Markus 10
10
Ya Ituldu Ni Hesus Gafu Ta Paggungay Na Nagatawa
(Mt 19:3-12)
1A ta nepagtugut nig Hesus ta nagyanan da en a umange kid ta lugar na Hudeya ta dammang na karayan na Hurdan, a nagammung ha tentu ya awan bababang na tolay, a netuldu na kid ta kuman na intu hala en. 2A umange hapa tentu ya kadwan kiden Pariseyu, te itta ya pohut da ta pangparuba da tentu.
“Mistro, had kun na pangawatam ta lintig ni Moses gafu ta magatawa kiden, te mepalubus de ta igungay na lalaki ya atawa na?” kunda.
3A ya tabbag na hapa tekid a
“Anu hud ya nebar ni mina Moses tekamuy?” kunna.
4“A nepalubus na ta igungay na lalaki ya atawa na, ammi mappya ta iatad na tentu ya papel na pakigungay na,” kunda.
5“A onay, gafu ta pagbanad na nonot muy, 6ammi addet ta nepamadday na Namaratu ta napopolu kiden a bakkan haman ta kunna ten, te ya uhohug na suraten a
‘Pinadday na kid petta itta ya lalaki ikid na babbay.
7 A yen ta makigungay ya lalaki ta dakal na kiden, te makidagga ta atawa na en,
8 a ikwenta na Dyos ya duwa kiden ta tatakday la na tolay,’ kunna,
A bakkan kid na mantu ta duwa na tolay, te tatakday kid na. 9A madi mantu am paggungayan tam ya pinagdagga na Namaratu,” kunna tekid.
10A ta datang nig Hesus ikid na ituldu na kiden ta bali a pabida da ha tentu ya kasasaad na makigungay ta atawa na. 11A ya uhohug na tekid a
“Am makigungay ya lalaki ta atawa na otturu mangatawa ha ta takwan a mekwenta hala ta mangadallaw. 12A am makigungay hapa ya babbay ta atawa na otturu makiatawa ta takwan a mekwenta hapa yen ta makikadallaw,” kunna.
Ya Pagbendisyon Ni Hesus Ta Abbing
(Mt 19:13-15; Lk 18:15-17)
13A sangaw itta ya mangiange ta anak da kiden te Hesus petta ipotun na ya kamat na tekid, ammi nehuya na kid na ituldu na kiden. 14Ammi te Hesus a nagporayan na hapa ya ituldu na kiden.
“Awemuy la gamman ya anak kiden, petta e kid la teyak, te ya ngamin kiden makigitta ta abbing a yen kid ya iturayan na Namaratu ewan,” kunna.
15“A kakurugan hapa ya uhohug ku tekamuy ta am awemuy ikatalak ya pagtaron na Namaratu ta kuman na abbing a awemuy sangaw mesipat tentu,” kunna,
16otturu sina-bil na ya tagtakday abbing, a pinasinapan na kid ta nepangipotun na ta kamat na tekid.
Ya Ituldu Ni Hesus Ta Naba-nang
(Mt 19:16-30; Lk 18:18-30)
17A tentu en nagganwat nga ange ha magpasyar ta takwan na lugar a itta ya nagbilag nga ange namalentud ta atubang na en petta nakimemallak tentu.
“Ay, Mistro, kakurugan ta mappya ka na tolay, a ibar mu haen teyak am anu mina ya tarabakuk nga mappya petta itta sangaw ya angat ku nga magnayun,” kunna.
18A ya tabbag ni Hesus tentu a
“Annum hud ibar ta mappya yak na tolay? Itta hud ya mappya am bakkan la ta Namaratu ewan,” kunna.
19“Ammi am ikayat mu maatadan ta magnayun na angat a amum haman ya lintig na kiden ta awem mamapasi, ikid na awem mangadallaw, ikid na awem magtakaw, a awem hapa magladdud, ikid na awem magdarogas, a dayawam hapa ig damam ikid ni hinam,” kunna ha.
20“Ay, kanayun kurugan ku yen kid na lintig abat ta kaabbing ku,” kunna hapa.
21A inaita la ni Hesus ta pangidduk na tentu, kapye na kinabida ta;
“Itta para la ya takday pagkurangam,” kunna, “te em mina ilaku ya ngamin kiden kwam, a mangatad ka ta pobre kiden petta itta sangaw ya pagba-nangam nga mauknud ta agyan na Namaratu. A am mabalin kan a magtoli ka sangaw petta dumagdag kan teyak,” kunna.
22A ta pakadangag na lalaki en ta inuhohug ni Hesus tentu a nagsugyab ya mukat na, a nagtugut hapa nagdamdam, te pake addu ya kwa na. 23A sangaw nagliplipay i Hesus kapye na ha naguhohug ta ituldu na kiden:
“Kuga mazigat ya isassarok na maba-nang ta pangikerutan na Namaratu,” kunna.
24A nepagpaka-lat da hapa ya inuhohug na, ammi pinidwa na ha tekid;
“Anak ku, kakurugan ta mazigat ya isassarok na tolay ta pangikerutan na Namaratu, 25te malmalogon ya isassarok na anwang ta hubu na dagum ammi ta isassarok na maba-nang ta pangikerutan na Namaratu,” kunna tekid.
26A pake nepagpaka-lat da ha ya inuhohug na;
“A am gagangay ta kunna ten, Afu, a itta hud para ya mekerutan?” kunda.
27A nangita bit tekid kapye na tumabbag.
“Awan pulus ta mabalin na tolay petta mekerutan mina, ammi itta ya mabalin na Namaratu, te intu ya makapangwa ta ngamin,” kunna.
28A ya uhohug ni Pedru tentu,
“A itan na kamin, Afu, te sa newasa min ya ngamin kwa mi petta dumagdag kami teko,” kunna.
29,30A ya tabbag hapa ni Hesus a
“Kakurugan ya uhohug ku tekamuy ta maski am inya ya mangiwagak ta bali na, ikid na kabagis na, ikid na dakal na kiden, ikid na lutak na, ikid na anak na, gafu ta pakesipat na teyak ikid na pangipadangag na ta damag ku a maatadan hala sangaw yen ta minagmagatut ta katolay na sin ta kuman na natugutan na kiden, ammi medagga hapa sangaw ya mangitapang tentu. A sangaw ta ketta na pangipa-na na a maatadan hapa ta magnayun na angat. 31Ammi ya kadwan kiden nga mapa-polu ta ayanin a mapozan kid sangaw, a ya kadwan kiden nga mapozan ta ayanin a mapolu kid sangaw,” kunna tekid.
Ya Ange Nig Hesus Ta Ili Na Herusalem
(Mt 20:17-28; Lk 18:31-34)
32A ta nekabalin na en a magtugtugut kid na ange ta ili na Herusalem, a malalang ya mafulu duwa kiden te Hesus gafu ta maaggut imunnan tekid ta dalan, yaga medyo magtalaw hapa ya kadwan kiden tolay nga dumagdag tekid. A pinaabikan ni Hesus ya mafulu duwa kiden tentu petta bidan na tekid ya makkwa sangaw tentu.
33“Dangagan muy ya ibar ku tekamuy, te magdulot kitanan ta ili na Herusalem, a yen sangaw ya panggafutan da ta Tolayin taga Langit, petta idarum dak ta padi kiden ikid na mangituldu kiden ta lintigen, a sa ikayat da sangaw ta masiyak. 34A am negawat dak na ta Hentil kiden nga mangibbal tekitam a amāmatan dak hapa, yaga paligatan dak kapye dak sangaw pagappan ta krus. Ammi matolayak hala sangaw ta mekatallu na araw,” kunna.
35A pake himebing tentu ig Santiago ikid ni Hwan nga anak ni Zibadeyu, a
“Mistro, itta haen ya adangan mi teko,” kunda.
36“A anu hud ya ikayat muy?” kunna hapa.
37“A te ikayat mi ta makipagtogkok kami sangaw ta hebing mu am makatogkok kan sangaw ta pagariyam ta lutakin,” kunda.
38“Ahu, awemuy de amu ya zigat na adangan muy. Makkwa muy hud sangaw ya magattam ta kagitta na neatad na Namaratu teyak ta zigat kin?” kunna.
39“A on ay, makkwa mi,” kunda hapa.
40“A kakurugan ta paruban muy sangaw ya kagitta na zigat kin, ammi maski kunna ten a bakkan hala ta iyak ya magpili ta magyan ta hebing ku, te i Damakewan ya makkamu magpili,” kunna tekid.
41A ta pakadangag na kadwan kiden ta inadang na duwa kiden te Hesus a nalussaw kid hapa tekid, 42ammi sa pinaabikan na kid ni Hesus a tinabarangan na kid.
“Amu muy ya gagangay na Hentil kiden ta ikwenta da ya iturayan da kiden ta kuman na tagabu da, 43ammi awemuy mina makigitta ta isina kid, te ya mayat madayawan tekamuy a maguray mina makitagabu ta kahulun na kiden. 44A ya mayat metun ta mayor na ngamin a maguray hapa makitagabu tekid. 45Te maski ya Tolayin taga Langit a bakkan ta yen ya umeyan ku ta isin petta makitagabu ya tolay kiden teyak, awa iyak ya magserbi tekid, a isagapil ku hapa ya angat ku tekid petta masaka na kid,” kunna tekid.
Ya Pagpamappya Ni Hesus Te Bartimeyo
(Mt 20:29-34; Lk 18:35-43)
46A tekiden nagtalib ta ili na Heriku a dumadagdag hapa tekid ya pake addu na tolay. A itta hapa ya nagdaram nga imatuttud ta pingit na kalsada en; Bartimeyo ya ngagan na nga anak ni Timeyo. 47A ta pakadangag na ta magtalib na i Hesus taga Nasaret a nagayayag na,
“Ay, Hesus, Simsima ni mina Dabid, ikallak nak haen, Afu,” pakakin.
48Ammi nehuya na kadwan kiden tolay petta awena magsitang, ammi nepasikan na para ya iayag na,
“Ay, Simsima ni mina Dabid, ikallak nak haen, Afu,” kunna.
49A nagtayuk hapa i Hesus a
“Baran muy, petta ange hala sin,” kunna.
A binaran da.
“Awem la magburung, a imivwat kan, te paayagan na ka,” kunda tentu.
50A alistu timollok nangiwasa ta salnuk na en, a umange te Hesus.
51“A anu hapa ya pakkwam teyak?” kun ni Hesus tentu.
“Ay Afu, ipaitak ya awekin pakaita,” kunna hapa.
52A ya uhohug ni Hesus tentu a
“Magdulot kan la ta eyam, te nagmappya kan gafu ta pangikatalak mu teyak,” kunna,
a yen hapa ya nepakaita na, a dumagdag na hapa teg Hesus ta dalan.
Currently Selected:
Markus 10: agt
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
