Marka 14

Ny teti-dratsy hamonoana an’i Jesosy

Mat 26.1-5; Lio 22.1-2

1Rehefa indroa andro no sisa tsy hahatongavan’ny Paska izay fihinanana ny mofo tsy misy masirasira dia nitady hisambotra an’i Jesosy tamin’ny fitaka ireo lehiben’ny mpisorona sy ny mpanoradalàna* mba hamonoany Azy. 2Nefa hoy ireo: Tsy amin’ny andro firavoravoana, fandrao hampitabataba ny vahoaka.

Ny nanosorana menaka manitra an’i Jesosy tany Betania

Mat 26.6-13; ampit. Lio 7.36-50; Jao 12.1-8

3Ary nony tany Betania Jesosy ka nipetraka nisakafo tao an-tranon’i Simona boka dia avy ity vehivavy iray izay nitondra tavoara alabasitara feno menaka manitra nisy narda tena sarobidy; novakiny ny tavoara ka nararany tamin’ny lohan’i Jesosy ny menaka manitra. 4Ary tezitra ny sasany ka nifampilaza hoe: Inona no anton’izao fandaniam-poana ny menaka manitra izao? 5Fa azo namidy lafo mihoatra ny denaria* telonjato iny menaka manitra iny ka ho nomena ny mahantra! Dia tezitra indrindra tamin-dRavehivavy ireo. 6Fa hoy Jesosy taminy: Avelao izy. Nahoana ianareo no manao izay mampalahelo azy? Asa soa no nataony Tamiko. 7Fa ny mahantra dia eto aminareo mandrakariva, ary na oviana na oviana no tianareo hanaovana soa aminy dia mahazo manao izany ianareo; fa Izaho kosa dia tsy mba ho eto aminareo mandrakariva. 8Efa nanao izay azony natao izy: Nanosotra mialoha ny tenako izy hanamboarany Ahy halevina. 9Ary lazaiko aminareo marina tokoa: Na aiza na aiza no hitoriana ny Filazantsara eto amin’izao tontolo izao dia hotantaraina koa izao nataon-dRavehivavy izao mba ho fahatsiarovana azy.

Ny naneken’i Jodasy hamadika an’i Jesosy

Mat 26.14-16; Lio 22.3-6

10Ary i Jodasy iskariota, ilay isan’ny roa amby folo lahy, dia nankao amin’ireo lehiben’ny mpisorona mba hanolotra an’i Jesosy amin’ireo. 11Rehefa nandre izany izy ireo dia faly ka nampanantena fa hanome vola azy. Ary i Jodasy dia nitady izay andro hahazoany manolotra Azy.

Ny niarahan’i Jesosy sy ny mpianany nihinana ny Paska

Mat 26.17-19; Lio 22.7-13

12Tamin’ny andro voalohany amin’ny fihinanana ny mofo tsy misy masirasira, izay famonoana ny Paska, dia hoy ny mpianany Taminy: Aiza no tianao handehananay hanomanana ny sakafon’ny Paska ho Anao? 13Dia naniraka roa lahy tamin’ny mpianany Izy ka niteny taminy hoe: Mankanesa any an-tanàna, ary hisy lehilahy mitondra siny feno rano hifanena aminareo; dia manaraha azy. 14Ary lazao amin’ny tompon’ny trano izay hidirany hoe: Izao no lazain’ny Mpampianatra: Aiza ny efitrano hiarahako mihinana ny Paska amin’ny mpianatro? 15Ary izy no hanoro anareo efitrano malalaka ambony rihana izay efa misy izay ilaina rehetra sady voavoatra tsara; any ianareo no manomana ho antsika. 16Ary nandeha ny mpianatra dia tonga tany an-tanàna ka nahita araka izay nolazainy taminy; dia nanomana ny Paska izy ireo.

Mat 26.20-25; Lio 22.21-23; Jao 13.21-26

17Nony hariva ny andro dia tonga niaraka tamin’ny roa amby folo lahy Izy. 18Ary raha nipetraka nisakafo izy ireo dia hoy Jesosy: Lazaiko aminareo marina tokoa fa ny iray aminareo no hamadika Ahy, dia izay miara-mihinana Amiko. 19Dia nalahelo izy ireo ka nanomboka nanontany an’i Jesosy ny tsirairay hoe: Izaho va izany? 20Ary niteny tamin’izy ireo Izy hoe: Izay iray aminareo roa amby folo lahy miara-manatsoboka ny tanany Amiko ao anatin’ny lovia no izy. 21Fa ny Zanak’Olona* dia mandeha araka izay voasoratra momba Azy, nefa lozan’izay olona hahatonga ny Zanak’Olona ho voatolotra! Tsara ho an’izany olona izany raha tsy teraka akory izy.

Ny nanorenana ny Fanasan’ny Tompo

Mat 26.26-29; Lio 22.15-20; ampit. 1Kor 11.23-26

22Ary raha mbola nisakafo izy ireo dia nandray mofo Jesosy, koa nony efa nisaotra Izy dia novakiny ka natolony azy ireo sady nataony hoe: Raiso, ity no tenako. 23Dia nandray kapoaka Izy ka nony efa nisaotra dia natolony azy ireo ary nisotroan’izy rehetra izany. 24Dia hoy Izy taminy: Ity no rako amin’ny fanekena izay alatsaka hamonjy ny maro. 25Lazaiko aminareo marina tokoa: Tsy mba hisotro ny vokatry ny voaloboka intsony Aho mandra-piavin’ny andro hisotroako izay vaovao any amin’ny fanjakan’Andriamanitra.

Nambaran’i Jesosy fa handa Azy i Petera

Mat 26.30-35; Lio 22.31-34; Jao 13.36-38

26Rehefa avy nihira fiderana izy ireo dia lasa nankany an-tendrombohitra Oliva.

27Ary hoy Jesosy taminy: Ho tafintohina avokoa ianareo rehetra; fa voasoratra hoe:

«Hamely ny mpiandry Aho

dia hihahaka ny ondry» (Zak 13.7).

28Fa rehefa tafatsangana amin’ny maty Aho dia hialoha anareo any Galilia. 29Fa hoy i Petera Taminy: Na dia ho tafintohina avokoa aza ny olona rehetra, izaho dia tsy mba ho tafintohina. 30Dia hoy Jesosy taminy: Lazaiko aminao marina tokoa: Anio, amin’ity alina ity ihany, raha mbola tsy misy akoho maneno fanindroany, dia handa Ahy intelo ianao. 31Fa vao mainka nanamafy izy hoe: Na dia tsy maintsy ho faty miaraka Aminao aza aho dia tsy mba handa Anao mihitsy. Ary toy izany koa no nolazain’izy rehetra.

Ny vavaka nataon’i Jesosy tao Getsemane

Mat 26.36-46; Lio 22.39-46

32Ary tonga tany amin’ny saha iray atao hoe Getsemane izy ireo; dia hoy Jesosy tamin’ny mpianany: Mipetraha eto ianareo fa handeha hivavaka Aho. 33Ary Jesosy nitondra an’i Petera sy i Jakoba ary i Jaona niaraka Taminy, dia nanomboka nangorohoro sady ory fatratra Izy. 34Dia hoy Izy tamin’ireo: Fadiranovana loatra toy ny efa ho faty ny fanahiko; mitoera eto ka miareta tory. 35Ary nony nandroso kelikely Izy dia niankohoka tamin’ny tany ka nivavaka mba hialan’izany ora izany Aminy, raha azo atao. 36Ary hoy Izy: Aba, Ray ô, ny zavatra rehetra hainao; esory Amiko ity kapoaka ity. Nefa aoka tsy ny sitrapoko anie no hatao fa ny Anao. 37Ary niverina Izy ka nahita azy ireo matory dia hoy Izy tamin’i Petera: Ry Simona, matory va ianao? Tsy mahazaka miari-tory na dia ora iray ihany aza va ianao? 38Miareta tory ianareo ka mivavaha mba tsy hidiranareo amin’ny fakam-panahy; mety ihany ny fanahy fa ny nofo no tsy manan-kery. 39Dia lasa indray Izy niverina nivavaka ka namerina ilay teny teo ihany. 40Nony niverina indray Izy dia nahita azy ireo matory, ary efa nilondolondo ny masony ka tsy hitany izay havaliny Azy. 41Ary niverina fanintelony Izy dia niteny taminy hoe: Mbola matory ihany ianareo ka miala sasatra. Ampy izay. Tonga ny fotoanandro; indro ny Zanak’Olona* hatolotra eo an-tanan’ny mpanota. 42Mitsangàna, andeha isika; fa indro, efa manakaiky ilay manolotra Ahy.

Ny nisamborana an’i Jesosy

Mat 26.47-56; Lio 22.47-53; Jao 18.2-12

43Niaraka tamin’izay, raha mbola niteny Izy, dia avy i Jodasy, iray amin’ny roa amby folo lahy, ary nisy vahoaka niaraka taminy, nitondra sabatra sy langilangy, nirahin’ireo lehiben’ny mpisorona sy ny mpanoradalàna* ary ny loholona. 44Ary ilay hanolotra Azy dia efa nanome famantarana tamin’ireo ka niteny hoe: Izay horohako no Izy; sambory Izy ka ento dia ataovy tsara ambina. 45Ary raha vao tonga izy ka nanatona an’i Jesosy dia niteny hoe: Raby ô! Sady nanoroka Azy izy. 46Ary nanatsotra ny tanany Taminy ny olona ka nisambotra Azy. 47Ary nanatsoaka ny sabany ny iray tamin’ireo izay nanatrika teo dia nikapoka ny mpanompon’ny Mpisoronabe* ka nahafaka ny sofiny.

48Dia niteny taminy Jesosy hoe: Tonga mitondra sabatra sy langilangy hisambotra Ahy toy ny fisambotra jiolahy va ianareo? 49Teo aminareo isanandro Aho, nampianatra tao amin’ny tempoly, nefa tsy nisambotra Ahy ianareo; fa mba hahatanteraka ny Soratra Masina izao.

50Ary samy nandao Azy izy rehetra ka nandositra. 51Ary nisy zatovo iray nanaraka Azy, tsy nitafy afa-tsy lamba hariry madinika, ary nosamborin’ny olona teo izy. 52Dia navelany teny amin’ireo mpisambotra azy ny lambany hariry madinika ka nandositra nitanjaka izy.

Ny nitsaran’ny Sinedriona an’i Jesosy

Mat 26.57-58; Lio 22.54-55, 63-71; Jao 18.12-15

53Ary nitondra an’i Jesosy ho any amin’ny Mpisoronabe izy ireo; ary nivory ireo lehiben’ny mpisorona rehetra sy ireo loholona ary ireo mpanoradalàna*. 54Ary i Petera dia nanaraka Azy teny lavidavitra teny hatrany anatin’ny kianjan’ny tranon’ny Mpisoronabe*. Ary niara-nipetraka teo amin’ny mpiandry raharaha izy ka namindro teo anilan’ny afo.

Mat 26.59-68; Lio 22.63-71; Jao 18.19-24

55Ary ireo lehiben’ny mpisorona sy ny Sinedriona* manontolo dia nitady zavatra hiampangana an’i Jesosy ka hamonoany Azy ho faty, nefa tsy nahita. 56Fa maro no niampanga lainga Azy, nefa tsy nifanaraka ny fanambaràny. 57Dia nitsangana ny sasany ka niampanga lainga Azy hoe: 58Izahay nandre Azy niteny hoe: Izaho handrava ity tempoly nataon-tanana ity ary amin’ny hateloana dia hanangana hafa izay tsy nataon-tanana Aho. 59Tsy nifanaraka anefa ny filazany na dia tamin’izany aza. 60Dia nitsangana ny Mpisoronabe* ka nankeo afovoany nanontany an’i Jesosy hoe: Tsy manan-kavaly va Ianao? Inona no iampangan’ireto Anao? 61Fa tsy niteny Jesosy sady tsy namaly akory. Dia nanontany Azy indray ny Mpisoronabe ka niteny taminy hoe: Ianao va no Kristy*, Zanaky ny Isaorana? 62Dia hoy Jesosy: Izaho no Izy. Ary ho hitanareo ny Zanak’Olona* mipetraka eo ankavanan’ny Hery sady avy eny amin’ny rahon’ny lanitra. 63Ary nandriatra ny fitafiany ny Mpisoronabe ka nilaza hoe: Inona indray no mbola ilantsika vavolombelona? 64Efa renareo ny fitenenan-dratsy ka ahoana ny hevitrareo? Dia nanameloka Azy ho mendrika ho faty izy rehetra.

65Ary nanomboka nandrora Azy ny sasany dia nanarona ny tavany sady namely tehamaina Azy ka niteny hoe: Maminania! Ary namely Azy tamin’ny tehamaina koa ireo mpiandry raharaha.

Ny nandavan’i Petera an’i Jesosy

Mat 26.69-75; Lio 22.56-62; Jao 18.17, 25-27

66Ary raha mbola teo ambany, teo an-kianja i Petera, dia avy ny iray tamin’ny ankizivavin’ny Mpisoronabe. 67Nony nahita an’i Petera namindro izy dia nijery azy ary niteny hoe: Ianao koa dia niaraka tamin’Ilay Nazareana atao hoe Jesosy. 68Nandà anefa izy ka niteny hoe: Sady tsy fantatro no tsy azoko ny teninao. Dia nandeha nankany ivelany ho any amin’ny vavahady izy, ary nisy akoho naneno tamin’izay.

69Ary nahita azy ilay ankizivavy ka namerina niteny tamin’ireo izay nanatrika teo fa io lehilahy io dia naman-dry zareo ireo. 70Fa mbola nandà indray izy. Nony afaka kelikely, ireo izay nanatrika teo, dia niteny indray tamin’i Petera hoe: Marina mihitsy fa anisan’ireny ianao; fa Galiliana koa ianao. 71Dia niozona sy nianiana izy hoe: Tsy fantatro izany Lehilahy lazainareo izany. 72Ary niaraka tamin’izay dia nisy akoho naneno fanindroany. Ary tsaroan’i Petera ny teny izay nolazain’i Jesosy taminy hoe: Raha mbola tsy misy akoho maneno fanindroany dia handa Ahy intelo ianao. Dia niala teo izy sady nigogogogo nitomany.

Currently Selected:

Marka 14: MRV

Highlight

Copy