Matiu 20
20
A wasiso elelar una kum tene pinapam una kinobot na wain
1“A matanitu tagisapat una langit i elar nama taman a kinobot na wain, i pirso una kobot raut sur in iting sur lako kum tene pinapam sur det in papam una nun a kinobot na wain. 2Det kubus wasiso tomo pas nama kum tene pinapam sur det in los a ikul tagun ara bung na pinapam, ra i tulu det sur anun a kinobot na wain. 3Una lisu na pakano bung, i wan melet ra i tama pas ara taro bulung det tur ororos kut una nubual na inawan tomo. 4Ra i watungi tandet lena, ‘Mot kai, mot in nan, ma mot in papam una nung a kinobot na wain, ma an tokom mot nama sau ra i tokodos.’ 5Ra det wan.
“Una labino suan i wan ra i iting melet sur lako kum tene pinapam, ma una tulu pakano bung una lirop i wan melet sur lako taro. 6Una limo na pakano bung una lirop i wan melet, ma i tama pas ara taro bulung det tur ororos kut. Ra i watungi tandet lena, ‘Ilai ra mot tur ororos kut nin, a kudulano bung rop ri?’ 7Det balu i lena, ‘Katutaio i ben met sur tu pinapam.’ I watungi tandet lena, ‘Mot kai mot in nan ma mot in papam una nung a kinobot na wain.’
8 #
Wkp 19:13; Lo 24:15 “Ra i sa lirop matano mirum, a taman a kinobot na wain, i watungi tan a mugumugu tagun anun a kum tene pinapam lena, ‘Kabo pas a kum tene pinapam urin, ma un tokom det. Det ra det wanpat murmur sakit un tokom mugu det. Numur un tokom imurmur a kum tene pinapam tuk un det ra det mugu pat.’ 9A kum tene pinapam ra di ben pas det una limo na pakano bung det wanpat, ra di tokom det taktakai nama ikul tagun ara bung na pinapam. 10Det ra di ben mugu pas det, det wanpat. Det nuki lena det in los a labino ikul. Ikut, awu! Det kai di tokom det taktakai nama ikul tagun ara bung na pinapam kut. 11Ra det sa lolos pas, det ururai torom a taman a kinobot na wain, 12det watungi lena, ‘Det ri ka det papam suano i, ma met, met pam a dekdek na pinapam ma a suan i rang met, ikut u tokom det utkai elar nam met.’ 13Ra i balu ara tandet lena, ‘Pasang, awu sur a ban laulau ui. Pepetlai, ka dar kubus pas a wasiso sur a ikul tagun ara bung na pinapam? 14Los pas anum a mani, ma un nan. Iau ut a nemi sur an tokom det ra det wanpat murmur elar nam ui ra u mugu. 15Pepetlai, ke sot sur an pam asau ra a nemi nam anung a mani? Pepetlai, u nuknuk laulau un iau, uni a maris a taro ri?’ 16#Mt 19:30; Mk 10:31; Lk 13:30I lenri, det ra det mur uniri, numur det in mugu, ma det ra det mugu uniri, numur det in mur.”
O Iesu i mantulu wasiso una nun a minat
(Mk 10:32-34; Lk 18:31-34)
17 #
Mt 16:21; 17:22-23 Ra o Iesu i wan nanan usapat o Jerusalem, i ben gisen pas anun a noino ma aru nat na ususer, ma i watungi tandet lena, 18“Tama i, iri dat wan nanan usapat o Jerusalem. Din pitar a Nutun a Musano torom a kum lamlabino tene etabor torom o God ma a kum tene ususer tagun a Warkurai. Det in warkurai i sur in iru, 19ma det in pitar tari torom det, ra awu sur a taro Juda sur det in urongon laulau uni, det in mirasi, ma det in sak wati unin nanai kutus. Ra a tulu bung in rop in katutur melet.”
O nan o Jon ma o Jems i saring o Iesu
(Mk 10:35-45)
20Numur o nan aru nutnutun o Sebedi i wan torom o Iesu nam aru nutnutunu. I kis butkeke umatano ma i saringi sur in mur anun a nemnem. 21#Mt 19:28; Lk 22:30Ma o Iesu i tingi lena, “Asau ra u nemi?” Ra i balu i lena, “Un mulaot sur aru nutnutung ri, der in kis tomo nam ui una num a matanitu, ara una sot na lamam, ma ara pasander kai una kair, ma motul in warkurai tomo.” 22#Mt 26:39; Jn 18:11O Iesu i balu i lena, “Ka motul tasman asau ra motul sasaring suri. Pepetlai, in topasi sur mur kai mur in inum tagun a kap na mamaut ra an inum taguni?” Der balu i lena, “Mir in pet lar pasi kut.” 23I watungi tander lena, “A lingmulus ut, a kap na mamaut ra an inum taguni, mur kai mur in inum taguni. Ikut a kinkinis una sot na lamang ma una kair, awu sur iau, a warkurai sur an pitari. O Tita in pitari torom det ra i sa waninar tari sur det.”
24A noino nat na ususer det longoro i, ra det kankan torom dersino. 25#Lk 22:25-26Ra o Iesu i kabo tomo pas det, ra i watungi lena, “Mot tasmani lena a kum tene warkurai anun a taro ra awu sur a taro Juda, det kuro laulau a taro. Ma anundet a kum mugumugu kai det pitar a kum dekdek na warkurai torom anundet a taro. 26#Mt 23:11; Mk 9:35Ikut torom mot ken lenra. Osi ra i nemi sur in labo taun mot, in unatino pasi ut sur in tultul anumot. 27Ma osi ra i nemi sur in mugumugu anumot, in papam oros kut torom mot ma ka din kuli. 28#Lk 22:27; Pil 2:7Lenkutkai ra a Nutun a Musano ke wanpat sur din papam toromi. I wanpat sur i ut in papam torom a taro, ma in pitar tar anun a nilaun, a ikul, sur in kul langolango pas a susut na taro.”
O Iesu i utamtama pas aru pulu
(Mk 10:46-52; Lk 18:35-43)
29Ra o Iesu ma anun a kum nat na ususer det wan tagitong o Jeriko, a labino kunur na taro det mur det. 30Aru musano aru pulu der kis taru una papor ina kisapi. Ra der longoro i lena o Iesu i wan nanan milau, der kakabo sapat lena, “Labino, a Nutun o Dewid, un maris mir.” 31Ma a kunur na taro det turbat der sur der in kis wowowon. Ikut der kakabo dekdek makai usapat lena, “Labino, a Nutun o Dewid, un maris mir.” 32O Iesu i tur sikot, ra i kabo pas der, ma i ting der lena, “Asau ra mur nemi sur an pami un mur?” 33Der balu i lena, “Labino, mir nemi sur mir in tamtama.” 34O Iesu i maris doko der, ra i pam arin matander. Uniutra der tamtama, ma der muri.
Currently Selected:
Matiu 20: kqw
Highlight
Share
Copy
Want to have your highlights saved across all your devices? Sign up or sign in
© 2019 Wycliffe Bible Translators, Inc. All rights reserved.
