ኢሳይያስ 43
43
የእስራኤል ብቸኛ አዳኝ
1አሁን ግን፣ ያዕቆብ ሆይ የፈጠረህ፣
እስራኤል ሆይ! የሠራህ፣
እግዚአብሔር እንዲህ ይላል፤
“ተቤዥቼሃለሁና አትፍራ፤
በስምህ ጠርቼሃለሁ፤ አንተ የእኔ ነህ፤
2በውሃ ውስጥ በምታልፍበት ጊዜ፣
ከአንተ ጋራ እሆናለሁ፤
ወንዙን ስትሻገረው፣
አያሰጥምህም፤
በእሳት ውስጥ ስትሄድ፣
አያቃጥልህም፤
ነበልባሉም አይፈጅህም።
3እኔ እግዚአብሔር አምላክህ፣
የእስራኤልም ቅዱስ መድኀኒትህ ነኝና፤
ግብጽን ለአንተ ቤዛ እንድትሆን፣
ኢትዮጵያንና#43፥3 የላይኛውን የአባይ ወንዝ አካባቢን የሚያመላክት ነው። ሳባን በአንተ ፈንታ እሰጣለሁ።
4ለዐይኔ ብርቅና ክቡርም ስለ ሆንህ፣
እኔም ስለምወድድህ፣
ሰዎችን በአንተ ምትክ፣
ሕዝቦችንም በሕይወትህ ፈንታ እሰጣለሁ።
5ከአንተ ጋራ ነኝና አትፍራ፤
ልጆችህን ከምሥራቅ አመጣለሁ፤
ከምዕራብም እሰበስብሃለሁ።
6ሰሜንን፣ ‘አምጣ!’
ደቡብንም፣ ‘ልቀቅ’ እላለሁ፤
ወንዶች ልጆቼን ከሩቅ፣
ሴቶች ልጆቼንም ከምድር ዳርቻ፣
7በስሜ የተጠራውን ሁሉ፣
ለክብሬ የፈጠርሁትን፣
ያበጀሁትንና የሠራሁትን አምጡ።”
8ዐይን እያላቸው የታወሩትን፣
ጆሮ እያላቸው የደነቈሩትን አውጣ።
9ሕዝብ ሁሉ በአንድነት ይሰብሰብ፤
ሰውም ይከማች፤
ከእነርሱ አስቀድሞ ይህን የነገረን፣
የቀድሞውን ነገር ያወጀልን ማን ነው?
ሌሎችን ሰምተው፣ “እውነት ነው” እንዲሉ፣
ትክክለኝነታቸውም እንዲረጋገጥ ምስክሮቻቸውን ያቅርቡ።
10“ታውቁና ታምኑብኝ ዘንድ፣
እርሱ እኔ እንደ ሆንሁ ትረዱ ዘንድ፣
እናንተ ምስክሮቼ፣
የመረጥሁትም ባሪያዬ ናችሁ” ይላል እግዚአብሔር።
“ከእኔ በፊት አምላክ አልተሠራም፤
ከእኔም በኋላ አይኖርም።
11እኔ፣ እኔ እግዚአብሔር ነኝ፤
ከእኔም ሌላ የሚያድን የለም።
12ገልጫለሁ፤ አድኛለሁ፤ ተናግሬአለሁ፤
በመካከላችሁ እኔ እንጂ ባዕድ አምላክ አልነበረም።
እኔ አምላክ እንደ ሆንሁ፣ እናንተ ምስክሮቼ ናችሁ” ይላል እግዚአብሔር፤
13“ከጥንት ጀምሮ እኔው ነኝ፤
ከእጄም ማውጣት የሚችል የለም፤
እኔ የምሠራውን ማን ማገድ ይችላል?”
የእግዚአብሔር ምሕረትና የእስራኤል አለመታመን
14የእስራኤል ቅዱስ፣
የሚቤዣችሁ እግዚአብሔር እንዲህ ይላል፤
“ስለ እናንተ በባቢሎን#43፥14 ወይም፣ ከለዳውያን ማለት ነው። ላይ ሰራዊት እሰድዳለሁ፤
በሚመኩባቸውም መርከቦች፣
ባቢሎናውያንን ሁሉ እንደ ኰብላይ አመጣለሁ።
15እኔ እግዚአብሔር፣ የእናንተ ቅዱስ፣
የእስራኤል ፈጣሪ፣ ንጉሣችሁ ነኝ።”
16በባሕር ውስጥ መንገድ፣
በማዕበል ውስጥ መተላለፊያ ያበጀ፣
እግዚአብሔር እንዲህ ይላል፤
17እንደ ገና ላይነሡ እዚያው እንዲተኙ፣
እንደ ጧፍ ኵስታሪ ረግፈው እንዲጠፉ፣
ሠረገሎችንና ፈረሶችን፣
ሰራዊቱንና ደጀኑን በአንድነት ያወጣ እንዲህ ይላል፤
18“የቀደመውን ነገር አታስቡ፤
ያለፈውን እርሱ።
19እነሆ፤ አዲስ ነገር አደርጋለሁ!
እርሱም አሁን ይበቅላል፤ አታስተውሉትምን?
በምድረ በዳም መንገድ አዘጋጃለሁ፤
በበረሓም ምንጭ አፈልቃለሁ፤
20የምድረ በዳ አራዊት፣
ቀበሮና ጕጕት ያከብሩኛል፤
በምድረ በዳ ውሃ፣
በበረሓም ምንጭ እሰጣለሁና።
ለመረጥሁት ሕዝቤ ውሃ እሰጣለሁ፤
21ለራሴ ያበጀሁት ሕዝብ
ምስጋናዬን ያውጅ ዘንድ ይህን አደርጋለሁ።
22“ያዕቆብ ሆይ፤ አንተ ግን አልጠራኸኝም፤
እስራኤል ሆይ፤ የእኔ ነገር ታክቶሃል።
23ለሚቃጠል መሥዋዕት በጎች አላመጣህልኝም፤
በመሥዋዕትህም አላከበርኸኝም።
በእህል ቍርባን እንድታገለግለኝ አላስቸገርሁህም፤
በዕጣን መሥዋዕትም አላሰለቸሁህም።
24መልካም መዐዛ ያለው ከሙን አልገዛህልኝም፤
በመሥዋዕትህ ሥብ አላጠገብኸኝም፤
ነገር ግን በኀጢአትህ አስቸገርኸኝ፤
በበደልህም አደከምኸኝ።
25“ስለ ራሴ ስል መተላለፍህን የምደመስስልህ፣
እኔ፣ እኔው ነኝ፤
ኀጢአትህን አላስባትም።
26እስኪ ያለፈውን አስታውሰኝ፤
ተቀራርበን እንከራከርበት፤
ትክክለኛ ስለ መሆንህም አስረዳ።
27የመጀመሪያው አባትህ ኀጢአት ሠርቷል፤
መምህሮችህም ዐምፀውብኛል።
28ስለዚህ የመቅደስህን አለቆች አዋርዳለሁ፤
ያዕቆብን ለጥፋት፣#43፥28 የዕብራይስጡ ቃል አንድን ሰው ወይም ነገር ሙሉ በሙሉ በማጥፋት ለእግዚአብሔር መስጠትን ያመለክታል።
እስራኤልን ለስድብ እዳርጋለሁ።
Currently Selected:
ኢሳይያስ 43: NASV
Highlight
Share
Copy
Want to have your highlights saved across all your devices? Sign up or sign in
መጽሐፍ ቅዱስ፣ አዲሱ መደበኛ ትርጕም™
የቅጂ መብት © 2001, 2024 በBiblica, Inc.
በፈቃድ የሚወሰድ። በዓለም ዐቀፍ ባለቤትነቱ።
The Holy Bible, New Amharic Standard Version™
Copyright © 2001, 2024 by Biblica, Inc.
Used with permission. All rights reserved worldwide.
