Luke 11

Yesu ve'o'ola fa'ina givehawala.

Madiu 6:5-14, 7:7-11

1Tova sa'eyana Yesu give'ove'o'ola. Give'o'ola gihavaina ana tomuliya sa'eyana gigahena gigayo, “Kauveya, bana Yoni ana tomuliya ve'o'ola givehawaledi amine, meda ime udavehawalema.”

2Yesu gigahedi gigayo, “Wanave'o'ola againe hidede amine wanagahe wanagayo,

Tamama, a egana mahamahalina anave'amohimohinena.

Ya abavehimeya ana tova gidalakayemu ase'asemeya.

3Aiyeta sa'eyana sa'eyana amaga udavelevelema.

4Yama koyona O udavenuwauluyena, fa'ina gaveyao moya'aidi agaimeya hikoyo

medema yadi koyona kadu ime avenuwauluyena.

Kadu keke aladibidibi againe unahawahegema.”

Ve'o'ola fa'ina hidedemi Yesu givehawala.

5-6Kadu gigahedi gigayo, “Ka'i agaimiya kaliva sa'eya uda'enonuwaulu tu bogi nafone tobohiya sa'eyana againiya gidalakayemu ada keke tamo a'a againiya gidadauda, au tobohiya velugana yana manuweya udana udagahena udagayo, Kusebo, tobohiyaku sa'eyana yanana againe agaikuya gilakayemu, ada keke tamo a'a agaikuya gidadauda-yo bana fa'ine ganakidewadewa, fa'ina a'a tohiye udaveleku.

7Tu ka'i tobohiya vetawaneya gidagahe gidagayo, Keke unakive'ive'itaku. Wana ahe gafalina natukweyao buye a'enobala. Au keke akufaiweya ganamidi tamo gavadi ganavele. 8#Lu 18:5E gavaiyami? Keke-mo'a ginamidi a'a ginavele bana tobohiya fa'ine tu ya ve'o'ola againe u'atuvefa'ila be bana keke nuwanuwana wowomumu ginanuhagani fa'ina, ginamidi be gavadi nuwanuwa ma ginavele.

9 # Yo 14:13-16 Ada Iya gagahemi, wanave'ove'o'ola be Yaubada ginavelemi. Wanalelele be wananuhagana. Wanakikifisifisi'a be Yaubada wana ginayauna. 10Wa'ita, gaveyao hive'ove'o'ola medema Yaubada nimane hinavaina, kadu gaveyao hilelele medema hinanuhagana, ada gaveyao hikikifisifisi'a medema agaidiya Yaubada wana ginayauna.

11Omi kaliva wanogali! Ka'i natumiyao hida'ela hidagayo, Kamaku, tamo igana gada'ana, ma ka'i keke igana tu oloto wadaveledi? Keke. 12O ka'i hidave'o'ola hidagayo, Kamaku, tamo kamukamu foudi gada'ana, ma ka'i atagikwamana wadaveledi? Keke. 13Omi tokoyona tu nuwakabubu hagihagina natumiyao waveleveledi. Atu ka'i Tamada lobameya wanave'ove'o'olena amine, Bana'e Alu'aluwa Mahalina agaimiya ginahawahegena ginahawahege-mo'ena.”

Yesu yana faiwala inubana ka'i Yaubada againe

o ka'i Setani againe?

Madiu 12:22-37; Maki 3:20-27

14 # Md 9:32-34 Tova sa'eyana Yesu kaliva wayafunena ginuhagana. Bana kalivai-nadi yafune giluvaiyena fa'ina, awana gi'abodana. Ada Yesu yafune giwavi-yo kaliva awana gila'ana be givebutu gilukahihi. Au yo'o hiyaulowoga. 15Tu tufoidi higayo, “Biyelisibuli Yesu gifaiwalaveleni-yo yafune giwaviwavidi, bana yafune adi tokaiwabu higa Setani.” 16#Md 12:38, 16:1Kadu tufoidi nuwanuwadi hinavebauna fa'ina, higahena higayo, “Aituha fifiwalana unafaisewani-yo O ya inuba velemo'ena Yaubada againe ma anahalamanena.”

17Tu Yesu yadi nuwanuwa gihalamanena ada gigahedi gigayo, “Hai fafali ana melala tulina tulina buye hilulugaviya, medema taudiyao hinavehavaidi. Kadu hai yo'o ana kaliva tova moya'aina buye hivekwavekwageya, medema hina'abi'ota'ota be taudiyao hinavehavaidi. 18Meda anafaiweya ka'i Setani tauna yana yo'o ginavenibainedi, bana tauna yana yo'o ginavehavaidi ada au yana abavehimeya ginahavaina. Omi wagahe vaita Biyelisibuli higa Setani gidafaiwalaveleku-yo yafune gadawaviwavidi. Ka'i Setani hidedemi gidafaiwalaveleku digo, ana nuwanuwa vaita tauna yana yo'o gidawaviwavidi. Hima keke hidedemi. 19Hida wagahe vaita Biyelisibuli yana faiwala againe yafune gadawavidi. Ka'i Iya Biyelisibuli yana faiwala againe gawavidi digo, hakwadi yami kalivamomo faiwala giveledi-yo yafune hiwavidi? Ka'i Biyelisibuli faiwala giveledi? Keke-mo'a. Omi wagahe-kawowo ma taumiyao yami kaliva hinavenuwa'atami. 20Atu ka'i Iya Yaubada yana faiwala againe yafune gawavidi amine o Yaubada yana itave'avina againe wavebutu wamimiyami ase'asemiya givehivehimeya.

21Ka'i kaliva fifiwalana yana wafuluma yana wagiyo yana manuwa gi'ita'itave'avina, au yana lokoloko moya'aina ginada yamumuna. 22#Kl 2:15Tu ka'i kaliva sa'eyana gifaiwalahegena-ma gina'ela ginamununa be ginafaiwalahegehegena, au yana fuluma yana giyo givetumaganena-ma ginanauwena ada yana yabwana ginafolakena.

23Hai kaliva keke tobohiyaku, medema nibaiku kadu hai kaliva tomuliya adi yaudi againe keke gidavelugaku, medema gihuluva vaita kaliva gidawavidi be keke hinamuliyeku.”

Ka'i kaliva boi wayafunena ma Alu'aluwa Mahalina keke

ginaluvaiyeni, au yafune ginayewana.

Madiu 12:43-45

24Kadu Yesu gigayo, “Ka'i yafune kaliva ginanuyabuyabuna amine, ginanauna ai'aveya abaveyawai ginalelena. Ka'i ginalele-wayoga au ginagayo, Ganana be yaku abamiyami ganuyabuyabuna-ma againe ganayewaku. 25E, bana yafune ginalakayemu yana manuwa yegayegana ma ginanuhagana vaita tamo hakwadi gida'ihagihagiyeni. 26Au kadu ginana tobohiyaneyao yafune seveni ginavega'auledi be badi moya'aidi kaliva hinaluvaiyena. Bana yafune nagona koyona tu yafune seveni koyo-mo'edi. Nagona kaliva yana miyami koyona tu muliya yafune moya'aidi hinaluvaiyena againe yana miyami ginakoyo-mo'a.”

Gaveyao yadi wavemwamwala velemo'ena?

27Yesu hidedemi gigahegahe tu kwamayoku sa'eyadi yo'o agaidiya Bana againe hikova higayo, “Badi kwamayoku O hivenatune be hivehuhu amanadi yadi wavemwamwala.”

28 # Lu 8:21; Ha 1:3 Tu Yesu gigayo, “Ika tu badi Yaubada bonana hinogalina be hi'abina amanadi yadi vemwamwala gavatubuga.”

Iya'iyaya sa'eyana Yona againe Yesu gilukahihiyena.

Madiu 12:38-42; Maki 8:11-12

29Kaliva hiyo'oyo'o tu Yesu givebutu gigayo, “Omi kaliva tova adamoya babiya watubuyemu amanadi yami nuwanuwa koyo-mo'ena. Nimaku ana iya'iyaya walelelena. Atu keke mena iya'iyaya wana'itani. Au iya'iyaya sa'eyanaga ganavehawalemi, higa iya'iyaya Yaubada bonana ana to'awatalatalaina ana egana Yona againe gilakayemu-ma amine. 30#Yon 3:4-10Fa'ina gava iya'iyaya tuwai-mo'ena Yona giyemaunena medema miNiniva fa'idiya amine, meda Iya Tohobu'ela iya'iyaya omi kaliva tova adamoya babiya watubuyemu amanadi fa'imiya. 31#1Kin 10:1-10Aimo tova mulina vedewayauga ana toveya fafali sa'eyana wabolimaneya ana tokaiwabu kwamayoku hinatowamidi be omi hinahawavekoyoyemi. Fa'ina tuwai-mo'ena yuwa lauveya hitauya be miIsileli yada tokaiwabu Solomoni yana vehawala nuwahuyahuyana hinanogalina. Atu tova adamoya yaku vehawala Solomoni yana vehawala gitubuhegena tu omi keke nuwanuwami wananogalini. 32Kadu'e tova mulina vedewayauga ana toveya miNiniva hinatowamidi be omi hinahawavekoyoyemi. Fa'ina badi miNiniva bana Yona yana laumamala hinogalina againe hivenogalena be hinuwaviladi. Tu omi wanogali! Bana Yona yana laumamala gaitoma lakahina, tu tova adamoya yaku laumamala wanogalina-ma gaitoma lakahi-mo'ena tu omi keke wadavenogaleni.” Au hidedemi Yesu yo'o gigahedi.

Nuwada ana lamufa fa'ina Yesu gilukahihi.

Madiu 5:15-16, 6:22-23

33 # Lu 8:16 Kadu gigayo, “Ka'i kaliva lamufa ginakabuna, keke ginasevauyeni o ka'i avaeka againe ginavetalabodani, keke. Au ana abasewadi againe ginaselakahina be badi manuweya hinaluku-ma matadi ginamahalina. 34Matami vaita nuwami ana lamufa amine. Ka'i matami ita'ita'eyana amine nuwami matatabuna mahamahalina. Tu ka'i matami ita'italugana amine, nuwami matatabuna uyu'uyuyuna, nuwanuwaluga againe wamimiyami. 35Medema fa'ina wana'itave'avimi nuwami vaita mahamahalina tu velemo'ena uyu'uyuyuna. 36Au ka'i nuwami matatabuna mahamahalina tu keke tamo uyuyu gidadauda, au omi velemona mahamahalimiga lamufa yana mahalina gituvemahalimi amine.”

Yesu Falisi be vehimeya ana tovehawala gihawavekoyoyedi.

Madiu 23:1-36

37 # Lu 14:1 Yesu gilukahihi gihavaina tonagona tafatafalolodiyao adi egana Falisi kalivana Yesu giyowanina be buye hina'a. Au giluku gi'enolukekela be gina'a. 38#Md 15:1-2Yesu keke gidavenimakola tu gi'au'a. Bana Falisi gi'ita-yo giyaulowoga.

39Au Kaiwabu gigahena gigayo, “Omi Falisi wa'itami, ami gowa ami nau'a kwauna wakolakolana tu hinagena bwanebwanenena gidadauda amine, meda wowomi wa'ihagihagiyena tu nuwahinagemi kai'afu nuwanuwa koyo-mo'ena againe gimaga. 40Omi kwavakwavamiyao! Yaubada keke wowomiga gidabubuni. Au kadu nuwahinagemi gibubuna fa'ina luhei wana'ihagihagiyedi. 41Gavadi gavadi ami foseya gidadauda, medema koyokoyo agaidiya wanafolakena be yami yegayega velemo'ena ma moya'aidi matadiya wanaseyemaunena.

42Atu hoiyoi omi Falisimomo! Aimo vita lakahina wananuhagana. Fa'ina vehimeya kabi'ona wa'itave'avina, higa gaitoma-kawowo naiya'au'a saikuku mawa gavadi gavadi wamagana ami kevakeva ana kivehivehimala fa'ina wavaivaina be Yaubada yana tufo waseusena, tu vehimeya lakahina keke wada'itave'avini. Omi keke wadanuwanuwa tunutunugina kadu yami nuwanuwa keke Yaubada againe wadaseuseni. Mena vehimeya lakahina nuwanuwa tunutunugina Yaubada ana nuwanuwa wada'itave'avina tu kadu vehimeya kabi'ona wana'itave'avina, higa Yaubada yana tufo wanaseusena.

43Hoiyoi omi Falisimomo! Aimo vita lakahina wananuhagana. Fa'ina nuwanuwami manuwa-abavehawala ana egana sinagogi agaidiya abavetoga kikaiwabuna againe wanavetoga, kadu kaliva abakimokimone againe yadi wave'amohimohina hinalusiuleyemi.

44Hoiyoi omi Falisimomo! Aimo vita lakahina wananuhagana. Fa'ina omi vaita lahi keke ana tutu'ala be kaliva hivagavagana vaita babi-kawowo, tu hinagena gilada. Meda kaliva wowomi hi'ita'itana vaita hagihagimiyao tu ase'asemiya bwanene gidadauda.” Au hidedemi Yesu gigahe.

45Tu vehimeya ana tonuwahuya sa'eyana gigahena gigayo, “Tovehawala, mena ya gahe againe vaita udagahe kadu ime kaliva koyomeyao.”

46Yesu gigayo, “Meda hoiyoi omi vehimeya ana tonuwahuya! Kadu omi aimo vita lakahina wananuhagana. Yami vehawala tulina tulina au vitana, vaita vainuwana lakahina kaliva wadave'avalani tu taumiyao mena vehimeya ana itave'avina againe keke ma'ita wadavelugadi.

47Hoiyoi omi'iyao, aimo vita lakahina wananuhagana! Fa'ina Yaubada bonana ana to'awatalatalaina tuwai-mo'ena bwanenemiyao hiluve'alikadi-ma adi tomohuyahuya wakidewedewena. 48Hidedemi wakidewedewena fa'ina bwanenemiyao yadi luve'alika omi wahalamanena ma waseyemaunena, kadu mena yadi dewa koyona wahawaveyamumuyena. Badi Yaubada yana kaliva hiluve'alikadi tu omi adi tomohuyahuya wakidewedewena. 49Au hidedemi wahuluva fa'ina tuwai-mo'ena Yaubada Tonuwahuya-mo'a gigahe gigayo, Bonaku ana to'awatalatalaina kadu ana towahidadana agaidiya gana'iveninisedi. Tufoidi hinakivekoyodi tufoidi hinaluve'alikadi. 50-51#Aba 4:8; 2Kah 24:20-21Tuwai-lokalokana Yaubada babi gimidibubuna ana toveya be hinunauwena tova adamoya badi bwanenemiyao Yaubada bonana ana to'awatalatalaina moya'aidi hiluluve'alikadi. Ebeli ana luve'alika againe hivebutu be Sakalaiya againe hinunauwena, bana atudidiga liline manuwa-tafalolo ana eda'awaneya hiluve'alikana amanadi. Taumadi gagahemi omi kaliva tova adamoya babiya watubuyemu-ma bwanenemiyao yadi luve'alika ana laufata omi wanawahina.

52Hoiyoi omi vehimeya ana tonuwahuya! Aimo vita lakahina wananuhagana. Yaubada ana halamana ana kihi wa'abina. Kaliva nuwanuwadi Yaubada yana nuwanuwa hinahalamanena tu omi badi agaidiya keke wadayauni. Omi keke Yaubada ana halamana againe wadahawahegemi, ada badi nuwanuwadi hinahalamanena-ma wahawatadi.” Au hidedemi Yesu vehimeya ana tonuwahuya gidakeyedi.

53-54 # Lu 6:11, 19:47, 20:19, 22:2 Yesu gilukahihi gihavaina Falisi yana manuweya gihobu be gina. Tu badi Falisi kadu vehimeya ana tonuwahuya hivebutu yadi wa'ago'uga hi'awa'awalavena kadu hitoli'uye'uyena be higa yana bonalaufata againe hinavebauna.

Currently Selected:

Luke 11: viv

Highlight

Copy