Luk 19

I Yesu nda Zakayus

1Ka ɓhadamtá *Yesu da luwa Yeriku, ka lab nda mida. 2Mamu sana mndu ta hgə lu ka Zakayus, mali ta ghəŋa gwal tska dzumna, gadghəl ya guli. 3Ka zbə tsi ta tva guyata nda Yesu, ka wa tsi ya. Tsaw laviŋ a ta nghaŋta wa. Ka dekweri nzakwa ni tsku tska mnduha guli 4Ka hwayaghatá tsi nda ta kəma, ka ŋladafta ta sana fwa babala, ŋa nghaŋta Yesu ta lab nda ta tsa tvi ya. 5Manda ɓhadaghata Yesu da tsa vli ya, ka kapaŋtá tsi ta ghəŋ, ka nghadafta. Kaʼa mantsa: « Zakayus, sasa gha misimmisim da ghuni ta dzaʼa yu gita, » kaʼa. 6Ka gi saha Zakayus, ka laghu həŋ da taŋ, ka tsuʼaftá tsi ta Yesu nda rfu. 7Nghaŋta mnduha ta tsaya, mbaɗa həŋ ka ruruŋwaku. « Wa a laghwa tsa mndu ya da mnda dmaku, » ka həŋ. 8Ka sladata Zakayus, kaʼa nda Mgham Yesu mantsa: « Sna ɓa Mghama ɗa! Dzaʼa daganaftá slɓahwa gadghəla ɗa yu ta la ka pɗu. Ka mamu mndu si hulgudunus yu ta skwa ni, fwaɗ səla dzaʼa planamta yu ta va tsa skwa ni ya guli, » kaʼa. 9Ka Yesu mantsa: « Sam sa mbaku da na həga na gita, kabga zivira Abraham tsatsi guli. 10Tsaya ná, sa psa gwal nda zaɗa ŋa mbambanaftá həŋ *Zwaŋa mndu, » kaʼa.

Kwalvaha hkən

Mat 25:14-30

11Tata snay snay həŋ ta tsa skwi ya, ka sganaghatá *Yesu ta mahdihdi kabga ndusanavatani ta luwa Ursalima. Guli ná, zlah gi dzaʼa zlagap zlaga ga mgham Lazglafta, ka mnduha ta ndanay. 12Wya tsa skwi ta mnə tsi ya: « Mamu sana mndu ka katsala mndəra taŋ ta laghwi ta sana haɗik diʼiŋ, ŋa famta ka mgham, kada vrakta tsi. 13Makəɗ tsi kada laghu, ka hagaʼatá tsi ta gwal ksanatá slna ghwaŋ ka daganaftá tseda dasu#19:13 Tseda vagha mndu turtuk turtuk ya. pal pal pal ta həŋ. “Ka tsakala kuni ta tsakala nda tsi ta vraktá yu,” kaʼa nda həŋ. 14Tsa mndu ya ná, ta husaŋ husa ta tsa mnduha ta tsa haɗik ya. Ka ghunaftá həŋ ta mnduha ta hula ni kazlay: Va a ŋni ta gay ni ta mgham ta ghəŋa aŋni wu kəʼa. 15Kulam nda tsa, ka famtá lu mamgham, ka vraktá tsi ta haɗika ni. Ka hagaktá tsi ta tsa gwal daganaf tsi ta tsedi ya, ŋa ɗawaŋta da həŋ ta skwi mutsanagha həŋ. 16Ka lagha sani taŋtaŋ. Kaʼa mantsa: “Mghama ɗa! Ghwaŋ mutsanaghata yu ta ghəŋa tsa vliha ka ya kay,” kaʼa nda tsi. 17“Ɗina tsa, vərɗa kwalva ka. Fitika tsa nzata gha ka vərɗa mndu ma skwi kiʼa ya, ka ŋumna ta ghəŋa luwaha ghwaŋ ta famta yu ta kagha,” ka tsa mgham ya nda tsi. 18Ka lagha mahis. “Mghama ɗa! Hutaf mutsanaghata yu ta ghəŋa tsa vliha ka ya kay,” kaʼa nda tsi. 19“Kagha guli, ka ŋumna ta ghəŋa luwaha hutaf ta fanaghata yu ta kagha, kaʼa.” 20Ka sagha sani. Kaʼa mantsa: “Mghama ɗa! Aʼa tseda dasa gha. Ma lgut si mbsamta yu. 21Zləŋaf zləŋa yu ta kagha, nda bla gwaɗa ta kagha, ta klay ka ta skwi kul fata ka, ta tskay ka ta skwi ta vwah ya kul sləgaftá ka,” kaʼa nda tsi. 22“Ghwaɗaka kwalva ka. Ta gwaɗa gha ta tsaghaghata yu ta guma. Nda sna kagha kazlay: Nda bla gwaɗa ta iʼi, ta klay yu ta skwi kul fata yu, ta tskay yu ta skwi ta vwah kul sləgaftá yu kəʼa a tsa wa. 23Kabgawu kwal ka kul famta ta tsa tseda ɗa ya ma baŋki? Ma na vrakta ɗa na ná, ma ŋa klagapta ɗa nda zwaŋ ta ghəŋa ni?” 24Ka mgham nda tsa gwal hada ya mantsa: “Kləgədanaghwa tsa tseda dasu ya ka gwanaghata kuni ta tsa ghwaŋ ŋa ni ya,” kaʼa. 25Ka həŋ nda tsi mantsa: “Aʼa! Ghwaŋ a ŋa ni tsa mghama ɗa wa!” ka həŋ nda tsi. 26“Ka iʼi ta mnaghunata wa, ka mamu skwi da mndu katsi, ŋa ni ta sganaghata lu. Ala ka haɗ skwi da mndu wu katsi, kləgadanaghutá va tsa kiʼata ni ta fə tsi ta ghəŋ tida ya, kaʼa zlghanaftá wi ta həŋ. 27Tsa hamata gwal kul kuma nzakwa ɗa ka ga mgham ta ghəŋa taŋ ya, hlagaghawa hla ta həŋ ka pslata kuni ta həŋ tawa ira ɗa, kaʼa nda həŋ,” » ka Yesu. 28Tahula mnata Yesu ta tsa gwaɗa ya, Ka sliʼaftá tsi ka mbaɗa ta kəma taŋ ŋa dzaʼa da Ursalima.

Lama Yesu da luwa Ursalima

Mat 21:1-11, Mak 11:1-11, Yuh 12:12-19

29Manda ndusanavatani ta luwa Beslaze, nda luwa Betani ta nzakway ndusa nda ghwá *Zaytuŋ ya, ka ghunaftá tsi ta duhwalha ni his. Kaʼa nda həŋ mantsa: 30« Lawa la da na luwa ta kəma mu na. Ɓhadaghata ghuni ya, dzaʼa slanagha sla kuni ta zwaŋa kəɗih ta hba, ta kul walaŋtá mndu ta lafi tida. Ka plata kuni ka klaktá kuni. 31“Ka ŋaw ta pla kuni na?” ka mndu nda kaghuni ya, “Mgham ta psay” » ka kuni dazlay nda tsi, kaʼa.

32Ka laghu tsa gwal ghunagha lu ya, ka slanaghatá həŋ manda va ya mnana *Yesu ta həŋ. 33Tata playplay həŋ, « ŋaw kuni ta zwaŋa kəɗih na? » ka tsa gwal nda kəɗiha taŋ ya. 34« Mgham ta psay, » ka həŋ zlghanaftá wi ta həŋ. 35Ka klanaktá həŋ ta tsa zwaŋa kəɗih ya ta Yesu. Ka pghaftá həŋ ta lgutha taŋ tida. Ka faftá Yesu tida. 36Ka gavu həŋ ya ná, ka zlazlatə mnduha ta lgutha taŋ ta tvi. 37Ndusadaghatani nda Ursalima, nda ta tsa tvi ta saha nda təv ghwá Zaytuŋ ya, mbaɗa inda tskata duhwalha ni ka rfu, ka zləzlva Lazglafta nda lwi dagala dagala ta ghəŋa inda mazəmzəm ya nghaŋ həŋ. 38« Ka tfanagha tfa Lazglafta ta wi ta Mgham ta sagha ma hga ni. Zɗaku ta luwa, glaku ŋa Lazglafta ta luwa nda gaftək, » ka həŋ. 39« Lma ta na duhwalha na ɓa, ka lɓata həŋ, » ka sanlaha ma la *Farisa ta lami da taba dəmga. 40« Ka iʼi nda kaghuni wa, ka haf ha həŋ ta wa taŋ ná, pala dzaʼa wahay, » kaʼa nda həŋ.

Taway Yesu ta luwa Ursalima

41Ndusadaghatani ɗekɗek nda luwa, ka nghanavatá tsi, ka taw tsi ta taw ta ghəŋa ni. 42Kaʼa mantsa: « Ka má nda sna kagha Ursalima ká ka má da zba zɗakwa gha gita! Ndana tama, zaɗaghaghazaɗa nghəglaŋta a ka wa. 43Dzaʼa sagha sa fitika ksaghaghata, ŋa dzəɓafta ghumaha gha ka waghafta, ka ŋamtá kagha hesl dər ndiga. 44Ŋa zaɗaghata nda mnduha gha tani. Zlanata a həŋ ta nzugwatá pala ta ghəŋa sani wu, kabga tsatsaf a kagha ta tsa fitika sagha Lazglafta da kata kagha ya wu, » kaʼa.

Ghzlay Yesu ta gwal dzawa skwi ma həga Lazglafta

Mat 21:12-17, Mak 11:15-19, Yuh 2:13-22

45Ka lam *Yesu da həga Lazglafta, ka zlraftá tsi ta ghəzlagaptá gwal ta tsakala. 46Kaʼa mantsa: « Vinda a ma deftera Lazglafta kazlay: Həga ɗa ná, həga maga duʼa ya kəʼa ra? Na kaghuni ná, ka niŋta ka galigha la ghali#19:46 Ngha ta Isaya 56:7 nda Yirməya 7:11.? » kaʼa nda həŋ. 47Ka taghə Yesu ta skwi ŋa mnduha ma həga Lazglafta inda fitik. Mbaɗa gwal dra skwi ŋa Lazglafta nda gwal tagha zlahu, nda la mali ta ghəŋa mnduha ka psa dzatá Yesu. 48Ama sna a həŋ ta tvi ka həŋ dzaʼa ɓhanavata wu, kabga dar fata mnduha ta vgha ka sna gwaɗa ni.

Currently Selected:

Luk 19: xed

Highlight

Copy