GENESIS 44
44
Say Kupa a Naandi
1Ingganggan nen Jose imay aripen ya inkargadoy abung to, Panom iray sako ra na tagano a nayarian dan sakbaten, tan ipawil mod tapew na kargay sako so kuarta na balang sakey ed sikara. 2Ikargam ed tapew na kargay sako to may yogtan so kupak a pilak, tan say kuarta to. Inonur na aripen so ganggan ed sikato. 3Nen ontombuk a kabwasan, asakbay a sinmiput ira may sanaagi ya akakabayo rad asno ra. 4Nen ag ni ra akaarawid siudad, inkuanen Jose ed samay aripen ya inkargadod abung to, Abot mo ra man a totoo tan tepet mod sikara, Akin et kaogsan so imbales yod kamaungan nen amok? 5Akin et tinakew yoy pilak a kupa to?#44:5 Diad sakey a dagdaan a patalus Akin et tinakew yoy pilak a kupa to?; anggapo ra yan salita diad salitay Hebreo. Sikato man a kupa so paniinoman to tan pampaparlesan to. Balbaleg a kaogsan so ginawa yo!
6Nen nabot ira na samay aripen, inolit to ra man a salita. 7Inmebat ira, Antoy labay mon ibaga diad pansasalitam na ontan? Sambaan mi ya ag mi ginawa tay ibabagam. 8Kabat mo ya impawil mid sika manlapud Canaan imay kuartan nalmo mi ed tapew na saray karga na sako mi. Akin et manakew kami na pilak o balituk ed abung na amom? 9No naalmod sakey ed sikami itay kupan abalang, nepeg toy napatey tan magmaliw ya aripen mo iray arum ed sikami.
10Inkuanto, Onabuloy ak ed satan, balet say pakalmoan labat na kupa so magmaliw ya aripen ko, tan saray arum nayarian da lay onla. 11Kanyan tampol ya inyabeba dad dalin iray sako ra, insan da ra nilolokasan. 12Nananap a maung imay aripen nen Jose; pinalapu tod sankapangulowanan ya anggad sankayogtanan, et nalmod sako nen Benjamin imay kupa. 13Pinipilat na saramay sanaagi iray kawes da a pangipanengneng day ermen da, impapawil da ra may sako ra ed beneg na saray asno ra, insan ira pinmawil ed siudad.
14Nen sinmabid abung nen Jose si Juda tan saray agagi to, wadman niy Jose. Dinmakmomo rad arap to, 15tan inkuanto, Antoy ginawa yo? Ag yo ta amta a siak a toon manoley et naerel ta kayo diad panamegley na panagparles?
16Antoy nibaga mi? kuanen Juda. Panoy pankatonungan mi? Panoy pakapangipanengneng min anggapoy kasalanan mi? Say Dios a dili so amapapaway ed kasalanan mi. Natan, aripen yo kami lan amin, aliwan saman labat so akalmoay kupa.
17Inkuanen Jose, Andi, ag ko tan balut gawaen! Saman labat so akalmoay kupa so magmaliw ya aripen ko. Saray arum ed sikayo, nayarian yo lay onsempet ed kinen ama yo.
Kinerew nen Juda so Pakapawil nen Benjamin
18Inmasingger si Juda ed kinen Jose tan inkuanto, Abuloyan mo ak pan misalitad sika. Ag ka komun mamapasnuk ed siak, O katawan; kaparam lay ari. 19Tinepet mod sikami no walay ama mi o agi mi. 20Inyebat min walay ama min masiken la tan sakey ya agi min sankayogtanan a nianak nen matakken lay ama mi. Inatey lay agi to yan ogaw tan sikato labat so mabilay ya anak nen ina to, kanyan ontan lay panangarod sikato nen ama mi. 21Ingganggan mon awiten mi dia, pian nanengneng mo, 22tan inyebat min mairap ya iyarawid kinen ama to, ta ompan ipatey ya nen ama to. 23Inkuan mo balet ya ag kami la makapiarapan ed sika no ag mi kaiba.
24Nen pinmawil kamid kinen ama mi, sinalita mid sikaray imbagam. 25Insan inkuanda, Pawil kayo, ta manaliw kayoy daiset a tagano tayo. 26Inmebat kamin ag kami makapawil; ag kami makapiarapan ed sika no ag mi kaibay sankayogtanan ya agi mi. 27Inkuandad sikami, Kabat yon dogduaray inanak nen Raquel ya asawak. 28Naandi lay sakey; nayarin say laman to et binibingkas na ayep ed katakelan, ta ag ko nin balut anengneng nanlapud saman. 29No alaen yod siak lamet yay agi yo, et walay nagawad sikato, ompatey ak ed ermen ya iter yod siak, siak a masiken la.
30-31Ompatey si ama mi no nanengneng ton ag ko kaibay ogaw diad ipawil mi. Singa nansoldungan so pait da. Diad kinamasiken da la, ipatey da yan ermen ya iter mid sikara. 32Sakey ni, impotikak ed kinen amak so bilay ko para sayan ogaw. Imbagak ed sikara a no ag ko nipawil ed sikara yan ogaw, akoen koy tetel ed intiron bilay ko. 33Natan sirin, siak lay ontilak ya aripen mo; papawil mo a kaiba to ray agagi to. 34Ta panoy ipawil kod kindi amak no ag ko kaiba? Ag ko nitepel ya ipasakbat yan gunigon ed kindi amak.
Currently Selected:
GENESIS 44: PnPV
Highlight
Share
Copy
Want to have your highlights saved across all your devices? Sign up or sign in
Philippine Bible Society New Testament © 1977, Bible © 1983
