Matyu 23

Ya Pangpaliwat Ni Hesus Ta Pariseyu Kiden

(Mk 12:38-40; Lk 11:37-54)

1A sangaw, nagbida ha i Hesus ta tolay kiden nangkalihung tentu kontodu ituldu na kiden gafu ta Pariseyu kiden.

2,3“Mappya ta kurugan muy ya ituldu na Pariseyu kiden ikid na mangituldu kiden ta linteg ni mina Moses, te ikid ya nesaad nga mangituldu ta lintig kiden netuldu ni Moses. Ammi awemuy parigan ya gagangay da, te aweda haman idulot ya ituldu da tekamuy, 4yaga addu hapa ya idagga da ta linteg kiden nga mazigat makkwa. Ammi tekid a aweda haman kwan ya pakkwa da ta kadwan, maski ta assang la. 5A addu hapa ya tarabakun da petta pahig na kadwan ta masikan ya pangurug da ta Namaratu. Te mamadday kid ta ibārungut da ta mukat da nga nasuratan ta lintig kiden na Namaratu, yaga ipatāpāt da kid hapa ta kamat da kiden, a sangaw pake paispotan da ya gayadan na barawasi da ta kuman na padi kiden. 6A am itta ya pabuya ono gimung a pilin da para ya pake kaispotan na agtuttudan. 7am itta kid ta lugar na addu na tolay a ikayat da dangagan ya pangdayaw na tolay kiden tekid, aglalo am ‘Ser Mistro’ itta ya kumin tekid.

8“Ammi tekamuy a awemuy mina pagdaduman ya kabagis muy kiden, petta ‘Ser,’ kummuy ta kadwan, ono ‘Mistro,’ kummuy ta kadwan, te sa magkakabagis kam haman, a tatakday la ya mistro muy. 9A awemuy mina ikwenta ya ikattolay muy ta pinakadama muy, te tatakday la ya Dama muy ta langitewan. 10A awemuy hapa padayaw ta ‘Afu,’ te ya Ari en Kristu ya dana nesaad na Namaratu ta dafu muy nga makkamu tekamuy. 11A am inya ya manguffun tekamuy ta kuman na tagabu a yen ya mekwenta ta kadakalan muy, 12te maski am inya sangaw ya mangpātā-nāng ta bari na a mapaākban sangaw, ammi ya imunnan magpaakban ta bari na a yen sangaw ya mapātā-nāng,” kunna.

13A ya uhohug ni Hesus ta Pariseyu kiden ikid na mangituldu kiden ta lintig a

“Kakallak kam sangaw nga magimmamappya, te tabtabangan muy garay ya isasarok na tolay kiden ta pangikerutan na Namaratu. Gafu ta awemuy ikayat mangurug a tabtabangan muy hapa ya mayat kinden mangurug. 14A kakallak kam hapa sangaw, te sisteman muy ya babay kiden nabalu, petta magubatan muy ya bali da. A ikayat muy hapa pādanukan ya paklimallak muy, petta pahig na tolay kiden ta abikan kam ta Namaratu ewan, ammi pake padakalan na hapa sangaw ya pama-gang na tekamuy. 15A kakallak kam sangaw, ikamuy nga Pariseyu ikid na mangituldu, te magimmamappya kam. Te pakolangan muy ya maski takday la na tolay petta ikayat na simarok tekamuy. Ammi am abalin na netuldu a nagbalin ta pake magimmamappya ammi tekmauy.

16“Kakallak kam sangaw, te killu kam na mangituldu, te am itta ya magpagasingan ta ngagan na simbaan na Namaratu a ibar muy ta awena mekwenta na pagpagasingan na, ammi am magpagasingan ta ngagan na balituken ta simbaanen a ibar muy ta liwat na am awena idulot ya nekari na en. 17Killu mantu ya nonot muy, te pahig muy ta dakdakal ya balituken ammi ta simbaanen, ammi ya simbaanen haman ya mangatad ta kwenta na balituken. 18A ta kuman na takday para uhohugan muy a

‘Ya magpagasingan ta ngagan na angiatanganen a awena mekwenta,’ kummuy. ‘Ammi ya magpagasingan ta ngagan na neatang na en a liwat na,’ kummuy, ‘am awena idulot ya nekari na en.’ 19Kuga killu ha ya nonot muy! Te awan mina ta kwenta na neatangen am bakkan haman ta angiatanganen ya mangatad ta kwenta na. 20A am itta mantu ya magpagasingan ta ngagan na angiatanganen a mesipat hapa ya ngamin neatang na ten. 21A am itta ya magpagasingan ta ngagan na simbaanen a mesipat hapa ya ngagan na Namaratu ewan, te pagyanan na haman. 22A am itta ya magpgasingan ta langitewan a Namaratu ewan hapa ya makkamu, te ya langitewan ya pagyanan na.

(Lk 13:31-35)

23“Kakallak kam sangaw, ikamuy Pariseyu ikid na mangituldu te magimmamappya kam. Te am iatad muy ya mekamafulu en ta Namaratu ewan a pake sukatan muy ta mappya petta awena nasurok ono makurang. Ammi ya pake mesasita en nga patarabaku na tekamuy a yen kid haman ya taliban muy. Mapmappya ta yen kid mina ya pake nedulot muy kontodu pangiatad muy ta mekamafulu ta kwa muy. 24Ammi killu kam haman na mangituldu, te intu masamgad muy ya alaassangen, ammi ta dappugen a awemuy masamgad.

25“A pake kakallak kam sangaw, ikamuy magimmamappya, te baggawan muy ya liwan na pinggan ikid na paginuman, ammi napannu para la ya umagen ta paginggum muy ikid na pagattug muy. 26Daram kam mantu na Pariseyu. Dana pakappyan muy mina ya nonot muy nga awena maita na tolay, petta ispot hapa sangaw ya maita da ta bari muy.

27“A pake kakallak kam sangaw, ikamuy nga Pariseyu ikid na mangituldu, te kuman kam na tanam kiden na semyento nga pinintoran da ta furaw petta ispot. Ammi napannu haman ta tulang na nasi ikid na kompormi na matapang. 28A ta kuman na maita na tolay tekamuy a mappya kam, ammi napannu ya nonot muy ya ngamin dulay ikid na pagimmamappya muy.

29-33“A kakallak kam sangaw, ikamuy Pariseyu ikid na mangituldu, te ibosag muy ta anak na kam na dadagkal muy kiden nga namapasi ta aglavun kiden to idi. Ammi ape madamdam kanan ta pasi na aglavun kden, a yen ta pakappyanan muy ya tanan da kiden, anna tunan muy kid hapa ta magmagannud na ispot, kapye muy ape itangit ya pagdamdam muy.

“‘Ay, am natolay kami mina ta araw na dadagkal mi kiden awemi nekabat tekid nga namapasi ta aglavun kiden,’ kummuy. A yen mantu ya mangibar ta pakaliwat muy hapa, te ibosag muy hala ta anak kam na namapasi kiden ta aglavun kiden. Had kukummuy mantu makalillik ta pama-gang na Namaratu tekamuy, te anak kam haman na madagat.

“Aran, idulot muy la ya pinegafwanan na dadagkal muy kiden, 34te itta para sangaw ya doban ku tekamuy ta aglavun ikid na mangituldu ikid na malalaki magnonot, a amuk ta itta sangaw tekid ya papasin muy ikid na pagappan muy ikid na paligatan muy. A dadagdagan muy ya kadwan abat ta kompormi na lugar nga pagbilagan da. 35A yen ta ikamuy nga magimmamappya ya mehulun sangaw ta dadagkal muy kiden nga pa-gangan na Namaratu, te sa makaliwat kam ta pasi na mappya kiden tolay nga napapasi addet te mina Abelen nga awan nagliwat, addet te mina Zikaraya en nga anak ni Barakiya. Intu ya pinapasi muy ta hahat na simbaanen ikid na angiatanganen. 36A kakurugan ya uhohug ku tekamuy ta ikamuy ngamin ya pangibalatān na Namaratu ta pasi na inin kid na tolay.”

Ya Pagdamdam Ni Hesus Ta Tolay Kiden Taga Herusalem

(Lk 13:34,35)

37A gafu ta damdam ni Hesus ta sakā tolay na kiden a tinangitan na kid;

“Ay, anak ku taga Herusalem; mamempiga yak mina nga nangikerutan tekamuy ta kuman na manuken nga mangukup ta piyak na kiden, ammi awemuy ikayat, awa pinapasin muy hud la ya aglavun kiden nga dinob na Namaratu ta mangaskasaba tekamuy. 38A ta ayanin a iwagak na kanan na Namaratu. 39A ibar ku tekamuy ta awedak sangaw maita am awemuy ulin ya nonot muy, petta dayawan muy ya dinob na Namaratu nga pinakabari na tekamuy,” kunna.

Currently Selected:

Matyu 23: agt

Highlight

Copy