Luke 2

Iesu Ya Tupua

(Mateu 1:18‐25)

1Ka Ioni yana tuta tevana wayahina, me Rom ai tau veimea ananina ana wava SisaV Augusitusi. Ka tauna ya veimea boui, e meagai aitamoata aitamoata a tomotau ai wava iginumi, e ina‑iaiavi. Iuna sisa‑nana ya nuanua ya pai veimea Rom a tomotau ai yau n'‑anamanei, ka kadu ya nuanua yoko‑naia aitamoata aitamoata yai takesiV ivituei tunuhina deina. 2(Iaiava taina vivane iaiava naona tutana Kuiriniusi papani Siria veimeyei.) 3Wayahina, tomotau habuhabui nau‑wawani imavimavine amamai yai meagai wayahia, e tenoke ai wava iginumi.

4Wayahina, Iosepa meagai Nasareta papani Galili nihenina ni‑tawanei, ka omo meagai Betelehem wayahina papani Iudea nihenina. Tauna nau‑wawani dewei deina, iuna meagai Betelehem Davida ya meagai, ka Iosepa yana dede vivane Davida yana dede. 5Ka tauna Mari ainua iomo, e ai wava iginumi, iuna Mari tauna a vi‑awa‑kanakanapi, ka Mari avaha amwanainahe. 6Ka tutana Betelehem nihenina imamaei, avaha a wahava vaniahei vi‑natuna. 7Ka Mari natuna mai‑tupuina vi‑natunei, ka tevanina kwama wayahina umei, ka vahitau yai pai am nihenina boui, iuna tomotau manua bwanibwani inau‑vi‑anai, ka eha kadu aitam pai ma' ta‑mamae wayahi.

SipiV Ai Tau Dune‑vi‑avina

8Ka papani‑nana nihenina atu‑oyaoyana sipiV ai tau dune‑vi‑avina yai sipiV idune‑vivini ioyomana wayahina. 9Ka Kauvea yan' anelose aitam ya vin'‑omana vi‑au‑novoi, ka Kauvea didigana tunu‑mahemahei, e sipiV ai tau dune‑vi‑avina‑naia habuhabui imatamatauta ananina. 10Ka anelose‑nana vonei, ivona,

“Eha umatauta, kate udewa‑haiawa! Iuna vane ahiahina aomanei wayahimia. Ka vane taina tomotau habuhabumi yami pai dewa‑haiawa. 11Ka ioyoma taina Davida ya meagai nihenina, yami Tau Ito‑yavuha avaha tupua, tauna yami Kauvea. 12Ka iaiaya wayahimi taina. Tevanina na iumana kwama wayahina, ka vahitau yai pai am nihenina daudauva. Avi tuta tevanina uvaniahei, udueyei deinake.”

13Ka vo‑kwayavonina anelose habuhabui iomo ka Yaubada iawa‑davedavei, ivonavona,

14“Yaubada wahuma hetana awa‑davedavei!

Ka tau ma' tanopi ahaeyemi,

tauna ya nuanua apa‑vidovidohemi,

ka kadu ami pata nua gomagomanina

uvaniahei tauna wayahina!”#Luk 19:38.

15Ka avaha anelose‑naia imavi‑havine wahuma, sipiV ai tau dune‑vi‑avina‑naia matataui ivonavona, “Kana‑nei Betelehem, e dewa tanoi Kauvea haeyeka kadueyei.”

16Wayahina, ivisina, ine, e Mari ka Iosepa ivaniahai, kadu tevanina vahitau yai pai am nihenina daudauva idueyei. 17Ka avaha tevanina idueyei, ivi‑putu anelose‑nana ya vonana tevanina wayahina imataedai mani tomotau wayahia. 18Ka avi tomotau vaneana inononi, akanai habuhabui nuai vi‑tupatupa sipiV ai tau dune‑vi‑avina‑naia yai vonaia wayahina. 19Ka Mari yai vonaia habuhabuna nua‑vi‑avini, ka nuanua ananina wayahi.#Luk 2:51. 20Ka sipiV ai tau dune‑vi‑avina‑naia ini‑tawanei, imavina yai sipiV wayahia, ka tutana etawana ivenavenau Yaubada iawa‑davedavei. Iuna dewaia idueyei kadu dewaia inononi habuhabui anelose‑nana ya vonana aitamoata. Wayahina, idewa‑haiawa.

21Ka tevanina ya tupua munia, auyewa ai yau 7 iakwa, e wagana idabei, e ivi‑wahani Iesu. Nonova anelose‑nana wavana tomani Mari wayahia tutana eha it'‑amwanainahe.#Luk 1:31.

Simeoni Kauvea Awa‑davedavei

22Ka tuta tupwana munia, aitam auyewa omo, ka Iosepa Mari ainua ai veimea ainua mamaei. Veimea ainua Mosese ya veimea nihenina mamaei. Aitam veimea vonei dewa pai vidoha idewei Mari wayahi. Ka kadu aitam veimea vonei tevanina iam‑veneneyei Kauvea matana. Wayahina, taui tevanina ihuni, ivane Ierusalem wayahina, ka Yaubada iam‑veneneyei Mosese ya veimea veimeyei aitamoata deina.#Lev 12:1-8. 23Ka Kauvea ya veimea taina Iginuma nihenina mamaei, ivona,

“Nau‑wawanimi yaheyahe imai‑tupua

aitamoata aitamoata ubou‑keyei Kauvea wayahina.”#NiT 13:2,12.

24Ka taui ine, e yai pai vi‑nomu Yaubada wayahina ivenei. Iuna Yaubada ya veimea nihenina ivona,

“Yami vi‑nomu vivane bunebune ainua,

o kadi gabu‑tutuna ainua.”#Lev 12:8.

25Ka tuta‑nana wayahina Ierusalem nihenina aitam onoto ana wava Simeoni mamaei. Tauna onoto ahiahina, ka yawaina tunutunuhina, ka tuta habuhabuna wayahina tauna Kauvea vi‑ateteyei. Tauna toha‑vi‑anai, ka me Isiraeli yai Tau Ito‑yavuha potepotei. Ka Nuana Ahihinata omo wayahina, e nau‑vi‑anai. 26Ka tuta nonova Nuana Ahihinata apa‑taputapuei ka avaha nua‑uya si‑vin'‑omanei vivane eha ana pata na‑nusi a itoava tauna Tau Ito‑yavuha Kauvea wayahina na‑dueyei matana wayahina. 27Ka auyewana wayahina Nuana Ahihinata eta‑naoei, na‑omo Manua Vito‑pota a pai ni‑awana wayahina, e inui ka nihenina mamaei. Ka Iesu ayo‑amana tauna iomanei, e veimea ivi‑ateteyei. 28Ka tutana Simeoni dueyei, tevanina epei nimana, e Yaubada nau‑kaiwei kadu awa‑davei, ivona,

29“Kauvea, wamke am heta‑ohota eveimeyeai.

Kaiwa ananina!

Yam vona‑dabadaba nonova wayahiua

ataina avaha avaniahei.

Wayahina, eawaeheu

yau nua gomagomanina nui

an'‑aniga akanai.

30Iuna taina mata‑hoiua

avaha Tau Ito‑yavuha

wayahima adueyei.#Isa 52:10; Luk 3:6; Tit 2:11.

31Nonova yam vi‑nua‑hauhau

tomotau habuhabui ena‑ito‑yavuhi,

ka avaha tauna evi‑tunei adueyei.

32Wayahina, tauna vivane maheta

taui eha me Isiraeli wayahi,

ka kadu tauna yam nuanua

na‑si‑vin'‑omanei in'‑anamanei.

Ka kadu tauna yam tomotau,

itoai me Isiraeli, tauai didigai.”#Isa 42:6; 49:6; 52:10.

33Ka ayo‑amana nuai vi‑tupatupa Simeoni ya vonana wayahina. 34Ka Simeoni taui aitonu nau‑iaiavei. Ka kadu ayona Mari vonei, ivona,

“Yaubada avaha tevana taina

vi‑nua‑dadanei, e apaina

tauna me Isiraeli habuhabui na‑ito‑yavuhi,

kate me Isiraeli habuhabui ivihahaiei, ina‑peu.

Ka munia, tauna aitam iaiaya

Yaubada wayahina,

kate tupwai tomotau iaiayana

in'‑apa‑goyogoyoei.#Isa 8:14; Mat 21:42; 1Pi 2:8.

35Ka taui yai ipupu wayahina

yai nuanua maimaiovina isi‑vin'‑omanei.

Kadu wamike, Mari,

apaina yami nua‑vita nuami na‑tonei

apia manimaninina deina.”

Ana Tevana Iesu Wayahina Ipuipupu

36Ka aitam tau apa‑taputapu vavinena ana wava Ana mamaei. Tauna Panuela natuna kadu yana dede vivane Asera. Ka vavinena avaha vi‑nainai. 37Nonova tavine, ka ponimana ai yau 7 iakwa awana inusi, ka vavinena avaha wadae mamaei a itoava a ponimana ai yau 84 vaniahei wayahina. Ka tuta tuta Manua Vito‑pota nihenina mamaei, eha ta‑ni‑tawane. Auyewa kadu ioyoma wayahia vavinena Yaubada vi‑ateteyei ya viama wayahia, kadu dewa‑didiguna am navovo wayahina. 38Ka babau‑nana wayahina vavine‑nana omo Manua Vito‑pota a pai ni‑awana wayahina, ka avaha tevana vaniahei, Yaubada nau‑kaiwei. Ka me Isiraeli tupwai yai nuanua ananina vivane Ierusalem a Tau Ito‑yavuha na‑omo idueyei, wayahina ipotepotei. Ka auyewana wayahina vavinena vi‑putu tomotau habuhabui mataedai yai Tau Ito‑yavuha avaha omoi, vivane Iesu.

Imavina Meagai Nasareta Wayahina

39Ka Iesu ayo‑amana avaha Yaubada ya veimea ana dewa habuhabuna inau‑yehai meagai Ierusalem nihenina, akanai taui papani Iudea ini‑tawanei, imavina papani Galili wayahina, ka iomo taui yai meagai ana wava Nasareta wayahina, ka imamaei.#Mat 2:23. 40Ka tevana nata ka ininina bagibagina, ka kadu nua‑uya nau‑vi‑anai. Ka Yaubada tevanina nau‑iaiavei.

Iesu Tupunaina Manua Vito‑pota Nihenina

41Ka ponimana aitamoata aitamoata nihenina Iesu ayo‑amana ivanevane Ierusalem wayahina, e Itouvuha Toneina idedewei.#NiT 12:24-27; 23:14-17; V.V 16:1-8. 42Ka tutana Iesu a ponimana 12 vaniahei, nui ivane toneina wayahina. 43Ka avaha toneina iakwa, tomotau habuhabui imavimavina yai megeia, ka tevanina Ierusalem nihenina mamaei, kate ayo‑amana eha it'‑anamane. 44Taui eha ita‑dueye, kate inuanua tauna yoko ananina nui imavimavina yai megeia. Ka avaha ioyoma naona iakwa, e taui iomo yai dede wayahia, kadu iomo yaiai wayahia inaunau‑nenei kadu ivi‑tanatanaiei. 45Kate eha aitam koiaka wayahia ta‑dueye, e taui inau‑nene‑wayohe. Wayahina, ayo‑amana imagigino imavi Ierusalem wayahina, e tenoke inaunau‑nenei. 46Ka avaha auyewa v'‑itonuna iakwa, ivaniahei Manua Vito‑pota a pai nau‑hohona nihenina. Ka tauna me Iudea yai tau viwavenena nui imamaei, e tauna yai vona wayahia vanevaneneha ka kadu vi‑tanatanaiei. 47Ka taui habuhabui avaha ya nua‑uya inononi, nuai vi‑tupatupa ananina, iuna ya vona‑nau‑pata tunutunuhina, ka kadu yan' anamana ito‑niuna. 48Ka tutana ayo‑amana ivaniahei idueyei, nuai imwage. Ka ayona yapoi, ka vonei, ivona, “Ia! Natuai, aviani wayahina edeweyeai deinake? Amam ama inua yama nua‑vita ananina nui anaunau‑nene‑wayohem.”

49Ka Iesu vi‑tanaiei, ivona, “Kaiwadi, aviani wayahina uneneu? Eha ut'‑anamane vivane yauke nau‑wawaniu Amau ya manua nihenina amamaei? Nau‑wawanimi un'‑anamane deina.” 50Ka ayo‑amana nuai eha t'‑am‑hau tauna ya vonana wayahina.

51Akanai ka, Iesu nui imavina Nasareta wayahina, ka tauna yai vona habuhabuna vi‑ateteyei. Kate ayona dewaia habuhabui inuanuani.#Luk 2:19. 52Ka Iesu ya nua‑uya nata, ka kadu ininina bagibagina, ka Yaubada kadu tomotau idewa‑haiawa ya dewaia wayahina.#1Sa 2:26; V.T 3:4.

Currently Selected:

Luke 2: MVN

Highlight

Copy