Luka 9
9
Jesũ gũtũma arutwo arĩa ikũmi na eerĩ
(Mat 10.5-15; Mar 6.7-13)
1Na rĩĩrĩ, Jesũ agĩĩta arutwo arĩa ikũmi na eerĩ makĩũngana hamwe oothe, akĩmahe hinya na ũhoti wa kũingata ngoma ciothe na wa kũhonania. 2Naake agĩkĩmatũma mathiĩ makahunjie ũhoro wa Ũthamaki wa Ngai, makĩhonagia andũ arĩa arũaru. 3#Luk 10.4-11; Atũ 13.51 Naake akĩmeera atĩrĩ, “Mũtigekuuĩre kĩndũ o na kĩ rũgendoinĩ; o na mũtirima kana mondo, kana irio kana mbeeca, o na mũtigakuue nguo ingĩ tiga iria irĩ mwĩrĩ. 4Na rĩĩrĩ, o nyũmba ĩrĩa mũrĩtoonyaga, mwanyiitwo ũgeni, ikaragaai kuo kinya rĩrĩa mũkoima itũũra rĩu; 5itũũra rĩrĩa andũ maarega kũmũnyiita ũgeni mwĩribaribage rũkũngũ rũrĩa rwĩ magũrũ maanyu mũkiuma kuo, ũndũ ũcio ũgĩtuĩke kĩonereria kũrĩ o atĩ mũtinakena.”
6Nao arutwo magĩkiuma hau magĩthiĩra icagiinĩ ciothe makĩhunjagia Ũhoro ũrĩa Mwega, makĩhonagia andũ kũndũ guothe.
Herode kũrigithio nĩ ũhoro wa Jesũ
(Mat 14.1-12; Mar 6.14-29)
7 #
Mat 16.14; Mar 8.28; Luk 9.19 Na rĩĩrĩ, hĩndĩ ĩrĩa Herode ũrĩa warĩ mũthamaki wa Galili aiguire maũndũ moothe marĩa meekĩkaga, nĩmaamũrigithirie nĩ tondũ andũ amwe moigaga atĩ nĩ Johana Mũbatithania ũriũkĩĩte. 8Angĩ nao moigaga nĩ Elija wonekeete, nao arĩa angĩ makoiga nĩ mũnabii ũmwe wa arĩa a tene ũriũkĩĩte. 9Herode agĩkiuga atĩrĩ, “Nĩndatinithirie Johana mũtwe, mũndũ ũyũ ũngĩ ndĩraigua ũhoro wake-rĩ, nĩ we ũ?” Nĩ ũndũ ũcio Herode agĩkĩĩrirĩria kuona Jesũ.
Jesũ kũhũũnia andũ ngiri ithaano
(Mat 14.13-21; Mar 6.30-44; Joh 6.1-14)
10Na rĩĩrĩ, rĩrĩa atũmwo maacookire makĩĩra Jesũ maũndũ moothe marĩa meekĩĩte. Naake Jesũ akĩmatwara marĩ oiki itũũrainĩ rĩrĩa rĩĩtagwo Bethisaida. 11Rĩrĩa andũ maamenyire, makĩmũrũmĩrĩra, naake akĩmaamũkĩra na akĩmaruta ũhoro wa Ũthamaki wa Ngai, na akĩhonia arĩa maabatairio nĩkũhonio.
12Na rĩĩrĩ, riũa rĩatua gũthũa, arutwo arĩa ikũmi na eerĩ magĩũka kũrĩ we makĩmwĩra atĩrĩ, “Ĩra andũ mathiĩ icagiinĩ o na mĩgũndainĩ gũkuhĩ na gũũkũ nĩ geetha magacarie gĩa kũrĩa na gwa gũkoma, nĩ ũndũ gũũkũ tũrĩ gũtirĩ mĩciĩ.”
13No Jesũ akĩmeera atĩrĩ, “Maheei gĩa kũrĩa arĩ inyuĩ.”
Nao makĩmwĩra atĩrĩ, “Ithuĩ irio iria twĩ nacio no mĩgate ĩtaano na thamaki igĩrĩ. No tũthiire tũkagũrĩre andũ aya oothe irio.” 14(Handũ hau haarĩ na arũme ta ngiri ithaano (5,000).)
Naake Jesũ agĩkĩĩra arutwo atĩrĩ, “Ikariai andũ aya thĩ me ikundi cia andũ mĩrongo ĩtaano ĩtaano.”
15Nao arutwo makĩmaikaria oothe thĩ o ta ũguo Jesũ aameerĩĩte. 16Naake Jesũ akĩoya mĩgate ĩyo ĩtaano na thamaki icio igĩrĩ, akĩrora igũrũ, agĩciraathima, agĩcooka agĩcienyũranga akĩnengera arutwo aake magaĩre andũ. 17Nao andũ oothe makĩrĩa, makĩhũũna. Nao arutwo magĩcooka makĩũngania ciondo ikũmi na igĩrĩ cia cienyũ iria ciatigarĩĩte.
Petero kuumbũra Jesũ
(Mat 16.13-19; Mar 8.27-29)
18Na rĩĩrĩ, mũthenya ũmwe Jesũ akĩhooya arĩ wiki handũ, arutwo nĩmookire harĩ we, naake akĩmooria atĩrĩ, “Andũ moigaga niĩ ndĩ ũ?”
19 #
Mat 14.1-2; Mar 6.14-15; Luk 9.7-8 Nao arutwo makĩmũcookeria makĩmwĩra atĩrĩ, “Amwe moigaga atĩ wee nĩ we Johana Mũbatithania, angĩ makoiga atĩ wee nĩ we Elija, nao angĩ makoiga atĩ mũnabii ũmwe wa arĩa a tene nĩariũkĩĩte.”
20 #
Joh 6.68-69
Jesũ agĩcooka akĩmooria atĩrĩ, “Ĩ inyuĩ-rĩ, muugaga niĩ ndĩ ũ?”
Naake Petero akĩmũcookeria akĩmwĩra atĩrĩ, “Wee nĩ we Mesia ũrĩa wa Ngai.”
Jesũ kwaria ũhoro wa gũthĩĩnio na gũkua gwake
(Mat 16.20-28; Mar 8.30–9.1)
21Naake Jesũ akĩmakaania na hinya mũno akĩmeera matikeere mũndũ ũhoro ũcio. 22Agĩcooka, akĩmeera atĩrĩ, “Mũrũ wa Mũndũ no mũhaka athĩĩnio, na aregwo nĩ athuuri, athĩnjĩri Ngai arĩa anene, na arutani a Watho. Nĩakooragwo, no rĩĩrĩ, mũthenya wa gatatũ nĩakaariũkio.”
23 #
Mat 10.38; Luk 14.27 Agĩcooka akĩĩra andũ oothe atĩrĩ, “Mũndũ o wothe ũngĩenda kũũnũmĩrĩra, nĩerege we mwene, akuuage mũtharaba wake hingo ciothe, anũmagĩrĩre. 24#Mat 10.39; Luk 7.33; Joh 12.25 Nĩ ũndũ-rĩ, mũndũ o wothe ũngĩenda kũhonokia muoyo wake nĩakoorwo nĩguo, no ũrĩa ũũragwo nĩ muoyo wake nĩ ũndũ wakwa nĩakaũhonokia. 25Nĩ ũndũ-rĩ, mũndũ angĩĩguna na kĩ o na angĩgaya thĩ yothe no ate muoyo wake kana oorwo nĩguo? 26Nĩ ũndũ mũndũ ũrĩa ũconokaga nĩ ũndũ wakwa, na nĩ ũndũ wa ciugo ciakwa, ũcio nĩagaaconokerwo nĩ Mũrũ wa Mũndũ rĩrĩa agooka na riiri wake o hamwe na wa Ithe na wa araika atheru. 27Ngũmwĩra na ma atĩ, haaha nĩharĩ andũ amwe matagaakua matooneete Ũthamaki wa Ngai.”
Jesũ kũgarũrũka ũrĩa aatariĩ
(Mat 17.1-8; Mar 9.2-8)
28 #
2Pet 1.17-18
Na rĩĩrĩ, mũthenya wa ĩnaana thuutha wa Jesũ kuuga maũndũ macio, akĩoya Petero, Johana, na Jakubu, makĩambata kĩrĩma igũrũ kũhooya. 29Rĩrĩa aahooyaga, ũthiũ wake ũkĩgarũrũka, nacio nguo ciake ikĩerũha cua. 30Na rĩĩrĩ, hĩndĩ o ro ĩyo andũ eerĩ makĩaria na Jesũ, nao maarĩ Musa na Elija. 31Nao moonekaga me na riiri na maaragia naake ũhoro wa gĩkuũ gĩake, kĩrĩa aathiaga kũũragĩrwo Jerusalemu. 32Hĩndĩ ĩyo Petero na arutwo acio angĩ nĩmaahĩtĩĩtwo nĩ toro, no rĩrĩa mookĩrire, makĩona riiri wa Jesũ na wa andũ acio angĩ eerĩ marũũgamĩĩte naake. 33Rĩrĩa andũ acio maatuire gũtigana na Jesũ, Petero akĩĩra Jesũ atĩrĩ, “Mwathani, kaĩ nĩ wega tondũ twĩ haaha-ĩ! Reke twake ithũnũ ithatũ, kĩmwe gĩaku,kĩmwe kĩa Musa, na kĩrĩa kĩngĩ kĩa Elija.” (Petero akiuga ũguo ndamenyaga ũrĩa oigaga.)
34O hĩndĩ ĩyo Petero aaragia, itu rĩgĩũka rĩkĩmahumbĩra, naguo ũndũ ũcio ũgĩtũma arutwo metigĩre mũno. 35#Isa 42.1; Mat 3.17; 12.18; Mar 1.11; Luk 3.22 Naguo mũgambo ũkiuma ituinĩ ũkiuga atĩrĩ, “Ũyũ nĩ we Mũrũ wakwa ũrĩa thuurĩĩte#9.35 Thuurĩĩte: Maandĩko mamwe moigaga “ũrĩa nyendeete.”, mũiguageei!”
36Thuutha wa mũgambo ũcio kũiguĩka, Jesũ akĩoneka arĩ wiki. Nao arutwo magĩkira ki, na gũtirĩ mũndũ o na ũmwe meerire matukũinĩ macio maũndũ marĩa mooneete.
Jesũ kũhonia kamwana kaarĩ na ngoma
(Mat 17.14-18; Mar 9.14-27)
37Na rĩĩrĩ, kwarooka gũkĩa, Jesũ hamwe na arutwo acio atatũ magĩikũrũka kuuma kĩrĩma igũrũ, nao andũ aingĩ magĩtũnga Jesũ. 38Naake mũndũ ũmwe warĩ gatagatĩinĩ ka andũ akĩanĩrĩra akiuga atĩrĩ, “Mũrutani! Ndagũthaitha ũrore mũrũ ũyũ wakwa; ndirĩ mwana ũngĩ tiga we! 39Rĩmwe nĩanyiitagwo nĩ ngoma akaanĩrĩra o rĩmwe; ĩmũũmagaragia nginya akaruta mũhũũyũ na kanua, na ĩkamũthĩĩnia mũno na ndĩngĩtigana naake! 40Thaithire arutwo aaku mamĩingate no matinahota.”
41Naake Jesũ agĩcookia atĩrĩ, “Inyuĩ rũciaro rũũrũ rũteetĩkĩĩtie na rwĩhia! Ngũtũũra na inyuĩ kinya rĩ, na ngũmũkirĩrĩria kinya rĩ?” Agĩcooka akĩĩra mũndũ ũcio atĩrĩ, “Reehe mũũrũguo haaha.”
42Na rĩĩrĩ, rĩrĩa kamwana kau gaathiaga harĩ Jesũ, ngoma ĩyo ĩgĩkoomagaria, ĩkĩhaana ta yakooraga. No Jesũ agĩkũũma ngoma ĩyo, nako kamwana kau gakĩhona, naake agĩkanengerana kũrĩ ithe. 43Nao andũ oothe makĩgega nĩ ũndũ wa hinya mũnene wa Ngai.
Jesũ kwaria rĩngĩ ũhoro wa gũkua gwake
(Mat 17.22-23; Mar 9.30-32)
O hĩndĩ ĩyo andũ oothe maagegeete nĩ ũndũ wa maũndũ moothe marĩa Jesũ eekaga, Jesũ akĩĩra arutwo aake atĩrĩ, 44“Mũtikaariganĩrwo nĩ ũhoro ũyũ ngũmwĩra! Atĩrĩĩrĩ, Mũrũ wa Mũndũ nĩekũnengeranwo kũrĩ andũ.” 45No arutwo matiigana gũtaũkĩrwo nĩ ũrĩa aameeraga tondũ nĩmaahithĩĩtwo ũndũ ũcio matikaũmenye, na nĩmeetigagĩra kũmũũria ũrĩa eendaga kuuga.
Nũũ mũnene gatagatĩinĩ ka arutwo?
(Mat 18.1-5; Mar 9.33-37)
46 #
Luk 22.24
Na rĩĩrĩ, nĩhaagĩire na ngarari gatagatĩinĩ ka arutwo makĩũrania nũũ warĩ mũnene gatagatĩinĩ kaao. 47Rĩrĩa Jesũ aamenyire ũrĩa meeciiragia, akĩoya kaana, agĩkarũũgamia hakuhĩ naake, 48#Mat 10.40; Luk 10.16; Joh 13.20 akĩmeera atĩrĩ, “Mũndũ ũrĩa wamũkagĩra kaana ta gaaka thĩinĩ wa rĩĩtwa rĩakwa, nĩ niĩ aamũkagĩra. Naake ũrĩa ũnyamũkagĩra nĩ ũrĩa wandũmire aamũkagĩra. Nĩ ũndũ-rĩ, mũndũ ũrĩa mũniini biũ gatagatĩinĩ kaanyu nĩ we mũnene.”
Ũrĩa ũtarĩ thũ yanyu nĩ mũraata wanyu
(Mar 9.38-40)
49Na rĩĩrĩ, Johana akĩmũcookeria akĩmwĩra atĩrĩ, “Mũnene, nĩtuonire mũndũ akĩingata ngoma thĩinĩ wa rĩĩtwa rĩaku twamũkaania, tondũ ti mũraata witũ.”
50No Jesũ agĩcookeria Johana hamwe na arutwo arĩa angĩ atĩrĩ, “Tiganaai naake nĩ tondũ mũndũ ũrĩa ũtarĩ thũ yanyu nĩ mũraata wanyu.”
Itũũra rĩa Asamaria kũrega kwamũkĩra Jesũ
51Na rĩĩrĩ, matukũ maakuhĩrĩria ma Jesũ kwambatio igũrũ, nĩeciiririe athiĩ Jerusalemu. 52Agĩgĩtũma andũ mbere yake mathiĩ gĩcagiinĩ kĩmwe thĩinĩ wa Samaria makahaaragĩrie maũndũ moothe. 53No rĩĩrĩ, andũ a kũu Samaria makĩrega kũmwamũkĩra, tondũ aathiaga Jerusalemu. 54#2Atha 1.9-16 Rĩrĩa arutwo aake, Jakubu na Johana moonire ũguo, makĩmwĩra atĩrĩ, “Mwathani, nĩũkwenda tuuge mwaki uume igũrũ ũmaniine#9.54 Ũmaniine: Maandĩko mamwe nĩmoongagĩrĩra; ta ũrĩa Elija eekire.?”
55Naake Jesũ akĩĩhũgũra na kũrĩ o akĩmakũũma.#9.55 Akĩmakũũma: Maandĩko mamwe nĩmoongagĩrĩra “Mũtiũũĩ mũrĩ a maroho marĩkũ, nĩ gũkorwo Mũrũ wa Mũndũ ndookire gũthũũkia mĩoyo ya andũ, no ookire kũmĩhonokia.”
56Jesũ hamwe na arutwo aake magĩcooka magĩthiĩ gĩcagiinĩ kĩngĩ.
Ciĩgwatio cia arĩa mangĩatuĩkire arũmĩrĩri a Jesũ
(Mat 8.19-22)
57Na rĩĩrĩ, rĩrĩa Jesũ na arutwo aake maathiaga na njĩra, mũndũ ũmwe akĩarĩria Jesũ akĩmwĩra atĩrĩ, “Niĩ ngũkũrũmĩrĩra kũrĩa guothe ũgũthiĩ.”
58Naake Jesũ akĩmũcookeria atĩrĩ, “Mbwe nĩ irĩ marima, o na nyoni nĩ irĩ itara, no Mũrũ wa Mũndũ ndarĩ na handũ ha kũhuurũka.”
59Agĩcooka akĩĩra mũndũ ũngĩ atĩrĩ, “Nũmĩrĩra.”
Naake mũndũ ũcio akĩmũcookeria atĩrĩ, “Mwathani, njĩtĩkĩria nyambe nyinũke ngathike baaba.”
60Naake Jesũ akĩmwĩra atĩrĩ, “Reke andũ arĩa akuũ mathike akuũ aao. Wee thiĩ ũkahunjie Ũhoro wa Ngai.”
61Mũndũ ũngĩ naake akĩĩra Jesũ atĩrĩ, “Mwathani, nĩngũkũrũmĩrĩra, no amba ũreke thiĩ mũciĩ ngoigĩre andũ aakwa ũhoro.”
62No Jesũ akĩĩra mũndũ ũcio atĩrĩ, “Gũtirĩ mũndũ woyaga icembe arĩme, agacooka akaambĩrĩria gũcũũthĩrĩria na thuutha wagĩrĩirwo nĩ Ũthamaki wa Ngai.”
Currently Selected:
Luka 9: GKN
Highlight
Share
Copy
Want to have your highlights saved across all your devices? Sign up or sign in
Gikuyu Common Language Bible with DC © Bible Society of Kenya, 2014, 2018.
