DITIRO TŠA BAAPOSTOLA 1
1
Tša Thotogelo; tša Mathia
1Theofilo wa ka! Ka taodišo ya pele ke go anegetše tšohle tša ge Jesu a thoma go dira le go ruta. 2Ka di fihliša tšatšing leo a rotošitšwego ka lona, baapostola ba a ba kgethilego a ba laetše ka Moyamokgethwa. 3Ke bona ba a iponaditšego go bona mola a sa tšo tlaišwa, ba ba dihlatse tša gagwe ge a phela, ka ge ba mmone gantši ka matšatši ao a masome a mane, a ba botša tša mmušo wa Modimo, 4A na le bona a ba laela a re ba se tloge Jerusalema, ba dule gona, a re: Letelang tše Tate a le holofedišitšego, tše le di kwelego go nna. 5Gobane Johane, yena o kolobeditše ka meetse; ge e le lena le tlo kolobetšwa ka Moyamokgethwa ge go fetile matšatši a sego makae.
6A na le bona ka mokgwa woo, ba mmotšiša ba re: Morena! Mmušo wa Isiraele a o tlo o tsoša lebakeng leno?
7Yena a re: Ga se taba ya lena go tseba mehla le mabaka a Tate a a beilego ka maatla a gagwe yena mong. 8Lena le tlo fiwa maatla ge Moyamokgethwa o theogela go lena, la tlo ba dihlatse tša ka motseng wa Jerusalema le nageng ka moka ya Juda le ya Samaria, go fihla magomong a lefase. 9Ge a sa tšo realo, a rotošwa ba mo lebeletše; leru la mo tšea, ba se hlwe ba mmona.
10Ba sa fela ba mo tsepeletše a eya legodimong, ba bona banna ba babedi ba eme le bona, ba apere bošweu. 11Bona bao ba bolela ba re: Lena banna ba Galilea! Le emetšeng le lelaletše legodimong? Yena Jesu yo, e a tlošitšwego go lena a išwa legodimong, o tlo boa ka wona mokgwa wo le mmonego a eya legodimong ka wona.
12Ba tloga thabeng yeo ye ba rego ke ya Mehlware e lego kgauswi le Jerusalema, ke leeto la Sabatha fela ge motho a eya gona; ba boela Jerusalema. 13Ba fihla ba namela ngwakong wa godimo, mo ba bego ba dula gona, e le Petro le Jakobo le Johane le Andrea le Filipi le Tomase le Baratholomeo le Mateo morwa wa Alifeo le Simone Tselote le Juda ngwanabo Jakobo. 14Ke bona ba bego ba fela ba tiišetša go rapela le go kgopela ba le pelotee, gammogo le basadi ba bangwe, le Maria mmago Jesu, le bana babo.
15Mehleng yeo Petro a ema gare ga barutiwa ba kgobokane e nyaka go ba ba lekgolo le masome a mabedi; a bolela a re: 16Banna ba gešo! Go be go swanetše gore mangwalo a phethege; ke ra ao Moyamokgethwa o a boletšego ka molomo wa Dafida a šupa Judase, e a tlilego a ba moetapele wa ba go swara Jesu. 17O be a balwa le rena; o be a gafetšwe modiro le rena.
18Bjale monna eo o rekile tšhemo ka moputso wa bokgopo, a yo koduma ka hlogo, a palega ka bogare, mala a gagwe ka moka a gorometšega. 19Taba yeo e tumile go bohle ba ba agilego Jerusalema; le bjale tšhemo yeo ka polelo ya bona ba re ke Hakeldama, ke go re Tšhemo ya madi.
20Gobane pukung ya Dipesalome go ngwadilwe gore: Boago bja gagwe a e be lešope, go se be e a dulago gona. Le lengwe la re: Kabelo ya gagwe e newe o šele.
21Bjale a re nyakeng go banna ba ba sepetšego le rena lebakeng ka moka la ge Morena Jesu a etšwa a boa a na le rena. 22Go tloga ka kolobetšo ya Johane, go fihla tšatšing leo a tlošitšwego go rena a išwa legodimong ka lona. Re nyake wa go tlo ba hlatse le rena ya go re, Morena o tsogile bahung.
23Ba hlaola ba babedi, Josefa wa go bitšwa ka la Barasaba a reetšwe la Justo, le Mathia. 24Ba rapela ba re: Wena Morena o tsebago dipelo tša bohle! Šupa yo o mo hlaolago go ba babedi ba, 25gore a fiwe modiro le thomo ye Judase a e arogilego, a ya mo a ilego. 26Ba ba diriša matengwa, a ntšha Mathia. Ke moka ba mmala le baapostola ba lesome le motšo o tee.
Currently Selected:
DITIRO TŠA BAAPOSTOLA 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
