Luke 12

Keke kaliva wanamatausedi, au Yaubada.

Madiu 10:26-31

1 # Md 16:12 Tu Falisi hidedemi hihuluva tu kaliva moya'ai-mo'edi hiyo'oyo'o be hiveve'agevagatagona. Hiyo'oyo'o tu nagona Yesu givebutu ana tomuliya agaidiya gilukahihi gigayo, “Falisi ahenao meyadi luhei. Yadi dewa vaita isi keke kada'itani tu falawa hinagene ginauna-ma amine. Taumiyao wana'itave'avimi be yadi nuwaluga keke agaimiya ginadamana. 2Yadi nuwaluga keke adifaiweya hinasevauye-vagahini. Gavadi gavadi adamoya sevesevauyana, au medema aimo kabu'avane ginayemu. Kadu kaliva yadi nuwahinage aimo kaliva moya'aidi hinahalamanena. 3Medema fa'ina gavadi uyuyuya wagahekauyena, medema aimo kaliva yo'oya hinanogalina. Kadu gava bona vetawaneya wa'alakululuyena, medema aimo kabu'avane didigeya kaliva agodi lakahina hinalukahihiyena.

4Tobohiyakweyao ganagahe agaimiya. Badi wowomi hinakivekoyona be wana'alika amanadi keke wanamatausedi, tu muliya kadu keke tamo adifaiweya agaimiya gavadi hinagani. 5#Ye 4:12Hakwa'adi wanamatausena-ma ganavehawalemi. E, Bana Yaubada wanamatausena, fa'ina wowomi hinaluve'alikani-yo Bana anafaiweya ginavehimeya be alu'aluwami abaga koyona againe ginahegena. Ika, gagahemi Bana'e wanamatausena. 6#Lu 12:24Manuga mukumukudiyao faifi yabune amine fatadi toea luhei amine tu keke tamo manuga sa'eyana Yaubada gidavenuwauluyeni. 7Tu wanogali! Utuutu u'umiya ana kilagalaga Tamami gihalamanena. Au keke wanamatauta fa'ina Yaubada matane omi manuga wakaiwabuhegedi.”

Hawavemogatala o vekeke Yesu fa'ine yo'o matadiya.

Madiu 10:32-33, 12:32, 10:19-20

8“Kadu gagahemi hai kaliva keke ginamatauta tu yo'o matadiya ginagahe ginagayo, Iya Yesu yana kaliva, medema fa'ine Iya Tohobu'ela Yaubada yana tovenuwa'ata matadiya ganagahe ganagayo, Bana'e yaku kaliva. 9#Lu 9:26Tu hai kaliva ginamatauta be yo'o matadiya ginavekekeyeku ginagayo, Iya keke Yesu yana kaliva, medema fa'ine Yaubada yana tovenuwa'ata matadiya ganamidi ganagahe ganagayo, Bana'e keke yaku kaliva.

10 # Md 12:23-25,28,31 Gava kaliva Iya Tohobu'ela ginahawavekoyoyeku, medema yana koyona Yaubada ginayawelina, tu gava kaliva Alu'aluwa Mahalina againe ginagahe'ihawadamana, medema yana koyona Yaubada keke-mo'a ginayawelini.

11 # Lu 21:12-15 Ada omi wamuliyeku fa'ina aimo manuwa-abavehawala againe hinanauwemi be tonagona kadu tovehimeya agaidiya hinavekotumi ana toveya, keke wananuwanuwa lakahina vaita gavaimi wanabonalaufata o ka'i gavaimi wanagahe. 12Fa'ina medema bai-nadi againe Alu'aluwa Mahalina gavaimi wanagahe ma gina'alavelevelemi.”

Wakalivana kwavakwavana ana gahetalahobuhobu.

13Yesu gilulukahihi tu kaliva sa'eyana yo'o agaidiya gigahena gigayo, “Tovehawala, kawaku unagahena be tamama la'ovina ginafolake-hagihagiyena, bana tufona iya tufona.”

14Tu Yesu gigayo, “Kaliva unogali! Hakwa'adi aku vehimeya giseni-yo kaliva la'ovina ganafolakeni?” 15#1Ti 6:9-10Au moya'aidi agaidiya Yesu gigahe gigayo, “Taumiyao wana'itave'avimi be italuvadiga tulina tulina keke nuwami ginavaini. Kaliva yawaina velemo'ena keke lokoloko kikaiwabuna moya'aina againe gidave'inuba.”

16 # 1Ti 6:17 Kadu Yesu hida gahetalahobuhobu gilukahihiyena gigayo, “Wakalivana sa'eyana gimiyami yana babi againe a'a moya'aina giyaudi. 17Au nuwahinagene ginuwanuwa gigayo, O hima yaku faha lakahina be yaku bolu gimaga-mo'a. Gavaimi ganagani? 18Au tauna yana nuwahinage gifatana gigayo, O bolu kabi'ona ganayawelini tu velugana lakahina ganayogona be medema againe yaku faha yaku lokoloko moya'aina gana'ive'ave'ahina. 19#Ye 4:13-15Ada agaikuya ganagahe ganagayo, Keke fwaya! Yaku faha yaku lokoloko lakahina kadu moya'ai-mo'ena, malamala moya'aina akufata. Yaku wagakahikahi yaku wavemwamwala ganamiyami, gana'a'a-mo'a ganayuyu-mo'a. Au hidedemi gigahe. 20Tu wakalivana yana nuwahinage Yaubada gifatana gigayo, O kwavakwava! Adamo'uya-mo'a ya tova ginahavaina be mene gaitoma moya'aina tauni fa'iniya ukidewedewena-ma ginavela'ova.”

21 # Md 6:19-21 Ada Yesu yana gahetalahobuhobu hidedeiya giluyabuna gigayo, “Gaveyao babi ana kikaiwabu taudiyao fa'idiya hi'ive'ave'ahina, medema vaita wakalivana kwavakwavana amine. Badi kalivai-dina keke yadi walokoloko Yaubada againe.”

Yesu gigahe vaita Tamada yana itave'avina

kanavetumaganena.

Madiu 6:25-34

22Tu Yesu ana tomuliya gigahedi gigayo, “Hidema fa'ina gagahemi, yami miyami fa'ina keke wanavenuwanauna vaita gavadi wana'u'ani. Kadu kaleko fa'ina keke wanavenuwanauna vaita gavadi againe wanavelifi. 23Au yawaimi gaitoma lakahina tu a'a gaitoma kabi'ona, kadu wowomi gaitoma lakahina tu kaleko gaitoma kabi'ona. 24#Sam 147:9; Lu 12:7Bwayobwayo yadi dewa wananuwenuwena. Keke hidafahafaha, keke hidayauyaudi kadu keke kweda hidayogoyogoni-yo a'a hidasewasewadi tu au ai'adi Yaubada adiga giveleveledi. Ada Yaubada yana itave'avina omi'iyao be manuga agaidiya. Tu omi ami itave'avina manuga adi itave'avina gitubuhegena. 25Kadu hakwadi agaimiya unavenuwanauna-yo afaiweya yawaini ana etowava babiya unakivetubugini? Keke-mo'a afaiweya. 26Ka'i mena gaitoma kabisona keke afaiweya gavadi-yo uvenuwanauna mali gaitoma fa'idiya?

27 # 1Kin 10:23-25 Falafalawasi wala'aiya hikabukabu-ma wananuwenuwedi. Keke hidafifaisewa, keke doki hida'alulauga. Tu gagahemi bana tokaiwabu ana egana Solomoni ana vaigau kikaiwabu-mo'ena tu hida falafalawasi adi vaigau bana ana vaigau gitubuhegena. 28E, Yaubada isisi'u givevigauna, medema tova adamoya wala'aiya gikabu tu bogiyadi hinatuna be gina'alahina. Yaubada isisi'u givevigauna tu medema gaitoma kabi'ona. Tu omi'iyao ma gaitoma lakahi-mo'emi fa'ina, gina'itave'avi-mo'emi ami vaigau ginavelemi. Wona velemona yami vetumagana kabi'ona. 29Amiga fa'ina keke wananuwanuwa vaita ka'i gavadi wana'ani o gava bwai wanayuni, kadu gaitoma moya'aina againe keke nuwami ginanauna. 30Au fafali tulina tulina kalivai-dina Yaubada keke hidahalamaneni-ma hida gaitoma fa'ina hinuwanuwa lakahina, kadu tova moya'aina hilelelena. Tu omi'iyao ma nuwanuwami hida gaitoma yami miya hagihagina fa'ina Tamami a gihalamanena. 31Ka'i Yaubada yana abavehimeya ana nuwanuwa fa'ina wanamidihawahegemi, au Bana'e gina'ita'itave'avimi amiga ami bwai ami vaigau ginavelevelemi be wanamiyami yamumuna.

Yesu lobama ana lokoloko fa'ina gilukahihi.

Madiu 6:19-21

32 # Yo 10:11,27,28 Yaku sifi, keke wanamatauta. Au ai'adi keke moya'aimi tu Tamami givenuwadadanemi be yami wakaiwabu Bana buye wanavehimeya. 33Taumiyao yami lokoloko wanakimonevedamanena be fatana koyokoyo agaidiya wanafolakena. Au ami laufata lobama ana lokoloko wanavaina, lokoloko-nadi miyamiya-vagahina. Wesede againe tokai'afu keke ginaki'afuni kadu tumotumo keke hina'onani, au fose vewabana againe ginadauda higa aimo keke ginakoyo. 34Ada au ha'againe yami lokolokofou ginadauda, au medede againe nuwami ginanunauyena tova moya'aina.

Tofaisewa yadi kauveya himiyamiyabodana.

35-36 # Md 25:1-13; Mk 13:32-37 Tu wanakidewadewa be yami Kaiwabu yana yewa'ela fa'ina wanamiyabodana. Tofaisewa dibudibumuhigidiyao wanave'u'uledi. Kauveya sa'eyana gina nagi ana avemwamwala againe be ginayewana, ada yana tofaisewa hikidewadewa adi kaleko hiluhivigena, yadi lamufa hikabuna be yadi kauveya fa'ina himiyamiyaboda. Ginalakayemu-yo wanafali againe ginakifisifisi'a auhe'amanadi wana hinayauna be ginaluku. Meda anafaiweya kadu omi wanamiyamiyaboda. 37Tofaisewa gaveyao matadi keke gidaneganega au hivanevanenega tu yadi kauveya gilakayemu, medema yadi vemwamwala gavatubuga! Wona velemona gagahemi yadi kauveya tauna ana kaleko ginaluhivigena, adi ivi ginayavelina, adiga ginakidewedewena be hina'a. 38Ka'i yadi kauveya yana ela bogi nafone o ka'i kamukamu ginakwage ada medema bai-nadi yana tofaisewa aimo hilulauboda, au yadi vemwamwala gavatubuga! 39Atu hidedemi wanahalamanena. Ka'i tonimanuwa tokai'afu yana ela ana kauwana gidahalamanena digo, keke matana gidalowoni au gidalulauboda be tokai'afu keke anafaiweya gidaluku yana manuweya. 40Meda anafaiweya omi taumiyao wana'itave'avimi be wanalulauboda. Fa'ina gava kauwana Iya Tohobu'ela ganayewa'ela ma keke wadahalamaneni. Ka'i wanamiya-kawowo wanagayo, Keke adamoya gina'ela, au medema tovai-nadi ganavefuta'ami.” Au hidedemi Yesu givenuwa'atadi.

Tofaisewa bonabona'abina o dibudibutoyogina

ana gahetalahobuhobu.

Madiu 24:45-51

41Ada Fita gitoliluvaluva gigayo, “Kauveya, mena gahetalahobuhobu ulukahihiyena-ma gaveyao fa'idiya? Ka'i ime tomuliyagaga fa'imeya o ka'i kaliva moya'aima fa'imeya?”

42 # Md 25:19-21 Ada Kaiwabu Yesu gigayo, “Gavaiyami? Gava tofaisewa ginadewadewa be bana fa'ine hinagahe hinagayo, Wada tofaisewa bonabona'abina yana wanuwahuya gifififaisewa? Yana kauveya ginavegidena be ginagahena ginagayo, Iya ganana tu o aku agetoga una'itave'avidi, aiyeta sa'eyana sa'eyana adiga unaveleveledi. 43Ka'i gavaimi yana taubada givehimeyena medemi ginadewadewa tu yana taubada ginayewa'ela bonana bana gi'abi'abina-ma gina'itana, au bana tofaisewai-nadi vemwamwala ginanuhagana. 44Gagahe velemo'ena agaimiya kaliva lakahina yana lokoloko matatabuna ana to'itave'avina bana tofaisewai-nadi ginasena. 45Tu ka'i bana tofaisewai-nadi nuwahingene ginagahe ginagayo, Hima yaku taubada givekwalu lakahina, ka'i keke ginamadu'ela, au ginavebutu agetoga kaliva vevine ginamunukoyokoyodi kadu gina'a'a-fa'ila gufa laulaugina ginayuyu-fa'ila yo u'una ginavekwavakwava. 46E, ka'i tofaisewa hidede amine ginahuluva, au yana taubada yana ela againe ginavefuta'ana. Yana aiyeta o ka'i yana kauwana tofaisewa keke gidahalamaneni tu yana taubada ginayewa'ela, ada au ginamunukoyokoyona ada ginahegenauwena be badi to'idibutoyoga adi matahiwadi amine bana ginanuhagana.

47 # Ye 4:17 Bana tofaisewa yana taubada yana nuwanuwa gihalamanena tu keke gidakidewadewa be nuwanuwai-nadi amine gidahuluva, bana kalivai-nadi ginamunukoyokoyona. 48Tu gava tofaisewa yana taubada yana nuwanuwa keke gidahalamaneni ada tamo koyona gifaisewana, medema ginamununa kabi'ona. Gaveyao moya'aidi agaidiya Yaubada abavehimeya lakahina ginasena, medema gilubodana be yadi faisewa yamumu-mo'ena hinaseyemaunena. Kadu gava kaliva againe Yaubada faisewa lakahina amine ginavelena, medema yana faisewa guwana lakahina amine ginaveleyewena.” Au hidedemi Yesu gigahe.

Yesu gihobu'ela be venibaina babiya ginasena.

Madiu 10:34-36

49Kadu Yesu gigayo, “Gahobu'ela be higa ai'ala'alata babiya gana'aliyeni-yo tomiyababi matahiwadi hinanuhagana. Nuwanuwaku lakahina mena aku vehimeya ganamaduluyabuna. 50#Lu 9:22, 2:34Bafitaiso sa'eyana gananuhagana higa tagiya aulolo againe hina'utuviku. Yaku ase'u'aulolo gavatubuga gananunauwena bafitaiso-nadi ginahavaina ana maka. 51Ka'i mene wanuwanuwa vaita gadahobu'ela-yo niwalova babiya gadaseni? Keke niwalova ganaseni fa'ina gada'ela, keke. Au Iya gahobu'ela be venibaina ginalakayemu fa'ina. 52Adamoya be ginanunauwena tova mulina ka'i manuwa sa'eyana hinagene kaliva faifi hinamiyami, kaliva adi'iselu adi'itoto buye hinavekwageya, kadu kaliva adi'itoto adi'iselu hinavenibainedi. 53Yadi venibaina hidede amine. Kaliva natuna kaliva againe ginavenibaina, meda natuna tamana againe ginavenibaina. Kadu kwamayoku natudi kwamayoku againe hinavenibaina, meda natudi hinana agaidiya ginavenibaina. Kadu kwamayoku be lawadi buye hinave'avenivenibaina. E, aku vetumagana fa'ina hidedemi hinavenibaina.” Au hidedemi Yesu givenuwa'atadi.

Aituha tulina tulina ana iya'iyaya ana halamana fa'ina

Yesu gilukahihi.

Madiu 16:2-3, 5:25-26

54Kadu yo'oyo'o agaidiya Yesu gigahe gigayo, “Buhibuhi oya gikevana ma wa'itana againe wagayo, Hima wehi ginalugaga. Ada au gilugaga. 55Ada bolimana gimadu ma wa'ayaunena againe wagayo, Hima kauwana lakahina ginakabuna. Ada au gikabuna. 56Omi meyami lagalaganina! Wehi be kauwana adi iya'iyaya wahalamanena. Tu gavadi-yo vita lakahina hida tovai-nadi ginalakayemu-ma ana iya'iyaya keke wada'itahalamanedi?

57Kadu'e gavadi-yo dewa tunutunugina keke taumiyao wadanuwenuweni-yo medede amine wadahuluva? 58Ka'i kaliva sa'eyana ginasimane be tovedewayauga againe buye wanana, au edeya wananauna tu unagaluvaluva be wanaveyao. Ka'i keke wanamaduveyao, tovedewayauga againe ginasimadumaduge ada tovedewayauga filisimani nimadiya ginaseni be deliya hinanauwe. 59Gagahe againiya, keke hinamaduyau. Tu nagona a laufata unase-'owona muliya hinayau.” Au hidedemi Yesu gigahe.

Currently Selected:

Luke 12: viv

Highlight

Copy