Jon 10
10
Kibu sipsip tomogae tomode bidibo po begelama wai
1Jisasgo te po wai, “Mu po eno dagebolo obao. Bidi kibu sipsip bidibo bagulali obo tomogae tomoba pabo tųdu dolo pisąbo bidi da, te tialima agai gasa badu tomogae bolama tomoba pabo bidi yai baso da, teda te tebo bidi aga te nai wi sabo bidi dao, mena nai anoma elama sabo bidi dao. 2Tialima, bidi tųdu tomoba pabo bidi, te aga sipsip tonalubo bidi dao,” te po wai. 3“Te sipsip tonalubo bidi asobaso, te sipsip tomogai tų tonalubo bidi agai te tų dalama, tama te sipsip tonalubo bidi tomoba pelama, tama agai aga kibu sipsip nogi deli deli i wabo dao. Sipsip dabe i olama, tama aga polasa pobaso, tama te sipsip dabe augwali aga wali buluba soabo dao, te tubo noswai gegemainogo tebo dao. 4Tama augwali tigidali buluba teda soabode, te sipsip tonalubo bidi aga polasa peyu, augwali aga wali pabo dao. Magi basowe? Augwaligo aga po wabo dogoni odoyu, wali pabo dao. 5Augwali gasa bidi wali me pabo menio. Augwali te bidigo po wabo dogoni odolama, tama konesiąwai dogonigo po obaso, augwali wi pabo dao,” Jisasgo te we bidibolo te po wai. 6Jisasgo te po begelama, augwali dali wai. Tialima, augwaligo Jisasgo te wali po page augwaligo konebeo.
7Te augwaligo Jisasgo wali po digi begelai po page konesiąbaso, agai augwalibolo te po ma wai, “Eno mu po dage dali obao, ena digi ena da kibu sipsipgo tomogai tų palialubo bidi dao,” te po wai. 8“Te ena nosali asobadi, polasa asali te bidi dabe augwali nai wi sabo bage dao, dage meba tiwai dao, te mena nai anoma elama, nai wi sabo bage dao. Tialima, te sipsip dabe augwaligo te bidi dabego wali po odobeo. 9Ena digi ena te tomogai tų tiwai dao. Te kibu sipsip dabe tomogai tomoba pelama, tama bugagia bidiyu, buluba ma soyu, tede nai tuyu elama, bugagia bidibo dao. Te tiwai egilama yaibao, bidi me ena bidibo digi asobaso da, aga Godigo tau selama, ma saibao. Tama te bidi dwagi yai madide bugagia bidaibao, te kibu sipsip bidibo tiwai egilama. 10Te tibo po wabo bidi, aga te sipsip wi sabo bidi tiwai dao, te wi sabo bidi agai te homu deli naga elasa asai, agai te sipsip dabe wi siyu, ela munama, doloyu yainogo, te homu naga elasa asai. Tialima eno da, we bidi augwaligo bidabo bomo somainogo ena asai. Tama te bidabo bomo augwalide mu pągąna pomainogo, ena asai dao,” Jisasgo te po wai.
Jisas aga dwagi yai kibu sipsip tonalubo bidi dao
11Jisasgo te po me wai, “Ena te kibu sipsip dabe bugagia tonalubo bidi dao. Te kibu sipsip bugagia tonalubo bidi agai te homu ebo dao, ‘Ena te sipsip tau sabo sę ebadi, tama te sipsip kibu elainogo asali bidigo ena me elebaso da, te usu dao,’ te kibu sipsip bugagia tonalubo bidigo te homu ebo dao. 12Tiali digi sipsip tonalubo masigi sabo sę naga ebo bidi, tama agai sipsip tonalubo bidi mu meni, te sipsip kibu aya wasiąwai bidi, aga te uni yowi asobaso, te sipsip dabe taga peyu, wi pabo dao. Tama tibaso, uni yowigo te sipsip kibu dabe ela tuyu, me badu wi pabo dao. 13Magi baso te bidi wi pabo dawe? Te bidigo masigi sabo sę naga yai. Agai te kibu sipsip dabede homu dene eyu, tau sabo homu isiąwai bidi dao. 14-15Ena da, te kibu sipsip dabe bugagia tonalubo bidi da. Eno Ayago ena konebo dao, te eno ena Aya me konebo dao. Tama te tiwai egilama, eno ena kibu sipsip konebo dao, augwaligo me ena konebo dao. Eno te sipsip tau sidubadi, bidi mego ena ela muiyu da, te usu dao. Eno homu ena te sipsip tau saibao. 16Eno gasa sipsip me elalubuo. Megi augwali e tomogai tomode bidibo menio. Te me eno sigi pelama, odasa asaibao, e tomogai tomoba muaibao. Tama augwaligo eno po odaibao. Tama deli kibu sipsip hani bidaibao, tama te sipsip dabe tonalubo bidi deli digi yaibao.
17Ena bidabo bomo te eno kibu sipsip tobade tagalaibao. Tama tibaso, Ayago ena godolo mu ebo dao. Tama nosali eno te bidabo bomo ma somai hagede eno te homu elama, ena bidabo bomo te kibu sipsip tobade tau siyu hasia tagalaibao. 18Bidi me deligo eno bidabo bomo me sela sągobeo. Magi basowe? Ena digi ena homugo koneama, tama ena bidabo bomo ena kibu sipsip tobade tagalaibao. Tama ena bomogo bidabo bomo tagalama, tama bidabo bomo ena ma sabo elalubuo. Ena Ayago enabolo te sę ya wai dao,” Jisasgo te po wai.
19Juda bage augwaligo te po odolama, augwali bidi hani si ma bugai. 20Bidi hauwago te po wai, “Dwai haubo noma bidi agade bidiyu, aga polobao. Magi baso dagego agai po odobawe?” Juda bage me badugo Jisasde te po wai. 21Meba bidigo te po wai, “Te bidi Jisasde dwai haubo noma bidi bidigi sogo da, teda agai te tobage po wagi menigi da. Dwai noma bidigo gedu widai bidi gedu pedalaibawe?” Juda bage mebago Jisasde te po wai.
Juda bage augwaligo Jisas dali boi bidi homu yai
22Te kedau side, Jerusalem moni hanude te Juda bagego olo bidibo si pedalali. Te olo bidibo si page e dao. Polobadu boi bidi mego te habu selali bolama, tama te Moni Lotu Be tempel dwai meda ilai, habu selali nai te be tomoba mugi pali. Tama nosali te Juda dabe augwaligo te be ma dwagi yai ilama, tų ma dawai. Nosali tigidali kibu bede te sogo ma konemainogo eyu, te side augwaligo olo bidibo sogo dao wai. 23Tama te olo bidibo side Jisas aga te Moni Lotu Be tempel moni mabode bilali. Tama te be mabo te polobadu genuai nogi yali bidi Solomon agai nigali be mabo dao. 24Jisas te moni be mabode bilibadi, tama Juda bage aselama, Jisas bagulama, te po wai, “Nisu naga sogo nago dago homu si pedemainogo ebawe?” Juda bagego Jisas dali te po wai. “Nage Godigo sa muyu asaiba wali bidi da, te Krais bidi da wida, nago po hanilama, da dali wao,” augwaligo te po wai.
25Jisasgo augwali dali te po wai, “Eno dagebolo polobadu wai dao. Tama tiali goli, dagego eno po mu po dao homu ebeo. Eno Ayago tigidali bomo yai sę eno agai nogide te sę yao obaso, tama tigidali ena konesiąwani we bidi eno te ebo sęde sulama, ena konemainogo, eno te sę ebo dao. 26Tiali goli, dagego enabolo duga homu dąų olama, mubeo. Magi basowe? Dage da eno kibu sipsip menio. 27Eno kibu sipsip dabego eno po wabo dogoni odobo dao. Eno augwali koneai, tama augwali ena wali asobo dao. 28Tama eno augwali bidada peyu, bidada pabo bomo mobao, tama augwali munu me isigobeo, hagagobeo. Menio. Bidi me deligo augwali eno nogode ma dobola sabo usu egobeo. 29Magi basowe? Eno Aya agai augwali enabolo mawai. Agai bomo te gasa bidi tigidaligo bomo aiyaba elalubo dao. Tama tibaso, bidi mego Ayago nogode augwali dobola sabo usu egobeo. 30Ena dali Aya dali si page deli tama dao,” Jisasgo te po te Juda bage dali wai.
31Te Juda bage augwaligo te po odolama, tama augwaligo masigi ma selama, tama Jisas tigiba masigi sąwai hagede, aga elemainogo yai. 32Jisasgo augwalibolo te po wai, “Eno dagebolo Ayago dwagi yai bomo yai sę hauwa ola mawai dao. Tama dagego eno te yali sęde dwai sę me deli ebo sulama, tama dagego te homu eyu, ena masigi sąnama elainogo ebawe?” Jisasgo augwali dali te po wai. 33Tama Juda bage augwaligo Jisas dali po bomo elama weyu, te po wai, “Dago homugo nago de dwagi yai sę yalide dago te homu elama, nage masigi sąnama elainogo ebeo. Nage olo tǫde bidi tiwai digi, nago Godibolo posobo po weyu, te po wai, naga digi nage te God dao, te po obaso dago nage masigi sąnama elainogo ebao,” augwaligo te po wai.
34Jisasgo te po augwali dali wai, “Dagego bomo yai po asęani bukude te God agai wali po me deli elalubao, e dao, ‘Eno te po wai, “Dage da God dabe dao,” ’ te bukude te asęani po elalubao. #Tib 82:6 35Tama dago koneai, Godigo te bukude asęani po te mu po tigidali sogo mu po dao. Tama te po tomode God agai te gasa we bidi tonalubo we bidi augwali god dabe dao wai. Te we bidibolo God agai po mawai dao. 36Tialima God aga digi ena sa muyu, e tǫba tagala palai. Tama eno te po wai dao, ‘Ena da Godigo Ogwa dao.’ Tama tilama, dagego enabolo magi baso ‘Nage Godigo nogi dwai posobo po wai dao,’ waliwe? 37Eno Ayago enabolo yao wali sę eno egi menigi sogo da, teda duga homu enaba mugimio. 38Dagego duga homu eno wali poba musiąwai goli, eno Godigo enabolo yao wali sę eyu da, teda dagego duga homu te yali sęba muiąo. Magi basowe? Te eno yali sęba duga homu mubaso da, te dagego homu bugagia mu koneaibao, God Aya enade bidiyu, ena God Ayade bidiyu ebao, te dagego konemainogo duga homu eno yali sęba muao,” Jisasgo te po wai.
39Te Juda bage augwaligo Jisas nogo bono duainogo homu ma yai. Tialima, agai augwali bidibo digi tagalama, gasa badu pai.
40Te Jisas ma pelama, Jordan pabo ąį ma togogi pelama, tama pelama, Jongo we bidi polobadu baptais mani te bulu sabolama, Jisas te bulude bidai. 41Tama te we bidi hauwa Jisas bidibo digi asai. Augwaligo te po wai, “Mu tamao, Jongo e bidigo ebo bomo yai sę me deli yai menio. Tiali digi tigidali po Jongo Jisasde wali po mu tama wai,” augwaligo te po wai. 42Tama tede we bidi hauwa augwaligo augwa bomo yai homu dąų olama, Jisasba muani.
Currently Selected:
Jon 10: mps
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
