Mak 4

O Iesu i wasiso elelar una wat na ngas na piso

(Mt 13:1-9; Lk 8:4-8)

1 # Mk 3:7-9; Lk 5:1-3 Numur o Iesu i tur melet pas a etowo tiro una usalin ina du tasi Galili. A labino kunur na taro det tur talilis pasi. Ra i kas una pot ra i kis taru uni sa utasi, ma a taro rop det tur nago korot una usalin. 2#Mt 13:34; Mk 4:33-34I ususer det una susut na utna nama kum wasiso elelar. I ususer det lena, 3“Mot longoro i! A tene minarut i wan sur in sapro a kum pitino wit. 4Ra i sapro nanan a kum pitino wit, a ramano det puku una kisapi, ra a kum piko det ro pat ma det wan ru i. 5A ramano kai det puku una nubual na watat, ra kalako susut na piso uni. Det lubung pat lakit, uni a piso ke but. 6Ikut ra a suan i sisio pat, i rang det ra det main ma det marang rop, uni kalako wakakorin det. 7A ramano kum pitino wit det puku epotor una kum kuikui, ra a kum kuikui det lubung ma det rau bat pas det. Ra ka det wu lako windet. 8Ikut a ramano kum pitino kai, det puku una wakak na piso. Det lubung pat, det labo ra det wu. A ramano det wu a tulu noino, a ramano kai a wonom na noino, ma a ramano ara mar na windet.” 9Ra o Iesu i len tandet lena, “Osi ra arin talngano kura, i wakak sur in longoro nami.”

O Iesu i ususer nama wasiso elelar

(Mt 13:10-17; Lk 8:9-10)

10O Iesu mukut kura i kis taru, ra a noino ma aru nat na ususer ma ara taro kai det tingi una kum wasiso elelar. 11Ra i inanos det lena, “O God i utalapor a wasiso na pidik una nun a matanitu torom mot. Ikut torom det a taro gisen, a ususer det una ututna rop nama kum wasiso elelar, 12#Ap 28:26-27sur,

‘det in tamtama ma det in tamtama, ikut ka det in tama lele i,

ma det in longoro ma det in longoro, ikut ka det in tasmani.

Ra gunuk det in tasman lele i,

sako det in tupukus torom o God ma in unus ru anundet a kum sakino.’” Ais 6:9-10

O Iesu i utalapor a kukurai ina wasiso elelar una wat na ngas na piso

(Mt 13:18-23; Lk 8:11-15)

13O Iesu i inanos det lena, “Pepetlai, ka mot talapor una wasiso elelar ri? Mot in talapor lai un tu wasiso elelar kai? 14A tene minarut i elar nam ara musano ra i ususer det nama wasiso anun o God. 15A kum pitino wit ra det puku una kisapi, det elar nama taro ra det longoro a wasiso anun o God, ra uniutra o Satan i wanpat ma i rakon ru a wasiso. 16A kum pitino ra det puku una nubual na watat det elar nama taro ra det longoro a wasiso anun o God, ra uniutra det pam ukai i nama gasgas. 17Ikut a wasiso anun o God ke kis ubalandet, ra ka det in tur suano i, elar nama wit ra kalako wakakorin det. Det turpasi det wakak, ikut det in puku lakit una du bung ra a kum mamaut in nanpat, ma din ban laulau det, uni det nurnur una wasiso anun o God. 18#Mt 19:23-24A kum pitino ra det puku epotor una kum kuikui, det elar nama taro ra det longoro a wasiso, 19ikut a labino nuknuk sur a wakak na kinkinis nin upiso, ma a kum usobor tagun a kum ululeng taginin una rakrakon bual, ma a nemnem kai sur a ramano kum utna, i rau bat a wasiso anun o God, ra ka det wu lako windet. 20Ikut a ramano taro det elar nama kum pitino, ra det lubung sapat una wakak na piso. Det longoro a wasiso ma det muri, ra det wu. A ramano det wu a tulu noino, a ramano a wonom na noino, ma a ramano ara mar na windet.”

A wasiso elelar una lam

(Lk 8:16-18)

21 # Mt 5:15; Lk 11:33 O Iesu i watungi tandet lena, “Katutaio in los pas tu lam ma in wop bat tari nama paket, o in ubek tari kai nago utuntudu ina kabulu. Awu! Din ubek tari ut netes una nun a turtur. 22#Mt 10:26; Lk 12:2A kum utna rop ra i kis eno, numur in nanpat puaso. Ma a kum utna rop ra kura i parau, numur in kis talapor, ma din tasmani. 23Osi ra arin talngano kura, i wakak sur in longoro nami.”

24 # Mt 7:2 O Iesu i wasiso liklik utmakai ra i lena, “Mot nuknuk wakak un asau ra mot longoro i. Ra mot in longoro wakak, o God in pitar a labino tastasman torom mot. Mot in utur ukai a tastasman ra i labo sakit. 25#Mt 13:12; 25:29; Lk 19:26Osi ra i longoro anung a kum etowo, o God in pitar a labino tastasman toromi. Ikut osi ra ke longoro, din rakon ru i utkai asau lik ra kura i pam ukai i.”

A wasiso elelar una kum wino wit ra i lubung

26O Iesu i watungi kai lena, “A matanitu anun o God i elar nam ara musano ra i sapro a kum wino wit una piso. 27I ser inep una mirum ma una waspi i ser tuangun ma i papam, ra a kum wino wit det lubung pat ma det labo, ikut a musano ke tasmani ra det lubung pepetlai. 28A piso ut i ser ulubung a kum wit lenri: Numugu in ubek in gomono, numur in nanai ino in labo tito, ra numur in ubek in gilino tomo nama wino. 29#Jol 3:13; Tam 14:15Ra a kum wino det sa taka, a musano ra, in nan tomo nam anun in totok, ma in pirat pas det, uni a kalang sur din pasong a wit i sa sot.”

A wasiso elelar unin pitino mastad

(Mt 13:31-32, 34; Lk 13:18-19)

30O Iesu i watungi lena, “A matanitu anun o God i elar nama sau? Ma asi na wasiso elelar ra an utalapori nami? 31I elar namin pitino mastad. I natino taun a kum pitino duwai rop, ra di maruti una piso. 32Ikut ra di sa marut tari, ma i lubung, i labo taun a kum duwai na inangon rop. I ubek a kum lamlabino kanokano, ma a kum piko det ser pam pios una kum kanokano ra kura una kabosoro ino.”

33O Iesu i ususer det nama susut na wasiso elelar kai, ra i elar nam anundet a tastasman. 34Ke wasiso torom det nam tu se wasiso, a wasiso elelar rop kut. Ikut, ra i mukut tomo nam anun a kum nat na ususer det kis, i utalapori maragom a kukurai ina kum wasiso elelar.

O Iesu i turbat a wuwu ma a top

(Mt 8:23-27; Lk 8:22-25)

35Una bung na lirop ut ra, o Iesu i inanos anun a kum nat na ususer lena, “Dat nan utong una ara papor tasi.” 36A kum nat na ususer det kas utiro una pot ra o Iesu kura uni, ra det wan gusun a kunur na taro. A ramano kum pot utkai det wan tomo nam det. 37A dekdek na wuwu doko i ragoti, ma a top i tapak sapat netes una pot, ra i milau sur in bukus nama tasi. 38O Iesu i inep dumun nago numur una pot, ma i ulalong taru una pilo. A kum nat na ususer det wangun pasi ma det inanosi lena, “Tene Ususer, dat na iru! Ko nuk pas met mo?” 39I katutur, i turbat a wuwu ma i turbat a top lena, “Mana, un mililo.” Ra a wuwu i rop ma i mililo mut. 40Numur i watungi torom a kum nat na ususer lena, “Sur asau ra mot ngara? Awai kuti anumot a nurnur?” 41Det ngara doko ma det ting etetalai det lena, “Osi na ngas na musano mulus ri? A wuwu ma a top der mur anun a wasiso!”

Currently Selected:

Mak 4: kqw

Highlight

Copy