GENESIS 43
43
Pinmawil ed Egipto iray Agagi nen Jose a Kaiba ray Benjamin
1Linmoor so eras ed Canaan. 2Nen naoput la na pamilya nen Jacob imay trigo a nanlapud Egipto, inkuanen Jacob ed saray anak ton lalaki, Pawil kayo, ta manaliw kayoy daiset a nakan tayo.
3Inkuanen Juda ed sikato, Impurpurek to may too ya ag kami naawat ed arap to no ag mi kaibay agi mi. 4No onabuloy kayon awiten miy agi mi, onla kamin manaliw na tagano a para sikayo. 5No ag kayo, ag kami met la onla, ta imbaga to may too ya ag kami naawat ed arap to no ag mi kaibay agi mi.
6Inkuanen Jacob, Akin et initdan yo ak na ontan lan gunigon diad impangibaga yon wala niy agi yo?
7Inmebat ira, Ag tinondaan na samay too a tinepet so nipaakar ed sikami tan say pamilya tayo, Mabilay niya ama yo? Wala niy agi yo? Nepeg min ebatan iray tepet to. Panoy pakaamta min paawit toy agi mi?
8Inkuanen Juda ed kinen ama to, Ipila yod siak si Benjamin, et onla kami lan tampol. Diad satan anggapod sikatayoy ompatey ed eras. 9Ipostak so bilay ko tan siak so makaoley ed sikato. No ag ko nipawil a mabilay ed sikayo, siak so mangakoy tetel ed anggad angga. 10No ag kami komun naabalan abaybayag, akakar tan akapawil kami la ya amidwa.
11Inkuanen ama ra, No ontan so nepeg a nagawa, onyay gawa yo sirin: Mangawit kayoy sankamaungan iran bungay dalin, ikarga yod saray balkut yo, tan irigalo yo rad satay gobirnador: pigaran pasas, daiset a dilo, saray rikado, alponsigo, tan almindra. 12Mangawit kayo met na kuartan mamidway karakel nen samay onaan ya inawit yo, ta nepeg yon ipawil imay kuartan walad saray sako yo. Nayarin lingo labat iman. 13Awit yo sirin si agi yo, insan ki la onla. 14Iyabuloy komun na Dios a Makapanyarin-amin a kasian to kayo tay too, pian ipawil tod sikayo si Benjamin tan samay sakey ya agi yo. Para say siak, no nepeg a naandid siak iray anak ko, sipaparaan ak.
15Kanyan saramay sanaagi inala da ra may irigalo ra tan samay kuarta, insan la ra linmad Egipto a kaiba ray Benjamin. Kasabi ra, pinmarontal irad kinen Jose. 16Nen anengneng nen Jose a kaiba ray Benjamin, inkuantod aripen ya inkargadod abung to, Itagar mod abung ira yan totoo. Mirongo rad siak no ogto, kanyan mamatas kay sakey ya ayep tan iparaan mo. 17Sinumpal to may aripen so pagagawad sikato, tan intagar tod abung nen Jose ira may sanaagi.
18Nen oonla la rad abung, natatakot ira tan inkuandad sikaran dili, Niaakar kami dia lapud samay kuartan nipawil ed saray sako mi nen onaan ya inyakar mi dia. Biglaan da kamin dogpaan, alaen da ray asno mi, tan gawaen da kamin aripen to. 19Nen wala rad puirtay abung, inkuandad samay inkargado, 20Wala pay ibaga mid sika. Linma kami la dian analiw na tagano. 21Nen ompapawil kami la, tinmonda kamin nampainawa, et nen nilokasan mi ray sako mi, nalmoy balang sakey ed sikami so kuarta to. Natan, inawit mi ra dian ipawil ed sika. 22Wala met so awit min kuartan panaliw mi na tagano. Ag mi amta no siopay angipawil ed saray sako mi na samay kuarta.
23Inkuanto may aripen, Ag kayo mapaga. Ag kayo natatakot. Angangko say Dios yo, say Dios na ama yo, so angipawil na kuarta yo. Inawat kod saman so bayar yo. Insan inyakar tod sikara si Simeon.
24Samay aripen inyakar tod abung ira may sanaagi. Initdan to ray danum a panoras day sali ra, tan pinakan to ray asno ra. 25Imparaan da ra may rigalon iter dad kinen Jose no onsabid kaagewan, ta nibagad sikaran mirongo rad sikato. 26Nen sinmabiy Jose, inyakar dad sikato ra may rigalo ra, tan dinmakmomo ra ed arap to ya anggad dalin so lupa ra. 27Tinepet toy kipapasen da, insan to ni tinepet, Komusta may ama yon asalita yod siak? Mabilay ni tan maksil ni?
28Inmebat ira, Say ama mi a mugmon aripen mo et mabilay ini tan maksil ni. Insan tinmalimukor ira tan tinmuek irad sikato.
29Nen anengneng nen Jose si Benjamin ya agi ton peteg inkuanto, Sikato ya sirin so sankayogtanan ya agi yo ya asalita yod siak. Bindisionan ka komuy Dios, anak ko. 30Insan biglan tinmaynan si Jose, ta napnoy puso to na panangarod kinen agi to. Ngalngali la makaakis, kanyan linmad kuarto to tan diman nanakis. 31Kasumpal ton nandilamus, pinmaway, binembenan toy inkasikato, tan ingganggan ton isaklang da la ray lamisaan. 32Sakey a lamisaan so anganan nen Jose, tan sananey so anganan da ray agagi to. Sananey met so anganan da ray Egipsio a mangakan diman, ta ipapasen dan ag onkana ray Hebreo a mirongod sikara. 33Akayorung iray sanaagi ed lamisan a walad arap nen Jose, manlapud pangulowan ya anggad yogtan. Nen anengneng da so pasen ed lamisaan na balang sakey ed sikara, nannenengnengan ira diad pankelaw da. 34Nanlapud lamisaan nen Jose so niparongod sikara; si Benjamin maminliman karakel so niiter ed sikato nen saramay arum. Angan tan inminom ira a kaiba ray Jose, tan ontan lay likeliket da.
Currently Selected:
GENESIS 43: PnPV
Highlight
Share
Copy
Want to have your highlights saved across all your devices? Sign up or sign in
Philippine Bible Society New Testament © 1977, Bible © 1983
