Afositolo 3
3
Fita tovefela gisiveyawana.
1Tova sa'eyana Fita be Yoni manuwa-tafalolo lakahina againe hina, ada kauwana giwahivekenana ana ita bai tohiye amine higa ve'o'ola ana tova. 2#Af 14:8Ada badi hiyemuyemu tu kaliva sa'eyana yana tubuga againe givefela-ma manuwa-tafalolo ana abaluku againe hiwahiwahina, abaluku-nadi ana egana Abaluku Vewaga. Ada aiyeta sa'eyana sa'eyana tovefela hiwahiwahina, ada hidede againe hisesehobuyena be badi manuwa-tafalolo ana toluku agaidiya mani fa'ina give'ove'o'ola. 3Ada Fita be Yoni hidaluku ma gi'itadi, ada badi agaidiya mani fa'ina give'o'ola. 4Tu Fita kadu Yoni buye'i hi'itakwanekwanena. Au Fita gigahena gigayo, “U'itama-yo.” 5Fita gigahe-yo kaliva badi agaidiya gi'italele tu ginuwanuwa vaita tamo gavadi hidaveleni.
6 #
Af 3:16, 16:18 Au Fita gigahena gigayo, “We'a keke tamo mani tu we'a lemegaga sa'eyana akufaiweya ganavele. Yesu Keliso kwanaNasaledi ana eganeya o gavehimeye be unanudadana.” 7Au nimana i'atagine gi'abina be gisilakahina, ada auhe'ama kaliva agena kadu agemata'ihina gifaiwala. 8Au gimadutowamidi ada givebutu ginunudadana. Au badi buye manuwa-tafalolo againe hiluku tu bana ginunudadana gihegehegelakalakahina, Yaubada gihawahawadavadavana. 9Ada kaliva moya'aidi bana ginunudadana tu Yaubada againe givesivesiule-ma hi'itana. 10Au hiyakovina higa bana tova moya'aina manuwa-tafalolo ana Abaluku Vewaga againe gihiyoto be mani fa'ina give'ove'o'ola, ada au moya'aidi ase'asedi gi'alilihiwana ada yana yamumu fa'ina hiyaulowoga.
Fita yo'o manuwa tafalolo lakahina againe gilumamaledi.
Yadi koyona higa Yesu hiluve'alikana fa'ina.
11Tu manuwa-tafalolo againe abamiyami sa'eyana eda'awaneya gidauda, ana egana Solomoni yana Abamiyami, ada medede againe Fita Yoni himiyami kaliva giyamumu-ma buye'i. Bana nimadi gi'abi'abina tu kaliva moya'aidi yadi wayaulowoga badi agaidiya himadu. 12Bana Fita gi'itadi-yo gigahedi gigayo, “Omi ide miIsileli, gavana fa'ina hidevama giveyaulowogimi? Gavadi-yo wa'itakwanekwanema vaita taumeyao yama faiwala o ka'i yama tafalolo toyogina fa'ina hida kaliva adasiveyawani be gidanunaudadana? Keke hidedemi wananuwanuwa. 13#Yem 3:15; Lu 23:13-25Au bwanenedeyao yadi Yaubada, badi Abelahamo Aisake Yakobu yadi Yaubada yana kikaiwabu lakahina yana Tofaisewa Yesu givelena. Tuwaina Bana'e Failato againe wahegenauwena be alikeya ginahegena. Bana Failato nuwanuwana ginayauna tu omi bana matane wakilowena. 14Au omi Kaliva Mahamahalina kadu Yegayegana wakilowena tu wave'o'olena toyogina be toluve'alika ginayauna. 15#Af 2:32, 5:30Ada hidedemi yawaida inubana waluve'alikana tu Yaubada alikeya gisivemididina, au yana mididi-havagi ime ana to'ita. 16Ada au Yesu ana egana fa'ina, higa Bana ana eganeya avetumagana fa'ina, hida kaliva gifaiwala ada omi wa'itana kadu wahalamanena. E, yana yamumu moya'aimi matamiya inubana ma vetumagana Yesu ana eganeya.
Hagavila be koyona ana aiyawela fa'ina.
17 #
Lu 23:34
Tu tobohiyakweyao, iya gahalamanena gavaimi Yesu againe wafaisewani-ma omi keke wadahalamane-hagihagiyeni, kadu yami tonagona keke hidahalamane-hagihagiyeni fa'ina hidedemi wahuluva. 18#Lu 24:27Boi tuwai-mo'ena Yaubada badi bonana ana to'awatalatalaina moya'aidi awadiya gigaheye-vagahina vaita yana Tovegida Keliso aulolo tagiya gidanuhagana. Ada Bana givehimeyena amine, a gilakayemu. 19Au yami dewa koyona wanahegena be Yaubada againe wanahagavilami be yami koyona ginayawelina fa'ina. 20E, wananuwavilana be kaliva gufaleda againe meyana gi'ivebikana amine, Yaubada Tauna ase'asemi gina'ivebikana be faiwala wananuhagana, kadu Yesu Keliso gina'iveninisena be ginahobu'ela-havagi, Bana ahe givegidena be omi ginanagoyemi fa'ina. 21Ada Yaubada boi tuwai-mo'ena bonana ana to'awatalatalaina mahamahalidiyao awadiya gigaheye-vagahina amine, aimo tova mulina gaitoma moya'aidi babiya ginaluve'ivagudi, ada hida tovai-nadi fa'ina Bana Yesu lobameya gibodaboda. Tovai-nadi ginalakayemu, au ginahobu'ela-havagi. 22-23#2Veh 18:15,18-19E, to'awatalatalaina sa'eyana Mosese boi tuwai-mo'ena gigahe gigayo,
Yaubada yami Kaiwabu aimo tova mulina bonana ana to'awatalatalaina sa'eyana omi yami yo'o hinafamiya ginakivemididina. Iya gakivetuvetunumi amine, kadu bana ginakivetuvetunumi. Ada au gaitoma moya'aina ginavehimeyemi-ma wanadibumuhigena. Hai kaliva bana yana vehimeya keke ginadibumuhigeni, medema Yaubada yana yo'o agaidiya ginalu'atugena be ginaluyaweyawelina.
Hidedemi Mosese gigahe.
24Kadu anafaiweya Yaubada bonana ana to'awatalatalaina moya'aidi gavadi tova adamoya ginalakayemu-ma tuwai-mo'ena higaheye-vagahina. E, gaveyao Yaubada yana venuwa'ata giveledi, medema tova adamoya fa'ina higaheye-vagahina. Bana to'awatalatalaina Samuwela hidedemi gigaheye-vagahina, kadu anafaiweya to'awatalatalaina moya'aidi wai himulina amanadi tova adamoya fa'ina higaheye-vagahina. 25#Aba 22:18; Ga 3:8Au Yaubada yana to'awatalatalaina awadiya omi fa'imiya giwonadabadaba, ada Yaubada boi tuwaina bwanenemiyao agaidiya yana veyao gisena-ma kadu omi fa'imiya gisena. E, Abelahamo againe gigahe gigayo, ‘A unumamomo agaidiya tonuwakabubu ginatubuyemu be fafali tulina tulina adi yo'o moya'aidi ginanuwakabubuyedi.’ Hidedemi Yaubada gigahe. 26Ada au Yaubada yana Tofaisewa Yesu gisivemididini-yo omi agaimiya gimidi'iveninisena be ginanuwakabubuyemi. Bana'e omi moya'aimiyao ase'asemi ginakiviviyena be eda koyona wanahegena fa'ina. Au hidedemi ginanuwakabubuyemi.”
Currently Selected:
Afositolo 3: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
