Ruk 19

Jesu ga Zekias

1-2Jesu fu ijegrene fun Jeriko mai bomana iji asidiame vakafa vain. Regavo e takes abejo ijiebuon e bomana be ijia fino if fuon iji Zekias. Regavo e iji fu e ikin ga fuka e sinuom uruvana zarain. 3-4Regavo Zekias fu Jesu e izekin fu iji gakafak vierafen revo fuka e ivuankbe ijefuon fu izeg e fok ijiebuon nifak ijia Jesu gakma bakin. Ijefuon fu asidiame kukum roke in durim ijekin be unam irif ijia manino ijia ajien. Fu ijia ajie fine Jesu vuako iji gam. 5-6Fu fine gakoga Jesu fu roke in anej ijia kekome asarajie Zekias game kua, Zekias migegare ari rokne ijefuon maiji ivia na ar on ijia fikno kuain. Fu ijeg kuamga Zekias fuka oimaimga fu migegare ari kekome Jesuon bomana oimaren. 7Fu ijegrega e fok bu game buka zien. Ijefuon bu isuar kuai e guri fuka e ise reno gavo e ikin guri fuka ar fuon ijia vakreno kuain.

8Regavo Zekias fu uri manine E Bomana Jesu kua, E Bomana igia fai na vierafega naka ire nun fateroin kege una e sinuom bakin iji ik vajiaken. Regavo gaga na e roin biesiame ire buon roin kegogakva iji na vierafega naka una ire kafo kege una ire buon iji na kenva ijekma vajiakno kuain. 9-10Fu ijeg kuardamga Jesu fu una roin kia, Ivia e ar igia karijo ijiebuon ise iji God fun giame aren. Ijefuon ja jonkua Eburamon uifarif bakin gavo Zekias fuk fu Eburamon uifarif be. Ijefuon maiji fu na ma vierafen. Regavo Ema ijiebuon Farif igi na ruainva iji na e ijekin bu ise rene God uzame vainva na ijin nisaidiame aferdiaknum karauniakro ruainvano kiain.

Jesu fu mon iji bu izeg kege ik kafokafo reoinva ijia bijame kuardiainma ijin

(Metiu 25:14-30)

11Areme e uruvana bu vek karine Jesu vuak iji fu kuardiamo iji faikoga fu madu vuak be bijame kuardiain. Ijefuon maiji fun Jerusarem samaij ijia vako ijia fu vuak ijin kuaimga e bu vierafero tavan iji God fu efuon ijiebuon oij iji samuagdiakfuon iji fun iviakma igia rekrenoro bu ijeg vierafen. 12Ijefuon Jesu fu uri kia, E ikin be fu moik be ijia e bomana rekafa ijefuon daro abek vaido fu una ruakfuon. 13E bomana iji fu vakafa vierafene uri efuon ikrejo imut roinroin (10) iji kege uri mon fu nainma iji kege ata vajiain. Fu vajiame kia, Na vako ni mon ijin kege ik jon kafokafo rene una mon kafo amarega na una ro karevno kiain. 14Fu ijeg kuardiame fun vek unam vako efuon iji buka fu uzame ziegafain. Ijefuon bu e vuak abe oijo iji kiava bu rad jame va e ikin iji kua, Eon gami bu kume no e iji fu e bomana nuvuon rekreno iji noka iseduomno kuain.

15Regavo e ikin iji fu vuak buon iji fum faim arega fun va izeg fu e bomana rekfuon daro iji abe una ruain. Fun una ro kekome e iji mon fu atame vajiama bu kege ikrene una kafo azan kenva ijin giakafa kumena bu besum ufuin. 16Ijegreare e be fun kekome kua, E bomana na mon iji a mienma iji na abe ik rene una mon kafo imut roinroin (10) ijeg kege ijekma nainvano kuain. 17Fu ijeg kuardamga e bomana iji fu uri kua, A ire ukaknak iji kege amarigia samuagdiado na kuaga a mai mamkanuk imut roinroin (10) iji samuagdiakno kuain. 18Fu ijeg kuardame una efuon ikreno be kumena fu vain. Fu kekome kua, E bomana na mon a mienma iji na abe ikreoine una mon kafo imut roin (5) ijeg kege una ijekma nadaivano kuain. 19Ijefuon e bomana iji fu una kua, A ijegrenma ijefuon a mai imut roin (5) iji samuagdiakno kuain.

20Areme fu una efuon ikreno be iji kumena fu vain. Fu kekome kua, E bomana mon on a mienma iji igaijar. Naka a juinva ijefuon na abe amarigia ugon ijia anume abeden. 21Ijefuon maiji na vierafega aiji aka e darokin fu erar a biesuakma bakin. Ijefuon na mon igi kege iremirekva tavan iji a una roko ijia na izegrekva bakin. Regavo madu a ire kafo a imut on ijia oinma ga nainma bakin iji am ijia kareknum masimoino ijefuon na iji ijegrevano kuain. 22Fu ijeg kuardamga e bomana fuon iji fu una kua, A ijeg kuaimon ijefuon na vierafega aka ba nuifuon ik amarigia ren ijefuon na a dab arafirak. Regavo igia fai. Naiji naka e darokido na irerag nar nainva ga oinva bakin iji na masiknum karvo. 23Ijefuon a irerag abega a mon nun iji aba abe ar bu mon navo ijia abedekoga bu abe ikrene una mon kafo amardienvano kuain.

24Fu ijeg kuardame fu una efuon ikrejo ijia irenva iji kia, Mon guri abe una e gari mon kege amarigia ikreno iji mafno kiain. 25Fu ijeg kiamga bu una kua, E bomana e iji an amur mon bomana be fu mainmano kuain. 26Bu ijeg kuardavga e bomana iji fu una roin kia, Na igi kuardiavo ni faif. E iji eraneb bu ire uruvana kenva iji bu una madu ma uruvana kek. Regavo erar fu ire kafo ba nainma iji irerag sibank fu nainma iji bu una kamazak. 27Regavo e ani nun bu na e bomana rekfuon iji bu uzainva iji ni aferdiame ro na manijo nifak guria usem kania bu aoivno kiain.

Jesu fu Jerusarem aru vainma ijin

(Metiu 21:1-11; Mak 11:1-11; Jon 12:12-19)

28Jesu fu vuak ijeg bijame kuardiame baremga fun amur Jerusarem vakga e uruvana bu rad jame vain. 29-30Fun roke ar Betifas ko Beteni samaij uruor Orivsno kuavo ijia kekoin. Fu ijia kekome uri e vuak fuon faivo nokarok (2) iji vuak igin kuardiain. Fu kia, Va ar gafia useme vien ijia aruvaf. Ja vien ijia aru vaga bu maf-donki uka be buba abe oijo iji ijia kiraiga iji irame abe una igia ruaf. 31Regavo ja iraga ebe fu giame kiaga ni kua, E Bomana ijar kuoga no iravno kuaf.

32Areme e iji bun vake gafia usem vuak fok Jesu fu kuardiainma iji bun useme ijeg ren. 33Bun usem maf-donki uka iji iravga e koikin iji fun uri kia, E garie ja irerafuon maf-donki uka iji iravno kiain? 34-35Fu ijeg kiama bu una kua, No E Bomana ijar kuoga no iji iravno kuame bun abe una roke Jesu fino ijia usen. Areme bun ugon buon bu azan savo iji azome maf-donki azan ijia rieme Jesu imuikeja fu ijia ajie fin. 36Areme fun abe unam ijia vako e roin bu ugon buon bu azan savo iji azome unam ijia riedako fu azan ijia vain.

37Fun vake ar Jerusarem samaij uruor Orivs unam dorok ijia kekoin. Fu ijia kekomga e uruvana vuak fuon faivo iji bu fu ja roko iji bun ijia anerene ire sumakin fu rena bu gainva ijefuon uruvana igia Godon oimaren.

38Bu oimarknum kume, No vierafe Godri Kin igi fu E Bomana ijefuon if ijia rokon igi daro mak. Regavo no vierafega ire fok varur gufia naoivo bu afuime ijia naoim vak.

Regavo madu noka Godon if iji dab aroikno kumen. 39Areme e uruvana irenva guf ijia e Ferisis roin bu uri Jesu kua, E nijaidiamon ni e vuak on faivo iji kia bu isuar irevno kuain. 40Bu ijeg kuavga Jesu fu una roin kia, Naka ma kuardiav na kuriaire bu arekva mun guri naoivo iji buka uri na arordiekno kiain.

Jesu fu mai Jerusaremon nirainma ijin

41Fu ijeg kuardiame fun ajie roke mai bomana Jerusarem samaij ijia keko mai iji gama fuka oifiaima fu una efuon ijiebuon nirain. 42Fu niraiknum kume, O e Jerusaremko igie irerafuon ni jon fuka vek nakinman ijefuon na jaka ba gieme vierafen. Regavo ja na gieme vierafenvabatie iviakma ja na amarigia agordiek. 43Regavo ijeg jaka bakin ijefuon vake tavan be abekma ijia e ani jon bu unam jon iken roinroin ja usem vakfuon iji buka ufutkuria ameoine bijukuriak. 44Areme bu uri ar jon ga e fok mai guf ijia karinva ijin arafiriak. Regavo mun iji bu kege ar jon sainva iji buka uduimarik. Ijefuon maiji ja Godon tavan iji fu ja karauniakafa ruainma iji jaba game ma vierafenvano kumen.

Jesu fu Godon ar bomana iji bu sirimamejo ijia aru vainma ijin

(Metiu 21:12-17; Mak 11:15-19; Jon 2:13-22)

45Jesu fun ijeg niraiknum kuardiame fun Godon ar bu sirimamejo ijia arume e iji bu karine ire kafokafo kimejo iji kuriaireme kiama bu usen. 46Fu ijeg kiama bu usekoga fu uri kia, Usuibe buk akaij iji bu isoinva ijia God fu kuai,

Ar nun iji bu ijia sirimamejno kuain. Regavo jar ijia aru karine dab e niesavobuo ar igeg amarevo kuain.

47Fu ijeg kuriairega bu usem vako fu tavan uruvana Godon ar ijia vuak nijaidiam. Regavo e Godon isuf baroijo ijiebuon e mamkanuk ijiga e vuak akai nijaidiavo ijiga e aiko ijiebuon e mamkanuk iji bu ka Jesu kanakuai vierafen. 48Regavo bu unam iji bu izeg Jesu kanakfuon iji bu nisaimga fuka iseren. Ijefuon maiji e uruvana buka vek ijia karine vuak fu kuaimon ijefuon ma ijin abekuai amarigia faiv. Bu vuak besum be buka ba asikuai vierafen.

Currently Selected:

Ruk 19: nvm

Highlight

Copy