Luke 19

Sakiusa kahihina.

1Tu Yesu Yeliko melala againe giluku be ginanauna. 2Medede againe kaliva sa'eyana gimiyami ana egana Sakiusa, ada bana takesi ana toyaudi kikaiwabuna yana walokoloko. 3Ada nuwanuwana gavaimi Yesu ana ita'ita ma gina'itana, tu bana kaliva kali'uhona ada kaliva hiyo'oyo'o fa'ina keke anafaiweya gida'itani. 4Au wai gimadunagona aihala ana egana sikomoli againe gilaka be gina'itana, fa'ina edai-nadi againe Yesu gi'ela'ela.

5Yesu ai-nadi inubane giyemu-yo givedadaga gigahena gigayo, “Sakiusa, umaduhobu fa'ina adamoya gilubodaku be ya manuweya buye kanamiyami.” 6Auhe'ama gimaduhobu yana wavemwamwala givega'aulena be hina yana manuweya. 7Ada kaliva moya'aidi hi'itana againe hivebutu hi'alawoluwolu higayo, “Bana kaliva koyona nonogana againe giluku giwakawaka.”

8 # Yem 22:1 Tu Sakiusa gitowamidi Kaiwabu againe gigahe gigayo, “Kauveya u'ita, adamoya yaku lokoloko ganalugolohina, tufona koyokoyo fa'idiya tufona iya fa'ikuya. Kadu kaliva gaveyao yadi mani gavai-kawowona, medema ganaveleyewedi. Ka'i sa'eyana amine gavaina, au fowa amine ganaveleyewedi.”

9 # Af 16:31 Yesu gigahena gigayo, “Adamoya hida yo'o yadi koyona ana aiyawela hinuhagana, fa'ina hida kaliva takesi ana toyaudi nonogana bana Abelahamo yana yo'o kalivana. 10#1Ti 1:15Wa'ita, Iya Tohobu'ela gahobu'ela be badi Yaubada yana eda hifaniyena-ma ganaleledi kadu ganakibababaledi.”

Tofaisewa yadi lukimokimone ana gahetalahobuhobu.

Madiu 25:14-30

11Yesu yana yo'o buye kabisona Yelusalema againe hinayemu ada yo'oyo'o hinuwanuwa vaita Yaubada yana abavehimeya kaliva agaidiya auhe'ama gina'ivemogatalina. Medema fa'ina Yesu yana gahe aimo hinuwenuwena tu givebutu gahetalahobuhobu gilukahihiyena. 12Gigayo, “Kaliva kikaiwabuna sa'eyana fafali lauveya ginana be tokaiwabu adi maka ginavaina be ginayewana. 13Ginana fa'ina yana tofaisewa teni gikovadi be sa'eyana sa'eyana K100 giveledi ada gigahedi gigayo, Hida mani lukimokimone againe wanakivetubugina be wananunauwena yaku yewa'ela ana toveya.

14Gina tu yana melala kalivadi hivenikohiyena ada tovenuwa'ata hi'iveninisedi be hivemulitawaina higa tokaiwabu lakahina hinagahena hinagayo, Keke nuwanuwama hida kaliva agaimeya ginavetokaiwabu.

15Hidedemi higahe tu au ai'adi tokaiwabu adi maka givaina be giyewana yana melaleya. Giyemu-yo yana tofaisewa mani giveledi-ma giyowanidi be higa gavaiyehi yadi lukimokimoneya ana tufo buye hivaini-ma ginahalamanena.

16Au tofaisewa nagona gi'ela gigayo, Kauveya, ya mani K100 gave'atutamo'aina be K1,000 gilakayemu.

17 # Lu 16:10-11 Yana tovehimeya gigahena gigayo, O tofaisewa hagihagi. Gaitoma kabikabi'ona ya wa'idibumuhiga u'itave'avina fa'ina, abavehimeya melala teni agaidiya unavaina.

18Tofaisewa anavelu gi'ela gigayo, Kauveya, ya mani K100 gave'atutamo'aina be K500 gilakayemu.

19Yana tovehimeya gigahena gigayo, Kadu o'eni abavehimeya melala faifi agaidiya unavaina.

20-21Muliya kadu tofaisewa sa'eyana gi'ela gigayo, Kauveya, hidei ya mani, kalekoya gakevana be gidauda. O kaliva nuwa koyona fa'ina gamatause. Mali kaliva gififaisewa tu o fata uvaivaina, kadu mali kaliva gifahafaha tu o a'a uyauyaudi-kawowo.

22-23Yana tovehimeya gigahena gigayo, O tofaisewa koyo. Tauni ya gahe amine ganavedewayaugi. O ugahe va ita udahalamaneku iya kaliva nuwaku koyona. Mali kaliva gififaisewa tu iya fata gavaivaina, kadu mali kaliva gifahafaha tu iya a'a gayauyaudi-kawowo. Hidedemi o ugahe tu gavadi-yo yaku mani banika againe keke udaseni? Ka'i udasena digo, yaku mani ana ve'atutamo'ai gadavaina yaku yewa'ela ana toveya.

24Au ana agetoga liline himidimidi-ma agaidiya gigahe gigayo, Yana mani K100 wanalemana be bana K1,000 gi'abina-ma wanavelena.

25Badi higayo, Kauveya, yana mani ahe lakahina K1,000.

26Tu bana gigayo, Gagahemi hai kaliva yana halamana o ka'i yana faisewa Yaubada givelena-ma gi'ita'itave'avina, medema yana halamana o yana abavehimeya ginakivetubugina. Atu hai kaliva yana gava'adi Yaubada givelena-ma keke gina'itave'avini, medema yana halamana kabi'ona Yaubada ginavaihegena be ginamiya-kawowo. 27Ma hida nibaikweyao keke nuwanuwadi badi agaidiya ganavetokaiwabu-ma wanakive'avidi be wana'aliyedi matakuya wanaluve'alikadi.” Gahetalahobuhobu au hidede amine.

Yesu doniki kwaune Yelusalema againe giyemu.

Madiu 21:1-11; Maki 11:1-11; Yoni 12:12-19

28Yesu gilukahihi gihavaina, ana tomuliya edeya ginagoyedi Yelusalema againe hinauna-tu. 29Melala luhei Bedefegi kadu Bedani oya ana egana Olive againe hi'iveda'ufodi tu ana tomuliya adi'iselu gigahedi be wai hinanagona. 30Gigahedi gigayo, “Omi wai wananagona yuwa melala againe wanaluku, ada wanalukuluku tu doniki natudi ai againe hiluhifona-ma wana'itana. Mena doniki kwaune keke tamo hakwadi boi gidayage. Au wanayauna be wana'aliyena. 31Ada ka'i tamo hakwadi ginagahe ginagayo, Gavana fa'ina wayauyauni? au wanagahena wanagayo, Yama Kaiwabu nuwanuwana me'ama.”

32Au tomuliya adi'iselu gi'iveninisedi-ma hilowoga be hina, ada Yesu gigaheyena amine hinuhagana. 33Ada doniki natudi hiyauyauni waganeyao higahedi higayo, “Gavana fa'ina doniki wayauyauni?”

34Badi higayo, “Yama Kaiwabu nuwanuwana fa'ina.”

35Au doniki natudi Yesu againe hi'aliyena ada adi aikeva kwaune hiyavelini-yo Bana giyage. 36Ada ginauna tu kaliva adi aikeva edeya hiyaveyavelina.

37Ada Yelusalema liline oya Olive ana eda gihobu againe giyemu-yo ana tomuliya yadi yo'o lakahina hivebutu yadi wavemwamwala Yaubada hihawadavadavana agodi lakahina, Yesu yana gugai fifiwalana tulina tulina hi'itana-ma fa'ina hivesivesiule higayo,

38 # Sam 118:26 “O Tokaiwabu Kaiwabu ana eganeya u'ela'ela-ma

au Yaubada ginanuwakabubuye.

Kukuya ana toni'inuba lobameya kanadavadavana,

Tomiyagetane-mo'ane kanakivekaiwabuna.”

39 # Md 21:14-16 Au hidedemi Yesu ana tomuliya hidavadava tu Falisi tufoidi yo'o agaidiya higahena higayo, “Tovehawala, a tomuliyamomo unahawatadi.”

40Bana gigayo, “Gagahemi ka'i badi hidave'awa'ibodeku digo, kuga aku davadava fa'ina auhe'ama hidakovakova.”

Aimo miYelusalema nibaidiyao melala hinaluyaweyawelina.

41 # Lu 13:34-35 Tu Yesu Yelusalema gi'ivedaveda'ufona be melala-mo'ena gi'itana againe givebutu gitagi'uvadi. 42Gigayo, “Hoiyoi miYelusalema! Vaita adamoya kukuya ana eda wadahalamaneni tu tova hidevama matami gi'itahowahowa eda wafaniyena. 43-44Aimo tova vitana agaimiya ginayemu, nibaimiyao boda hinadudauvina be hinabodabodafifimi-yo melala hinaluyaweyawelina, omi'iyao kadu natumiyao melala ana alahinageya hinaluyaweyaweli-'owomi. Keke tamo kabala hikivetalana-ma aimo kabalahiyana tabone ginada, au moya'aina hinatutuyauyaulena. Au hidedemi hinahuluvimi, fa'ina Yaubada gi'ela be ginakibababalemi-ma ana tova wafaniyena.”

Yesu manuwa-tafalolo lakahina againe giluku.

Madiu 21:12-17; Maki 11:15-19; Yoni 2:13-17

45-46Yesu miYelusalema gitagi'uvadi gihavaina, manuwa-tafalolo lakahina ana eda'awaneya giluku be givebutu tolukimokimone giwavidi gigahedi gigayo, “Yaubada bonana eto'etoladina gigahe gigayo,

Yaku manuwa hinavewagana abave'ove'o'ola ana manuwa.

Hidedemi gigahe tu omi'iyao ma vaita tokai'afu yadi abaga amine wafaisewana.” Hidedemi Yesu gidakeyedi.

47Ada au aiyeta sa'eyana sa'eyana agaidiya manuwa-tafalolo againe givehavehawala. Atu badi abaveyao ana tofaisewa kikaiwabudiyao kadu Mosese yana vehimeya ana tovehawala kadu yo'o adi tonagona eda hilelena be higa hinaluve'alikana. 48#Md 21:46Tu eda hilele-wayoga keke adifaiweya, fa'ina yo'o moya'aidi Yesu bonana hivenovenogalena keke nuwanuwadi tamo gahe hinanogalibabuni.

Currently Selected:

Luke 19: viv

Highlight

Copy