Luk 20

Wa ta vlaŋtá tvi ta Yesu ŋa magay mantsa na?

Mat 21:23-27, Mak 11:27-33

1Ma sana fitik, ma tsa fitika tataghay *Yesu ta skwi ŋa mnduha ma həga Lazglafta, ka mna *Lfiɗa Gwaɗa ya, ka sliʼadaghatá la mali mali ta ghəŋa gwal dra skwi ŋa Lazglafta, nda gwal tagha zlahu, nda la galata mndu slanaghata. 2Ka həŋ mantsa: « Mnaŋna mna, ka wa ta mnaghatá maga na skwiha na, ka wa ta vlaghatá mbrakwa magay? » ka həŋ nda tsi. 3Ka Yesu mantsa: « Ka ɗawaghuna ɗawa iʼi guli. 4Lazglafta ta ghunagatá Yuhwana da maga batem re, ari mnduha a na? mnihawa mna, » kaʼa nda həŋ. 5Ka nzatá həŋ ka dzərkay mataba taŋ. « “Ka Lazglafta ya ta ghunagata” ka mu, “nu kul zlghaftá kuni ta gwaɗa ni ɓa,” kaʼa dzaʼazlay nda amu. 6“Ka mnduha ya” ka mu guli, dzaʼa zlrətsaku mu nda pala da inda mnduha ŋa pslatá amu, kabga nda sna inda taŋ kazlay: *Anabi Yuhwana kəʼa. » 7« Sna a aŋni ka wa ta ghunagaghata wu, » ka həŋ nda tsi. 8Ka Yesu mantsa: « Ahaa! Iʼi guli ná, haɗ yu ta mnaghunata ka wa ta vlihatá mbrakwa maga tsa skwiha ya wu, » kaʼa nda həŋ.

Sana mnda vwaha inabi ta sidi

Mat 21:33-46, Mak 12:1-12

9Tahula tsa, ka zlraftá *Yesu ta mna mahdihdi ŋa mnduha, kaʼa mantsa: « Lagha sana mndu ka ŋaɓatá fuha inabi ma vwaha ni. Ka sliʼaftá tsi ka laghu dista luwa ŋa nzəɗavata. 10Magatá fitika ɗaga yakwa fwa inabi, ka ghunaftá tsa mndu ya ta kwalva ni slanaghatá tsa gwal ta hva vwaha tsa inabi ya, ŋa hlanaftá mayaka ŋa ni ma yakwa fu. Ka mbəɗanatá tsa gwal ta hva tsa vwah ya ta tsa kwalva ya nda dzə kul klanafta. 11Ka ghunəglaftá tsi ta sana kwalva ni, ka rəhaptá həŋ ta tsaya guli, ka rarazata, ka vriŋta kul klanafta. 12Ka ghunəgladaptá tsi ta mahkəna kwalva ni, ka balanatá həŋ ta tsaya guli ka vzidiŋta. 13Ka da ni ma tsa vwaha inabi ya mantsa: “Waká yu dzaʼa magay? dzaʼa ghuna zwaŋa ɗa ɗvu yu, yu. Tsatsi yeya dzaʼa vlə həŋ ta glaku ŋa ni,” kaʼa. 14Na ghur nghay tsa gwal ta hva vwaha tsa inabi ya ta lagha tsa zwaŋ ya, gi ka həŋ mantsa: “Ya wana tsa mndu dzaʼa za həga ya tane, dzama dza, ka nzakwa na fuha inabi na ka ŋa mu,” ka həŋ. 15Ka tsəhaghatá həŋ diʼiŋ nda tsa vwaha inabi ya, ka dzata. » Ka Yesu mantsa: « Mantsa tama ní, nu dzaʼa maganata da ni ma vwaha inabi ta həŋ? 16Dzaʼa lagha la slanaghatá tsa gwal ta hva tsa vwaha inabi ya, ka pslatá həŋ. Ŋa klafta ni ta tsa fwa inabi ya, ka fanamta ma dzvu ta sanlaha ma mnduha, » kaʼa nda həŋ. « Haɗ tsaya dzaʼa magaku mantsa wu, » ka tsa mnduha ta sna gwaɗa Yesu ya hlaftá wi.

17Ka naghadamtá Yesu da kuma taŋ, kaʼa mantsa: « Nu klatá ghəŋa tsa gwaɗa vindaf lu ma deftera Lazglafta kazlay:

Tsa pala wuɗidiŋ gwal ta ba həga ya,

ta nuta ka palaka tughwa həga#20:17 Ngha ta Zabura 118:22. kəʼa ya?

18Inda mndu dzaʼa nzeghwafta ta tsa pala ya, dzaʼa huruɓu huruɓa. Ka tsa pala ya ta dəɗanaghatá tsa mndu ya katsi guli, dzaʼa huʼanap huʼa ŋərɗək, » kaʼa.

Nda ra ka pla dzumna ŋa mghama Ruma ra?

Mat 22:15-22, Mak 12:13-17

19Ma va tsa fitik ya, ka zbə la mali ta ghəŋa gwal dra skwi ŋa Lazglafta, nda gwal tagha zlahu, ta tva ksaftá *Yesu, kabga nda sna həŋ kazlay: Ta ghəŋa taŋ ta mna Yesu ta tsa mahdihdi ya kəʼa, ama ka zləŋaftá həŋ ta mnduha.

20Ka va ɗakwats həŋ ta Yesu, ka ghunadaghatá həŋ ta sana mnduha ta nzakway manda va ya ŋərma mnduha ya, da ɗawa gwaɗa da Yesu, ŋa ɗakwatsa gwaɗa da tsi, ŋa ksafta ka vlaŋtá ŋumna. 21Ka ɗawaŋtá həŋ da tsi: « Mghama ɗa! Nda sna ŋni ta gwaɗa ta gwaɗ ka, nda skwi ta tagh ka tɗukwa nzakwa ni kəʼa. Haɗ ka ta gala mndu wu, tva nzaku kahwathwata manda ya ta kum Lazglafta ta tagh ka, » ka həŋ. 22« Mnaŋna mna, nda ra re ra a wa a ka play mu ta dzumna ŋa mgham Sezar na? » ka ga ŋni. 23Tsatsafta Yesu ta tsa maɗgwirmaɗgwira taŋ ya, kaʼa nda həŋ mantsa: 24« Yahawa ka nghanata yu ta tsa kwaɓu#20:24 Ngha ta Lukwa 15:8. ya. Fuwata wa nda hgawa na thaf lu tida na na? » kaʼa. « Ŋa mgham Sezar ya, » ka həŋ. 25« Ala plawa ŋa mgham Sezar ta ya ta nghanatá mgham Sezar. Plawa ŋa Lazglafta ta ya ta nghanatá Lazglafta, » kaʼa. 26Triɗ trap tra həŋ ta ksaftá krughuva ni ma skwi ya ta mnə tsi ta kəma mnduha. Tsa zlgha wa ni yeya ta vlaŋtá ndərmimay ta həŋ katək, ka nzatá həŋ faflara.

Dzaʼa sliʼagap sliʼa gwal nda rwa ra?

Mat 22:23-33, Mak 18:18-20

27Ka gavadaghatá sanlaha ma la *Sadukiya guli tavatá *Yesu. Tsa la Sadukiya ya gwal ta mnay kazlay: Haɗ sliʼagapta ma mtaku nda hafu wu kəʼa ya. Ka ɗawaŋtá həŋ da Yesu. 28« Mghama ɗa! Ka Musa vindaŋnafta na: “Ka mamu sana mndu nda zwaŋama ni ta klaftá marakw ka mtuta kul yatá zwaŋ katsi, ka kla tsa mndu ta ndiri ya ta tsa wadga ni ya, ŋa yanatani ta zivir ta zwaŋama ni#20:28 Ngha ta Zlrafta 38:8 nda Vrafta ta Zlahu 25:5-6.,” kaʼa. 29Tsaw mamu la zwana mandəfáŋ həŋ. Ka klaftá zumali ta marakw ka mtuta kul yatá zwaŋ. 30Ka klutá mahis ta tsa wadgu ya, 31mantsa ya mahkən, ka raftá həŋ ndəfáŋ ndəfáŋ tida ka rwuta həŋ, haɗ ya ta yatá zwaŋ nda tsi wa. 32Mantsa ya guli ka mtanaghatá tsa marakw ya. 33Mantsa tama ní, ŋa wa ŋa wa dzaʼa nzakwa tsa marakw ya baɗu sliʼagapta ma mtaku nda hafu, ya wya klu kla tsa mnduha ya ndəfáŋ ndəfáŋ ka markwa taŋ na? » ka həŋ nda tsi. 34Ka Yesu nda həŋ mantsa: « Ta kluvustá vgha zgwana nda miʼaha ma na ghəŋa haɗik na, 35ama zgwana nda miʼaha gwal nghadap Lazglafta kazlay: Nda ra həŋ ka vragapta ma mtaku nda hafu, ŋa nzaku nda hafu ma mbəɗakwa luwa dazlay kəʼa ya, haɗ həŋ dzaʼa kluvustá vgha wa. 36Haɗ həŋ dzaʼa mtəgəltá mtaku wu, kabga nda nza həŋ manda duhwalha Lazglafta. Nda nza həŋ ka zwana Lazglafta, kabga sliʼagap sliʼa həŋ ma mtaku, ka nzata nda hafu. 37Kɗiŋ kɗa Musa ta mnata kazlay: Dzaʼa sliʼagap sliʼa gwal nda rwa ŋa nzaku nda hafu kəʼa. Ma vla gwaɗa ta ghəŋa mubukw ta zlghaku, ka hgə tsi ta Mgham, “ka Lazglafta Abraham, ka Lazglafta Izak, ka Lazglafta Yakubu#20:37 Ngha ta Sabi 3:2, 6..” 38Lazglafta ná, Lazglafta gwal nda rwa a wa, Lazglafta gwal ndiri ya, kabga inda taŋ demdem ŋa ni ta nzakwa həŋ nda hafu. » 39Rkauʼ tsuʼuwaghu tsuʼa sanlaha ma gwal tagha zlahu ta gwaɗa, ka həŋ mantsa: « Zɗa tsa gwaɗa gha ya Mghama ɗa, » ka həŋ, 40Walglaŋ a həŋ ta ɗawglaŋtá sana skwi da tsi wa.

Kristi ná, Mghama Dawuda ya

Mat 22:41-46, Mak 12:35-37

41Ka *Yesu mantsa: « Kura ki lu ta mnay kazlay: *Kristi ná, zwaŋa Dawuda ya kəʼa na? 42Wya mna mna vərɗa Dawuda ma deftera Zabura kazlay:

“Ka Mgham Lazglafta nda mghama ɗa ná,

nza nza nda ga zeghwa ɗa,

43ta nanaftá yu ta ghumaha gha ka skwa ta diŋlay səla gha#20:43 Ngha ta Zabura 110:1.” kəʼa.

44Waká Kristi dzaʼa nzaku ka zwaŋa Dawuda, ya wya “Mgham” ka Dawuda ta hgay? » kaʼa.

Yaha kuni maga skwi manda gwal tagha zlahu

Mat 23:1-36, Mak 12:38-40

45Tata sna tsa gwaɗa ta mnə tsi ya mnduha, ka *Yesu nda duhwalha ni mantsa: 46« Ɗaswa ka kuni nda gwal tagha zlahu zɗəgana wawaku ta həŋ nda lgut zutututa ta kuma gagay lu ta zgu ŋa taŋ ta dawadawa ya. Vla nzaku ta kəma ŋa taŋ ta zbay ma həga tagha skwa la *Yahuda nda ya ma vla za skwa zay. 47Hahəŋ gwal ta tskugudunustá skwa miʼa wadgu. Ta slriŋslra həŋ ta maga duʼa ŋa ghubu. Dzaʼa tsanagha tsa lu ta guma ta həŋ katakata, » kaʼa.

Currently Selected:

Luk 20: xed

Highlight

Copy