Afositolo 1
1
Alu'aluwa Mahalina inubana fa'ina.
1 #
Lu 1:1-4
Tobohiyaku Tiyofilo, boi yaku buki nagona againe gaitoma moya'aina Yesu gifaisewana kadu givehawalayena-ma ga'etoladina. 2#Lu 24:49-51Yana faisewa ana abave'inuba againe gavebutu ga'etoladina, ada yana laka lobameya ana toveya Bana kahihina ganunauwena. Tu aimo keke gidalaka lobameya tu Alu'aluwa Mahalina yana kivetuvetunu againe badi kaliva yana kabu hivaini-yo hive'afositolo-ma vehimeya giveledi. 3#Lu 24:36-45E, Bana gi'alika ada gimididi-havagi yo badi kalivai-dina agaidiya Tauna gi'i'ivemogatalina, ada Bana wayawaina velemo'ena ma giseyemaune-mo'ena be keke adifaiweya yana mididi-havagi fa'ina hinavenuwanauna. Au tova keke sa'eyadi Tauna gi'i'ivemogatalina be badi hi'ita'itana, ada Yaubada yana itave'avina fa'ina higa ide yana yo'ogaga givehivehimeyeda ma gilukahihiyedi. Ada hidede amine ginunauwena aiyeta foti (40) agaidiya. 4#Lu 24:49; Yo 14:16-17Ada tova sa'eyana badi Bana buye aimo himiyami hi'au'a tu hida vehimeya giveledi gigayo, “Keke Yelusalema wananuyabuyabuni, au wanamiyami be abahawahega Kamaku giwonadabedabena-ma wanabodana, abahawahegai-nadi fa'ina Iya boi gavenuwa'atami be wanogalina, higa Alu'aluwa Mahalina. 5#Md 3:11Boi tuwaina bana Yoni gufa againe gikivebafitaisoyemi tu aiyeta keke moya'aina kanahegedi-yo Yaubada Alu'aluwa Mahalina againe ginakivebafitaisoyemi higa alu'aluwami gina'utuvina.” Hidedemi Yesu gigahedi.
Yaubada Yesu lobameya gisilakahina.
6Tu badi afositolo Yesu buye hivaga'auta ana toveya, badi hitoliluveluvena higayo, “Kaiwabu, ka'i adamoya hida tovai-nadi miLoma yadi abavehimeya unayawelina be ide miIsileli kanafaiwala-havagi be yo'o moya'aidi kanavehimeyedi?”
7 #
Mk 13:32
Bana Yesu gigahedi gigayo, “Kamaku anakaibe kaliva yadi tova o ka'i yadi aituha givehimeyena, tu tovai-nadi omi keke amifaiweya wanahalamaneni. 8#Md 28:19; Af 2:32, 5:32; Ef 3:16Tu gaitoma sa'eyana amifaiweya wanahalamanena, higa Alu'aluwa Mahalina ginaluvaiyemi-yo yana faiwala againe ginavemagami be Iya fa'ikuya wana'awatalatalaina fa'ina. E, Yelusalema againe Iya fa'ikuya wana'awatalatalaina, kadu Yudiya ada Sameliya ana fafali agaidiya ada hida babi ana fafali moya'aina lauveya wana'awatalatalaineku.” 9Ada hidedemi gigahe-yo Yaubada lobameya gisilakahina. Bana gilakalaka tu badi afositolo hilulauboda, ada au buhibuhi gisevauyena be keke adifaiweya hina'itani.
10Bana gilakalaka ada badi lobameya aimo hi'ita'itadona tu auhe'ama kaliva adi'iselu adi vaigau ve'akinamanamalina gilu'afuneunedi be lilidiya himidi. 11#Lu 21:27; Ha 1:7Ada higayo, “Omi miGalili, gavana fa'ina mededei wamidimidi tu lobameya wavedavedadaga? Bana hidevama Yesu Yaubada lobameya gisilakahina be ginuyabuyabumi amanadi, aimo tova mulina ginahobu'ela-havagi. E, Bana lobameya gilaka amine, kadu lobameya ginahobu'ela.”
Afositolo Yudasi ana hilafa fa'ina hinuwanuwa.
12Tu kaliva adi'iselu hidedemi higahe-yo badi afositolo oya Olive againe hitauya be Yelusalema againe hiyewadi, melalai-nadi ana lauva eda'ufo vaita kilomita sa'eyana amine. 13Ada au Yelusalema againe hiyemu tu manuwa hinagene himiyami-ma hiluku ada yadi abamiyami manuwa getana againe hilaka. Ada badi himiyami-ma adi egana Fita Yoni Yemesa Anidulu, kadu Filifi ada Tomasi, kadu Batolomiu ada Madiu, kadu Yemesa bana Alifiyo natuna, Saimoni bana yo'o miLoma hivenibainedi-ma kalivana, ada Yudasi bana Yemesa natuna. Au afositolo adi yo'o hidede amine. 14Ada tova moya'aina buye hivagavaga'auta, badi'iyao kadu vevine, ada Meli Yesu hinana kadu Yesu taineyao. Au moya'aidi se'eyaine hivagavaga'auta be hive'ove'o'ola.
15-16 #
Sam 41:9
Himiyami tu tova sa'eyana tovetumagana hivaga'auta be himitini, adi kilagalaga hanaledi-tuweniti (120). Ada au Fita gitowamidi be gilukahihi gigayo, “Tobohiyakweyao, keke gavana tu Yaubada Veyao Tuwaina ana bukiya boi tuwai-mo'ena givehimeyena amine ahe gilakayemu, higa Alu'aluwa Mahalina Devida awane Yudasi fa'ine gigaheye-vagahina, bana kalivai-nadi boi kaliva gi'aliyedi be Yesu hikive'avina amanadi. 17Bana Yudasi ma boi ime afositolo yama yo'o kalivana, fa'ina Yesu bana ime buye hida faisewa fa'ina givegidema.” Hidedemi Fita givebutu gilukahihi.
18 #
Md 27:3-10; Lu 22:22 Tu higa bana Yudasi yana gugai koyona fa'ina fata givaina, ada mani-nadi againe babi sa'eyana gikimonena. Au hida yana babi againe gibe'u, hifugana gibifolena be kamokamona giyemu ada au gi'alika. 19Ada miYelusalema moya'aidi hida Yudasi valeyana hinogalina, ada hidema fa'ina yana babi taudiyao bonadiya hivewagana Akelidama. Egana ana kaivila ma babi dayadayagina.
20 #
Sam 69:25, 109:8 Kadu Fita gigayo, “Au Yaubada bonana Same againe kaliva sa'eyana gi'etoladina Yudasi fa'ine gigayo,
Gilubodadi be kaliva moya'aidi yana manuwa hidanuyabuyabuna,
e keke tamo hakwadi medede againe gidavemanuwa.
Kadu Yaubada bonana sa'eyana gigayo,
Kadu tamo hakwadi velugana yana faisewa gidavaina.
21-22Yaubada bonana hidedemi gigahe fa'ina, kaliva sa'eyana bana ana hilafa fa'ina adafaiweya kadavenuwadadanena, be Yesu Keliso yana mididi-havagi fa'ina bana ime afositolo buye kaliva agaidiya ana'awatalatalaina. Ada bana kalivai-nadi yada yo'o agaideya kanavaina. E, tamo hakwadi ide boi kavebutu Kaiwabu Yesu buye kamiyami kanunudadana tuwaina Yoni gilumamala be kaliva gikivebafitaisoyedi ana toveya ada kanunauwena Yaubada Yesu lobameya gisilakahina be ginuyabuyabuda, au medema Yudasi ana hilafa kanasena.”
23Tu Fita hidedemi gigahe fa'ina, kaliva luhei adi egana hiyakahina. Sa'eyana ma Yosefa kadu hivewagana Basabasi, ada ana egana anaveto Yasito. Kadu kaliva anavelu ma Mataiyasi. 24-25Adi egana hiyakahini tu hive'o'ola higayo, “Kaiwabu-yo, kaliva moya'aima ase'asema uhalamanena fa'ina O unavehawalema. Hida kaliva adi'iselu amanadi hadema O uvenuwadadanedi be afositolo yadi faisewa gina'abina, higa faisewai-nadi Yudasi gidibutoyogena be koyona ana laufata ana abageya gina.” 26Hive'o'ola gihavaina, kaliva adi'iselu adi egana kabala kabi'ona againe hi'etoladina be gowa againe hidodona, ada au hibihiwana againe Mataiyasi ana egana gimidibe'u, fa'ina afositolo adive'ileveni agaidiya giluku.
Currently Selected:
Afositolo 1: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
