Luk 24

Yesu bɔa gau

(Mat 28.1-10; Maa 16.1-8; Zãa 20.1-10)

1Ãsɔ̃anɛnzĩ gufɛ̃nɛ ɔ̃ nɔɛpiɔ ɛ̀a gɛ̀ miapi kĩi ń nisi gĩnana pɔ aa a sɔukɛ̀o. 2Aa lè gbɛ goa mia'ɛlɛ. 3Kɛ́ aa gɛ̃̀u, aai Dii Yesu gɛ eo. 4Aalɛ bilikɛ yãpiwa, ɔ̃ gɔ̃ɛ gbɛ̃ɔn plaeɔ bɔ̀ aa mɔ̀má pɔkasa tɛkɛaɔ daa. 5Vĩa ń kṹ, aa ń mi pɛ̀lɛ, ɔ̃ gɔ̃ɛpiɔ ònɛ́: Bɔyãi álɛ gbɛ̃́ bɛ̃́ɛ wɛɛlɛ gɛɔ guui? 6A ku lao, à vù. À to yã pɔ a òɛ́ gɔɔ pɔ a ku Galile dɔágu 7à mɛ̀, sema wà Gbɛ̃nazĩn Nɛ kpá duunkɛnaɔwa, aai aà pá líwa, a gɔɔ aaɔ̃dezĩ i vu.#Luk 9.22, 18.31-33 8Ɔ̃ yãpi dɔ̀ńgu. 9Bɔa mia kĩi aa gɛ̀ yãpi baokpà aà iwa gbɛ̃ɔn kuɛdoɔnɛ ń gbɛ̃kĩniɔ. 10Maliama Madelɛni ń Yoanao ń Zaki da Maliamao ń nɔɛ kĩni pɔ aa kuńnɔɔ, aamɛ aa yãpi ò zĩnapiɔnɛ. 11Ɔ̃ nɔɛpiɔ yãpi kɛ̀nɛ́ lan faai yãwa, aai sio. 12Ɔ̃ Piɛɛ fɛ̀lɛ baalɛ̀, à gɛ̀ miapi kĩi. Kɛ́ à wɛkpàlɛ miapiu, i pɔe eo, sema baabaa pɔlɛɔ, ɔ̃ à ɛ̀a tà, àlɛ laasookɛ, yãpi aà kũ̀ gbãa.

Ɛmausi zɛ́u

(Maa 16.12-13)

13Gɔɔdoũpizĩ Yesu iwa gbɛ̃ɔn plaeɔ lɛ́ gɛ́ wɛ̃lɛ pɔ wì mɛ Ɛmausi. Ń Yelusalɛũo à kà lon kuɛdo taa. 14Aalɛ yã pɔ kɛ̀ pii faaibokɔ̃ɛ, 15ɔ̃ gɔɔ pɔ aalɛ a faaibo, aalɛ a waaipa, Yesu ń lé, ɔ̃ aa bɛ zɛ́u sãnu. 16Pɔe kpaanɛ́ ń aà dɔ̃ao. 17Ɔ̃ à ń lá à mɛ̀: Bɔ́ yã álɛ taa'oò ń kɔ̃oi? Ɔ̃ aa zɛ̀, an oo sisia. 18An gbɛ̃do pɔ wì mɛ Keleopa wèwà à mɛ̀: Mɛ́ i kɛ ndo baasio, gbɛ̃e ku Yelusalɛũ a gi yã pɔ kɛ̀ gɔɔplaɛa dɔ̃io. 19Ɔ̃ à ń lá à mɛ̀: Yã kpele ni?

Aa wèwà aa mɛ̀: Yesu Nazalɛti yãɛ. Ãnabi zɔ̃ɔɛ. Gbɛ̃pii dɔ̃ kɛ́ aà yãkɛa ń aà yã'oao bɔ̀ Lua kĩiɛ. 20Ɔ̃ sa'onkiaɔ ń wá gbãadeɔ aa aà kpàmá, kɛ́ wà yãdaaala yãi, wi aà pá líwa wà dɛ yãi. 21Wapiɔ sɔ̃ wálɛ e ɔ̃mɛ a Isailiɔ suaba. Bee kpɛ yãpi kɛa gɔɔ aaɔ̃den gbã. 22Ɔ̃ yã pɔ wá nɔɛeɔ ò bɔ̀ wá saɛ. Kɛ́ aa gɛ̀ aà mia kĩi gufɛ̃nɛa, 23aai aà gɛ e weo. Kɛ́ aa sù, aa mɛ̀ malaikaɔ bɔ̀ aa mɔ̀má, aa ònɛ́ a ku bɛ̃́ɛ. 24Ɔ̃ wá gbɛ̃eɔ gɛ̀ miapi gwai, aa è lá nɔɛpiɔ ònɛ́wa, a ku weo.

25Ɔ̃ Yesu ònɛ́: Laasoosaideɔ, ili yã pɔ ãnabiɔ ò si kpaao. 26Lua dìlɛ Mɛsi taasikɛ màa, i gbasa gɛ̃ a gawi guu nolo? 27Daalɛa Mɔizi láwa e à gɛ̀ pɛ̀ ãnabiɔ pɔwa pii, Yesu yã pɔ kɛ̃a azĩa yãmusu bɔɔlɛkɛ̀nɛ́ pii.

28Kɛ́ aa kãikũ̀ ń wɛ̃lɛ pɔ aalɛ gɛ́uo, Yesu kɛ̀ lá á ye gɛ̃zɛawa. 29Ɔ̃ aa aà kũ̀kũ aa mɛ̀: Gɔ̃wanɔ la. Oosi kɛ̀, gu lɛ́ gɛ̃kɔ̃u. Ɔ̃ à gɛ̃̀ ua à gɔ̃̀ńnɔ. 30Gɔɔ pɔ àlɛ pɔbleńnɔ, ɔ̃ à pɛ̃ɛ sɛ̀, à baaadàu, ɔ̃ a ɛ̀ a kpàmá. 31Ɔ̃ an wɛ́ kɛ̃̀ wà aà dɔ̃̀ sa, ɔ̃ aa kùawà. 32Ɔ̃ aa òkɔ̃ɛ: Kɛ́ àlɛ yã'owɛ̃ɛ zɛ́u, àlɛ Lua yã pilokɛ̃wɛ̃ɛ, wá nɔ̀sɛ lɛ́ yaalɔo le? 33Ɔ̃ aa fɛ̀lɛ gɔ̃̀ɔ aa ɛ̀a gɛ̀ Yelusalɛũ. Aa aà iwa gbɛ̃ɔn kuɛdoɔ lè kãaaa we ń gbɛ̃́ pɔ nàmáɔ 34aalɛ mɛ: Dii vù sĩanaɛ. À azĩa ɔlɔ̀ Simɔɛ. 35Ɔ̃ gbɛ̃ɔn plapiɔ zɛ́ guu yã dàu wà sìunɛ́ ń lá aa aà dɔ̃̀ gɔɔ pɔ à pɛ̃ɛ'ɛ̀'ɛo.

Yesu azĩa ɔlɔa a iwaɔnɛ

(Mat 28.16-20; Maa 16.14-20; Zãa 20.19-23; Zĩn 1.6-8)

36Kɛ́ aalɛ yãpi o màa, kãndo aa aà è zɛa ń guu, ɔ̃ a ònɛ́: Àɔ ku ń aafiao. 37Ɔ̃ gili gɛ̃̀ńgu, vĩa ń kṹ, aalɛ e gyaade wa è. 38Ɔ̃ a ònɛ́: Bɔyãi á nɔ̀sɛ ɔ̃ɔkpài? Bɔyãi á ku ń nɔ̀sɛ plaplaoi? 39À ma ɔɔ ń ma gbáɔ gwa, mamɛ. À ɔkãa à gwa. Gyaade líɔ mɛ ge wá vĩ lá a ma eɛwao. 40Kɛ́ a ò màa, ɔ̃ à a ɔɔ ń a gbáɔ ɔlɔ̀nɛ́. 41Pɔna guu aa a ɛɛbò, kɛ́ à bɔ̀ ń saɛ yãi. Ɔ̃ à ń lá à mɛ̀: Pɔblea kua? 42Ɔ̃ aa kpɔ kpaatɛa kɔ̃̀ɔ kpàwà, 43ɔ̃ a sò ń wáa. 44Ɔ̃ a ònɛ́: Yã pɔ má òɛ́ gɔɔ pɔ má kuanɔ mɛ́ kɛ̀. Ma mɛ̀ sema yã pɔ wa ò ma yãmusu Mɔizi ikoyã láu ń ãnabiɔ láo ń Soũ láo pa pii. 45Ɔ̃ à ń nɔ̀sɛ wɛ̃̀nɛ́, kɛ́ aa e aa yã pɔ ku lápiɔ guu gbá dɔ̃. 46A ònɛ́: Wa kɛ̃̀ wà mɛ̀, Mɛsi a taasikɛ, a gɔɔ aaɔ̃dezĩ i bɔ gau, 47wi waasokɛ bui piiɛ ń aà tɔ́o daalɛa Yelusalɛũ, kɛ́ aa nɔsɛlilɛ, an duuna i kɛ̃má. 48Yãpi seeladeɔn á ũ. 49Mapi sɔ̃ má gba pɔ ma Mae a lɛgbɛ̃̀ kpãsãɛ́. Àɔ ku wɛ̃lɛ guu la gĩ́a e gbãa bɔ luabɛ à pisiwá.#Zĩn 2.1-4

50Ɔ̃ Yesu bɔ̀ńnɔ wɛ̃nkpɛ e Bɛtani saɛ, ɔ̃ à ɔsɛ̀ musu plapla à baaadàńgu. 51Kɛ́ àlɛ baaadańgu màa, ɔ̃ à kɛ̃̀má, Lua aà sɛ̀ tàò a kĩi. 52Ɔ̃ aa kùlɛɛ̀, ɔ̃ aa ɛ̀a tà Yelusalɛũ ń pɔna zɔ̃ɔo. 53Aaìɔ ku Lua ua gɔɔpii, aaìɔ Lua saaukpa.

Currently Selected:

Luk 24: Boo2024

Highlight

Copy