EKISODO 24
24
Baperisita ba bagolo ba bona Morena. Moshe o boela thabeng
1A bolela le Moshe a re: Rotogela go Morena, wena le Arone, le Nadaba, le Abihu, le ba bagolo ba Isiraele ba masome a šupago, mme le khuname le le kgole. 2Moshe a batamele Morena a nnoši; ba bangwe ba se batamele; le setšhaba se se ke sa rotoga le yena.
3Moshe a tla a tsebiša setšhaba tšohle tše Morena a di boletšego; setšhaba ka moka sa fetola ka lentšu letee sa re: Tšohle tše Morena a di boletšego re tlo di dira. 4Ka moka tše Morena a di boletšego, Moshe o di ngwadile pukung. Ka la ka moswana a tsoga a aga aletare ka tlase ga thaba, a tsema dikokwane tše lesome le metšo e mebedi tša meloko e lesome le metšo e mebedi ya Isiraele. 5A roma masogana a Baisiraele ba tliša dihlabelo, ba tlišetša Morena didimo tša tebogo tša dipowana. 6Moshe a tšea madi a mangwe, a a tšhela megopong; a mangwe a fokela aletare ka ona. 7A tšea puku ya kgwerano, a e bala setšhaba se theeditše; ba fetola ba re: Ka moka tše Morena a di boletšego re tlo di dira, re tlo fela re laiwa ke tšona.
8Bjale Moshe a tšea madi, a fokela setšhaba ka ona a re: Seao madi a kgwerano ye Morena a e dirilego le lena ka yona melao ye ka moka.
9Ya ba gona Moshe le Arone, le Nadaba le Abihu, le ba masome a šupago a ba bagolo ba Isiraele ba rotogilego. 10Ba bona Modimo wa Isiraele; bogato bja maoto a gagwe bo be bo etša lebato la mabje a matala, bo tagile bjalo ka legodimo lé. 11Gomme ga a ka a ba dira selo, bahlaolwa bao ba Isiraele; ba bone Modimo mme ba ja ba nwa.
12Morena a bitša Moshe a re: Rotogela go nna thabeng; o dule ntshe ke go neele diphaphathi tša maswika, le melao le ditaelo, tše ke di ngwadilego gore ba rutwe tšona. 13Moshe a tsoga a na le Joshua mohlanka wa gagwe; Moshe a rotogela thabeng ya Modimo. 14Ba bagolo o be a ba boditše a re: Le re letele mo, re be re boele go lena. Arone le Huri šeba, le na nabo; e a nago le taba, a a tle go bona.
15Ya re ge Moshe a namela thaba, thaba ya apešwa ke leru. 16Letago la Morena la dula mo thabeng ya Sinai; gwa fela matšatši a selelago e apešitšwe ke leru. Ka la go šupa Moshe a bitšwa ke e a bego a le mo lerung. 17Letago la Morena, le Baisiraele ba le bonego, le be le etša mollo o tukago mo ntlheng ya thaba. 18Gomme Moshe o tsene mo gare ga leru, a namela thaba, a fetša matšatši a masome a mane le mašego a ona a le mo thabeng.
Currently Selected:
EKISODO 24: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
