Dawuda. 33Dzaʼa gay ta mgham ta ghəŋa la Israʼila ŋa kɗekedzeŋ, kɗavakta a tsa ga mghama ni ya wu, » kaʼa. 34Ka Mari nda tsa duhwala Lazglafta ya mantsa: « Kinawu ka skwi dzaʼa magaku mantsa, ya wya ta sna a yu ta zgun wu? » ka Mari. 35« Sulkum nda ghuɓa dzaʼa saha ta ghəŋa gha. Mbrakwa Lazglafta Dagala dzaʼa bukwaghamta. Tsaya dzaʼa kəl lu ka hga tsa zwaŋ nda ghuɓa dzaʼa yata ka ya ka Zwaŋa Lazglafta. 36Ngha a ka ta zba gha Elizabet si kul faftá lu ta ghəŋ ta yay ni ta zwaŋ ná, waʼa nda huɗi ndana, mamkuʼ a tila ni na nda va tsa halata ni ya tani ra. 37Haɗ sana skwi ta tranaghatá Lazglafta wu, » ka duhwala Lazglafta nda tsi. 38Yaw, « kwalva Lazglafta iʼi, ka maga Lazglafta manda ya mniha ka, » ka Mari. Ka sliʼaftá duhwala Lazglafta ta vata ni ka laghwi.

Laghwa Mari nghanaghatá Elizabet

39Ma va tsa fitik ya, ka sliʼaftá Mari misimmisim ka laghwi da sana luwa ta ghwá ma haɗika *Yahuda da nghanaghatá Elizabet. 40Ka lam tsi da həga ga Zakari ka ganaghatá tsi ta zgu ta Elizabet. 41Na gi snaŋta Elizabet ta ga zgwa Mari, gi ka skalavaftá zwaŋ ma huɗa ni. Ka ndəghanaftá Sulkum nda ghuɓa ta Elizabet. 42Ka klaŋtá tsi ta lwi dagala dagala. Kaʼa mantsa: « Kagha, nda tfa wi ta ghəŋa kagha mataba miʼaha. Na zwaŋ ma huɗa gha na guli, nda tfa wi ta ghəŋa ni. 43Waká yu mutsa nana ma zɗaku kəl ma ni ma mghama ɗa ka sagha da ini na? 44Nda sna ka ná, ma fitika lama tsa ga zgwa gha ya tsərah da sləməŋa ɗa, ka skalavaftá na zwaŋ ma huɗa ɗa na da rfu. 45Nda tfa wi ta ghəŋa kagha, kagha ta zlghaftá skwiha mna gha lu ta dzaʼa magaku kahwathwata daga da Mgham Lazglafta ya. »

Fa laha Mari

46Ka Mari mantsa:

« Ta zləzlvay yu ta Lazglafta.

47Ta taku ŋuɗufa ɗa da rfu ta ghəŋa tsatsi mnda mba iʼi,

48kabga ɗvaf ɗva ta nghapta ka kwalva ni nda hta. Wana daga ndana, nda tfa wi ta ghəŋa ni ka inda zivira mnduha dzaʼazlay nda iʼi,

49kabga dagala ŋərma skwiha magiha Lazglafta nda mbra.

Nda ghuɓa həga Lazglafta.

50Tawa hiɗahiɗa ni ná, nda nza ŋa ɗekɗek ta ghəŋa gwal ta zləŋay.

51Nda dzva ni maraŋta tsi ta mbrakwa ni, ka ghəzliŋtá tsi ta gwal ta gla ghəŋ, nda ghərɓaku ma ŋuɗufa taŋ.

52Ka slisliŋwiŋtá tsi ta sanlaha ma gwal dagala dagala ta dughurukwa dasu, ka kapanaftá tsi ta gwal nda hta,

53ka baghanaftá tsi ta gwal ma maya nda skwiha zɗa zɗa, ka ghəzliŋtá tsi ta gwal gadghəl bɗadar.

54Manda ya tanaf tsi ta imi ta sləməŋ ta dzidzíha mu, ka kataŋtá tsi ta la Israʼila mnda maganatá slna,

55ka havaptá tsi ka tawa hiɗahiɗa ni ŋa Abraham nda inda zivira ni tani ŋa ɗekɗek, » kaʼa.

56Ka nzatá Mari kawadaga nda Elizabet ta kla tili hkən, tahula tsa ka vraghutá tsi dzagha ni.

Yagatá Yuhwana

57Mantsa, ka sagha fitika dgakwa Elizabet, ka yatá tsi ta zwaŋa zgun. 58Ka snaŋtá sləvdaha ni nda la taŋ ta tsa ŋərma zɗaku magana Lazglafta ya, ka sliʼadaghatá həŋ gwaftá rfu kawadaga nda tsi. 59Baɗ matghasa fitik manda dgata ni, ka sliʼadaghatá həŋ ŋa tsanatá fafaɗa zwaŋ. Ka kum həŋ ta tsanaftá hga ni ka Zakari manda va hga da ni. 60« Mantsa a dzaʼa hga lu wu, Yuhwana hga ni, » ka ma ni. 61« Haɗ mndu mataba mndəra ghuni tsanaf lu ta mndərga tsa hgu ya wu, » ka həŋ nda tsi. 62Ka ɗawaŋtá həŋ nda dzvu da da ni: « Waká ka ta kuma tsanaftá hgu na? » ka həŋ nda tsi. 63Klagaɗighawa aluha, ka Zakari nda dzvu. « Yuhwana hga ni, » kəʼa vindaftá hga tsa zwaŋ ya. Inda taŋ demdem ka ndərmim həŋ.

64Gi hada hada, ka zlrəglaftá Zakari ta gwaɗa tsəleŋ, ka zləzlva Lazglafta. 65Ka ksaftá tsi ka zləŋ ta inda sləvdaha ni. Ka rusu lu ta inda tsa skwiha ya ma inda vli ta ghwá ma haɗika Zudiya. 66Inda mndu ta snaŋtá tsa gwaɗa ya, ta ndanu ta ghəŋa ni kazlay: Kinawu dzaʼa nzakwa tsa zwaŋ ya tama kəʼa? « Zlah dzaʼa nzakway ka mndu dagala, kabga kawadaga Lazglafta nda tsa zwaŋ ya, » ka həŋ.

Zləzlvay Zakari ta zɗakwa Lazglafta

67Tsa Zakari da ni ma tsa zwaŋ ya kay, ka ndəghanaftá Sulkum nda ghuɓa, ka zlraftá tsi ta mna skwi dzaʼa magaku: 68« Zləzlvama Mgham Lazglafta la Israʼila kabga sagha ni da kataŋtá mnduha ni, ka varatá tsi ta həŋ.

69Ka sladamatá tsi ta mnda

mba mndu nda mbra ta sabi

ma zivira Dawuda ta nzakway ka kwalva ni,

70manda ya mnigiŋ tsi nda ma wa la anabi daga ghalya kazlay:

71Dzaʼa mbaghunaf mba yu ma dzva ghumaha ghuni,

nda ya da gwal ta dra kaghuni kəʼa.

72Mantsa ya, maranaŋ mara ta tsa tva hiɗahiɗa ni ya ta dzidzíha mu,

ka havaktá tsi ka tsa dzratá wa ni nda ghuɓa ya, #1:72 Ngha ta Levitik 26:42.

73manda ya waɗana tsi ta dzidza mu Abraham,

74“Dzaʼa mbaghunaf mba yu ma dzva ghuma ghuni,

kada laviŋta kuni ta ksanatá slna kul haɗ zləŋ,

75ŋa nzata ghuni ka gwal nda ghuɓa,

gwal tɗukwa ta kəma ni ma inda kɗavakta hafa mu.”

76Kagha zwaŋa ɗa, anaba Lazglafta Dagala dzaʼa hga lu ta kagha.

Kagha dzaʼa tiŋlaghuta ka mgham ŋa faɗanatá tvi,

77Ŋa snanamtá mnduha ni kazlay:

dzaʼa mbay ta həŋ ma platá dmakwa taŋ kəʼa.

78Dagala tawa hiɗahiɗa nda zɗaku da Lazglafta mu kəl tsi ka vlagatá tsuwaɗaka ni manda fitik ta safi

gavzlazlaŋ, ka sagha da amu daga ta luwa,

79ŋa tsuwaɗakaku ta ghəŋa gwal ta nzakw ma grusl,

nda gwal ta nzakw ta wa hɗak ma sulkuma mtaku,

nda ya ŋa pgha səla mu ta tva zɗaku, » kaʼa.

80Mbaɗa tsa zwaŋ ya ka glaku, ka sgaku mbrakwa ni ma Sulkum, ka nzatá tsi ma mtak ha ka sagha fitik kəl tsi ka maraŋtá nzakwa ni baŋluwa da la Israʼila.

Currently Selected:

Luk 1: xed

Highlight

Copy