Daa 25
25
Ablahaũ nɛ pãleɔ
1Ablahaũ nɔ pãle sɛ̀ lɔ, aà tɔ́n Kɛtula. 2Nɛ pɔ à ìaanɔɔ tɔ́ɔn kɛ: Zimana, Yosã, Mɛdã, Madiã, Isebaki, Sua. 3Yosã mɛ́ Seba ń Dedão ì. Dedã buiɔn Asuluɔ ń Lɛtusiɔ ń Lɛumiɔ ũ. 4Madiã nɛgɔ̃ɛɔ tɔ́ɔn kɛ: Efa, Efɛɛ, Anɔki, Abida, Ɛlɛdaa. Ampii Kɛtula buiɔnɛ.
5Ablahaũ a aizɛɛ kpà Izaakiwa pii, 6ɔ̃ à gbadà a nɔ pɔ i mɛsɛdilɛnɛ́oɔ nɛɔnɛ, à ń gbaɛ gukpɛ oi e àɔ gɛ́ gai, kɛ́ aasu aaɔ ku gudoũ ń Izaakioo.
Ablahaũ gaa
7Ablahaũ kɛ̀ wɛ̃̀ baswaaɔ̃kwi ń sɔooɛ, 8ɔ̃ à gà. À zikũ̀ taotao, ɔ̃ à gbàsa zù a gbɛ̃́ɔ guu. 9Aà nɛɔ Izaaki ń Isimaɛlao aa aà vĩ̀ Mapela gbɛ'ɛu, Mamale gukpɛ, búa pɔ dɛ Iti bui Zohaa nɛ Ɛfɔ̃nɔ pɔ ũ yãa, 10ɔ̃ Ablahaũ lù Hitiɔwa.#Daa 23.17 Wekĩi ɔ̃ wà aà vĩ̀u ń a na Salao. 11Ablahaũ gaa gbɛa Lua baaadà aà nɛ Izaakigu. A zɔ̃lɛa Luabɛ̃ɛpɔima'e lɔ̀ɔ saɛ.
Isimaɛla buiɔ
12Ablahaũ nɛ Isimaɛla buiɔ yãn kɛ. Sala zɔnɔɛ Hagaa, Egipi nɔɛ, ɔ̃ Ablahaũ nɛpi ìaanɔ. 13Aà nɛgɔ̃ɛɔ tɔ́ɔn kɛ an iawa. Aà nɛgɔ̃ɛ sɛ̃ia tɔ́n Nɛbaio. Aà dãunaɔ tɔ́ɔn kɛ: Kedaa, Adibɛɛli, Mibisã, 14Misima, Duma, Masa, 15Adada, Tema, Yetuu, Nafisi, Kedema. 16Isimaɛla nɛgɔ̃ɛɔ tɔ́ɔn we. An baade a tɔkpà a wɛ̃lɛɛ ge a bòoɛ. Aamɛ bui kuɛplaɔ dezikaauɔ ũ.
17Isimaɛla kɛ̀ wɛ̃̀ basopla aaɔ̃sai, ɔ̃ à gà, à zù a gbɛ̃́ɔ guu. 18Aà buiɔ zɔ̃̀lɛ za Avila e à gɛ̀ pɛ̀ Suluwa Egipi busu lɛi taa Asili busu oi. Aali kɔ̃tɛsi ń Ablahaũ bui kĩniɔo.#Daa 16.12
Esau ń Yakɔbuo ia
19Ablahaũ nɛ Izaaki buiɔ yãn kɛ: Ablahaũ Izaaki ì. 20Kɛ́ Izaaki kà wɛ̃̀ bla ɔ̃ à Labã dãe Lɛbɛka sɛ̀. Ɔ̃mɛ Sili busu gbɛ̃́ Bɛtuɛ pɔ bɔ̀ Mɛsɔpɔtami busuu nɛ ũ. 21Izaaki wabikɛ̀ Diiwa a naɛ, asa fĩiɛ, ɔ̃ Dii sìaanɔ, aà napi nɔsì. 22Sìaɔ lɛ́ dɛ̃ɛka aà gbɛɛu, ɔ̃ à mɛ̀: Bɔyãi yã bee taa ma lei? Ɔ̃ à gɛ̀ Dii lai. 23Ɔ̃ Dii òɛ̀:
Bui mɛn pla ku n nɛasakpɛu,
gbɛ̃ɔn pla pɔ ku n gbɛɛupiɔ aa kɛ̃kɔ̃wa.
Bui mɛndo gbãa aɔ dɛ adola,
gbɛ̃́ pɔ bɔ̀ káau a gɔ̃ nɛ ũ gbɛ̃́ zã́ɛ.#25.23 Buipiɔ kĩi sìa ia guu, nɛ pɔ bɔ̀ káau ɔ̃mɛ ìɔ gbɛ̃zɔ̃ɔ ũ #Lom 9.12
24Kɛ́ aà nɛ'igɔɔ kà, à sìaɔ ì gɔ̃ɛɔ ũ. 25Kɛ́ gbɛ̃kaau lɛ́ bɔ, à bɔ̀ tɛ̃ndɔ̃ɔdɔ̃ɔ. Aà mɛkã kà ula ũ, ɔ̃ wà tɔkpàɛ̀ Esau.#25.25 Bee mɛ̀ kãde 26Bee gbɛa kɛ́ nɛ plaade lɛ́ bɔ, à dɔ̀ Esau gbatoewa, ɔ̃ wà tɔkpàɛ̀ Yakɔbu.#25.26 Bee mɛ̀ gbatoekũna ge gbɛ̃fuangbana Izaaki wɛ̃̀ baaɔ̃deu ɔ̃ à nɛpiɔ ì.
27Nɛpiɔ zɔ̃ɔkũ̀. Esau kɛ̀ toensa pɔ lí kɛ̃́ sɛ̃awao ũ. Yakɔbu sɔ̃ bɛgwanaɛ. 28Izaaki ye Esauzi, kɛ́ a lɛ'u vĩ yãi. Lɛbɛka sɔ̃ a ye Yakɔbuzi.
29Zĩewa Yakɔbu lɛ́ dokuu, ɔ̃ Esau sù ń sɛ̃ao, nɔana lɛ́ aà dɛ. 30Ɔ̃ a ò Yakɔbuɛ: N yã na! To mà blɛ tɛ̃a bee e mà ble, asa nɔana lɛ́ ma dɛɛ. Ayãmɛto wà tɔkpà Esauɛ Ɛdɔũ.#25.30 Bee mɛ̀ tɛ̃a 31Yakɔbu mɛ̀: Ǹ n yoakɛzɛ#25.31 Nɛgɔ̃ɛ sɛ̃ia mɛ́ gbɛ̃zɔ̃ɔ ũ, ɔ̃mɛ ì tubisɛ dɛńla kpaa gĩ́a. 32Ɔ̃ Esau mɛ̀: Ma ka gaaɛ, bɔ́ ma yoakɛzɛ a kɛmɛɛi? 33Ɔ̃ Yakɔbu òɛ̀: Mɛ ń sì ń Luao gĩ́a. Ɔ̃ à mɛ̀ á sì ń Luao, a a yoakɛzɛ kpàwàɛ.#Hɛb 12.16 34Ɔ̃ Yakɔbu pɛ̃ɛ ń blaa dopio kpàwà. A blè, à imì, ɔ̃ à fɛ̀lɛ bɔ̀. Beewa Esau a yoakɛzɛ dìlɛ pã.
Currently Selected:
Daa 25: Boo2024
Highlight
Share
Copy
Want to have your highlights saved across all your devices? Sign up or sign in
Boko Bible © SIM International, 2024.
