Ñwaè' Luêk 14
14
1À m ba nyʉ̀ mmbomntaa Nyʉ̀ mò', Jisòs à du à ryeŋgèr mbe ndàp ŋwɛ̀ Farìsi mò' ce e m ba ŋwɛ̀ rlii, bèe a ce ker ye bòŋboŋ sê. 2Mbaŋrùŋwɛ̀ mò' ce bko' vi m koo ye à tɛɛ njeptii Jisòs. 3Jisòs à bipshì nè ŋwɛ̀ Farìsi anà ba ŋgǎa ryɛ'ni mncir enɛ̂, “Ncir yi byemi enɛ sèe gee tɛ ŋwɛ̀ yaŋ ke'se nyʉ̀ mmbomntaa Nyʉ̀ kɛ̀ yi byemi ka'?” 4Wowèe a laa yuu ka'. Jisòs à koo ŋwɛ̀ anà a gee e ke'sè, a laa nè ye enɛ e dû. 5E ka' gèe wa' wɛɛ, a laa nè wowèe enɛ̂, “Mò' efa wèe à ka' tʉr muu mbaŋrù kɛ̀ nà' ɛ̀, e gwe njep rwee nyʉ̀ mmbomntaa Nyʉ̀, àde' e caasì nfè' efa rfʉr enjo a?” 6Wowèe a m tʉr yuu làa ka'.
7E ka' yɛ àmbò bèe ce a m be nà a ce taŋni à rcu ba mbe mnta' bbòŋboŋ, e ma' ŋgàa nè wowèe enɛ̂, 8“Ŋwɛ̀ à ka' be wɛ̀ à Ŋkǎ' bgùu, à fa cu ba mbe nta' yǐ bòŋboŋ ka', njobè' àde' yi ku ba enɛ ŋgàŋ à ba be ŋwɛ̀ mò' ce e yu ŋwɛ̌ ŋgòr nè wɛ̀. 9Yi ka' ba wa'a banɛ ŋwɛ̀ ce e ba be wèe ye nà be vʉ̀ làa nè wɛ̀ enɛ̂, ‘Nàti mbekì tɛ ŋwɛ̀ ca cu.’ E ce làa wa'a, banɛ à be nàti mbekì nè rìtu-ŋwɛ̀ dù cu mbe mʉ nta' kɛ'. 10A ka' be wɛ̀ à ŋkà', à cu ba mbe mʉ nta' kɛ', ŋwɛ̀ ce e ba be wèe nà ka' vʉ̂, tɛ e bo làa nè wɛ̀ enɛ̂, ‘Ŋkarà, nàti embo nà, cu mbe nta' bòŋboŋ ca.’ E ka' gee wa'a banɛ e nàa wɛ̀ mbekì à mʉ̀ bèe ce e ba be nà. 11Yi yu enɛ ŋwɛ̀ ce e ka' naa yì nyor mbekì banɛ a be sùusi ye njep nshè. Ŋwɛ̀ ce e ka' suusi yì nyor njep nshè banɛ a be nàa ye mbekì.”
12E m ker laa foŋ nè ŋwɛ̀ ce e ba be ye nà enɛ̂, “Wɛ̀ ka' fɛr byee vǐ nèmootì, kɛ̀ vǐ à mbùuŋkùr ɛ̀, à fa be ba bkar wo kɛ̀ bfʉr wo, kɛ̀ bèe ce wèe wowèe à ràte, kɛ̀ ŋgǎa mbàa ce wèe wowèe ce cu à dǐ' mo'sir ka'. Wɛ̀ ka' be ba wowèe banɛ àde' wowèe foŋ a ku be wɛ̀, tɛ yi ba sè'ni enɛ wowèe a là' yò ntar ce wɛ̀ m tar wowèe àgho nà. 13Wɛ̀ ka' ce gèe ŋkà', à be ba ŋgǎa fùp, ba bèe ce a kepŋger, ba mntɛ̀ŋ, ba bèe ce a fèp. 14Wɛ̀ ka' gee wa' banɛ à be ba ŋwɛ̀ rbǒŋtu njobè' wowèe a tʉr yuu mo' ce àde' a la' wɛ̀ àgho ka'. Nyʉ̀ be kè là' wɛ̀ à nfè' ce bèe ce a yu yɛɛnì à bsii Nyʉ̀ a be kè fʉʉ efa rkwe.”
15Ŋwɛ̀ mò' efa mʉ̀ bèe ce a m cute a sir tɛbùr nà à ka' yu' wa'a, a laa nè ye enɛ̂, “Rbǒŋtu li yu nè ŋwɛ̀ ce e be kè ye ŋkà' embe nto' Nyʉ̀ embe bùu.” 16Jisòs à laa nè ye enɛ̂, “Ŋwɛ̀ mò' à m ce gèe ma njɛ̀ɛ ŋkà' mo' gòr, a be ku' bèe sê. 17Nfè' ŋkà' à ka' ghɛɛ, e tuu yì ŋwɛ̀ rfà' enɛ e du laa nè bèe ce e m be nà enɛ wowèe a vʉse, njobè' e fɛr buu ŋkà' a misî. 18Ŋwɛ̀ wɛɛwɛ à kɛ' a ce suŋ yuu ce e be jepsi ye efa rdù ŋkà' anà. Ŋwɛ̀ entombì à laa enɛ̂, ‘Mɛ̀ yuu ŋkʉ̀, à ba yì ce m be kù dù ba sè'ni na dù yɛ àmbò ŋkʉ̀ anà yu. Dù laa nè ye enɛ ntee yi fa yaŋ lɛ ye ka'.’ 19Mò' à laa yi enɛ̂, ‘Mɛ̀ yuu nǎ' nfà' mnsuu yi rʉ̂ʉ, a ce dù àgho sè'ni na à rmòoshi enɛ yi be fà' bòŋboŋ lɛ. Dù laa nè ye enɛ ntee yi fa yaŋ lɛ ye ka'.’ 20Mò' à ker laa yi enɛ̂, ‘Mɛ̀ lòr ŋgwa, banɛ àde' m vʉ ka'.’ 21Ŋwɛ̀ rfà' à kʉtì a suŋ buu ce wowèe a m làa nè yì masà. Ntee yi yaŋ masà ŋwɛ̀ ndap ca, e laa nè yì ŋwɛ̀ rfà' ca enɛ̂, ‘Dù nè à btase ba à btar mndap vʉ nè ŋgǎa fùp, ba bèe ce a kepŋger, ba bèe ce a fèp, ker ba mntɛ̀ŋ.’ 22Ŋwɛ̀ rfà' anà à kʉtì, a laa enɛ̂, ‘Masà, mɛ̀ gèe yuu ce wɛ̀ làa. Ndap à be ruu ka'.’ 23E laa nè ye enɛ̂, ‘Kèr du à mnduunjì à mʉ̀ rla' ker ba à mʉ mnduunjǐ à mŋkʉ̀, koo bèe à ŋger, tɛ a vʉ̂, tɛ yà ndap bo ruu. 24M ce suŋ wèe mɛnɛ àde' mò' efa bèe ce a be anà joo yuu kù cùu à ya ŋkà' ka'.’”
25Ma kʉr bèe yi m ce jɛ̀r a Jisòs wèe, e karsì nyor a laa nè wowèe enɛ̂, 26“Ŋwɛ̀ à ka' vʉ a mɛ̌ mbùu, ke' baa yì ta ba yì mâ, ba ŋgwa yì, ba boo vi, ba bfʉr vi ba bjar vi, ker ba nè yì nyor-ŋwɛ̀ foŋ ka', banɛ àde' ŋgàŋ ba ŋwɛ̀ yɛ'ni yà buu ka'. 27Ŋwɛ̀ ce e ka' tɛ byɛ̀' yi kìntaa, vʉ̀ fa mɛ̌ mbùu ka', banɛ àde' ŋgàŋ ba ŋwɛ̀ yɛ'ni yà buu ka'. 28Ŋwɛ̀ mò' efa wěe mʉ ka' ce kòŋ à rbà'ri ndap ce e sàp mbekì sê, banɛ e be cu à nshè, kwà'shi àmbò mbàa ce àde' e ba'rì ndap anà àgho tɛ e bo yɛ enɛ e tʉr buu ce àde' e ba'ri ndap anà àgho misi lɛ, 29buwa'làr, e ka' boo kǔu ndap, lo moo à rbà'ri ndap mìsi làr, banɛ bèe ce a ka' yɛ ndap anà a be vʉ̀shi ye ce làa enɛ̂, 30‘Ŋwɛ̀ ca à m kɛ̀' a ce bà'ri ndap a moo à rmìsi làr.’ 31Yi yu foŋ enɛ ŋkʉʉ à ka' ce dù à rmà' bìr, tʉr bsoogɛ̀ ncʉ̀kì rʉ̂ʉ, ŋkʉʉ ce a ye a be mà' bìr tʉr yi bsoogɛ̀ ncʉ̀kì mmbaa, banɛ e be kɛ̀' entombì cu à nshè, kwà'shi enɛ yi ŋger yi ghɛɛte à rmà' bìr a ŋkʉʉ anà lɛ. 32E ka' yɛ enɛ e tʉr ŋger à rmà' bìr a ye ka', banɛ e be tuu bèe tɛ a du yɛ ŋkʉʉ anà à nfè' ce e ku bii ànjìsàp, làa nè ye enɛ a ye a seesi sèesi ba cǔu mo'sir, borni bìr. 33Yi ku ba wa' foŋ nè wèe. Ŋwɛ̀ ce e ka' tɛ mà'shi yì buu wɛɛwɛ ce e tʉr ka', banɛ àde' ŋgàŋ ba ŋwɛ̀ yɛ'ni yà buu ka'.
34“Mgwaŋ mi bòŋ, geewa'a, mi ka' cir, àde' a gee ekɛ mi ka' ker lêe? 35Mi ka' cir, banɛ mi be kèr tʉr rfà' mo' nè nshe kɛ̀ nè mànyo ka'. A be lòr mi mà'. Ŋwɛ̀ ce e ka' tʉr btù', ŋgàŋ yu'.”
Currently Selected:
Ñwaè' Luêk 14: LNT
Highlight
Share
Copy
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.
