Mateu 24

Manua Vito‑pota A Vita‑vovona

(Marika 13:1‐2; Luke 21:5‐6)

1Vonana iakwa, e Iesu Manua Vito‑pota ni‑tawanei, ka tutana tauna nepena, a tau vi‑muni‑waiwai iomo wayahina, ka manua habuhabuna Manua Vito‑pota papena ananina imamaei iapa‑vidovidohei. 2Ka Iesu ivona, “Memeanina nuami vi‑tupatupa, kate avonemi, ataina manua‑naia habuhabui ududueyei, kate apaina habuhabui ibwege‑yavunei, ka hanu manua‑naia wayahia, kadu hanu manua ai tutu‑gana wayahia imamaei tanopia, eha aitam hanu‑naia wayahia mani hanu hetana.”#Luk 19:44.

Iesu Dewa Vitana Apa‑taputapuei

(Marika 13:3‐13; Luke 21:7‐19)

3Munia tauna omo Oya Olive wayahina ka manuena, ka a tau vi‑muni‑waiwai iomo wayahina ka taui ai heta nui imamaei, ka iviamei, ivona, “Kauvea, evoneai avi tuta wayahina Manua Vito‑pota ibwegei, ka yam tuta mavina, ka kadu tuta pai nau‑yehata wayahina ai iaiaya emataedai an'‑anamanei.”

4Ka Iesu ya vona‑nau‑pata mamanaina vi‑putu deina, ivona,

“Udune‑vivinimi. Apaina tomotau in'‑omo, ka yai nuanua inonomi. 5Wayahina, habuhabui au wavea in'‑omo, iviwavene‑paniemi. Ka aitamoata aitamoata wayahia ina‑vona, ‘Yauke Tau Ito‑yavuha‑nana.’ E taui tomotau habuhabui inonoi deina, ka aituhu aviyaivia taui ivitumahanei, ivi‑muniei.#Mat 24:23-24; 1Io 2:18. 6Kadu apaina, vanevane haviai wayahia unononi, tupwai avaha ivi‑putu, ka tupwai, kaiwadi, apaina ivi‑putu. Kate itomi nau‑wawanimi udune‑vivinimi ahiahina, ka eha un'‑awaehemi ateatemi viviha wayahina. Iuna Yaubada avaha dewaia tanoi veimeyei naona in'‑omo, ka munia tanopi ana tuta pai nau‑yehata na‑omo. 7Wayahina, apaina tau ma' papani tau ma' mani papani wayahia ivi‑naua, ka kiniV yai yoko mani kiniV yai yoko wayahia ivi‑naua. Kadue am navovo ananina ka yoyoyo in'‑omo meagai habuhabui wayahia. 8Ka dewaia tanoi vivane tuta vitaia ai pai vi‑putu ana heta.

9Apaina tomotau ipoy'‑avinimi, e mani tomotau wayahia ivenemi, ivo‑vihavihami, o ina‑nau‑vi‑anigimi. Ka tau vi‑meagai papani habuhabui nihenia inau‑nikonikoiemi, iuna taumi vivane au tau vitumahana.#Mat 10:22. 10Ka auyewaia nihenia au tau vitumahana habuhabui yai vitumahana ivihahaiei ini‑tawaneu, ka ivi‑putu vavanei ivauyei, ka inau‑nikonikoiei, ka kadu inau‑haviei. 11Ka tau apa‑taputapu vitupu habuhabui in'‑omo, e tomotau habuhabui ieta‑naonao‑paniei.#Mat 24:5, 24; 1Io 4:1. 12Ka auyewaia nihenia dewa goyona na‑nata. Wayahina, tomotau habuhabui yai dune‑nuanuai mani tomotau wayahia na‑ihanua. 13Kate aituhu aviyaivia itoha‑vi‑anai, imimini toyoina a itoava tuta a pai nau‑yehata wayahina, akanai taui dewa‑haiawa‑vavaha ivaniahei.#Mat 10:22. 14Naona au tau nau‑wahe nau‑wawani ineine meagai habuhabui wayahia, ka Yaubada ya pai veimea Vaneana Ahiahina inaunau‑waheyei tau vi‑meagai‑naia wayahia. Na‑iakwa, ana pata tuta pai nau‑yehata na‑omo.#Mat 28:19.

Dewa Goyona Ani‑vainena Kadu Dewa Vi‑aioi

(Marika 13:14‐23; Luke 21:20‐24)

15Nonova tau apa‑taputapu Daniela dewa goyona ani‑vainena apa‑taputapuei vivane apaina na‑omo pai vi‑ai vito‑potana wayahina. Ka Yaubada dewana goyona nau‑nikonikoiei. Iuna dewana pai vi‑ai vito‑potana na‑vo‑vi‑gawagawami. Ka dewana a vin'‑omana aitam iaiaya wayahimi. Ka avi auyewa iaiayana udueyei meagai vito‑potana nihenina mimini (aituhu aviyaivia vona taina iaiaiavi, yau nuanua nuai n'‑am‑haui),#Dan 9:27; 11:31; 12:11. 16auyewana wayahina, Iudea a tau ma' nau‑wawani ineine oya wayahia, ina‑novo. 17Ka aituhu aviyaivia nau‑peuna yai manua hetana wayahina imamaei, taui nau‑wawani ina‑opu ina‑novo‑kwayavoni. Eha nau‑wawani yai manua ina‑nu‑havinei yai gugua ivitue.#Luk 17:31. 18Ka auyewana wayahina, aituhu aviyaivia baguna nihenina ipaipaisewa, eha nau‑wawani imavina yai megeia, e ai kwama badobadona in'‑epe. 19Aioi! Iuna auyewana wayahina taui iamwanainahe kadue taui vi‑nunu vitana ananina ivaniahei! 20Nau‑wawanimi uviama auyewa ahiahina Yaubada na‑venemi yami tuta novo wayahina, ka eha kwadudu ana tuta nihenina, ka eha auyewa tapanono wayahina. 21Vona tunutunuhina, auyewana wayahina inahe ani‑vainena na‑omo, eha aitam deina tanopi a vevewana wayahina a itoava tuta ataina wayahina, ka apaina eha kadu aitam na‑vin'‑omo deina.#Dan 12:1. 22Vitaia auyewaia vivane vita‑vainena. Ka Yaubada tupwai tomotau vi‑nua‑dadanei vivane ya tomotau. Ka tauna taui wayahi auyewaia na‑vo‑vi‑kutekutei. Aituhu eha, tomotau habuhabui in'‑aniga, eha aitam na‑tupwa. 23Auyewaia nihenia, aituhu koiaka na‑vonemi, ‘Tau Ito‑yavuha taina’ o ‘Tau Ito‑yavuha tanoi’ eha uvitumahane.#Mat 24:5. 24Iuna, tau ito‑yavuha vitupu kadue tau apa‑taputapu vitupu in'‑omo, ka taui ai pata iaiaya bagibagi kadu dewa‑bagibagi idedewei. Ka dewaia ivevewanei, e tomotau habuhabui inonoi deina. Tupwai tomotau, taui avaha Yaubada vi‑nua‑dadanei ya tomotau, taui ai heta nuai n'‑am‑haui nono‑naia wayahi.#V.V 13:1-3; 2Te 2:8-9; SiV 13:13-14. 25Unuani. Ataina avaha dewaia wayahi amataedami.

26Wayahina, aituhu aviyaivia ivonemi, ‘Tau Ito‑yavuha meagai anata mamaei,’ eha una‑ne anata wayahina. O aituhu aviyaivia ivonemi, ‘Tau Ito‑yavuha manua taina nihenina mamaei,’ eha yai vona uvitumahane.#Luk 17:23-24. 27Avaha uanamanei, avi tuta vonaina tapa‑yayai babau a papani pai vane wayahina, ana pata kadueyei babau a papani pai onu wayahina. Ka yauke, Tauna Vi‑tomotau, yau mavi‑havine deinake. Vo‑kwayavonina avin'‑omo, ka tomotau habuhabui idudueyeu.#Mat 24:37-39. 28Aitam vona tana‑minikuna taina unononi.

‘Aveta wayahina aitam tau mate mamaei,

akanai eha ani‑hoina

papani‑nana nihenina

bwayobwayo inau‑hohona.’

Wayahina, avi tuta iaiaya tanoi ivin'‑omo udueyei, akanai un'‑anamanei vivane vi‑aioi ana tuta vi‑maupwani.#Luk 17:37.

Tauna Vi‑tomotau Ya Mavi‑havine

(Marika 13:24‐27; Luke 21:25‐28)

29Ka tuta vitana tanoi na‑iakwa, e vo‑kwayavonina

‘Babau vi‑novane,

e kadu wahava ya maheta na‑weu.

Ka wadima wahuma imaumaua,

ka dewa habuhabui wahuma imamaei

yai bagibagi ina‑ihanua.’#Isa 13:10; 34:4; Ese 32:7; Ioe 2:10, 31; 2Pi 3:10; SiV 6:12-13.

30Munia tomotau yauke, Tauna Vi‑tomotau, au iaiaya wahuma na‑omo idudueyei, kadu yoko habuhabui tanopia idudueyeu you tepana yau bagibagi kadu didigau ani‑vainena nui aomomo. Wayahina, taui ivi‑mohai, iuna yai ini‑yauyau ananina.#Sek 12:10; SiV 1:7; Dan 7:13. 31Ka bwegigi putuna ananina wayahina yau anelose avi‑tunei ine papani aitamoata aitamoata wayahia tanopi wayahina kadue wahuma wayahina. Ka aituhu aviyaivia avaha avi‑nua‑dadanei, taui ivi‑ateteyeu, akanai anelose‑naia inau‑hohoni iomanei wayahiua.#1Ko 15:52; 1Te 4:16.

Viwavenena Ai Madaiba Wayahina

(Marika 13:28‐31; Luke 21:29‐33)

32Aitam pai dune madaiba wayahina aviwavenemi unononi. Avi tuta madaiba yawaina vovouna ivi‑putu itabo‑havine, uanamanei nau‑sisi ana tuta vi‑maupwani. 33Wayahina deinake, aituhu avi tuta iaiaya‑naia udune‑vaniahei, akanai un'‑anamanei yau tuta mavi‑havine wayahina avaha vi‑maupwani, tuta eha ani‑hoina na‑iakwa, e udune‑havineu. 34Memeanina nuami vi‑tupatupa, kate avonemi, hum taina eha na‑iakwa a itoava dewai habuhabui ivin'‑omo wayahina.#Mat 16:28. 35Apaina wahuma taina kadu tanopi taina ina‑iakwa, kate yau vona eha ina‑iakwa.#Mat 5:18.

Eha Aitam Koiaka Auyewana T'‑anamane

(Marika 13:32‐37; Luke 17:26‐30, 34‐36)

36Unononi ahiahina. Eha aitam koiaka tanopia mamae yau mavi‑havine ana tuta, o kadi an' auyewa t'‑anamane. Anelose wahuma eha it'‑anamane, kadu yauke, Tauna Vi‑tomotau, eha at'‑anamane. Amau a heta‑ohota anamanei.#Dew 1:7; 1Te 5:1-2. 37Nonova Noa yana tuta wayahina, tomotau taui yai dewa ivi‑muniei. Ka yauke, Tauna Vi‑tomotau, yau mavi‑havine ana tuta deina.#Nao 6:5-8. 38Iuna, Noa yana tuta wayahina, naona tomotau iamam, ka inimnim, ka ivi‑awa‑kanakanapi, kadu itavitavine a itoava auyewana Noa yana yoko nui ya waea igenu wayahina. Iakwa, e diwaya ananina vin'‑omoi. 39Ka tomotau‑naia mwagemwagei, ka eha it'‑anamane vivane diwaya omomo, na‑tua‑hunuvi, ka tomotaui habuhabui igavivina. Ka yauke, Tauna Vi‑tomotau yau mavi‑havinena an' auyewa deinake.#Nao 7:21-23. 40Auyewana wayahina, aituhu onoto ainua ibagubaguna, anelose‑naia aitamoata wayahia in'‑epei, ka a niam ivihahaiei na‑mae. 41Ka kadu aituhu vaivine ainua iam‑gidoma, anelose‑naia aitamoata wayahia in'‑epei, ka a niam ivihahaiei na‑mae.

42Wayahina, itomi udune‑vivinimi, kadu udunedune ahiahina. Yauke yami Kauvea, kate eha yau mavi‑havinena ana tuta ut'‑anamane ahiahina.#Mat 25:13. 43Ka vona tana‑minikuna taina unononi, ka unuani. Aituhu tau vi‑manua tau vainau ya nuanua n'‑anamane, vivane nuanuana ioyoma pouna na‑omo, e ya manua na‑bwegei, tau vi‑manuana nau‑wawani ya manua na‑dune‑vi‑anai.#Luk 12:39-40; SiV 16:15. 44Ka itomi nau‑wawanimi udune‑vivinimi deina, kadu udunedune ahiahina. Iuna yauke, Tauna Vi‑tomotau, amavina aitam tau vainau deina. Eha yau mavi‑havinena a babau amai‑vonemi.

Tau Paisewa Ahiahina Kadu Tau Paisewa Goyona

(Luke 12:41‐48)

45Wayahina, kadu aitam vona tana‑minikuna avonemi, e tau nua‑uya yai dewa un'‑anamanei. Yauke aitam tau vi‑manua deina, ka itomi yau tau dune‑vi‑avina. Yau manua nihenina tau paisewa habuhabui imamaei. Ka ataina yami paisewa avenemi. Ka avi tuta nau‑wawani yau tau paisewa‑naia wayahi, akanai itomi ai ma' uvenevenei. 46Aituhu itomi yami nua‑uya nui, nau‑wawanimi yami paisewana udedewei a itoava amavina wayahina. Aituhu udedewei deina, apaina auyewana wayahina ududueyeu, dewa‑haiawa‑vavaha uvaniahei. 47Memeanina nuami vi‑tupatupa, kate avonemi vivane yau gugua habuhabuna avenemi uveimeyei.#Mat 25:21, 23. 48Kate aituhu unuanua goyona, ami heta una‑vona, ‘Ia! Tuta bana mamanaina wayahina yau kauvea papani‑nana mamaei. Tuta mamanaina nau‑wawaniu apotapota, e tauna na‑mavina. 49Wayahina, nau‑wawaniu yau nuanua avi‑putu adedewei.’ Aituhu uvi‑putu yaiami upiahi, o aituhu uamam‑didiga, o kadi daudau bagibagina unimnim‑didiga tau goyona nui, 50apaina yauke, yami Kauvea, amavina aitam auyewa wayahina, kate eha auyewana un'‑anamane, ka eha babau‑nana un'‑anamane. 51Ka aituhu yami goyona avaniahei deina, avita‑vovonimi yau inama wayahina, kadu avo‑tahomi una‑ne ami pai vi‑ai wayahina. Pai vi‑ai‑nana vivane tau vitupu yai papani wayahina, ka papani tanoi wayahina taui na vihai itoutou, kadue na vihai nihoi ina‑utaiei.”

Currently Selected:

Mateu 24: MVN

Highlight

Copy