Yoni 7

Yesu taineyao buye hilulukahihi.

1 # Yo 5:18 Au Yesu hidede amine gilukahihi gihavaina, Galili ana fafali againe gimiyami be ginunudadana. MiYuda yama tonagona nuwanuwadi hinaluve'alikana fa'ina, Yesu keke nuwanuwana Yudiya ana fafali againe ginanunaudadana. 2#2Veh 16:13Tu miYuda yama tafalolo sa'eyana giluve'eda'ufo, ana egana A'a-'aiyala ana vesiule. 3Ada Yesu taineyao higahena higayo, “Hida Galili ana fafali unahegeni tu unana Yudiya ana fafaliya be kadu badi ya kalivamomo wesede againe ya aituha fifiwalana ufifaisewadi-ma hina'itadi. 4Ka'i kaliva nuwanuwana moya'aidi tauna hinahalamanena be hinavetumaganena, au keke ginafaisewakau, fa'ina Tauni una'ivemogatale yo'o matadiya.” 5#Af 1:14Hidemi higahe fa'ina badi taineyao nonogana keke hidavetumaganeni.

6Badi higahe tu Yesu gigahedi gigayo, “Yaku ivemogatala ana tova aimo keke gidalakayemu tu omi'iyao ma gava tova nuwanuwami wanana, au wanana. Keke tamo gavadi fa'ina wadabodaboda. 7#Yo 15:18Tomiyababi keke omi agaimiya hinanuwakoyo tu Iya'eku ma yadi dewa koyona gahawavemogatalena fa'ina, Iya agaikuya hinuwanuwakoyo. 8Au tafalolo Yelusalema againe omi wanana tu yaku ivemogatala ana tova aimo keke gidalakayemu fa'ina, adamoya hida tafalolo againe Iya keke ganana.” 9Ada au hidede amine gigahedi-yo au Galili againe gimiya.

Yesu gina Yelusalema againe tafalolo ana egana A'a-'aiyala

ana vesiule fa'ina.

10Tu Yesu taineyao tafalolo againe ahe hilowoga be hina, tu muliya Bana Tauna kadu gina. Au keke yo'o buye hidana, anakaibe gina. 11Ada au miYuda yama tonagona yo'o agaidiya Yesu hilelelena kaliva hitoliluveluvedi higayo, “Yesu hai gimimiyami?”

12Ada moya'aidi yo'o sa'eyana sa'eyana agaidiya Bana Yesu fa'ine hi'alawoluwolu. Tufoidi higayo, “Bana kaliva hagihagina.” Tu tufoidi higayo, “Keke, Bana keke kaliva yamumuna fa'ina yo'o ginuwa'abiyedi, gigahe vaita Tauna kaliva kikaiwabuna.” 13#Yo 12:42, 19:38Hidemi hive'agahegahe tu miYuda yama tonagona himatausedi fa'ina, keke yo'o matadiya hidalukahihiyeni.

Yesu manuwa-tafalolo againe givehawala.

14Tu tafalolo ana tova hinafane Yesu manuwa-tafalolo againe giluku givebutu givehawala. 15#Md 13:54Ada badi miYuda hinogalini-yo nuwadi givegafo'uya'uya higayo, “Gavadi-yo hida kaliva tonagona yadi sikulu againe keke gidasikulu tu ginuwahuya?”

16 # Yo 12:49, 14:10 Au Yesu gigahedi gigayo, “Keke Tauku yaku nuwanuwa gadavehawalemi tu au Bana gi'iveniniseku amanadi yana nuwanuwa gavehavehawalemi. 17Gava kaliva nuwanuwana velemona Yaubada yana vehimeya gina'itave'avina, medema ginahalamane-mo'ena ka'i Bana Yaubada yana nuwanuwa gavehavehawala, o ka'i au Tauku yaku nuwanuwagaga gavehavehawala. 18Bana kaliva ka'i tauna yana nuwanuwa ginalukahihiyena digo, au nuwanuwana tauna ginakilakahina, tu Iya nuwanuwaku Bana gi'iveniniseku-ma ganakilakahina, fa'ina keke tamo gadafwaya, au yaku gahe velemo'ena. 19Mosese Yaubada yana vehimeya givehawalemi tu keke tamo hakwadi agaimiya vehimeyai-nadi gida'itave'avini. Au gavana fa'ina nuwanuwami wanaluve'alikaku?”

20 # Yo 8:48-52 Hidedemi Yesu gigahe-yo yo'o higahena higayo, “A! O'eni wayafune, fa'ina ugahegahe vaita kabakabaleya. Hakwadi nuwanuwana ginaluve'alika?”

21Bana Yesu gigahedi gigayo, “Gugai fifiwalana sa'eyanaga sabati againe gafaisewana fa'ina, omi moya'aimi nuwami givegafo'uya'uya. 22#1Veh 12:3Boi Mosese givehimeya be fwefweya kaliva moya'aidi wowodiya Yaubada yana iya'iyaya wanatomogolohina, tu hida dewa inubana keke Mosese againe, au tuwai-mo'ena bwanenemiyao hidedemi hihuluva. Ada au Mosese givehimeya fa'ina, ka'i fwefweya kaliva ana aiyeta eita sabati againe ginaluvefosena, au sabati nonogana wowone iya'iyaya wanatomogolohina. 23#Yo 5:8-10,16Ada sabati nonogana mena iya'iyaya ana tomogolota againe wafaisewa be Mosese yana vehimeya wana'itave'avina fa'ina. Ka'i sabati againe hidede amine omi wafaisewa digo, gavadi-yo Iya agaikuya wanuwakoyo sabati againe gafaisewa yamumuna be kaliva yana aulolo matatabuna gavaihegena fa'ina? 24#Yo 8:15Keke kiholiholi amine kaliva wanahawavekoyoyeni. Nagona wanalele wananuwanuwa, ka'i velemo'ena bana gihuluva koyona o ka'i keke. Wanahalamane-hagihagiyena, au wanagahe.” Hidemi Yesu gigahe.

Kaliva hive'agahegahe ka'i Yesu Yaubada yana Tovegida Keliso, Bana miIsileli yadi yo'o ginanagoyedi o ka'i keke.

25Tu Yesu yo'o agaidiya hidedemi gigahe-yo au miYelusalema tufoidi hive'atolitoli higayo, “Bana miYuda yama tonagona nuwanuwadi hinaluve'alikana-ma ka'i hidevama Bana'e? 26Atu wa'ita, kaliva moya'aidi matadiya gilulukahihi tu yada tonagona hive'amata, keke tamo bana againe hidagahe. Ka'i velemona hinuwanuwa vaita hida kaliva Yaubada yana Tovegida Keliso? 27#Yo 7:41-42Atu aimo Yaubada yana Tovegida Keliso ginalakayemu ana toveya, keke tamo hakwadi yana tauya ginahalamaneni tu hida kalivai-nadi ma yana melala moya'aida kahalamanena.” Hidemi miYelusalema higahe.

28 # Md 11:27 Tu Yesu aimo manuwa-tafalolo againe givehavehawala. Atu miYelusalema yadi gahe ginogalini-yo gikovadona gigayo, “Omi wagagahegahe vaita wadahalamaneku kadu yaku melala wadahalamaneni tu keke Tauku yaku nuwanuwa fa'ina omi agaimiya gada'ela. Bana gi'iveniniseku-ma au velemona tu Bana'e keke wadahalamaneni. 29Au Bana'e Iya gahalamanena, fa'ina Bana buye amiyami ada gi'iveniniseku be gahobu'ela.”

30 # Yo 8:20, 13:1 Hidede amine Yesu gigahe fa'ina, badi tonagona nuwanuwadi Yesu hinakive'avina tu yana tova aimo keke gidalakayemu fa'ina, ana kive'avina higa-wayoga. 31#Yo 2:23, 11:45Tu moya'aidi yo'o agaidiya hivetumaganena ada hive'agahegahe higayo, “Ide kahalamanena Yaubada yana Tovegida Keliso ginalakayemu againe, nimana ana iya'iyaya ginafifaisewana. Hida hima Yesu au makewa Yaubada yana Tovegida, fa'ina Yesu nimana ana iya'iyaya moya'aina gififaisewana, ada bana vaita aimo ginalakayemu-ma keke-mo'a hida kaliva anafaiweya ginafaiwalahegeni.”

Tonagona tafatafalolodiyao adi egana Falisi kaliva

hi'iveninisedi be Yesu hinakive'avina.

32Atu Falisi yo'oyo'o yadi ve'agahegahe vaita Yesu Bana Keliso Yaubada yana Tovegida ma hinogalina. Hinogalini-yo badi'iyao kadu abaveyao ana tofaisewa kikaiwabudiyao badi tuilala hi'iveninisedi be hinakive'avina. 33Au Yesu gigahe gigayo, “Aimo tova kabisonaga Iya omi buye kanamiyami. Kanamiya kabisona tu Bana gi'iveniniseku-ma againe ganayewaku. 34#Yo 8:21Aimo wanaleleku tu keke wananuhagaku, ada Iya ganana againe omi keke amifaiweya wana'ela.”

35Yesu hidedemi gigahe ada miYuda hinogalini-yo hive'agahegahe higayo, “Bana hima kaliva hai ginana-yo keke adafaiweya kanahagani? Ka'i yada yo'o miGilika hi'abinauna-ma agaidiya ginana be miGilika ginavehawaledi, ka'i keke? 36Gavadi-yo gigahe gigayo, Aimo wanaleleku tu keke wananuhagaku, ada Iya ganana againe keke amifaiweya wana'ela? Hidema gavaimi ana nuwanuwa?” Hidemi hive'agahegahe.

Gufa miyamiya-vagahina fa'ina Yesu gilukahihi.

37 # Yo 4:10,14 Tu tafalolo ana egana A'a-'aiyala ana vesiule ana lauyabu gilakayemu. Medema aiyetai-nadi tova lakahina, ada au Yesu yo'o hinafadiya gitowamidi gikovadona gigayo, “Gava kaliva ase'ase agona gitaina, medema Iya agaikuya uda'ela yaku gufa udayuna. 38Ka'i unavetumaganeku, gufa miyamiya-vagahina gava nuwahinageniya ginaguwaguwalena be ginanauna. Hidede amine Veyao Tuwaina ana buki gigahe.” 39#Yo 15:26; Af 2:4Yesu hidedemi gigahe higa badi hinavetumaganena-ma Alu'aluwa Mahalina ase'asediya ginaluku. Tu Yesu aimo keke gida'alika-yo yana wakaiwabu gidalaka lobameya fa'ina, kadu Yaubada Alu'aluwana kaliva ase'asediya aimo keke gida'iveniniseni.

40 # Af 3:22 Tu kaliva tufoidi yo'o agaidiya Yesu yana lukahihi gufa miyamiya-vagahina fa'ina hinogalini-yo higayo, “Bana hidevama wona velemona Yaubada bonana ana To'awatalatalaina lakahina, bana kabodabodana-ma.”

41Kadu tufoidi higayo, “Bana makewa Yaubada yana Tovegida Keliso, yada yo'o ginanagoyeda.”

Tu kaliva tufoidi higayo, “Yaubada yana Tovegida keke-mo'a Galili againe ginatubuyemu, tu Bana Yesu ma kwanaGalili. 42#Mai 5:2; Md 2:4-6Fa'ina Veyao Tuwaina ana buki gigahe vaita Yaubada yana Tovegida bana Devida ana yo'o kalivana. Bedelihema againe ginatubuyemu, medema Devida yana melala.”

43 # Yo 9:16 Ada au Yesu fa'ine hinuwanuwaluga. 44Ada kaliva tufoidi nuwanuwadi hinakive'avina tu ana kive'avina higa-wayoga.

MiYuda yadi tonagona keke-mo'a Yesu hidavetumaganeni.

45 # Yo 7:32 Atu badi tuilala hi'ela vaita Yesu hidakive'avini amanadi abaveyao ana tofaisewa kikaiwabudiyao be Falisi agaidiya hiyewadi, ada hiyemu-yo badi Falisi hitoliluveluvedi higayo, “Gavana fa'ina keke wada'aliyeni?”

46 # Mk 1:22 Badi tuilala higayo, “Bana hima yana gahe au keke tamo hakwadi Bana amine boi gidalukahihi.”

47Ma badi Falisi hihawavelaigedi higayo, “Ha! Kadu omi'iyao ma yana ve'alololo nuwami gi'abina. 48#Yo 12:42Keke tamo hakwadi yami tovehimeya agaidiya kadu ime Falisi agaimeya Bana againe gidavetumagana, keke-mo'a. 49Tu hida hima yo'oyo'o kaliva-kawowo Bana himuliyena amanadi, Yaubada yana vehimeya Mosese givelena-ma keke hidahalamaneni fa'ina au Yaubada yana alatabutabu dibune himimiyami.”

50-51 # Yo 3:1-2 Hidemi badi Falisi higahe tu Falisi sa'eyana ana egana Nikodimo, bana boi Yesu againe gi'ela buye hilukahihi amanadi gigahedi gigayo, “Keke kanagahe-kawowo yo kaliva kanahawavekoyoyeni. Yada vedewayauga ana vehimeya keke hidede amine. Nagona kaliva kanayowanina be yana gahe kananogalina, yana dewa kana'itanuwenuwena ada ka'i koyona amine gihuluva, au kanahawavekoyoyena.”

52Au badi Falisi higahena higayo, “Ha! Ka'i o kadu kwanaGalili Yesu amine? Au Yaubada bonana againe unalele be halamana unavaina. Keke tamo Yaubada bonana ana to'awatalatalaina Galili againe ginatubuyemu, keke-mo'a.” [ 53Ada au higahe-yo moya'aidi hi'abinauna yadi manuweya.

Currently Selected:

Yoni 7: viv

Highlight

Copy