Afositolo 2
2
Alu'aluwa Mahalina tovetumagana givemagadi.
1 #
2Veh 16:9-11
Tu tafalolo ana egana Fenidikosi giyemu againe, tovetumagana se'eyaine ahe hivaga'auta. 2Ahe hivaga'auta tu auhe'ama butuna lobameya hinogalina, ana nogala vaita bolimanakouko gidamadumadu, ada manuwai-nadi againe hivetogadi-ma butuna gilelevilana. 3#Md 3:11; Yo 3:8Butuna hinogalini-yo iya'iyaya hi'itana, ana ita ma vaita ai noya'aina amine, ada gi'alavedavedama be kaliva sa'eyana sa'eyana getadiya gina gihiyoto. 4#Yo 14:17; Af 4:31, 10:44-46Au Alu'aluwa Mahalina moya'aidi nuwahinagediya giluku be givemagadi, ada hivebutu meya tulina tulina agaidiya hilulukahihi Alu'aluwa Mahalina gi'alaveleveledi amine.
5Tu mededei Yelusalema againe miYuda tufoidiyao himiyami, boi fafali moya'aina agaidiya hitauya be hina Yelusalema himiyami, ada badi Yaubada hihawadavadavana velemo'ena. 6Ada au badi kalivai-dina kaliva yadi lukahihi meya tulina tulina ma butuna hinogalini-yo, au moya'aidi hiyo'o ada ase'asedi gi'alilihiwana, fa'ina taudiyao bonadi tulina tulina badi tovetumagana hilulukahihiyena amanadi hinogalina. 7Au nuwadi givegafo'uya'uya kadu hiyaulowoga, ada buye hive'agahegahe higayo, “Badi hidevama kalivai-dina meya tulina tulina agaidiya hilulukahihi-ma au badi moya'aidi miGalili, keke fafali tulina tulina kalivadi. 8Bona Galiligaga hihalamanena nonogana gavadi-yo moya'aida kanogalina taudeyao bonada tulina tulina agaidiya hilulukahihi? 9Ide yada fafali ma Fadiya Midiya Elamu kadu Mesofotemiya, Yudiya Kafadosiya ada Fonitasi be Esiya. 10Kadu tufoida miFilidiya miFamifiliya miIdifita ada tufoida Libiya ana fafali melala ana egana Sailini liline katauya. Kadu tufoida miLoma tu Yelusalema againe kawakawaka. 11#Ha 7:9Ada higa tufoida miYuda-mo'a, kadu tufoida yo'o tulidiyao kalivai-dana tu miYuda yadi tafalolo againe kahawahegeda be kavemiYuda. E, kadu tufoida miKelita ada miAlebiya. Au yada fafali moya'aina tu Yaubada yana gugai fifiwalana taudeyao bonada tulina tulina agaidiya badi hilulukahihiyena-ma ide kanogalina.” 12Ada hidedemi moya'aidi hiyaulowoga kadu nuwadi givegafo'uya'uya fa'ina buye hive'atoliluvaluva higayo, “Taumadi! Hida gavana ana inuba?” 13Tu tufoidi tovetumagana hihawavelaigedi higayo, “Hida kaliva gufa koyona hiyuni-yo u'udi gikoyo.”
Fita yo'o agaidiya givebutu gilumamala.
Nagona Alu'aluwa Mahalina fa'ina gikivetuvetunu.
14Tu bana Fita badi afositolo ileveni buye himiyami amanadi gitowamidi givebutu yo'o agaidiya gilumamala agona lakahina gigayo, “Omi miYelusalema kadu ide miYuda moya'aimiyao ganakivetuvetunumi be wananogali-hagihagiyena. 15Ime kaliva keke gufa koyona againe u'uma gidakoyo omi wanuwanuwa amine. Ide yada dewa ma kaliva gufa koyona keke malalaugeya hidayuyu, au lavilaviya hiyuyu be u'udi gikoyokoyo. Ada adamoya kauwana ana ita bai naeni amine fa'ina u'uma keke gufa koyona againe gidakoyo, keke. 16Au hidevama wanogalina-ma Yaubada bonana ana to'awatalatalaina ana egana Yoweli boi tuwai-mo'ena gilukahihiyena gigayo,
17 #
Yow 2:28-32
Tova ana abalauyabu ana aituha fa'ina
Yaubada hidede amine gigahe gigayo,
Tomiyababi moya'aidi Alu'aluwakuya ganavemaga-mo'edi.
Natumiyao kaliva vevine yaku venuwa'ata
ganahawaveleveledi-yo hina'awatalatalainena.
Yami tubulakata yaku nuwanuwa hina'eno'itayena
kadu kaliva lakahidiyao yaku vehimeya hina'avayaunena.
18E, mena aituheya kadu aku agetoga
kaliva be vevine Alu'aluwakuya ganavemaga-mo'edi.
19-20Abaveyaulowoga wese lobameya ganafaisewana,
kauwana ginakweu vaikohi ginavedayaga.
Iya'iyaya gava babiya ganaseyemaunena,
dayaga ai'ala'alata siyo luvilovilona.
tu muliya Kaiwabu yana tova ginalakayemu,
higa vedewayauga ana tova matamatauhina.
21Tu gaveyao moya'aidi Kaiwabu againe hinakova,
medema adi kibababala hinanuhagana.”
Au hida Yaubada yana gahe bana Yoweli gi'etoladina-ma bana Fita giyakahina.
Yesu yana alika yana mididi-havagi fa'ina.
22 #
Yo 3:2
Kadu Fita gigayo, “Omi miIsileli yaku gahe wananogalina. Yesu kwanaNasaledi fa'ina ganagahe. Bana'e Yaubada velemona givegidena ma Yaubada Tauna givehawale-hagihagiyemi, fa'ina gifaiwalavelena be aituha fifiwalana ada abaveyaulowoga iya'iyaya lakahina omi hinafamiya gifaisewadi, ada hida gaitoma omi taumiyao wa'itadi be wahalamanedi. 23#Af 4:27-28Au hida kalivai-nadi waluve'alikana, fa'ina kaliva koyodiyao nimadiya wahegenauwena be kelose againe hitutuvefosena. Au hidedemi omi wahuluva tu boi tuwai-mo'ena Yaubada Tauna givehimeya be Yesu omi nimamiya gihawahegena ada wanaluve'alikana fa'ina. E, hidedemi Yaubada givehimeye-vagahina, kadu tuwai-mo'ena vehimeyai-nadi aimo keke wadafaisewani-ma au gihalamane-vagahina. 24Omi waluve'alikana tu Yaubada alikeya gisivemididina. E, alika ana bulava aulo'aulolona giyogona tu Yaubada giyauna, fa'ina alika yana faiwala giyawelina be keke anafaiweya ginakive'avi-vagahini. 25#Sam 16:8-11Alika Yesu keke anafaiweya ginakive'avi-vagahini fa'ina tuwai-mo'ena Devida Yesu yana gahe gigaheye-vagahina vaita Yaubada fa'ine gidalukahihi gidagayo,
Iya gahalamanena tova moya'aina
Kaiwabu agaikuya ginamiyami.
Bana'e lilikuya gimimiyami fa'ina,
ase'aseku keke gina'akolukoluni.
26-27Hidema fa'ina nuwaku giyamumu,
kadu yaku wavemwamwala galulukahihi.
Aimo wowoku lahiya ginadauda
tu yaku walulauboda ganamiyami,
fa'ina a gahalamanena alu'aluwaku
keke to'alika yadi abageya unahege-vagahini.
E, Iya ya Kaliva Mahamahaliku
keke-mo'a wowoku unahawahegeni-yo
babiya gina'alilini.
28Yawai-vagata ana eda ahe uvehawaleku.
Iya o buye kanamiyami fa'ina,
ganavemwamwala, ganavemwamwala-mo'a.
Au hidedemi Devida Yesu fa'ine gigaheye-vagahina.
Devida yana gahe Yesu yana mididi-havagi be yana kaiwabu fa'ina.
29 #
1Kin 2:10; Af 13:36 Tobohiyakweyao, nuwanuwaku ganagahe-mo'emi higa bwaneneda kikaiwabuna Devida boi tuwai-mo'ena gi'alika ada wowona hihuyana, au ana tomohuyahuya adamoya ide hinafadeya aimo gidadauda. 30#Sam 132:11Tu yana gahe gayakahina-ma keke tauna fa'ina, au aimo gavadi ginalakayemu fa'ina gigaheye-vagahina, ada Yaubada gavaimi bana againe giwonadabadaba-ma ahe gihalamanena, higa bwanenena sa'eyana tokaiwabu lakahina bana Devida amine ginasena. 31#Sam 16:10Ada gavadi Yaubada ginagani-ma Devida gi'ita-vagahina, ada au Yaubada yana Tovegida Keliso yana mididi-havagi fa'ina gigaheye-vagahina, gahe-nadi iya gayakahina amanadi higa Yaubada to'alika yadi abageya keke gidahege-vagahini, kadu wowona keke gida'alilini. 32#Af 1:4,8, 7:55-56; 1Fi 3:22Hidedemi Devida gigahe ada Yaubada hida kaliva Yesu makewa alikeya gisivemididina, ada ime moya'aimeyao to'ita, au yana mididi-havagi fa'ina a'awatalatalaina. 33E, Yaubada gisivemididina be i'atagine gisena. Kadu Tamana Alu'aluwa Mahalina givelena boi giwonadabadaba amine. Ada adamoya Yesu Alu'aluwa Mahalina ime agaimeya gi'iveninisena be givemagama, fa'ina meya tulina tulina agaidiya alulukahihi be omi wa'itana kadu wanogalina.
34-35 #
Sam 110:1
Kadu'e, Devida yana gahe gayakahina-ma keke tauna fa'ine gidagahe, fa'ina bana keke lobameya gidalaka Yesu amine. Tu gigahe gigayo,
Bana Yaubada Kaiwabu iya yaku Kaiwabu gigahena
gigayo, I'atagikuya unahiyoto. Unamiyami tu
nibaimomo ageyafayafaniya ganasedi.
Au hidedemi Devida gigahe vaita Yaubada Kaiwabu Yesu againe gidalukahihi.
36Au ide miIsileli moya'aimiyao wanahalamane-hagihagiyena. Bana hidevama Yesu omi kelose againe watutuvefosena tu Yaubada gisena Kaiwabu kadu yana Tovegida Keliso.” Au hidedemi Fita gilumamala.
Kaliva moya'aidi Fita yana laumamala hinogalini-yo hinuwavilana.
37 #
Af 16:30-33
Tu yo'o yana gahe hinogalini-yo ase'asedi gi'akolukoluna, bonana ase'asedi gi'onana fa'ina, ada Fita kadu afositolo velugadiyao agaidiya higahe higayo, “Tobohiyameyao, gavadi anagani?”
38Fita gigahedi gigayo, “Kaliva moya'aimi sa'eya sa'eya yami dewa koyona wanahegena be wanahagavilami, ada Yesu Keliso ana eganeya wanabafitaiso be Yaubada yami koyona ginayawelina fa'ina. Ada au Yaubada Alu'aluwa Mahalina omi agaimiya ginahawahegena be ginavemagami. 39#Ef 2:12-13,17Fa'ina Yaubada boi giwonadabadaba be Alu'aluwa Mahalina ginahawahegena omi agaimiya, kadu ami unumamomo agaidiya, kadu moya'aidi lauveya himimiyami-ma agaidiya. E, Yaubada yada Kaiwabu gaveyao moya'aidi ginakovadi be Bana againe hina'ela, medema agaidiya ginahawahegena.”
40Au hidedemi Fita gikivetuvetunudi kadu hifufu keke sa'eyadi againe gigaheya'aya'alidi be higa taudiyao hinalugolegoledi. Gigahedi gigayo, “Taumiyao wanalugolegolemi be hida yo'o koyodiyao Yesu hiluve'alikana-ma yadi koyona ana laufata omi keke buye wananuhagani.” Hidedemi Fita gigahe-fa'ilidi. 41#Af 4:4, 5:14Ada au tufoidi moya'aidi yana gahe hivetumaganena ada hibafitaiso. Ada medema aiyetai-nadi kaliva moya'ai-mo'edi adi kilagalaga tohiye tausani (3,000) tovetumagana yadi yo'o agaidiya hiluku.
Tovetumagana yadi miyami kadu yadi dewa fa'ina.
42Tu badi tovetumagana hihawahegedi be tova moya'aina badi afositolo yadi vehawala hinoganogalina, kadu yadi nuwanuwa sa'eyana buye himiyami hilulukahihi. Kadu hivagavaga'auta be buye hi'au'a, a'a oine higa Yesu ana anuwa'udu'udu hivaivaina, kadu buye hive'ove'o'ola. Tova moya'aina yadi miyami kadu yadi dewa au hidede amine. 43#Af 5:11-12Kadu'e, tova moya'aina afositolo aituha fifiwalana ada abaveyaulowoga hififaisewana fa'ina moya'aidi hiwowomumuyedi. 44#Af 4:32-35Kadu tovetumagana moya'aidi buye himiyami yadi nuwanuwa sa'eyana, ada yadi lokoloko taudiyao agaidiya hifolafolakena. 45Higa yadi babi ada yadi lokoloko tova tova hikimokimonevedamanena be gaveyao adiga o ka'i yadi lokoloko keke amanadi, badi agaidiya mani hivaivaina-ma hivetavetalaiyena. 46#Lu 24:53Kadu aiyeta moya'aina manuwa tafalolo lakahina againe se'eyaine hivavaga'auta, kadu taudiyao yadi manuweya buye hi'au'a be a'a hikikihinena Yesu ana anuwa'udu'udu fa'ina. E, yadi wavemwamwala kadu yadi nuwanuwa sa'eyana buye hi'au'a. 47#Af 6:7, 11:21,24Ada au tova moya'aina Yaubada hihawahawadavadavana, kadu kaliva moya'aidi hive'amohimohinedi. Ada tova sa'eyana sa'eyana Kaiwabu kaliva gikikibababaledi be tovetumagana yadi yo'o give'atutamo'aidi.
Currently Selected:
Afositolo 2: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
