Luk 11

Wabikɛa

(Mat 6.9-15, 7.7-11)

1Zĩewa Yesu lɛ́ wabikɛ guei. Kɛ́ a làa, aà iwae òɛ̀: Dii, wabikɛa dawɛ̃ɛ lá Zãa dà a iwaɔnɛwa. 2Ɔ̃ a ònɛ́: Tó álɛ wabikɛ, àli mɛ:

Baa, to wà n tɔ́ kuaadoakɛ dɔ̃.

To kia pɔ ń kpà mɔ́.

3Wá gba u pɔ wáɔ ble lagulɛdɔ.

4Wá duuna kɛ̃wá,

asa wi gbɛ̃́ pɔ taaekɛ̀wɛ̃ɛɔ kɛ̃ piiɛ.

Nsu to wà fu yɔ̃awao.

5Ɔ̃ a ònɛ́: Gbɛ̃e mɛ́ gbɛ̃na vĩ, ɔ̃ à gɛ̀ aà kĩi wɛɛdo a òɛ̀: Ma mɔ n kĩiɛ, pɛ̃ɛ sɛ̃amɛɛ mɛn aaɔ̃. 6Nibɔe pìlaa tiaɛ, má pɔe vĩ mà kpawào. 7Ɔ̃ aà gbɛ̃napi wèwà za kpɛa à mɛ̀: Nsu ĩadaao, ma zɛtà kɔ̀. Ma ta kpɛ́u ń ma nɛɔ, má fɔ̃ mà fɛlɛ mà kpamao. 8Malɛ oɛ́, baa tó i fɛlɛ a kpàwà gbɛ̃nakɛ yãio, a fɛlɛ à pɔ pɔ a yeipi kpawà kɛ́ a zɛazi yãi. 9Mapi sɔ̃ malɛ oɛ́, à wabikɛ, Lua i kpawá. À wɛɛlɛ, í e. À gbalɛ, Lua i wɛ̃ɛ́. 10Asa gbɛ̃́ pɔ wabikɛ̀, wì aà gbaɛ, gbɛ̃́ pɔ pɔ wɛ̀ɛlɛ ì eɛ, mɛ́ gbɛ̃́ pɔ gbalɛ̀, wa wɛ̃ɛ̀ɛ. 11Á gbɛ̃́ pɔ á nɛɔ vĩ, tó á nɛ kpɔ wabikɛ̀wá, á demɛ a piligona kpawài? 12Ge tó à kogbe wabikɛ̀wá, á demɛ a soi kpawài? 13Baa ń á vãikɛo, lá á pɔmaa kpaa á nɛɔwa dɔ̃, á Mae pɔ ku musu a a Nisĩna kpa gbɛ̃́ pɔ à a wabikɛ̀wawao le?

Tãagoa

(Mat 12.22-30, 12.43-45; Maa 3.20-27)

14Yesu lɛ́ tãa swãdo go gbɛ̃́wa. Kɛ́ à tãapi gò, swãdopi nà yã'oawa, ɔ̃ yãpi bɔ̀ bila saɛ. 15Ɔ̃ an gbɛ̃eɔ mɛ̀: Ì tãagonɛ́ ń tãaɔ ki Beezebu tɔ́oɛ. 16Ɔ̃ gbɛ̃pãleɔ lɛ́ likpalɛwà, aa gbɛ̀awa aà seelae kɛnɛ́ ń Lua gbãao. 17Lá Yesu ń laasoo dɔ̃, ɔ̃ a ònɛ́: Kpala pɔ a gbɛ̃́ɔ ibɛlɛsɛ̀ ń kɔ̃o a midɛ. Ua pɔ a gbɛ̃́ɔ ibɛlɛsɛ̀ ń kɔ̃o a gɔ̃ uazĩ ũɛ. 18Tó Setãu ibɛlɛsɛ̀ ń azĩao, kpelewa aà kpala aɔ zɛai? Má ò màa kɛ́ i mɛ mi tãagonɛ́ ń Beezebu tɔ́o yãiɛ. 19Tó Beezebu tɔ́ mi tãaɔ goò, á gbɛ̃́ɔ ì go ń dé tɔ́o ni? Beewa ázĩa gbɛ̃́ɔ yã'ĩikpàwá. 20Lá ma tãaɔ goamáá Lua ɔgbɛɛ, àɔ dɔ̃ kɛ́ kia pɔ Lua kpà á kĩi lèn we. 21Tó gɔ̃sa gbãa gɔ̃kɛbɔɔ kũa, àlɛ a ua dɔ̃́aò, aà aizɛɛɔ ìɔ aafiaɛ. 22Ãma tó gbɛ̃́ pɔ a gbãa dɛaala mɔ̀ gɛ̃̀ à gbãamɔ̀ɛ̀, a aà gɔ̃kɛbɔ pɔ a a naai vĩɔ sɛlɛ, i aà aizɛɛɔ biilɛnɛ́. 23Gbɛ̃́ pɔ dɛ ma gbɛ̃́ ũo, ma ibɛɛɛ. Gbɛ̃́ pɔ lí pɔ kãaamanɔo, àlɛ fãaaɛ.

24Tó wà tãagò gbɛ̃́ɛ, ìɔ liaaliaa gugiiu àɔ gbɛ̃́ wɛɛlɛ à diɛ̀ɛ. Tó i eo, ì mɛ: Má ɛa mà ta ma sɔ̃́ ziwaɛ. 25Tó à tà we, ì e a bɛ ado, à zu'ò, à azĩa kɛ̀kɛ wasawasa, 26ɔ̃ ì ɛa gɛ́, i tãa pɔ an vãi dɛalaɔ sɛlɛ à suńnɔ mɛn sopla, aaì diɛ̀. Beewa gbɛ̃́pi gwea gbɛzã vãi ì dɛ a káaua.

27Kɛ́ Yesu lɛ́ o màa, wà nɔɛe mà, à pũ̀na zã guu à mɛ̀: Baaaden nɔɛ pɔ n i à yɔ̃kpàma ũ. 28Ɔ̃ Yesu mɛ̀: Baaadeɔn gbɛ̃́ pɔ aa Lua yãmà aa kũaɔ ũ dɛ beea.

Seela gbɛaa Yesuwa

(Mat 6.22-23, 12.38-42)

29Wà nɔ̀nɔaa, ɔ̃ Yesu mɛ̀: Gbãgbɛ̃ɔ vãi. Aaì seela gbɛaa, ãma má seelae kɛnɛ́o, sema Yonasi pɔ. 30Lá Yonasi dɛ seela ũ Ninivadeɔnɛ,#Yon 3.4 màa Gbɛ̃nazĩn Nɛ aɔ dɛ seela ũ gbãgbɛ̃ɔnɛ. 31Yãkpalɛkɛgɔɔzĩ gɛɔmidɔkĩi oi nɔɛ kia a fɛlɛ yãda gbãgbɛ̃ɔlaɛ, asa à bɔ̀ za tɔɔlɛlɛwa à mɔ̀ Salomɔ ɔ̃nɔyã maiɛ,#1 Kia 10.1-10 mɛ́ gbɛ̃́ pɔ a zɔ̃ɔ dɛ Salomɔa ku la. 32Yãkpalɛkɛgɔɔzĩ Ninivadeɔ fɛlɛ aa yãda gbãgbɛ̃ɔlaɛ, asa kɛ́ Ninivadeɔ Yonasi waaso mà, aa nɔsɛlìlɛɛ,#Yon 3.5 mɛ́ gbɛ̃́ pɔ a zɔ̃ɔ dɛ Yonasia ku la.

33Wìli filia na wà dilɛ gu sɔ̀ɔnauo ge wà pɛ̃na kulɛwào. Wì di babanawaɛ, kɛ́ gbɛ̃́ pɔ aalɛ gɛ̃ɔ gupua e.#Luk 8.16 34N wɛ́ mɛ́ n mɛ̀ filia ũ. Tó n wɛ́ aafia, n mɛ̀ pii aɔ gupua vĩɛ. Tó n wɛ́ aafiao sɔ̃, n mɛ̀ pii aɔ gusia vĩɛ. 35Ayãmɛto laaika kɛ́ gupua pɔ nlɛ e ń vĩ su àɔ dɛ gusia ũo. 36Tó n mɛ̀ bṹu gupua vĩ mɛ́ a kee ku gusiauo, aɔ gupu wasawasa landɔ̃ filia í ì dɔmawaɛ.

Yesu zɔadɔa Yuda gbãadeɔwa

(Mat 23.1-36; Maa 12.38-40; Luk 20.45-47)

37Kɛ́ Yesu yã'ò a làa, ɔ̃ Falisie wabikɛ̀wà aà mɔ pɔbleanɔ, ɔ̃ à gɛ̃̀ zɔ̃̀lɛ. 38Kɛ́ Falisipi è i ɔpipi lá aaì kɛwa à gbàsa àlɛ pɔbleo, à bɔ̀ aà saɛ. 39Ɔ̃ Dii òɛ̀: Á Falisiɔ i gbãbɔ bisaɔ kpɛɛ ń taɔ, kási bĩi ń yãvãikɛao mɛ́ á nɔ̀sɛ pà. 40Sɔũɔ! Lua pɔ a kpɛ kɛ̀ i a guu kɛo le? 41À pɔ pɔ ku á taɔ guu dã wɛ̃nadeɔnɛ, á tapiɔ i gɔ̃ɛ́ gbãlɛsai.

42Waiyoo á Falisiɔ! I toeɔ dosina ń kpɛaanao ń dopɔɔ pii kwide kpa Luawa,#Lev 27.30 ɔ̃ i pãkpa yãgɔ̃gɔ̃a a zɛ́wai ń yea Luapizio. Yãpiɔ mɛ́ dɛ àɔ kũa pãkpaa a kĩniɔzi sai. 43Waiyoo á Falisiɔ! Iɔ ye zɔ̃lɛa gumaaɔu luasisikpɛu, iɔ ye wàɔ fɔkpakpawá gãaɛ. 44Waiyoo apiɔ! Á dɛ lan mia kpɛɛna pɔ wìɔ taa'owà dɔ̃saiwaɛ.

45Ɔ̃ ikoyãdɔ̃nae òɛ̀: Mɛtulu, tó ń ò màa, nlɛ wá sɔ̃sɔ̃ sɔ̃ɛ. 46Yesu mɛ̀: Waiyoo á ikoyãdɔ̃naɔ sɔ̃! I gbɛ̃́ɔ da asosɛa zĩ'ũu, mɛ́ ili ɔdamá ń a sɛaoo, baa ɔton do. Waiyoo apiɔ! 47I pɔ bo ãnabi pɔ á deziɔ ń dɛdɛ̀ɔ miaɔwa dɔngu yãi. 48Bee lɛ́ ɔlɔ gbɛ̃́ɔnɛ kɛ́ a zɛ ń á deziɔ yãkɛaɔɛ. Aa ãnabiɔ dɛ̀dɛ, ɔ̃ álɛ pɔbobo an miaɔwa. 49Ayãmɛto Lua ɔ̃nɔ guu à mɛ̀ á ãnabiɔ ń zĩnaɔ gbaɛwá, í ń gbɛ̃eɔ dɛdɛ, í ĩada ń gbɛ̃eɔwa. 50Lua a ãnabi pɔ wà ń dɛdɛ̀ za dũnia daalɛgɔɔ e gbãɔ au tɔsi gbãgbɛ̃piɔwa. 51Ao, malɛ oɛ́, za Abɛli dɛa#Daa 4.8 e à gɛ̀ pɛ̀ Zakali pɔ wa dɛ̀ sa'okĩi ń luakpɛo zãnguowa,#2 Lad 24.10-21 Lua a ń au tɔsi gbãgbɛ̃ɔwaɛ. 52Waiyoo á ikoyãdɔ̃naɔ! A dɔ̃a zɛ́ kili wò. I gɛ̃uo, mɛ́ a gi gbɛ̃́ pɔ aa ye wà gɛ̃uɔnɛ. 53Kɛ́ Yesu bɔ̀ we, Mɔizi ikoyãdanɛdeɔ ń Falisiɔ aa aà lèle pãsĩpãsĩ, aalɛ yãlalawà dasidasi, 54aalɛ aà kpakpa kɛ́ wà e wà aà kũ aà yã'oa guu.

Currently Selected:

Luk 11: Boo2024

Highlight

Copy