Yoni 13
13
Yesu ana tomuliya agedi gikolana be nuwahobu ginavehawaledi.
1 #
Yo 15:13
Tu aiyeta sa'eyana gidauda be tafalolo ana egana lobama ana tovenuwa'ata yana Abamaduviviya ginayemu. Ada au Yesu gi'ayaunena yana tova ahe giluvedaveda'ufo be hida babi ginanuyabuyabuni tu ginayewana Tamana againe. Tova moya'aina nuwanuwana lakahina ime'eyao yana kalivamomo babiya amiyami amanadi, ada tova giyemu be yana nuwanuwa agaimeya gavatubuga ma ginavehawalema.
2-3 #
Yo 13:27, 16:28 Au Yesu be ime ana tomuliya avevelavilavi tu ana tomuliya sa'eyana gimiyami, ana egana Yudasi-Isikaliyota, bana Saimoni natuna. Ada Setani ahe gilakayemu yana nuwanuwa gisena Yudasi ase'asene be Yesu nibaineyao agaidiya ginahawavemogatalena, tu Yesu gihalamanena Tamana abavehimeya gaitoma moya'aina agaidiya ahe givele-'owona, kadu Yaubada againe gitauya be gihobu'ela ada Yaubada againe ginayewana ma gihalamanena. 4-5Hidedemi gihalamanena tu tolama againe a'au'a-ma gitowamidi, ana aikeva givehalilina digo sawelo dobone gihifo tu nau'a againe gufa gihiwana, au givebutu vaita agetoga amine ime ana tomuliyamomo agema gikolana digo sawelo dobone gihifona-ma againe giluvehavehayana.
6Gi'ikolakola tu gi'ela higa vaita Saimoni-Fita agena gidakolana ma Fita gigahena gigayo, “Ho Kauveya! Ka'i iya ageku unakolana, ka'i keke?”
7Yesu gigayo, “Adamoya hida yaku huluva ana nuwanuwa keke udahalamaneni tu aimo tova mulina nuwa ginamahalina againe unahalamanena.”
8Tu bana Fita gigayo, “Keke-mo'a iya ageku unakolani.”
Yesu gigayo, “Ka'i age keke ganakolani, au keke yaku kaliva o'eni.”
9Hidedemi gigahe-yo Fita gigayo, “Kauveya, au keke agekuga unakolani tu nimaku u'uku buye'i.”
10Au Yesu gigayo, “Ahe utowa be matatabuna au yegayega tu giluboda be ageniga ganakolana. Ada omi moya'aimi yegayegamiyao tu kaliva sa'eyanaga keke yegayegana.” 11Fa'ina Yesu a gihalamanena gava kaliva nibaineyao agaidiya ginahawavemogatalena. Hidema fa'ina ahe gigahe moya'aimi yegayegamiyao tu kaliva sa'eyanaga keke yegayegana.
12Tu au agema gikolana gihavaina, ana aikeva gi'osena digo tolameya gi'enolukekela-havagi be gigahema gigayo, “Ka'i yaku huluva omi agaimiya mene wahalamanena? 13Omi wavewagaku Tovehawala kadu Kauveya. Au wagahe yamumuna, fa'ina wona velemona yami Kaiwabu Iya'eku. 14#Lu 22:27Ada Iya'eku yami Tovehawala yami Kaiwabu agemi gakolana vaita agetoga amine fa'ina, meda omi amifaiweya wadahuluva, agemi wadave'a'ikolakola. 15#Fl 2:5; 1Fi 2:21Au dewa hagihagina gavehawalemi be omi taumiyao hidede amine wanahuluva fa'ina. Omi agaimiya Iya gahuluva amine, kadu omi wanahuluva. 16Yaubada gihalamaneku tu gagahegahe, agetoga yana tovehimeya keke gidakaiwabuhegeni, kadu tovenuwa'ata bana gi'iveninisena-ma keke gidakaiwabuhegeni. 17#Ye 1:25Au hida yaku dewa ana nuwanuwa ahe wahalamanena. Ka'i hida nuwanuwa wanadibumuhigena digo, yami vemwamwala gavatubuga wananuhagana.” Au hidemi ve'agetoga fa'ina Yesu gigahe.
Bana Yudasi yana hawavemogatala fa'ina Yesu gilukahihi.
Madiu 26:20-25; Maki 14:17-21; Luke 22:21-23
18 #
Sam 41:9
Kadu gigayo, “Keke vaita moya'aimi fa'imiya gadalukahihi. Kaliva galuwafami-ma a gahalamanemi tu sa'eyana agaimiya ginakoyo. Bana fa'ine Veyao Tuwaina ana buki gigahe gigayo,
Kaliva yaku tolameya buye a'au'a-ma givenibaineku.
Ada au bana kalivai-nadi hidede amine ginahuluva be Yaubada bonana eto'etoladina velemo'ena ginalakayemu fa'ina.
19 #
Yo 14:29
Hida huluva aimo keke gidalakayemu tu tova adamoya gavenuwa'ata-vagahimi be aimo ginalakayemu againe, au wanavetumaganeku wanagayo, Wona velemona Bana Keliso, Yaubada yana Tovegida.
20Gagahe velemo'ena agaimiya, kaliva gana'iveninisena-ma hakwa'adi ginavetobohiyanena, au vaita kadu Iya ginavetobohiyaneku ada hakwa'adi ginavetobohiyaneku, au vaita kadu Bana'e gi'iveniniseku-ma ginavetobohiyanena.”
21Tu Yesu hidede amine gilukahihi gihavaina, gi'ase'u'aulolo ada ime ana tomuliya agaimeya gigaheye-mo'ena gigayo, “Yaubada gihalamaneku tu gagahegahe, kaliva sa'eyana agaimiya nibaikweyao agaidiya ginahawavemogataleku.”
22Yesu gigahe-yo au ime ana tomuliya ave'a'ita'ita, anuwanuwa ka'i hakwadi fa'ine gilukahihi. 23#Yo 21:7,20Tu iya Yesu ana tomuliya nuwanuwana lakahina iya'eku amanadi, Bana liline ga'enolukekela tu ga'au'a. 24Au bana Saimoni-Fita giveguwautuleku gigayo, “Hakwadi fa'ina gilukahihi-ma unatoliluvaluva be kanahalamanena.”
25Giveguwautuleku-yo au ga'alaliya Yesu tagane gagayo, “Kauveya, hakwadi fa'ina ulukahihi?”
26Yesu gigayo, “Hida a'a bwai againe gana'utuvina ada bana ganavelena-ma kalivai-nadi.” Gigahe-yo au a'a gi'utuvina Yudasi-Isikaliyota givelena, bana Saimoni natuna. 27Ada Yudasi a'a gi'abina tovai-nadi Setani bana ase'asene giluku, ada Yesu gigahena gigayo, “Ya faisewa unamaduvehavaina.”
28Tu keke tamo ime agaimeya buye a'au'a-ma gidahalamaneni, ka'i gavana fa'ina Yesu Yudasi againe hidede amine gigahe. 29#Yo 12:6Tufoima anuwanuwa higa Yudasi mani ana abavedodoga gi'ita'itave'avina fa'ina, Yesu gigahena vaita tafalolo ana a'a bana gidakimoneni, o ka'i koyokoyo agaidiya tamo nuwakabubu gidaveledi. 30Ada au Yudasi a'a Yesu givelena-ma gi'a gihavaina, auhe'ama gimaduhobu be gina. Ada mala a gibogi.
Yesu vehimeya ivaguna gisena.
31Yudasi a gina tu Yesu gigayo, “Au adamoya Yaubada Iya Tohobu'ela gikivekikaiwabuku, kadu Yaubada yana kikaiwabu Iya Bana Natuna agaikuya kaliva hi'itadavadavana. 32#Yo 17:5Ka'i Yaubada yana kikaiwabu Iya agaikuya kaliva hina'itadavadavana amine, au kadu Yaubada Tauna yana kikaiwabu ginaveleku be ganakaiwabu-mo'a. E, hidede amine ginamadu-kivekikaiwabuku.
33 #
Yo 7:33-34
Natukweyao, wanogali! Keke lauva tunugina buye kanamiyami. Tova kabi'ona ganalowoga tu aimo wanaleleku ada miYuda agaidiya gagaheyena amine, kadu omi agaimiya gagahe gagayo, Iya ganana againe keke amifaiweya wana'ela.
34 #
Yo 15:12; Ef 5:2 Tu vehimeya ivaguna ganavelemi. Taumiyao agaimiya wanave'ahawahawahega. Iya omi fa'imiya gahawahegeku amine, taumiyao agaimiya wanave'ahawahawahega. Au hidede amine gavehimeyemi. 35#1Yn 3:14; Yo 17:23Ka'i taumiyao agaimiya wanave'ahawahawahega, au huluvai-nadi againe kaliva moya'aidi hinahalamanena hinagayo, Wona velemona badi Yesu ana tomuliya.” Hidedemi Yesu gigahe.
Yesu Saimoni-Fita yana vekeke fa'ina gilukahihi.
Madiu 26:31-35; Maki 14:27-31; Luke 22:31-34
36Tu Saimoni-Fita gigayo, “Kauveya, hami unana?”
Yesu gigayo, “Iya ganana againe, adamoya keke afaiweya unamuliyeku tu tova mulina unamuliyeku.”
37Fita gigayo, “Kauveya, gavana fa'ina adamoya keke akufaiweya ganamuliye? Au gahawahegeku be O fa'iniya gana'alika.”
38Yesu gigayo, “Ugahe vaita Iya fa'ikuya una'alika tu gagahe velemo'ena againiya, kamukamu keke ginakwage tu nagona unamidivekekeyeku tova tohiye.”
Currently Selected:
Yoni 13: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
