Luk 16

Ŋərma kwalva

1Ka *Yesu nda duhwalha ni guli mantsa: « Mamu sana mnda gadghəl ta hlaftá huzla ni ka pghanamtá sana mndu ma dzvu ŋa nghanata. Ka lagha lu da mnanata kazlay: Waʼa tsa mndu ya ta badza huzla gha kəʼa. 2Ka hgaŋtá tsi. Kaʼa nda tsi mantsa: “Waká ka ta magay ka lu ta snə yu ya na? Mniha mna ká ka ta maga slna gha. Ndanana na, nzəglanaghata a ka ta ghəŋa huzla ɗa wa,” kaʼa nda tsi. 3Ka tsa mndu si ma dzva ni tsa huzlaha ya mantsa: “Waká yu dzaʼa magay tama? Wana hlaghu hla daŋahəga ni həga ɗa ta inda huzlaha ma dzva ɗa? Ka la yu da hva ka yu, haɗ mbrakwa ɗa wu. Ka la yu da gatá skwi ka yu, dzaʼa ksay ta iʼi ka hula. 4Ala, nda sna yu ta skwi dzaʼa yu magay dzaʼa kəl mnduha ka tsuʼaftá iʼi ghəzləɗisrə lu dazlay,” kaʼa. 5Tahula tsa tama ka hagaftá tsi ta gwal nda huzla daŋahəga ni həga ni da həŋ. “Kidaghi skwi ta dzaʼa ka vlay ŋa daŋahəga ni həga ɗa na?” kaʼa nda taŋtaŋa mndu. 6“Garwa rɗi dərmək ya,” kaʼa nda tsi. “Klaf kla ta ɗelewera gha, nza nza misimmisim ka vindafta ka ta hutaf mbsak,” kaʼa nda tsi. 7“Ki da kagha, ta kidaghi ŋa gha ŋa vlay?” kaʼa nda sani guli. “Buhwa hya dərmək ya,” kaʼa nda tsi. “Klaf kla ta ɗelewera gha, vindaf vinda ta Tghas mbsak,” kaʼa nda tsi. 8Hwiɗhwiɗa na mndu na, ka tsa daŋahəga ni həga ya ka ghuba tsa ghwaɗaka mndu ya. Tsaw mal hiɗata mnduha ma na ghəŋa haɗik na nzakwa taŋ mataba taŋ, ka zwana tsuwaɗak, » kaʼa.

Laviŋ a mndu ta gwaftá daŋahəga ni həga his wa

9« Ka iʼi ta mnaghunata na: Hlawa na ghwaɗaka skwa gadghəl ta na ghəŋa haɗik na, ka kasa kuni ta gra nda tsi. Baɗu kɗaghutani da kaghuni ya, ŋa tsuʼay Lazglafta ta kaghuni ma həga ni ŋa kɗekedzeŋ. 10Ka nda sna mndu ta ŋanatá skwi kwitikw, nda sna guli ta ŋanatá skwi dagala. Ka sna a mndu ta ŋanatá skwi kwitikw wu katsi, sna a guli ta ŋanatá skwi dagala wa. 11Ka laviŋ a kuni ta ŋanatá ghwaɗaka skwa gadghəla na ghəŋa haɗik na wu katsi, wa dzaʼa mnay kazlay: Zlgha ta vərɗa skwa gadghəl kəʼa? 12Ka laviŋ a kuni ta ŋanatá skwa gadghəl wu ní, wa dzaʼa vlaghatá vərɗa ŋa gha ma skwi tama.

13« Laviŋ a kwalva turtuk ta ga kwalva daŋahəga ni həga his wa. Nda husaŋta sani turtuk, nda ɗvuta ni ta sani. Ka mantsa a tsi wu, dzaʼa ndiʼanava ndiʼa ta vgha ta sani, ŋa husaŋta tsa sani ya. Laviŋ a kuni ta nzakway ka kwalva Lazglafta kuni guli na, ka kwalva tsedi kuni guli wa, » ka *Yesu.

Nzakwa la Farisa nda guma Lazglafta

Mat 11:12-13, 5:31-32, Mak 10:11-12

14Ka ghuɓasu la *Farisa ta sna inda tsa gwaɗa ya ta *Yesu, kabga ɗvu ɗva hahəŋ ta tsedi. 15Ka Yesu nda həŋ mantsa: « Ka tɗukwa mndu aŋni ka kaghuni ta mara ghəŋa ghuni ta kəma mnduha. Tsaw nda sna Lazglafta ta ŋuɗufa ghuni. Tsa skwi ta ghubu mnduha nda ghuba ya ná, ka manzakɗaway nzakwa ni ta wa ira Lazglafta.

16« Daga ghalya ta zlraftá lu ta mna gwaɗa ta ghəŋa skwi vindaf lu ma deftera zlaha Musa, nda ya ma deftera anabiha, ha ka sagha ta fitika zlagapta Yuhwana mnda maga Batem. Ta fitika zlagapta Yuhwana mnda maga batem tama, ka zlraftá lu ta mna gwaɗa ta ghəŋa *Lfiɗa Gwaɗa ta ga mghama Lazglafta, ka zluʼu mnduha ta vgha ŋa lami. 17Tsaw mal ndəkweɗata hərɗuta luwa nda haɗik ka dəɗavaghuta thatá skwi turtuk ma zlahu, » kaʼa.

Tagha skwi ta ghəŋa ghəzla marakw

18« Mndu ta ghəzliŋtá markwa taŋ ka klaftá sani ná, hliri ta hlu tsa mndu ya. Mndu ta klaftá marakw ghəzliŋ zəʼala taŋ guli ná, hliri ta hlu tsa mndu ya, » kaʼa.

I sana mnda gadghəl nda Lazar

19« Mamu sana mndu ghalya ka gadghəl, lgut kulefeɗfeɗa nda bla dzva ni ta suɗə tsi ta vgha. Inda fitik, skwi zɗa zɗa ta zə lu ga taŋ. 20Mamu sana mndu guli Lazar hga ni, ka pɗu, ka lku vgha ni dzeʼdzeʼ, ta ziʼaku, ta hani ta wa tgha ga tsa mnda gadghəl ya. 21Ta kumay si ta baghafta ni nda wiwisa ɗafa ta rkata ma vlə zay tsa mnda gadghəl ya, sew mutsaf a wa. Ama kriha yeya katək ta sliʼadaghata da niʼa tsa lkuhani ya. 22Ka mtuta tsa mndu ka pɗu ya, ka tsukwaghatá duhwalha Lazglafta fata ta vata Abraham. Ka mtutá tsa mnda gadghəl ya guli, ka paɗamtá lu. 23Ka ghuy tsi ta ɗaŋwa katakata ma vla nzakwa gwal nda rwa. Kəʼa kəʼa klaŋtá ghəŋ ná, ka nghaŋtá tsi ta Abraham diʼiŋ kawadaga nda Lazar. 24“Da ɗa Abraham! Tawatá hiɗahiɗa ta iʼi! Ghunaf ghuna ta Lazar ka tsughumamta tsi ta ndəfiŋa dzva ni ma imi, ka ɗiɗifta tsi ta ghanik ləŋləŋləŋ, kabga ta ghuya ɗaŋwa yu katakata ma na vu na,” kaʼa dzatá lawlaw. 25Ka Abraham nda tsi mantsa: “Sagəŋ! Havap hava ka za mghama gha si ta zə ka ma nzakwa gha nda iri ta ghəŋa haɗik, ta ghuy Lazar ta ɗaŋwa ni ya. Ndana tama nda lɓa ŋuɗufa tsatsi, ta ghuy kagha ta ɗaŋwa gha. 26Zlaŋha lu ta tsa, mamu mghama gudzuvruŋ ta dgamata. Dər má ta kumay mnduha ta sliʼafta hadna da aŋni ŋa dzaʼa da kaghuni ná, laviŋ a həŋ wa. Laviŋ a lu ta tsughwaɗagapta da kaghuni ka sagha da aŋni guli wu,” kaʼa. 27“Ka si mantsa tsi, wya dzvu, ghunatá Lazar da la ga da ɗa, 28kabga ta mamu zwana ma ɗa hutaf. Ka dzaʼa tsi da snanamtá həŋ, da sagha hahəŋ guli da ghuya ɗaŋwa ma na vla ghuya ɗaŋwa na,” ka tsa mnda gadghəl ya. 29“Mamu vindatá deftera zlaha Musa nda vindatá gwaɗa la anabiha da zwana ma gha, ka sna sna həŋ,” ka Abraham nda tsi. 30“Slaghwa a tsaya da ɗa Abraham wu, ka sliʼaf hadna mndu da gwal nda rwa, ka lagha slanaghatá həŋ katsi ná, hada hada həŋ dzaʼa mbəɗanaftá nzakwa taŋ,” ka tsa mnda gadghəl ya. 31“Ka va a həŋ ta sna tsa zlaha Musa nda tsa gwaɗaha la anabi ya wu katsi, dər ki sliʼafta mndu da gwal nda rwa ka lagha slanaghatá həŋ, haɗ fitik dzaʼa snata həŋ wu, ka Abraham nda tsi,” » kaʼa.

Currently Selected:

Luk 16: xed

Highlight

Copy