Mak 16

Sliʼagabta Yesu nda hafu ma mtaku

Mat 28:1-8, Luk 24:1-12, Yuh 20:1-10

1Manda luta Sabat, ka sliʼaftá i Mari makwa ta Magdala nda Salume nda Mari ma ni ma Yakubu dzawatá rɗa urdi ŋa dzaʼa masay ta mbla *Yesu. 2Ka sliʼafta həŋ, ka ɓhadaghatá həŋ mbessa vzlazlaŋ ta kulu ga sərɗək baɗu dəmas. 3Ta lab həŋ ta tvi, ka həŋ mantsa: Wa dzaʼa taŋwalaghutá tsa klam ta wa tsa kulu ya tama? ka həŋ. 4Ndusadaghata taŋ, kəʼa ka həŋ ná, taŋwalaghutaŋwala lu ta tsa mghama klam ya diʼiŋ nda wa tsa kulu ya. 5Ka gi lam həŋ da tsa kulu ya. Ka slanaghatá həŋ ta sana duhwal ta nzaku hada nda ga zeghwi, nda suɗatá ta lguta ŋusliŋ zutut ta vgha ni. Nghaŋta taŋ, mbaɗa həŋ ka ghudzafta da zləŋ. 6« Ma zləŋ kuni ta zləŋ, nda sna yu kazlay: Yesu mnda la Nazaret si zləŋaf lu ya ta psə kuni » kəʼa. Ta haɗ hadna wa. Sliʼaf sliʼa nda hafu ka laghu. Wana tsa vli si kəl lu ka fatá mbla ni ya. 7Lawa la da mnanatá i *Piyer nda sanlaha ma duhwalha ni kazlay: Tiŋəl tsatsi dzaʼa ɓhata ma Galili. Hada dzaʼa nghaŋta kuni manda ya si mnaghuna tsi,#16:7 Ngha ta 14:28. ka tsa duhwal ya nda həŋ. 8Ka ndagaptá tsa miʼaha ya ma kulu, ka hwaya. Ta ghudzaku həŋ da zləŋ. Ka kwalaghutá həŋ ta mna tsa gwaɗa ya ŋa mndu, kabga nda ksa həŋ da zləŋ.

Maraŋta Yesu ta vgha ni da Mari Magdala

Mat 28:9-10, Yuh 20:11-18

9[Manda sliʼagabta *Yesu ga sərɗək baɗu dəmas, tiŋəl Mari makwa ta Magdala, ya ghəzligiŋ tsi ta duhwalha halaway ndəfáŋ mida ya, marava tsi da tsi. 10Ka sliʼaftá tsa marakw ya ka laghu da mnay ŋa gwal si kawadaga nda Yesu, ta nzaku həŋ sasgama ka taw. 11Wa a Yesu nda hafu, nda ngha iʼi nda ira ɗa, kaʼa nda həŋ. Ka kwalaghutá həŋ ta zlghaftá tsa gwaɗa ya.

Maravata Yesu da sana duhwalha ni his

Luk 24:13-35

12Tahula tsa, ka maravatá *Yesu ka sani ma mndu tskəm da duhwalha ni his ta mbaɗa ta tvi ta dzaʼa tahula luwa. 13Ka vraktá həŋ da Ursalima, ka rusu həŋ ŋa sanlaha. Ama ka kwalaghutá tsaha ya ta zlghaftá tsa gwaɗa ya guli.

Maravata Yesu da duhwalha ni ghwaŋpəɗ ndeŋ

Mat 28:16-20, Luk 24:36-49, Yuh 20:19-23, Slna 1:6-8

14Tahula tsa guli, ka maravatá tsi ta kəma duhwalha ni ghwaŋpəɗ ndeŋ ta zə həŋ ta skwa zay. Ka davanaghatá tsi ta həŋ: Nu kul zlghaftá kuni ta gwaɗa tsa gwal ta nghaŋtá iʼi ta sliʼagapta ya, təŋ təŋa ghəŋa ghuni, kaʼa nda həŋ. 15Kaʼa nda həŋ tama mantsa: Lawa la ta ghəŋa haɗik tender, ka mna kuni ta *Lfiɗa Gwaɗa Lazglafta ŋa inda mnduha.#16:15 Slna gwal ghunay 1:8. 16Inda mndu dzaʼa zlghafta nda ŋuɗuf, ka maganaftá lu ta batem, dzaʼa mbaku. Ama mndu dzaʼa kwal kul zlghafta, dzaʼa tsanagha tsa Lazglafta ta guma. 17Wya ŋizla dzaʼa maraŋtá gwal ta zlghaftá iʼi: Nda hga ɗa, dzaʼa ghazlay həŋ ta duhwalha halaway ma mnduha, dzaʼa gwaɗay həŋ ta sana Lfiɗa Gwaɗa. 18Dər ksafha həŋ ta nahaɗik nda dzvu, dər suha həŋ ta gruma, haɗ sana skwi dzaʼa maganata tsi ta həŋ wa. Dzaʼa fafanaghafafa həŋ ta dzvu ta gwal kul ɗughwanaku, ŋa mbambafta taŋ, ka *Yesu nda həŋ.

Vraghuta Yesu ta luwa

Luk 24:50-53, Slna 1:9-11

19Tahula mnanata Mgham *Yesu ta tsa gwaɗa ya ta həŋ, ka klaghatá Lazglafta ta luwa, ka nzanatá tsi nda ga zeghwa ni.#16:19 Gray nda Slna gwal ghunay 1:9-11. 20Hahəŋ guli, ka sliʼaftá həŋ ka laghu da mna tsa *Lfiɗa Gwaɗa Lazglafta ya ma inda vli. Ka katu Mgham Yesu ta həŋ ma mna tsa gwaɗa ya, ŋlanaghaha ta tsa gwaɗa ya ta həŋ nda ma magay taŋ ta mazəmzəm.]

Currently Selected:

Mak 16: xed

Highlight

Copy