Matiu 19
19
Gong taio i kutus a nolin
(Mk 10:1-12)
1Ra o Iesu i sa watung rop tar a kum wasiso ri, i wan tagitong o Galili, utong una papor Judia, un ara papor danim Jodan. 2Ma a labino kunur na taro det muri, ma i ulangolango pas a kum misait tiro iai. 3A ramano kum Parisi det wan toromi sur det in lari. Det tingi lena, “I tokodos ut elar nam anundat a Warkurai sur a musano in lakro ru anun a ino un tu utna oros kut, o awu?” 4#Stat 5:2I balu det lena, “Pepetlai, ka mot luki utmakai a wasiso una Buk Tabu? I watungi lenri: Una turturkibin a ukukis, a Tene Ukukis ‘i ukis a taro, sur det in musano ma det in ino,’ Stat 1:27
5 #
Ep 5:31
ma i watungi lena, ‘Iri a kibino ra a musano in nan gusun o tamano ma o nano, ma in kis tomo nam anun a ino, sur der in takai mukut.’ Stat 2:24
6Ra awu mo sur der aru, der takai mukut. I mo ra asau ra o God i sa kubus tomo tari, gong melet mo taio i kutusi.”
7 #
Lo 24:1-4; Mt 5:31 Det ting meleti lena, “Ilai sur o Moses i pitar a warkurai sur a musano in pitar a dono buk na kutus nolin torom anun a ino, sur din palos ru a kinkinis na nolin?” 8I balu det lena, “O Moses i mulaot ru mot sur mot in lakro ru anumot a kum wardain, uni a balamot i dekdek doko. Ikut una turturkibin a ukukis awu sur i lenra. 9#Mt 5:32; 1 Kor 7:10-11A watungi tamot, osi ra in lu ru anun a ino ra ke pam tu sakino tomo nam tu musano gisen, ma a musano ra i nolin melet nam tu ino, a musano ra i pam a sakino.”
10Ra anun a kum nat na ususer det watungi tano lena, “Ra i lenra, i wakak sur gong di nolin.” 11I balu det lena, “Awu sur a taro rop ka det in nolin. Det kut ra o God i sa pitar tar a dekdek tandet. 12Iri a kum kibino ra lako taro ka det in nolin: Ara taro di usus det lenutra. Ara taro, a taro det ban laulau det, ma ara taro kai, ka det nolin uni det balon una pinapam una matanitu tagisapat una langit. Osi ra in pet lar pasi, in mur a wasiso ri.”
O Iesu i ubek aru lamano netes una kum nat liklik
(Mk 10:13-16; Lk 18:15-17)
13Di ben a kum nat liklik torom o Iesu sur in ubek aru lamano sapat netes un det ma in wararing un det. Ikut a kum nat na ususer det turbat det. 14#Mt 18:2-3O Iesu i watungi lena, “Mot in madek ru a kum nat liklik sur det in nan torom iau. Gong mot turbat det, uni a matanitu tagisapat una langit anundet ra det lenri.” 15Ra i ubek tar aru lamano netes un det, numur i wan tagitiro.
A tene gongon na barman
(Mk 10:17-31; Lk 18:18-30)
16Ara barman i wan torom o Iesu, ra i tingi lena, “Tene Ususer, osi na wakak na utna ra an pami sur an rakon a nilaun tukum?” 17#Wkp 18:5; Lk 10:28O Iesu i balu i lena, “Sur asau ra u ting iau un asau ra i wakak? Ara sot kut i wakak. Ra u nemi sur un ruk una nilaun tukum, un mur a kum Warkurai.” 18#Lo 5:16-20Ra i tingi lena, “Osi na kum Warkurai?” O Iesu i balu i lena, “‘Gong u um doko taio, gong u pam a sakino nam tu ino anun taio o nam tu musano anun taio, gong u wolong, gong u etakun torotoro, 19un ru o tamam ma o nam,’ Kis 20:12-16
ma ‘un nem o pasam elar nami ra u nem ui ut.’” Wkp 19:18
20A barman ra i watungi tano lena, “A kum Warkurai rop ri a sa mur sot pasi. Asau melet mo an pami?” 21O Iesu i balu i lena, “Ra u nemi sur un tokodos mulus, un nan ma un siuru ru anum a kum ululeng rop, ra a mani taguni, un tabor a kum sibo na taro nami. Ra un pami lenra, anum a wakak na ululeng kusapat una langit. Numur un nan urin ma un mur iau.” 22Ra a barman i longoro a wasiso ri, i wan ma ikut ke gasgas, uni i labo doko anun a ululeng.
23Ra o Iesu i watungi tan anun a kum nat na ususer lena, “A inanos mot nama lingmulus, i ngangitin doko torom a tene gongon sur in ruk una matanitu tagisapat una langit. 24A watungi kai tamot lena, in ngangitin sur a kamel in ruk una mato na sur na susuk, ikut, i ngangitin doko ut sur a tene gongon in ruk una matanitu anun o God.” 25Ra anun a kum nat na ususer det longoro i, det kisin doko ma det watungi lena, “Ra i lenra, osi mo ra din ulauni?” 26#Jop 42:2O Iesu i tamtama torom det ra i watungi lena, “A taro ka det in pet lar pasi, ikut o God sot kut in pet lar pas a kum utna rop.”
27O Pita i balu i lena, “Tama i, met sa wan gusun anumet a kum utna rop, ra met mur ui. Asau ra met in rakoni numur?” 28#Mt 25:31; Lk 22:30; Tam 3:21O Iesu i watungi tandet lena, “A Nutun a Musano in kis na king una nun a kiskis na minamar ra din umatok a kum utna rop. A inanos mot nama lingmulus, una du bung ra, mot ra mot sa mur iau, mot in kis una noino ma aru kiskis na king, ma mot in warkurai sur a noino ma aru kabotaro Israel. 29Ma det rop taktakai ra det sa wan gusun anundet a kum rumu, o gusun a kum tistisin det a kum musano ma a kum ino, o gusun a kum tamtaman det, o a kum nanan det, o a kum nutnutun det, o gusun anundet a kum piso, uni det mur iau, din pitar a marmar na utna lenri tandet, ma det in rakoni kai a nilaun tukum. 30#Mt 20:16; Lk 13:30Ikut a susut ra det mugu uniri, numur det in mur, ma det ra det mur uniri, numur det in mugu.”
Currently Selected:
Matiu 19: kqw
Highlight
Share
Copy
Want to have your highlights saved across all your devices? Sign up or sign in
© 2019 Wycliffe Bible Translators, Inc. All rights reserved.
