Mak 15

Kladaghata Yesu ta kəma Pilatus

Mat 27:1-2, 11-14, Luk 23:1-5, Yuh 18:28-38

1Tsaɗakwa vli, ka gi tskavatá maliha ta ghəŋa gwal dra skwi ŋa Lazglafta ka dzrəku kawadaga nda la galata mndu, nda gwal tagha zlahu ŋa mnduha, nda gwal tsa guma demdem. Ka habaftá həŋ ta *Yesu. Ka klaftá həŋ ka laghu vlaŋtá Pilat ka ŋumna. 2Tahula kladaghata taŋ ta Yesu da *Pilatus, ka ɗawaŋtá Pilat da tsi. Kaʼa mantsa: « Kagha mghama la *Yahuda ra? » kaʼa nda tsi. Manda ya mna ka,#15:2 Ngha ta Mata 27:11. ka Yesu nda tsi. 3Ka vazə maliha ta ghəŋa gwal dra skwi ŋa Lazglafta ta rutsakha kavghakavgha ta Yesu. 4Ka ɗawuglaŋtá Pilat da Yesu, « Mbəɗa a ka ra, ari sna a wa a ka ta na skwiha ta mnə həŋ ta kagha na na? » kaʼa nda tsi. 5Tsəriɗ nza nza Yesu kul mbəɗanaghata dər ka turtuk. Ka vlaŋtá tsi ta ndanu ta Pilat.

Tsanaghatá guma mtaku ta Yesu

Mat 27:15-26, Luk 23:13-25, Yuh 18:39–19:16

6Tsaw inda fitika skala *Pak ya ná, ta snu sna Pilat ta zlinistá mndu turtuk ma gamak ta həŋ. Mndu ɗawaŋ həŋ ta zlinista tsi ta həŋ. 7Ma tsa fitik ya, mamu sana mndu ta hgu lu ka Barabas, ksaf lu ka famta ma gamak kawadaga nda sanlaha ma mnduha, kabga dzata taŋ ta mndu ma vla zlərɗa wi nda ŋumna. 8Mbaɗa dəmga ka sliʼadaghata da *Pilatus, « Zliŋnis zla ta mndu turtuk manda ya snu ka ta magaŋnata, » ka həŋ. 9« Ta kumay kuni ta zlighunista ɗa ta mghama la *Yahuda ra? » ka Pilat nda həŋ, 10kabga nda sna ka mnay kazlay: Ka draku kladaghata maliha ta ghəŋa gwal dra skwi ŋa Lazglafta ta *Yesu kəʼa. 11Ama mbaɗa maliha ta ghəŋa gwal dra skwi ŋa Lazglafta ka ŋavata, ka bara mnduha ŋa mnay taŋ kazlay: Zliŋnis Barabas, zliŋnis Barabas, kaʼa nda Pilatus. 12Ka vrəgliŋtá Pilat ta ɗaway da həŋ: « Ka si mantsa tsi, nu ta kum kuni ta magay ɗa nda na mndu ta hgu kuni ka mghama la Yahuda na? » kaʼa nda həŋ. 13Ka hləglaftá həŋ ta wi: « Zləŋaf zləŋa ta udzu, ka həŋ nda tsi. » 14Ka Pilat nda həŋ guli mantsa: « Kabgawu, nahgani va ghwaɗaka skwi maga tsi? Ka hləglaftá həŋ ta wi nda mbraku, Zləŋaf zləŋa ta udzu! » ka həŋ nda tsi. 15Tsa Pilat ya, ta kumay ta zɗanafta ŋuɗuf ta dəmga. Mantsa, ka zlinistá tsi ta Barabas ta həŋ, ta vlaŋtá tsi ta Yesu ma dzvu ta la sludzi ŋa slvanapta. Tahula tsa, ka zlanaŋtá tsi ta həŋ ŋa zləŋafta ta udzu.

Gagay sludziha ta Yesu

Mat 27:27-31, Yuh 19:2-3

16Ka zlghaghutá sludziha ta *Yesu ma dzva *Pilatus, ka kladamtá həŋ, ta daɓi ma həga ma vla nzakwa Pilatus, ka hagadaghatá həŋ ta inda sludziha demdem, ka tskavata hada. 17Ka suɗanavatá həŋ ta lguta mamgham mgham ka dva. Ka ɗaftá həŋ ta teki ka wanamta ma ghəŋ manda zewzewa. 18Ka gə həŋ ta zgu ŋa ni: « Zgu tsa mghama la *Yahuda, » ka həŋ nda tsi. 19Mbaɗa həŋ ka dzay ta ghəŋ nda sarak guli, ka tafa sərɗək tida. Ka tsəlɓu həŋ ta tsəlɓu ta kəma ni, manda skwi ŋa vla glaku ŋa ni. 20Tahula hərfuta taŋ ta gagay, ka suɗaghutá həŋ ta tsa lguta dva má mgham mgham tida ya, ka suɗglanavatá həŋ ta vərɗa ŋa ni. Ka klagapta ka klaghata ŋa zləŋay ta udzu.

Dalafta la sludziha ta Yesu ta udzu

Mat 27:32-44, Luk 23:26-43, Yuh 19:17-27

21Ta lab həŋ ta tvi, ka guyatá həŋ nda sana mnda la Sireŋ ta hgu lu ka Simuŋ, da ni ma i Alegzandra nda Rufus#15:21 Gray nda Ruma 16:13. ta vrakta ta wawakwa ni. Ka mblanaftá həŋ ta kla tsa udza zləŋa Yesu ya. 22Ka klaghatá həŋ ta *Yesu da Gwalgwata. Tsa Gwalgwata ya na, manda mnay kazlay: Vla ghudzifa ghəŋ kəʼa ya. 23Ɓhadaghata taŋ da hada, ka kum həŋ ta sunustá ima inabi laɓanaf lu nda sana skwi ta hgu lu ka mur, ŋa htanaghutá kuzlakwa tsa ghuya ɗaŋwa ya, ama ka kwalaghutá Yesu ta say. 24-25*Nzemndi təmbay vli ta zləŋaftá həŋ ta udza zləŋay, ka vzə həŋ ta vindima#15:24-25 Ngha ta Zabura 22:19. ŋa daguvustá lgutha ni. 26Vindafha lu nda ta ghəŋa ni, ta ghəŋa skwi kəl lu ka tsanaghatá guma kazlay: Mghama la *Yahuda kəʼa. 27Ka zlaŋaftá həŋ ta gəndaha his ta sana udzuha ta vata ni, pal nda ga zeghwa ni, pal nda ga zlaɓa ni. 28[Mantsa ya kɗavakta skwi mnə gwaɗa Lazglafta kazlay: Nda mbəɗa mataba mbsaka gwal ta maga ghwaɗaka skwi,#15:28 Ngha ta Lukwa 22:37 nda Isaya 53:12.] kəʼa. 29Mbaɗa mnduha ta lab nda ta tsa tvi ya, ka gigɗa ghəŋ ka rarazay, « Yawa a wa! Dzaʼa tasiŋ tasa yu ta həga Lazglafta ka bafta ɗa ma fitik hkən#15:29 Ngha ta 14:58 nda Zabura 22:8 nda Yuhwana 2:19. a ka ka kay ra. 30Mbanaf mba ta ghəŋa gha kagha ka ghəŋa gha, ka saha ka ta na udza zləŋay na! » ka həŋ nda tsi. 31Mbaɗa maliha ta ghəŋa gwal dra skwi ŋa Lazglafta, nda gwal tagha zlahu ŋa mnduha ka manay guli: « Mbanafha ta sanlaha ná, ama triɗ laviŋ a ta mbanaftá ghəŋa ni wu, » ka həŋ mataba taŋ. 32« Ka sasa *Kristi Mghama la Israʼila ta na udza zləŋay na ndana tama, ka ngha ŋni, kada zlghafta ŋni nda ŋuɗufa ŋni! » ka həŋ. Mbaɗa tsa gwal zləŋaf lu kawadaga nda tsi ya guli ka razay.

Mtakwa Yesu

Mat 27:45-56, Luk 23:44-49, Yuh 19:28-30

33Lafa fitik ɗək da ghəŋ, ka nutá vli tɗik ka grusl ta haɗik demdem, ha ka laha ta nzemndi hkən ta fitik hawa. 34Manda magatá nzemndi hkən, ka hgatá *Yesu nda mbraku, kaʼa mantsa: « Eluhi, Eluhi, lama sabaktani? » kaʼa. Manda mnay kazlay: Lazglafta ɗa, Lazglafta ɗa, kabgawu zliɗivata#15:34 Ngha ta Zabura 22:2. ka na? kəʼa ya. 35Snaŋta sanlaha mataba tsa gwal hada ya ta tsa skwi mna tsi ya ná, ka həŋ mantsa: « Wya ta hga Iliya mnda Lazglafta ghalya, » ka həŋ. 36Ka gi sliʼaftá sani mataba taŋ ka hwayadapta klaftá susu, ka hbuŋta ta wa sarak. Ka tsughumamtá tsi ma ima inabi mastalaŋ, ka tsghədanaftá tsi ta Yesu ŋa say ni.#15:36 Gray nda Zabura 69:22. Ta tsghə tsi ya, « Swidwa! Nghama ngha ka dzaʼa sasa Iliya da klagata ta na udza zləŋay na tsi, ka ki tsi, » ka həŋ. 37Ama ka wahatá Yesu nda mbraku, ka sab hafu mida. 38Ma va tsa fitik ya, ka tavaptá zlala ta wa tgha lam da vli nda ghuɓa ma həga#15:38 Ngha ta Sabi 26:31-33. Lazglafta kuyar daga ta luwa dikw ta haɗik. 39Ma tsa vli zləŋaf lu ta Yesu ya, mamu sana mghama sludza la Ruma ta sladakta mbəŋ nda tsi. Manda nghaŋta ni ta mndərga tsa klay Yesu ta hafu ya, kaʼa mantsa: « Kahwathwata, na mndu na ná, Zwaŋa Lazglafta ya, » kaʼa. 40Mamu sana miʼaha ta sladakta diʼiŋ ka ngha tsa skwiha ta magaku ya guli. Mataba tsa miʼaha ya, mamu i Mari makwa ta Magdala, nda Salume, nda Mari ma ni ma i Yuses nda Yakubu ta tsneʼuwa ya. 41Ma fitika si nzakwa Yesu ta ma luwa Galili karaku ná, si ta dzaʼa mista ni tsa miʼaha ya ŋa maganatá slna. Si nda ndəgha sanlaha ma miʼaha ta sliʼadafta mista ni da luwa Ursalima guli.

Paɗamta Yusufu ta Yesu

Mat 27:57-61, Luk 23:50-56, Yuh 19:38-42

42Baɗu luma Madagala tsa fitik ya, ta kəl lu ka papaya skwiha, kabga dzaʼa lam la lu da Sabat, ka nda dəɗa fitik. 43Ka lagha Yusufu mnda luwa Arimate#15:43 Ngha ta Mata 27:57.. Tsa mndu ya ná, ta mnay ta tughwa gwaɗaha. Tsatsi guli ná, ta kəzla ga mghama Lazglafta. Ka draftá tsi ta ŋuɗuf, ka lagha slanaghatá Pilat ŋa ɗawaftá tvi ŋa dzaʼa kla mbla Yesu. 44Ka ndərmim Pilat ta tsa gi saba hafu ma *Yesu misimmisim ya. Ka hgaŋtá tsi ta tsa mghama sludziha ya, ka ɗawaŋta da tsi kazlay: Nda kɗa fitika saba hafu mida ra? kəʼa. 45Manda snanamta tsa mghama sludzi ya, ka zlanaŋtá tsi ta tvi ta Yusufu ŋa dzaʼa kla mbla Yesu. 46Ka skwatá Yusufu ta lguta wupay, ka klagata mbla Yesu ta udza zləŋay, ka mbsamta mida. Ka klaftá tsi ka laghu famta ma kulu huhrap lu ma kluluh. Ka taŋwalaktá mghama klam, ka huŋta ta wa tsa kulu ya. 47Ta nzaktá i Mari makwa ta Magdala nda Mari ma ni ma Yuses, ka ngha vli dzaʼa kəl lu ka famta.

Currently Selected:

Mak 15: xed

Highlight

Copy