EKISODO 18
18
Jethero mogwegadi wa Moshe
1Jethero moperisita wa Midiane mogwegadi wa Moshe o kwile ditaba ka moka tša tše Modimo a di dirilego Moshe le setšhaba sa gagwe sa Isiraele, tša ge Morena a ntšha Baisiraele nageng ya Egipita. 2Jethero mogwegadi wa Moshe a tsoga a na le Tsipora mosadi wa Moshe, yo a bego a boetše ga gabo, 3le barwa ba babedi ba Moshe. Leina la wa pele ke Gerisome (Modiiledi), ka ge a itše: Ke diiletše nageng e šele. 4Leina la e momgwe e be e le Eliesere (Modimo o a thuša), ka ge a itše: Modimo wa botate o tlo nthuša, a mphemela lerumo la Farao. 5Jethero mogwegadi wa Moshe o tlile a na le barwa ba Moshe le mosadi wa Moshe, a fihla mo Moshe a bego a le mošašeng mo lešokeng thabeng ya Modimo. 6A tsebiša Moshe a re: Nna Jethero mogwegadi wa gago ke tla go wena; ke na le mosadi wa gago le barwa ba babedi ba gago. 7Moshe a tšwa a gahlanetša mogwegadi wa gagwe, a lotšha, a mo atla, ba botšišana maphelo, ba tsena mošašeng. 8Moshe a anegela mogwegadi wa gagwe ditaba ka moka tša tše Morena a di dirilego Farao le Baegipita ka baka la Baisiraele, le tša mabothata ka moka a a ba wetšego ba le tseleng, mme ba namolelwa ke Morena. 9Mme Jethero a thabela tše botse tšeo ka moka tše Morena a di diretšego Baisiraele ge a ba namolela diatleng tša Baegipita. 10Jethero a re: A go retwe Morena e a le namoletšego diatleng tša Baegipita, le diatleng tša Farao, e a namoletšego setšhaba sa gagwe mo se bego se bušwa ke Baegipita. 11Bjalo ke lemogile gore Morena o feta medimo yohle ka bogolo; ka gobane ba dirile tša makoko, mme a ba wela godimo. 12Bjale Jethero mogwegadi wa Moshe a ntšha tša go hlabela Morena, tša sedimo le tša tebogo; Arone le bagolo bohle ba Baisiraele ba tla ba ja bogobe le yena mogwegadi wa Moshe pele ga Modimo.
13Ka la ka moswana Moshe o duletše go ahlolela setšhaba; batho ba hlwa ba eme ba lebane le Moshe go tloga ka moswana go fihla mantšiboa. 14Mogwegadi wa Moshe ge a bona tšohle tše Moshe a di direlago setšhaba, a re: O reng ge o direla setšhaba ka mokgwa wo? O dula o nnoši o reng? Mme setšhaba ka moka se hlwa se eme le wena go tloga ka moswana go fihla mantšiboa.
15Moshe a fetola a re: Ke ka gore setšhaba se tle go nna go botšiša Modimo. 16E re ge ba na le taba ba a tle go nna gore ke fediše taba ge monna a sekiša wa gabo, gore ke ba lemoše ditaelo tša Morena le melao ya gagwe.
17Mogwegadi wa Moshe a fetola a re: Mokgwa wo wa gago ga o botse. 18O tlo lapela ruri, le batho ba ba o nago le bona ba tlo napa ba lapa; mokgwa wo o tlo go roba; o ka se ke wa o kgona o nnoši. 19Bjale theetša se ke se bolelago, ke go eletše; mme Modimo o tlo ba le wena. Sa gago ke go emela setšhaba go Modimo; O iše ditaba go Modimo. 20Wena o be wa go ba hlatollela ditaelo le melao, le go ba ruta tsela ye ba swanetšego go tšea ka yona, le mediro ye ba swanetšego go e dira. 21Mo setšhabeng ka moka o ikgethele banna ba dinatla, ba ba boifago Modimo, banna ba therešo, ba ba hloilego megabaru; bona o ba bee ba be balaodi ba bona, ba go laola ba sekete, le ba lekgolo, le ba masome a mahlano, le ba go laola ba lesome. 22Bona ba tlo ahlolela batho ka mehla; go wena ba tliše taba e lego e kgolo. Ge e le taba e nyenyane e ahlolwe ke bona. Ke mo o tlogo hlatlolwa, bona ba go rwalela. 23Ge o ka dira ka mokgwa wo, mme Modimo a go dumelela, ke mo o tlogo kgona, ke mo o tlogo tia; gomme setšhaba se ka moka se tlo boela magaeng se iketlile.
24Moshe o kwile se mogwegadi wa gagwe a se boletšego, mme a dira tšohle ka mo a mmoditšego ka gona. 25A kgetha banna ba dinatla go Baisiraele ka moka, a ba bea go ba dihlogo tša setšhaba, ba ba ba go laola ba sekete, le ba lekgolo, le ba masome a mahlano, le ba go laola ba lesome. 26Bona ba ahlolela setšhaba ka mehla; ditaba tše thata ba di tliša go Moshe; ditaba tše nyenyane ka moka di ahlolwa ke bona.
27Gomme Moshe a fa mogwegadi wa gagwe tsela, a mo lesa a boela nageng ya gabo.
Currently Selected:
EKISODO 18: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
