Luk 12

Zɛa ń Yesuo gbɛ̃́ɔ aɛ

(Mat 10.19-33)

1Gɔɔ bee bila nɔ̀nɔaaaazi, wa ń dasilɛ dɔ̃o, e wàlɛ kɛsɛpɛlɛpɛlɛkɔ̃wa, ɔ̃ à yã'ò a iwaɔnɛ gĩ́a à mɛ̀: À laaika Falisiɔ mɔafilii, ì lińla lan pɛ̃ɛsɛ'ɛsɛwaɛ. 2Yã pɔ ulɛa a bɔ gupuau pii. Asiiyãe ku kɛ́ wa gi dɔ̃io.#Luk 8.17 3Beewa yã pɔ á ò gusiau, wa ma gupuau, mɛ́ asiiyã pɔ á ò kɔ̃ swãu kpɛa, wa a kpawakɛ gãaɛ.

4Ma gbɛ̃naɔ, malɛ oɛ́, gbɛ̃́ pɔ a á dɛ mɛ́ a gbɛa a fɔ̃ yãe kɛɛ́ lɔo, ásuli vĩakɛɛ̀o. 5Má gbɛ̃́ pɔ dɛ àli vĩakɛɛ̀ oɛ́. Àli vĩakɛ Lua pɔ gbɛ̃́ zua tɛ́ guu aà ga gbɛa iko vĩɛ. Ao, malɛ oɛ́, àli vĩakɛ aapiɛ. 6Wìli golegolena mɛn sɔo yia daa plao le? Kási baa a mɛndo yã lí sã Luaguo. 7Baa á mikãɔ, a a lɛ́ dɔ̃ɛ. Ásuli vĩakɛo, á bɛɛɛ dɛ golegolenaɔla dasi.

8Malɛ oɛ́, gbɛ̃́ pɔ zɛ̀manɔ gbɛ̃́ɔ wáa, Gbɛ̃nazĩn Nɛ a zɛaanɔ Lua malaikaɔ wáa. 9Gbɛ̃́ pɔ lelekpàmazi gbɛ̃́ɔ aɛ sɔ̃, má lelekpaaazi Lua malaikaɔ aɛ. 10Tó gbɛ̃́ Gbɛ̃nazĩn Nɛ bɛ̃ɛbò, Lua a aà kɛ̃́. Ãma tó gbɛ̃́ Lua Nisĩna tɔbɛ̃ɛsì, a kɛ̃a vĩo. 11Tó wàlɛ gɛ́ánɔ yãkpalɛu luasisikpɛu ge kiaɔ ń gbãadeɔ aɛ, ásu bilikɛ bɔkĩi ge yã pɔ á wemáwao, 12asa Lua Nisĩna mɛ́ a yã pɔ dɛ à o daɛ́ zĩbeezĩ.

Aizɛɛ

(Mat 6.19-34)

13Zã guu gbɛ̃e ò Yesuɛ: Mɛtulu, o ma vĩiɛ aà ma asea kpaa wá tubi guu. 14Ɔ̃ a wèwà à mɛ̀: Ma gbɛ̃́, demɛ ma dilɛ á yãkpalɛkɛna ge á tubi kpaalɛna ũi? 15Ɔ̃ a ò bilaɛ: Àɔ ázĩa kũa dɔ̃. À laaika pɔpii bĩikɛai, asa aizɛɛá gbɛ̃nazĩna wɛ̃ni no, baa tó a zɔ̃ɔ.

16Ɔ̃ à yãlɛ̀ɛũnɛ́ à mɛ̀: Ɔdee mɛ́ ku, aà bua blɛkɛ̀ɛ̀ maamaa, 17ɔ̃ à laasookɛ̀ à mɛ̀: Má kɛ kpelewa ni? Má blɛwɛnkakĩi vĩo. 18Ɔ̃ à mɛ̀: Lá má kɛn kɛ: Má a blɛwɛnkakĩiɔ gbooɛ, mí a zɔ̃ɔɔ bobo, mí a blɛwɛna kau pii ń ma aizɛɛɔ, 19mí o mazĩaɛ: Ma gbɛ̃́, ń kũsũa vĩ zɔ̃ɔ, a kannɔ wɛ̃ ũma? Kãmabo, pɔble, imi, pɔnakɛ. 20Ɔ̃ Lua òɛ̀: Sɔũ, gwãasĩnaɛ bee má n wɛ̃ni gbɛama. Sɔu pɔ ń kɛ̀ a gɔ̃ dé pɔ ũ ni? 21Màa aɔ dɛ ń gbɛ̃́ pɔ lɛ́ aizɛɛ kãaa azĩaɛ mɛ́ a dɛ ɔde ũ Luaɛoo.

22Ɔ̃ a ò a iwaɔnɛ: Ayãmɛto malɛ oɛ́, ásuli á wɛ̃ni kãakɛ pɔblea yãmusuo, ásuli á mɛ kãakɛ pɔkasa yãmusuo. 23Wɛ̃ni dɛ pɔbleala, mɛ dɛ pɔkasala. 24À gbagbaaɔ gwa. Aali pɔtɔ̃o, aali pɔkɛkɛo, aa dɔ̃ ge gbà zoolo vĩo, mɛ́ Lua ì ń gwa. Á dɛ bãɔla zɔ̃ɔo le? 25Á guu demɛ a fɔ̃ à a wɛ̃ni gbã̀a kãfĩ, baa gɔɔ do, a yãkãakɛa guui? 26Lá á yã yɔɔnapi fɔ̃o, bɔyãi ìɔ yã kĩniɔ kãakɛi?

27À lavuɔ gwa sɛ̃u lá aa dɛ. Aali zĩkɛo, aali bua tão. Malɛ oɛ́ baa Salomɔ ń a ɔdekɛo,#1 Kia 10.4-7 i ula e dà a maa kà an keewao. 28Luanaaifɛ̃nɛndeɔ! Sɛ̃a lá pɔ ku gbã mɛ́ a tɛkũ zia, lá Lua ì pɔ nai màa, wa á pɔ o lɔe? 29Ásuli tó pɔ pɔ á ble ge pɔ pɔ á mi yã dɔaaɛ́o. Ásuli bilikɛo. 30Pɔpiɔ pii yã ì dɔaa dũnia buiɔnɛ, ãma á Mae dɔ̃ kɛ́ á ye pɔpiɔi. 31À to kpala pɔ Lua kpà yã dɔaaɛ́, i pɔpiɔ kãfĩɛ́. 32Ma sã wɛmplanaɔ, ásuli vĩakɛo, asa à kà á Maegu kɛ́ à á kpá kpalapiuɛ. 33À pɔ pɔ á vĩɔ yia, í wɛ̃nadeɔ gba a ɔ̃a. À mɔkpɛ pɔ lí zikũo zɔ̃, luabɛ aizɛɛ laasai kakĩi ũ. Kpãi lí sɔ̃i weo, kɔ̀ɔ lí pɔ ɔ̃ɔkpa weo. 34Gu pɔ á aizɛɛ kuu, wekĩi ɔ̃ á laai ìɔ kuu.

Zĩkɛn naaide laaide

(Mat 24.45-51)

35À sɔukɛ, à to á filia àɔ naa, 36íɔ dɛ lan gbɛ̃́ pɔ aalɛ ń dii sua ń nɔsɛpɔnakɛao dãɔwa, kɛ́ gɔɔ pɔ à sù mɛ́ à gbalɛ̀, wi zɛwɛ̃ɛ̀ gɔ̃̀ɔ. 37Baaadeɔ zĩkɛna pɔ an dii a ń le laaideɔ ũ a sugɔɔɔ. Sĩana malɛ oɛ́, diipi a a asanadɔ, i ń zɔ̃lɛzɔ̃lɛ, i pɔblea kãaanɛ́. 38Baa tó à kà wɛɛdo ge gufɛ̃nɛ, tó à ń lé laaideɔ ũ màa, baaadeɔn ń ũ. 39Àɔ yãɛ bee dɔ̃. Tó uabele kpãi mɔgɔɔ dɔ̃, a wei aà a kpɛ́ gbooo. 40Apiɔ sɔ̃ àɔ ku ń sɔuo, asa Gbɛ̃nazĩn Nɛ a mɔ gɔɔ pɔ á wɛ́ dɔiwao.

41Piɛɛ mɛ̀: Dii, yãpi lɛ̀ɛũaá wá yã yã̀, ge gbɛ̃pii yãɛ? 42Dii mɛ̀: Demɛ ziia naaide laaide pɔ aà dii a a zĩkɛnaɔ naɛ̀ a ɔzĩ aàli blɛ kpamá a gɔɔwa ũi? 43Baaaden zĩkɛna pɔ aà dii à aà lè, àlɛ kɛ màa a sugɔɔ ũ. 44Sĩana malɛ oɛ́, a a aizɛɛ pii naɛ̀ a ɔzĩɛ. 45Tó zĩkɛnapi ò a sɔ̃u a dii sua lɛ́ gɛ̃gɛ̃, ɔ̃ à fɛ̀lɛ nà zɔnɔɛ ge gɔ̃ɛɔ gbɛ̃gbɛ̃awa, àlɛ ulatãble, àlɛ wɛ̃dɛkɛ, 46aà dii a su gɔɔ pɔ aà wɛ́ dɔiowaɛ, zaa pɔ a dɔ̃owa, i aà zɔ̃ɛzɔ̃ɛ, i aà baa daaa ń luayãdansaiɔ. 47Zĩkɛna pɔ a dii pɔeã dɔ̃ mɛ́ i sɔukɛ à aà pɔeã kɛ̀o, wa aà gbɛ̃ dúuduuɛ. 48Zĩkɛna pɔ a a dii pɔeã dɔ̃o, mɛ́ à yã pɔ dɛ wà aà gbɛ̃ kɛ̀ sɔ̃, wa aà gbɛ̃ yɔɔɛ. Gbɛ̃́ pɔ Lua kpàwà zɔ̃ɔ ɔ̃ a wɛɛlɛwà zɔ̃ɔ. Gbɛ̃́ pɔ Lua pɔ nàɛ a ɔzĩ zɔ̃ɔ, a gbɛawà dɛńla.

Kɔ̃kpaalɛa Yesu yãi

(Mat 5.25-26, 10.34-36, 16.2-3)

49Tɛ́ ma mɔ sɔ̃i dũniawa, mɛ́ malɛ wã maamaa kɛ́ tɛ́pi kũ sa. 50Má sia gau vĩ mɛ́ ma pɔ yaa e à gɛ kaò. 51Álɛ e ma mɔ kɛ́ wàɔ na ń kɔ̃o dũniau yã? Aawo! Malɛ oɛ́, kɔ̃kpaalɛa yãi ma mɔi. 52Za tia ua pɔ gbɛ̃ɔn sɔo kuu aa kɔ̃kpaalɛɛ. Gbɛ̃ɔn aaɔ̃ɔ bɔ gbɛ̃ɔn plaɔ kpɛ, gbɛ̃ɔn plaɔ bɔ gbɛ̃ɔn aaɔ̃ɔ kpɛ. 53Mae a bɔ a nɛgɔ̃ɛ kpɛ, nɛgɔ̃ɛ i bɔ a mae kpɛ. Da a bɔ a nɛnɔɛ kpɛ, nɛnɔɛ i bɔ a da kpɛ. Zãda a bɔ nɛ na kpɛ, nɛ na i bɔ a zãda kpɛ.#Mis 7.6

54Yesu ò bilaɛ lɔ: Tó á è lou lɛ́ sisi gukpɛ, i o gɔ̃̀ɔ lou a ma, ɔ̃ ì kɛ màa. 55Tó á è ĩana lɛ́ bɔ gɛɔmidɔkĩi oi, i o gu a wã, ɔ̃ ì wã. 56Mɔafilideɔ! Á tɔɔlɛ ń musuo wɛ́ dɔ̃, mɛ́ á gɔɔɛ bee yaasi dɔ̃ sɔ̃o bɛ?

57Bɔyãi ázĩawa á yãzɛde dɔ̃o ni? 58Tó n ibɛɛ lɛ́ gɛ́nnɔ yãkpalɛu, kɔaikɛ aà n kɛ̃ za zɛ́u, kɛ́ asu à n galɛ à gɛ́nnɔ yãkpalɛkɛna kĩio yãi. Asa yãkpalɛkɛnapi a n kpa dɔaiwaɛ, dɔaipi i n da kpɛ́u. 59Malɛ onɛ, ńyɔ̃ bɔ weo e ǹ gɛ ǹ fĩapi bo pii. Baa tãnga a gɔ̃ tɛnzio.

Currently Selected:

Luk 12: Boo2024

Highlight

Copy