Luk 3

Mbəɗanafwa mbəɗa ta nzakwa ghuni ka Yuhwana nda mnduha

Mat 3:1-12, Mak 1:1-8, Yuh 1:19-28

1Ta Maghwaŋpəɗ hutafa vakwa Tiber Sezar ta pala, ta nzakwə Pwaŋəs Pilat ka ŋumna ta haɗika Zudiya, ta gə Hiridus ta mgham ta haɗika Galili, ta gə zwaŋama ni Filip guli ta mgham ta haɗika Iture nda haɗika Trakunita, ta gə Lisaniya guli ta haɗika Abilena. 2Ma tsa fitik ya guli, i *Hana nda *Kayifa mali ta ghəŋ gwal dra skwi ŋa Lazglafta. Ka sagha gwaɗa Lazglafta da ghəŋa Yuhwana zwaŋa Zakari ma mtak. 3Ka sliʼaftá Yuhwana ka laghu da ra inda luwa ta wanaftá ghwa *Yardeŋ nda hagaku, kaʼa mantsa: « Mbəɗanafwa mbəɗa ta nzakwa ghuni, ka magaghunafta lu ta batem, ka plighunista Lazglafta ta dmakwa ghuni, » kaʼa.

4Manda ya nda vinda ma deftera anabi Isaya kazlay:

« Lwa tsa mndu ya ta snu lu ta gugɗaku ma mtak kazlay:

payanawa paya ta tvi ŋa Mgham,

ka leleʼanata kuni kəʼa.

5Ka saŋamta lu ta inda vli ka didiŋa,

ka tasiŋta lu ta inda ghwá nda kuɗuŋurha, ka ɗayapta lu ta skwi ka ghuluŋuɗ,

ka payanata lu ta huraɓasl ta tvi,

6ŋa nghaŋta inda mnda səla ta mbaku da Lazglafta#3:6 Ngha ta Isaya 40:3-5.. »

7Ka mnə tsi ŋa tsa mnduha ta sliʼadaghata rutututa da maga batem da tsi ya. Kaʼa mantsa: « Mndəra la mupuhwa, wa ta mnaghunata kazlay: Hwayawahwaya ta ɓasa ŋuɗuf ta sagha ta kəma kəʼa na? 8Magawa maga ta slna ya ta maraŋta mbəɗatá nzakwa ghuni, ka zlaŋta kuni ta mnay ma ghəŋa ghuni kazlay: Abraham ná, dzidza ŋni ya, kəʼa. Ka yu ta mnaghunata ná, laviŋ lava Lazglafta ta nanaftá ya palaha ya ka zwana Abraham. 9Ɗaswa ka kuni! Nda ghada kapatá slpaɗa ŋa tsiŋtá fu daga ta slrəŋ. Inda fu ya kul zɗaku yakwa ni, dzaʼa tsiŋ tsa lu ka vzamta ma vu, » kaʼa.

10Ka dəmga nda Yuhwana mantsa: « Nu ta raku ŋa magay ŋni tama? » ka həŋ. 11Kaʼa nda həŋ mantsa: « Mndu ya his lgut da tsi, ka dganapdga tsi nda mndu ya kul haɗ tsi da tsi. Mndu ya mamu skwa zay da tsi guli, ka maga tsi mantsa ya, » kaʼa.

12Ka sliʼadaghatá gwal ta tska dzumna guli, ŋa maganafta Yuhwana ta batem ta həŋ, ka ɗawə həŋ da tsi: « Maləm, nu ta raku ŋa magay aŋni guli? » ka həŋ. 13Kaʼa nda həŋ mantsa: « Ma ɗaw kuni ta skwi da mndu ka malaghutá ya tsaf lu, » kaʼa nda həŋ. 14« A ki aŋni, nu ta raku ŋa magay ŋni? » ka La sludzi ɗawaŋta guli da tsi. Kaʼa nda həŋ mantsa: « Ma mbrəh kuni ta mndu ŋa vlaghunata skwi, rfawa ta rfu nda kuraghuta skwi ta plaghunata lu, » kaʼa.

Mndu ta malaghuta ka Yuhwana

15« Zlah *Kristi a na mndu na ri, » ka mnduha nda Yuhwana, kabga nda fa ghəŋa taŋ ka kəzla sagha ni. 16Kaʼa nda həŋ mantsa: « Iʼi ná, nda imi ta magaghunafta yu ta batem, ama mamu mndu ta sagha ta malaghutá iʼi nda mbraku. Slaghu a iʼi ka pliŋtá zuʼa ɓaɓaha ni wa. Tsatsi, dzaʼa magaghunaf maga ta batem nda Sulkum nda ghuɓa nda ya nda vu. 17Nda ŋatá kuwatavihi ma dzva ni, dzaʼa vihapviha ta hya ni, ŋa tskamtani ma gvurani, ŋa driŋta ni ta sabatbat nda vu kul mtavata, » kaʼa nda həŋ demdem. 18Mantsa ya ka Yuhwana ta mna *Lfiɗa Gwaɗa ŋa mnduha, ka dzaʼa nda vla ndəghata hiɗakuha ŋa taŋ.

Tsamta Hirudus Aŋtipas ta Yuhwana ma gamak

19Ka dvanaghatá Yuhwana ta mgham Hiridus ta ghəŋa klugudunustani ta Hiridiya markwa zwaŋama ni Filip, nda ya ta ghəŋa ndəghata sanlaha ma ghwaɗaka skwi ta mag tsi. 20Ka ksamtá tsi ta Yuhwana da gamak, ka sganaghata ta ghəŋa tsa ghwaɗaka skwi ta mag tsi ya.

Maganaftá batem ta Yesu

Mat 3:13-17, Mak 1:9-11

21Manda ya ta maganafta Yuhwana ta batem ta mnduha, ka lagha *Yesu ka maganaftá lu ta batem guli. Ta ndəɓu tsi ta dzvu, ka gunatá luwa buwaŋ, 22ka saha Sulkum nda ghuɓa ta ghəŋa ni manda ghərbuʼ ta nghə mnduha. Mantsa, ka snaku lwa Lazglafta daga ta luwa ta mnay kazlay: Kagha Zwaŋa ɗa ɗvu yu ma hya hya ŋuɗufa ɗa#3:22 Ngha ta Zabura 2:7 nda Isaya 42:1., kaʼa.

Mndəra la taŋ ma Yesu

Mat 1:1-17

23Ta magay ima *Yesu ta hkən mbsak ta zlraftá tsi ta ksa slna ni. Manda va ya ta ndanu mnduha kazlay: Zwaŋa Yusufu ya kəʼa ya, wya mndəra taŋ: Yusufu, Yusufa Heli, 24Hela Matat, Matata *Levi, Levi Malki, Malki Zanay, Zanaya Yusufu, 25Yusufa Matatiyas, Matatiyasa Amus, Amusa Nahum, Nahuma Hesəla, Hesəla Nagay, 26Nagaya Mahat, Mahata Matatiyas, Matatiyasa Samayiŋ, Samayiŋa Yusek, Yuseka Yuda, 27Yuda Yuwana, Yuwana Resa, Resa Zərubavel, Zerubabela Salatiyel, Salatiyela Neri, 28Nera Malki, Malki Adi, Adi Kasam, Kasama Elmadama, Elmadama Yera, 29Yera Dzesuwa, Dzesuwa Eliʼezer, Eliyezera Yurima, Yurima Matat, Matata Levi, 30Leva Simeyuna, Simeyuna Yudah, Yudaha Yusufu, Yusufa Yunam, Yunama Iliyakim, 31Iliyakima Meleya, Meleya Mena, Mena Matat, Matata Nataŋ, Nataŋa Dawuda, 32Dawuda Yesay, Yesaya Ubed, Ubeda Bughaz, Bughaza Salmuŋ, Salmuŋa Nasuŋ, 33Nasuŋa Amminadav, Aminadava Admin, Admina Arni, Arni Hesərum, Hesruma Fares, Faresa Yuda, 34Yuda Yakubu, Yakubu Izak, Izaka Abraham, Abrahama Tera, Tera Nahur, 35Nahura Seruk, Serukwa Ragaw, Ragawa Falek, Faleka Ghever, Hebera Sala, 36Sala Kayinam, Kayinama Afaksad, Afaksada Sem, Sem Nuhu, Nuhwa Lamek, 37Lameka Matusalah, Matusalaha Inuk, Inukwa Yeret, Yereda Maleleyel, Maleleyela Kayinan, 38Kayinana Inus, Inusa Set, Seta *Adamu, Adamu ya Zwaŋa Lazglafta.

Currently Selected:

Luk 3: xed

Highlight

Copy