Ñwaè' Joân 19

1Yi ka' ba wa'a, Pailɛ̀t à lâa, bsoogɛ̀ a lip Jisòs. 2Wowèe a gee rtaa kʉʉ nè bsòpsì a sop ye mbe tù, a lor cɛ̌' beer a fa ye à nyòr. 3a kɛ' a ce bùu ye àmbò ŋkʉʉ wa'a, a ce làa enɛ̂, “Nyàr, ŋkwe Jûs.” Wowèe a m lìp ye nè mmbo.

4Pailɛ̀t à ker fʉʉ embe nto' a laa nè Jus enɛ̂, “Yɛ nè, m be fʉr ŋwɛ̀ ca njepmbè tɛ wèe bo rìŋ enɛ mɛ̀ yɛ fàa mò' ce e gèe ka'.” 5Jisòs à fʉʉ njepmbè nè rtaa bsòpsì ca mbe tù ba cɛ̌' beer cà à nyòr. Pailɛ̀t à laa enɛ̂, “Yɛ là nè ŋwɛ̀ anà.” 6Běe bgòrgòr efa mʉ̀ ŋgǎa taŋshi taŋshì ba ŋgǎa kè'ni Ndap Nyʉ̀ a ka' yɛ ye, a waani enɛ̂, “Taa ye mbe kìntaa! Taa ye mbe kìntaa!” Pailɛ̀t à laa nè wowèe enɛ̂, “Koo là nè ye du taa mbe kìntaa. À ka' ba yi àmbò mɛ̀, mɛ̀ yɛ fàa ce e gèe ka'.” 7Jus a ku le' yap enɛ̂, “Wèr tʉr ncir, àmbò ncir anà yi ce làa, e be kù kwe njobè' e ce lòr yì nyor enɛ e yu Muu Nyʉ̀.” 8Pailɛ̀t à ka' yu' blàa ca, a wɛp magòr sê. 9A ker niŋ mbe nto' a Jisòs, a bipshi nè ye enɛ̂, “A wɛ̀ ŋwɛ̀ efɛ?” Jisòs à laa yuu ka'. 10Yi ka' ba wa'a, Pailɛ̀t à laa nè ye enɛ̂, “Wɛ̀ làa yuu nè mɛ̀ ka' a? Mbò wɛ̀ rìŋ wɛnɛ m tʉr ŋger à rmà'shi wɛ̀ tɛ à du yo yu, a ker tʉr ŋger à rtaa wɛ̀ mbe kìntaa a?” 11Jisòs à beesì enɛ̂, “Àde' à tʉr ŋger mbe mɛ̌ ndù ka', ce a m ka' tɛ bà fa ŋger anà nè wɛ̀ embe bùu ka'. Banɛ yuu bebep yi ŋwɛ̀ ce e koo mɛ̀ a fa mba wɛ̌ mmbò, yi yu yi gòr a caa yo.”

12Pailɛ̀t à ka' yu' blàa ca, a koŋ enɛ e ba mà'shi Jisòs tɛ e dû. Yi ka' ba wa'a, Jus a ce waani enɛ̂, “Wɛ̀ ka' ma'shi ŋwɛ̀ ca e dû, banɛ à yu ŋkar Sisà ka'. è ka'. Ŋwɛ̀ à ka' lor yì nyor à ŋkʉʉ banɛ ŋgàŋ à tɛr Sisà mkùu mbe tù.” 13Pailɛ̀t à ka' yu' blàa ca, a fʉr Jisòs njepmbè, a cu mbe dì' mnsa' tɛ e bo teni mnsa'. A m ce too dì' ca enɛ dì' ce a fèe nè blùr. A m ce too dì' anà à li Hibrù enɛ̂, “Gàbatà.”

14Nòŋ anà à m ba nòŋ ce a m ce tami nyor à rye Ŋkǎ' càasi-mndap. Nyʉ̀ à m kɛ̀' a ce kùu ŋgòŋ à nfè' anà. Pailɛ̀t à laa nè bèe enɛ̂, “A yè ŋkʉʉ na.” 15Wowèe a waanì enɛ̂, “Mìsi ye! Mìsi ye! Taa ye mbe kìntaa!” Pailɛ̀t à laa nè wowèe enɛ̂, “Wèe ce kòŋ enɛ m taa yè ŋkʉʉ mbe kìntaa a?” Běe bgòrgòr efa mʉ̀ ŋgàa taŋshi taŋshì a beesì enɛ̂, “Wèr tʉr ŋkʉʉ mò' caa efa Sisà ka'.” 16À ka' ba àlʉ̀simbùu, Pailɛ̀t à boŋlàr a fa ye nè wowèe tɛ a bo taa ye mbe kìntaa.

Wowèe a m koo Jisòs a du àgho. 17E m byɛ̀' yi kìntaa, a wowèe a du à dì' mo' ce a m ce too enɛ Dì' kèkèp tu. A too dì' anà à li Hibrù enɛ Golgotà. 18A fàdì' ce a m taa Jisòs mbe kìntaa. A m taa bèe mo' a baa mbe bkìntaa foŋ. Mò' à m ba à bo ŋkòp Jisòs mò' à ba yi à bo mà', Jisòs à ba yi mbetar. 19Pailɛ̀t à m saŋ ŋwà' foŋ a taa mbe tu kìntaa. E m saŋ enɛ̂, “Jisòs ce à rla' Nasarɛ̀t, ŋkʉʉ Jûs.” 20Jus magòr a m bè' ŋwà' anà njobè' fàdì' ce a m taa Jisòs nà à m ba à wǎa la'. A m saŋ ŋwà' anà à li Hibrù, ba à li Latìn ker ba à li Grêk. 21Běe bgòrgòr efa ŋgàa taŋshi taŋshì efa mʉ̀ Jus a ka' bè', a du a yɛ Pailɛ̀t a laa nè ye enɛ̂, “Fa saŋ ba enɛ ‘ŋkʉʉ Jus’ ka', saŋ ba enɛ ‘ŋwɛ̀ ca à m làa enɛ a ye ŋkʉʉ Jûs.’ ” 22Pailɛ̀t à beesì enɛ̂, “Yuu ce mɛ̀ saŋ, a yuu ce mɛ̀ saŋ.”

23Bsoogɛ̀ a ka' taa Jisòs mbe kìntaa wɛɛ, a lor vi bcɛ̀' a gap bdì' kyèe, ŋwɛ̀ à lor vi, ŋwɛ̀ à lor vi. Yì sàaro à bɛtì. Sàaro anà à m tʉr ntar ka'. 24Wowèe a m làa a wǎp mʉ enɛ̂, “Sèe fa sàa cɛ̀' ca ka', sèe ma' kàŋ tɛ sèe bo yɛ ŋwɛ̀ ce sàaro ca be dù nè ye.” Cena yi m koni tɛ yi bo ghɛɛte àmbò a m saŋ mbe Ŋwǎ' Nyʉ̀ enɛ̂,

“A m gàp wa bcɛ̀' a wǎp mʉ,

a ker ma' kàŋ tɛ a bo yɛ ŋwɛ̀ ce yà sàaro be dù nè ye.”

Bsoogɛ̀ a m ku gee àmbò a m saŋ.

25Ma yì Jisòs, ba nfʉr yì mâ, ba Mɛ̀ɛri ce e m ba ŋgwa Kìlopàs ba Mɛ̀ɛri ce à rla' Makdalà, a m tɛɛ àgee kìntaa Jisòs. 26Jisòs à ka' yɛ yì mâ, ker ba ŋwɛ̀ yɛ'ni yì buu ce e m kòŋ nà àmbò wowèe a tɛɛ àtʉtʉ, e laa nè yì ma enɛ̂, “Njeŋwɛ̀ yɛ̂, a muu ghò na.” 27E m ker laa nè ŋwɛ̀ yɛ'ni yì buu enɛ̂, “Yɛ̂, a yò ma na.” Kɛ̌' à nfè' anà, ŋwɛ̀ yɛ'ni yì buu à lor yì mâ, a ye a du a ce cu a yě là'.

28Cena yi ka' mì wɛɛ, Jisòs à riŋ sè'ni enɛ li rfà' li mì. E m làa enɛ̂, “Ntee yi ce yuushi mɛ̀.” E m làa wa'a tɛ yi bo ghɛɛte àmbò a m saŋ mbe Ŋwǎ' Nyʉ̀. 29Ghee mo' yi m tɛɛ àfo, mrǔ' mcece' mi ba njo jiŋ. A m lor kʉ̀sha a fʉʉ njep mʉ̀ mrù' anà a kur à mbàŋ a naa mbekì, a tʉr ye àgee cùu. 30Jisòs à m nyoŋ mrù' anà efa kʉ̀sha. E ka' nyoŋ wɛɛ, a laa enɛ̂ “Yi mì.” A kɛr tu, a ma'shi li ryòŋ nè Nyʉ̀.

31Àmbò nòŋ anà à m ba nòŋ ce a m ce tami nyor tɛ a bo fʉʉ cu mmbomntaa Nyʉ̀, Jus a m ce kòŋ enɛ bgʉ̌ʉ bèe vi cu mbe kìntaa ka'. Mmbomntaa anà à m ba mǐ gòr. Yi ka' ba wa'a, wowèe a du a laa nè Pailɛ̀t enɛ e ma'shi tɛ wowèe a kepshi mkùu ese bèe anà, tɛ a bo yàŋse kweŋger tɛ a ca'si efa bsii. 32Bsoogɛ̀ a vʉ a kepshi mkùu ese ŋwɛ̀ entombì a ker kepshi mkùu ese ŋwɛ̀ mò' ce a m taa mbe kìntaa foŋ nà. 33Wowèe a ka' vʉ̀ bà' mbe Jisòs a yɛ enɛ e ba kwe wɛɛ, a ke' kepshi mkùu mi ka'. 34Ŋwɛ̀ soogɛ̀ mò' à sop mbèp nyor ese Jisòs nè rkòŋ, mdip ba blɛɛ mi ku fʉʉ à cùu anà. 35Ŋwɛ̀ ce e m yɛ buu ca a ŋwɛ̀ ce e suŋ vi. Yuu ce e làa yi yu mini. Ye ye rìŋ foŋ enɛ yuu ce e ce làa yi yu mini. E ce suŋ wèe buu ca tɛ wèe bo byemi foŋ. 36Buu ca vi m koni tɛ yi bo ghɛɛte àmbò a m saŋ mbe Ŋwǎ' Nyʉ̀ enɛ̂, “A be kè kep yi vʉp mo' ka'.” 37Ŋwǎ' Nyʉ̀ yi ker laa mbe dì' mo' enɛ̂, “Wowèe a be kè yɛ ŋwɛ̀ ce a m sòp.”

38Cena yi ka' mì wɛɛ, Josɛ̀f ce à rla' Àrimàtiyà à vʉ a yɛ Pailɛ̀t. E m ba ŋwɛ̀ yɛ'ni buu Jisòs a ke' ce kòŋ enɛ bèe a riŋ ka' njobè' e m ce wɛp Jûs. E m làa nè Pailɛ̀t enɛ e fa ye njì tɛ e suusi gʉ̌ʉ Jisòs embe kìntaa, tuŋ. Pailɛ̀t à ka' byemi, e du a suusî, a du àgho. 39Nìkòdɛmòs foŋ ce e m be vʉ a yɛ Jisòs nètʉ' nà, à m dù a ye, a tʉr njɛ̀ɛ mcɛ̀p mo' ce a m ce too enɛ mɛ̂r, ba alùs ce a m fìŋshi. Mcɛ̀p anà mi m ba àmbò bkilù mŋkyèe wa'a. 40A m lòr gʉ̌ʉ Jisòs a kur nè bcɛ̌' bbòŋboŋ nè mcɛ̀p anà-ŋwɛ̀ àmbò Jus a m ce gèe. 41Ŋka' mbyè buu yi m ba fàdì' ce a m taa Jisòs mbe kìntaa anà. Rshě rfi li m ba mbo ce a m be tuŋ ŋwɛ̀ njo ka'. 42À ka' ba njobè' Jus a m ce tami nyor nyʉ̀ anà tɛ a bo fʉʉ cu mmbomntaa, a lɛ ye njep rshè anà, njobè' li m ba àtʉtʉ.

Currently Selected:

Ñwaè' Joân 19: LNT

Highlight

Copy