Ñwaè' Matïìyoè 13
13
1Jisòs à m fʉʉ embe Ndàp Nyʉ̀ anà a du a cu àwǎa rò. 2Ku' bèe a vʉ̂, a sir ye a tarte, e niŋ mbe keŋ a cu mbo, bèe anà a tɛɛ nje wǎa tʉ̀. 3E suŋ wowèe buu magòr à mŋgàa. E m làa enɛ̂, “Ŋwɛ̀ mò' à m dù à rbyè buu, 4a ka' ce byè, ŋgʉ̀ buu mò' à gweŋgèr àwǎa nduunjì, bsiŋ vi vʉ̂, a ye. 5Ŋgʉ̀ buu mò' à gweŋgèr yi ba mbendù nshe ce e m ba mbendù ryɛɛ. Ŋgʉ̀ buu anà à yaŋsè a fʉʉ njobè' nshe e mbendù ryɛɛ anà à m ba gòr ka'. 6Nyʉ̀ à ka' saŋ, a too ŋgʉ̀ buu anà, e yoprì njobè' mŋgàŋ vi m niŋ njep nshe bòŋboŋ ka'. 7Ŋgʉ̀ buu mò' à m gwèŋger à mʉ̀ msini, msini mi ku', a kur. 8Ŋgʉ̀ buu mò' à gweŋgèr mbe nshe mbòŋmboŋ, a fʉʉ, a gee mbʉ̀, mò' à gee mbʉ̀ rjèe, mò' mntuunfu, mò' mntaar. 9Ŋwɛ̀ ce e tʉr btù', ŋgàŋ yu'.”
10Ŋgǎa yɛ'ni yì buu a ko'shì a yě geŋ a bipshi nè ye enɛ̂, “À ce suŋ buu nè bèe ba à mŋgàa njokɛ?” 11E beesì enɛ̂, “Buu ce àde' bèe a riŋ kuu kʉʉ Nyʉ̀ ka' na, Nyʉ̀ à gèe wèe à rîŋ. À ka' ba yi àmbò wowèe, Nyʉ̀ à gèe wowèe a riŋ ka'. 12Ŋwɛ̀ ce e ka' tʉr yuu, banɛ a be kèr fa ye buu mò', tɛ e misi tʉr buu gòr. Ŋwɛ̀ ce e ka' tɛ tʉr yuu ka', banɛ a be koo, ka' mʉ yì ce e tʉr nà ese ye. 13A mbùu ce m ce suŋ buu nè wowèe ba à mŋgàa. M ce gèe wa'a tɛ wowèe a ce kè' ce yɛ ka', a ce yu'shi, ce yu' ka', a riŋ buu foŋ ka'. 14Wowèe a gèe yuu ce Àsayà ŋwɛ̀ ncep ntuu Nyʉ̀ à m làa nà yi ghɛɛtè njo. E m làa enɛ̂,
‘Bèe ca a be ce yu', ce rìŋ yuu ce wowèe a ce yu' anà ka'.
Wowèe a be ce yɛ, ce rìŋ yuu ce a ce yɛ anà ka',
15njobè' ntee yi yini wowèe,
wowèe a riŋ buu ka'. Wowèe a kani à ryu' buu,
a cete map mmir fà dì' wowèe a bo yɛ buu nè map mmir,
yu' buu nè wap btù', rìŋ buu,
bèeŋger vʉ̀ yɛ mɛ̀ tɛ m gee tɛ wowèe a luŋ ka'.’
16Mbǒŋtu mi yu yi nè wèe njobè' me mmir mi ce yɛ buu, wee btù' vi ce yu' buu. 17M ce suŋ wèe nè mini-ŋwɛ̀ enɛ ku' ŋgǎa ncep ntuu Nyʉ̀ magòr, ba bèe ce a m ba yɛɛnì à bsii Nyʉ̀ a m ce kòŋ à ryɛ yuu ce wèe ce yɛ na, a yɛ ka', a koŋ à ryu' yuu ce wèe ce yu' na, a yu' ka'.
18“Banɛ wèe yu' là mbùu efa ŋgàa ŋwɛ̀ mbyè buu. 19Ŋgʉ̀ buu ce e m gweŋger àwǎa nduunjì tɛɛ àtu ŋwɛ̀ ce e m yu' yuu ce a ce làa àmbò kʉʉ Nyʉ̀, a ke' yu' ka', Satàn à vʉ a fʉr yuu anà enjep yě ntee. 20Ŋgʉ̀ buu ce e m gwèŋger yi ba mbe nshe e mbendù ryɛɛ nà tɛɛ àtu ŋwɛ̀ ce e yu' blǎa Nyʉ̀ ku yu' rbòŋ àgho sê, 21blàa anà vi ke' taa mŋgàŋ njep ye ka', ku cu ba à nfè' mʉcàr. E ba à nfè' ce bèe a ce fa ye ŋgɛ', kɛ̀ buu vi ba btatap nè ye njo' blàa anà, e ku kʉti njìnjì. 22Ŋgʉ̀ buu ce e m gwèŋger à mʉ̀ msini nà, tɛɛ àtu bèe ce a yu' blǎa Nyʉ̀, ku byemi, mlù ce à buu enjep ŋgòŋ na, ba broŋ buu, vi kur blàa anà, yi gee ŋgʉ̀ ka'. 23Ŋgʉ̀ buu ce e m gwèŋger yi ba mbe nshe mbòŋmboŋ nà tɛɛ àtu ŋwɛ̀ ce e yu' blǎa Nyʉ̀, yu' bòŋboŋ sê, gee ŋgʉ̀, mò' ba rjèe, mò' ba mntuunfu, mò' ba mntaar.”
24Jisòs à ker ma' ŋgàa mò' nè wowèe enɛ̂, “Kʉʉ Nyʉ̀ embe bùu yi yu àmbò ŋwɛ̀ ce e m byè ŋgʉ̀ buu bbòŋboŋ à mŋkʉ̀. 25Bèe a ka' ce buumi, yì ŋwɛ̀ bbàa à vʉ a bye ŋke' à mʉ̀ msaŋ ce ŋgàŋ à m byè, a du yi yu. 26Msaŋ mi ka' kù', bùr, ŋke' cà yi yɛɛtì sè'ni à ŋke'. 27Ŋgǎa mfà' à vʉ̂, a laa nè ŋwɛ̀ ŋkʉ̀ ca enɛ̂, ‘Masà, mbò wɛ̀ m byè ŋgʉ̀ buu bbòŋboŋ a wɛ̌ ŋkʉ̀ a? Ŋke' yi ka' lo yi ba efɛ?’ 28E beesì nè wowèe enɛ̂, ‘Yuu ca à gèe yà ŋwɛ̀ bbàa mò'.’ Ŋgǎa mfà' a laa nè ye enɛ̂, ‘À ce kòŋ wɛnɛ wèr du co'ni ŋke' anà a?’ 29E laa enɛ̂, ‘Mɛ̀ kani. Wèe à ka' ce co'ni ŋke' anà, seemò' wèe co'nì msaŋ à mʉ̀ mo. 30Mà'shi nè tɛ msaŋ anà ba ŋke' a ku ce kù' caar tɛ nfè' ntee msaŋ ghɛɛ. Nfè' anà e ghɛɛ tɛ m laa nè ŋgǎa ntee msaŋ enɛ̂, “Kɛ̀' nè co'ni ŋke', kur à bbyɛ̀' à bbyɛ̀', tɛ a tôo, baashi nè msaŋ, vʉ àgho lɛ njep càŋ.” ’ ”
31Jisòs à ker ma' ŋgàa mò' nè wowèe enɛ̂, “Kʉʉ Nyʉ̀ yi yu àmbò ŋgʉ̀ mostà ce ŋwɛ̀ à m lòr a bye fa yě ŋkʉ̀. 32Ŋgʉ̀ mostà ca ŋwɛɛsi a caa ŋgʉ̀ buu wɛɛwɛ. Ka' yi yu wa'a, a ke byè, e ku' caa buu wɛɛwɛ ce a byè à mŋkʉ̀, ba sè'ni ba à ce, bsiŋ vi vʉ ba'ri mndap à mnta' efa gho.”
33E m ker ma' ŋgàa mò' nè wowèe enɛ̂, “Kʉʉ Nyʉ̀ yi yu àmbò yis ce njeŋwɛ̀ à m lòr, a fe' mkʉ̌ŋ brɛ̌d mŋkǎa btaar, a top àgho caar mkʉ̀ŋ anà mi ko'.”
34Jisòs à m suŋ buu ca wɛɛwɛ nè bèe ce a m ba a wowèe, a ma' ba à mŋgàa. Yuu mo' yi yu ce e m làa nè wowèe a buu efa rmà' ba à ŋgàa ka'. 35E m gèe wa'a tɛ yuu ce ŋwɛ̀ ncep ntuu Nyʉ̀ à m làa, yi bo ghɛɛte njo. E m làa enɛ̂,
“M be mʉ̀' ya cùu, mà' mŋgàa.
M be suŋ buu ce Nyʉ̀ à m sʉ̀ti ese bèe kɛ̌' à nfè' ce e m gèe ŋgòŋ.”
36E ka' làa wa' mìsi, a ma'shi bèe cà, a niŋ mbe ndàp. Ŋgǎa yɛ'ni yì buu a du a yɛ ye mbo, a laa nè ye enɛ̂, “Suŋ ka wèr mbùu efa ŋgàa ŋke' ce yi m kù' à mʉ̀ msaŋ nà.” 37E beesì enɛ̂, “Ŋwɛ̀ ce e m byè ŋgʉ̀ buu bbòŋboŋ nà a Muu Ŋwɛ̀, 38ŋkʉ̀ à ba ŋgòŋ ca, ŋgʉ̀ buu bbòŋboŋ à ba bèe ce Nyʉ̀ yu yàp ŋkʉʉ, ŋke' à ba bèe ce a yu bèe Satàn. 39Ŋwɛ̀ bbàa ce e m byè yi ba ŋke' nà à ba Satàn. Nfè' ntee msaŋ yu nfè' ce ŋgòŋ yi ce mì, ŋgǎa rtee a ba bcìndap Nyʉ̀. 40Àmbò a ke baashi ŋke' too nè mor nà, yi be kèe ba wa'a à nfè' ce ŋgòŋ yi ce mì. 41Muu Ŋwɛ̀ be kèe tuu vi bcìndap tɛ wowèe a baashi buu ce vi ke gèe bèe a ce gèe buu bbebep, ker ba ŋgǎa ŋgèe buu bbebep wɛɛwɛ embe dì' yi kʉʉ, 42mà' njep mor ce bèe a be kèe ce warse ce kʉr msòŋ njo. 43A ce mà' wowèe njo wa'a tɛ bèe ce a yu byɛɛnì à bsii Nyʉ̀ a saŋ àmbò nyʉ̀ wa' mbe dì' kʉʉ yàp tâ. Ŋwɛ̀ ce e ka' tʉr btù', ŋgàŋ yu'.
44“Kʉʉ Nyʉ̀ yi yu àmbò yuu bòŋboŋ ce a sʉ̀ti à mŋkʉ̀, ŋwɛ̀ mò' à ka' vʉ̀ yɛ, a lor a sʉti foŋ, a lu'shi sê, a dû, a fyeni yì buu wɛɛwɛ a yuu ŋkʉ̀ anà. 45Kʉʉ Nyʉ̀ yi yu foŋ àmbò ŋwɛ̀ ntaa ce e m ce ròo sibaŋ, 46a ka' yɛ mo' ce e lùu ntaa sê, a du a fyeni yì buu wɛɛwɛ a yuu àgho.
47“Kʉʉ Nyʉ̀ yi yu foŋ àmbò rraa ce a m mà' njep rò, a koo nca njo njɛ̀ɛ jɛɛ jɛ̀ɛ jɛɛ. 48Yi ka' ruu njo, ŋgǎa ŋkoo nca a sʉŋ a ko'si mbe ŋkʉ̀, a cu à nshè, a capshi nca yǐ bòŋboŋ a lɛ à mŋkàa, a lor yǐ bebep a ma'. 49A mbò yi be kèe ba wa'a à nfè' ce ŋgòŋ yi ce mì. Bcìndap Nyʉ̀ a be kèe vʉ̀, fʉshi běe bbebep efa mʉ̀ bèe ce a yu yɛɛnì à bsii Nyʉ̀, 50mà' wowèe njep mor ce bèe a be kèe ce warse ce kʉr msòŋ njo.”
51Jisòs à bipshì nè wowèe enɛ̂, “Wà' wèe à yu' buu ca wɛɛwɛ a?” Wowèe a beesì enɛ̂, “Ɛ̀no.” 52E laa nè wowèe enɛ̂, “Banɛ ŋgǎa ryɛ'ni mncir wɛɛwɛ ce a yɛ'ni buu kʉʉ Nyʉ̀, a yu àmbò ŋwɛ̀ ndap ce e fʉr buu bfi ba buu brʉ̀ʉ embe dì' ce e ke lɛ̀ yì buu.”
53Jisòs à ka' mà' mŋgàa ca nè wowèe mìsi, a lǒ àfo, 54a dù fa yě là', a yɛ'ni běe àfo mbe yàp ndap rloo, wowèe a bɛɛŋgèr sê, a laa enɛ̂, “Ŋwɛ̀ ca à gèe bfee ca ba efɛ, a koni ŋger à rgèe buu bghagha' ca ba efɛ? 55Mbò ŋwɛ̀ ca yu muu kapintà cà a? Mbò a too yì ma enɛ Mɛ̀ɛri a? Mbò bfʉr vi à ba Jɛms ba Josɛ̀f, ba Saimʉ̀n ba Judàs a? 56Mbò bjar vi wɛɛwɛ a ce cu àfa sèe wowèe a? Banɛ ŋwɛ̀ ca à gèe bfee ca ba ŋger ca efɛ?” 57A ka' làa wa'a, a kanì ye. Jisòs à laa nè wowèe enɛ̂, “A ke yu'ni nè ŋwɛ̀ ncep ntuu Nyʉ̀ à bdì' bsìp, geewa'a bèe efa yě là' ba bèe embe yě ndàp a ke yu'ni nè ye ka'.” 58E m gèe buu bghagha' àfo gòr ka' njobè' wowèe a m byemi nè ye ka'.
Currently Selected:
Ñwaè' Matïìyoè 13: LNT
Highlight
Share
Copy
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.
Free Reading Plans and Devotionals related to Ñwaè' Matïìyoè 13
The Power of Your Words
Jesus Christ Crash Course (Part 1)
Faith & Love: A One Year Bible Reading Plan - Part 4