Ñwaè' Matïìyoè 10

1Jisòs à m kɛ' ŋgǎa yɛ'ni yì buu ce ncòp-baa-à-rrʉ̀ʉ, a fa wowèe ŋger enɛ wowèe a ce fʉr byʉ' bbebep enjep bèe, ker gee tɛ bèe ce a ce yaŋ byaŋ njɛ̀ɛ jɛɛ jɛ̀ɛ jɛɛ a ke'se. 2A mlii ŋgǎa ntuu ce ncòp-baa-à-rrʉ̀ʉ anà na: Ŋwɛ̀ entombì à m ba Saimʉ̀n ce a ce too enɛ Pità, ba nfʉr yì ce Andrù, ba Jɛ̂ms, muu Sɛbɛ̀dî, ba nfʉr yì ce Jǒn, 3ba Felêp, ba Bàtòlomì, ba Tomâs, ba Matìyò ce e m ba ŋwɛ̀ ŋkùu mbǎa bàrà', ba Jɛ̂ms, ce e m ba muu Alfìyòs ba Tàdiyòs, 4ba Saimʉ̀n ce e m ba mò' efa mʉ̀ bèe Silòt ba Judas Ìskarìyòt ce e m lò a fyeni Jisòs nà. 5Jisòs à m tuu bèe ncòp-baa-à-rrʉ̀ʉ ca, a laa nè wowèe enɛ̂, “Wèe fa dù à ŋgǒŋ bèe enje jɛɛ, kɛ̀ à mla' běe à ŋgǒŋ Sàmarìyà ka'. 6Dù nè yɛ ba njèe embe ndʉ̀' Isrɛ̀l ce yi m bʉ nà. 7Wěe ce dù, wèe ce fe'shi weenɛ kʉʉ Nyʉ̀ embe bùu yi yu àtʉtʉ. 8Gèe nè tɛ ŋgǎa byaŋ a ke'se, gee tɛ bèe ce a kweŋger a kʉti btèe, gee tɛ ŋgǎa byaŋ msàasì a ke'se, raa, fʉr nè byʉ' mnyʉ̌mkà' enjep bèe. Wèe à m là' a ka' koni ka', wěe gèe nè bèe wa'a, wèe fa koo blà' ka'. 9Wee ce dù, ŋwɛ̀ fa lòr mbàa, ka' mʉcàr ɛ̀, lɛ̀ njep posà tɛ e bo dù àgho ka'. 10Ŋwɛ̀ fa lòr bàa kɛ̀ bcɛ̌' bbaa, kɛ̀ blaba' kɛ̀ mbàŋ ka', njobè' yi yu yɛɛnì enɛ a la' ŋwɛ̀ rfà'.

11“Wèe à ka' niŋ à rla' rgòr, kɛ̀ à rla' rkɛ' ɛ̀, wèe fyɛ' ŋwɛ̀ ce e yu ŋwɛ̀ nyɛɛnì àfo, cu wèe ŋwɛ̀ anà wèe caar tɛ yè nfè' ce wèe be lǒ à rla' anà du ghɛɛ.” 12Wèe à ka' niŋ mbe ndàp, wèe ca'nì bèe embo. 13Ndap anà à ka' ba ndap nyɛɛnì, wèe ma'shì tɛ yè cumʉnyaŋ ba mbe ndàp anà. Ndap anà à ka' tɛ ba ndap nyɛɛnì ka', banɛ e bɛ bghònì anà. 14Ŋwɛ̀ ce e ka' tɛ koni wèe kɛ̀ yu' yuu ce wèe be làa ka', wèe ka' ce fʉʉ embe ndàp ŋwɛ̀ anà, kɛ̌ à rla' anà ɛ̀, wèe kashì nfʉ̀nfʉ efa wěe mkùu. 15M ce suŋ wèe nè mini-ŋwɛ̀ enɛ be kèe ba à nǒŋ mnsa' tɛ ŋgɛ' à rla' Sodòm ba Gòmorà ba àndèe nè ŋgɛ' à rla' anà.

16“Yɛ̂, m ce tuu wèe tɛ wèe du ba àmbò njèe à mʉ̀ bkuura. Banɛ wèe feese àmbò mnyo, ba nè rbornì-ŋwɛ̀ àmbò bbèŋ. 17Lòr nè nfè' wèe bèe wèe njobè' wowèe a be lòr wèe du àgho à bkansùr, lìp wèe nè mŋgwàa à wap mndap mloo. 18A be koo wèe dù àgho njeptii bgovanò ba bkʉʉ njo' mɛ̀, tɛ wèe bo suŋ wowèe ker ba bèe enje jɛɛ buu kuu mɛ̀. 19A ka' lor wèe du àgho, mlù mi fa koo wèe enɛ wèe be làa ba kɛ à njɛ̌ɛ kɛ lɛ ka', njobè' Nyʉ̀ be gèe tɛ wèe ku rìŋ yuu ce wèe be làa à nfè' anà. 20Be ba à nfè' anà tɛ ce làa wèe ka', be làa ba Yʉ' yè Ta nè wèe. 21Ŋwɛ̀ be kèe lòr nfʉr yì fa tɛ a yʉ, tɛ tàr lor muu yì fa tɛ a yʉ. Boo a be kèe tèe btu nè wâp tâ, ba wâp mâ, lòr wowèe fa tɛ a yʉshi. 22Bèe wɛɛwɛ a be kèe bàa wèe njo' mɛ̀. Geewa'a, ŋwɛ̀ ce e ka' tɛɛ tatap du ba' à lʉ̀simbùu, ŋgàŋ be lùŋ. 23A ka' fa wèe ŋgɛ' à rla' mo', wèe caŋ du à rla' mo' jɛɛ. M ce suŋ wèe nè mini-ŋwɛ̀ enɛ wèe be jɛ̀r à mla' Isrɛ̀l wɛɛwɛ ka', tɛ Muu Ŋwɛ̀ vʉ̂. 24Àde' ŋwɛ̀ ce a ce yɛ'ni ye caa yì ŋwɛ̀ ryɛ'nì ka'. Àde' ŋwɛ̀ rfà' caa yì masà ka'. 25Yi yu yɛɛnì enɛ ŋwɛ̀ yɛ'ni buu ba àmbò ŋwɛ̀ ce e yɛ'ni ye buu anà, tɛ ŋwɛ̀ rfà' ba àmbò yì masà. A ka' too masà ŋwɛ̀ ndap enɛ Bɛsɛbùl (Satàn), banɛ a be too bèe embe ndàp yì enɛ kɛ?”

26“Banɛ wèe fa wɛp wowèe ka' njobè' yuu mo' yi yu ce a tɛ'shi ce yi be kèe buu efa ryɛɛti àwaŋ ka', yuu mo' yi ba ce a sʉ̀ti ce bèe a be kèe buu efa rrìŋ ka'. 27Buu ce m ce suŋ wèe nètʉ', suŋ nè à mmir waŋ. Buu ce a cʉ̀ʉni nè wèe, suŋ nè embe btu mndap. 28Wèe fa wɛp bèe ce a ke yʉ ŋwɛ̀ wɛɛ, moo à ryʉ ryòŋ ŋwɛ̀ làr nà ka'. Wɛp nè ba ŋwɛ̀ ce àde' e yʉ ryòŋ ba nyor njep mor. 29Mbò a ke fyèni bbe' bbaa à frǎŋ mmbaa a? Àde' mò' efa bbe' ca gwe à nshè ce yè Ta à buu efa rbyemì ka'. 30Ka' nyʉ̀'tu ce yi yu mbe wěe tù, a bè' wɛɛwɛ. 31Banɛ wèe fa wɛp ka'. Wèe lùu ntaa à bsii Nyʉ̀ a caa bbe' àŋgoo. 32Ŋwɛ̀ ce e ka' suŋ à bsii bèe enɛ e yu yà ŋwɛ̀ banɛ mɛ mɛ̀ foŋ be suŋ à bsii yà Ta embe bùu enɛ e yu yà ŋwɛ̀. 33Ŋwɛ̀ ce e ka' mɛŋni mɛ̀ à bsii bèe banɛ mɛ mɛ̀ foŋ be mɛŋni ye à bsii yà Ta embe bùu foŋ.

34“Wèe fa ce kwà'shi enɛ mɛ̀ m vʉ̀ ba nè cumʉnyaŋ njep ŋgòŋ na ka'. Mɛ̀ m vʉ̀ ba nè cumʉnyaŋ ka'. Mɛ̀ m vʉ̀ ba nè kàafà'. 35Mɛ̀ m vʉ̀ tɛ m bo gèe tɛ ŋgàpni yi ba mbetar muu mbaŋrù a yì tâ, ba muunje a yì mâ, ba ŋgwa muu a malǔ. 36Bèe ce a be bàa ŋwɛ̀ be kù ba bèe embe yě ndàp.

37“Ŋwɛ̀ ce e ka' koŋ yì tâ, kɛ̀ yì ma ɛ̀, caa mɛ̀, banɛ ŋgàŋ à ghɛɛte à rba yà ŋwɛ̀ ka'. Ŋwɛ̀ ce e ka' koŋ muu yì, banɛ ŋgàŋ à ghɛɛte à rba yà ŋwɛ̀ ka'. 38Ŋwɛ̀ ce e ka' tɛ lòr yi kìntaa vʉ̀ fa mɛ̌ mbùu ka', banɛ ŋgàŋ à ghɛɛte à rba yà ŋwɛ̀ ka'. 39Ŋwɛ̀ ce e ka' ce ròo ba li ryòŋ, banɛ e be bɛ li. Ŋwɛ̀ ce e ka' bɛ li ryòŋ njo' mɛ̀ banɛ e be koni li.

40“Ŋwɛ̀ ce e ka' koni wèe banɛ e koni mɛ̀. Ŋwɛ̀ ce e ka' koni mɛ̀, banɛ e koni ŋwɛ̀ ce e m tuu mɛ̀. 41Ŋwɛ̀ ce e ka' koni ŋwɛ̀ ncep ntuu Nyʉ̀ njobè' ŋwɛ̀ anà yu ŋwɛ̀ ncep ntuu Nyʉ̀ banɛ ŋgàŋ be koni blà' ŋwɛ̀ ncep ntuu Nyʉ̀. Ŋwɛ̀ ce e ka' koni ŋwɛ̌ nyɛɛnì njobè' ŋwɛ̀ anà yu ŋwɛ̌ nyɛɛnì à bsii Nyʉ̀, banɛ ŋgàŋ be koni blà' ŋwɛ̀ ce e yu yɛɛnì à bsii Nyʉ̀. 42Ŋwɛ̀ ce e ka' fa ndoŋ mdip ce e ce fʉte nè ŋwɛ̀ mò' efa běe bkɛ'kɛ' ca njobè' e yu ŋwɛ̀ yɛ'ni yà buu, m ce suŋ wèe nè mini-ŋwɛ̀ enɛ àde' e bɛ vi blà' ka'.”

Currently Selected:

Ñwaè' Matïìyoè 10: LNT

Highlight

Copy