Tongo nda ti aye 15

Nzapa na Abraham asara mbuki

1Na peko ti aye so, tënë ti KOTA GBIA asi na Abram na lege ti mbeni ye tongana bango-li si atene na lo: “Sara mbeto pepe, Abram. Mbi laa mbi yeke *vala ti mo. Ye so mo yeke wara ande na peko ti ye so mo sara ayeke kota mingi.” 2Abram akiri tënë, atene: “Kota Gbia NZAPA, nyen laa mo ye ti mu na mbi, nyen? Mbi du molenge pepe ngbii si mbi yeke kui so. Zo so ayeke mu ande aye ti peko ti mbi, ayeke Eliezer, zo ti gbata ti Damas. 3Mo sara si mbi du molenge ti ya ti mbi wani pepe; mbeni zo ti gbe ti mbi si ayeke mu ande aye ti peko ti mbi.” 4Tongaso tënë ti KOTA GBIA asi na lo, atene: “Lo laa lo yeke mu aye ti peko ti mo pepe, me molenge so mo wani, mo yeke du laa ayeke mu aye ti peko ti mo.” 5 Na pekoni, KOTA GBIA amu Abram, asigigi na lo si atene na lo: “Baa ndo na le ti nduzu, mo diko atongoro tongana mo lingbi ti diko ni.” Lo kiri lo tene na Abram: “Fade *Ahale ti mo ayeke ga mingi mingi tongaso.”

6 Abram azia be ti lo na KOTA GBIA. Ndani laa KOTA GBIA abaa lo tongana zo ti mbirimbiri. 7KOTA GBIA atene na lo: “Mbi KOTA GBIA laa, mbi mu mo na gbata ti Ur so ayeke na sese ti Babilonii, mbi sigigi na mo ti mu na mo kodro so mo duti daa so titene aga ti mo.” 8Abram akiri tënë, atene: “Kota Gbia NZAPA, mbi yeke hinga ande mbi tene, kodro ni ayeke ga ti mbi tongana nyen?” 9KOTA GBIA atene na lo: “Mu kete mama ti bagara oko ti ngu ota, mama ti ngasa oko ti ngu ota, koli-taba oko ti ngu ota, *mbipa oko, na *kolokoto oko, mo ga na ala na mbi.” 10Abram amu anyama so kue, lo ga na ala. Lo suru ya ti anyama ni use use si lo zia ni mbage na mbage, abaa le ti tere. Ti andeke ni, lo suru ya ti ala pepe. 11*Angoalo aga atuku na ndö ti akuâ ti anyama ni; me Abram atumba ala.

12 Na lakui, Abram ati na kota lango. Kota mbeto agbu lo; ndo avuko pitipiti na ndö ti lo. 13 KOTA GBIA atene na Abram: “Ayeke nzoni mo hinga so ahale ti mo ayeke gue ande ti duti na mbeni kodro so ayeke ti ala pepe. Fade azo ayeke mu ala na ngbaa si azo ni ayeke sara pasi na ala na ya ti ngu ngbangbo osio. 14 Fade mbi yeke fâ ngbanga na li ti azo ti mara so ayeke sara ahale ti mo na ngbaa so; na pekoni, ahale ti mo ayeke sigigi na gbe ti ngbaa ni na aye mingi na maboko ti ala. 15Ti mo, fade mo yeke duti nzoni na mbakoro ti mo; mo yeke kui gi na ya ti siriri ti gue ti wara akotara ti mo si a yeke lu kuâ ti mo. 16Fade amolenge ti mo ti molongo osio ni, ahale ti mo ayeke kiri ge, ngbanga ti so na ngoi ni so, ade sioni ti azo ti mara ti Amori ahon ndoni pepe.”

17So lâ akui awe, na bi ni so ndo avuko pitipiti, mbeni kota wâ so ayeke za si guru ayeke sigigi daa ahon na popo ti ambage ti anyama so lo suru ya ti ala so. 18 Gi na lango ni so KOTA GBIA asara *mbuki na popo ti lo na Abram, lo tene: “Mbi yeke mu ande kodro so na ahale ti mo. Kodro ni ayeke londo na ngu ti Ezipte ague ngbii asi na *bale ti Efrate. 19Kodro ni ayeke bongbi akodro ti azo ti mara ti Keni, ti Kenizi, ti Kadmoni, 20ti Het, ti Perizi, ti Refa, 21ti Amori, ti Kanaan, ti Girgashi na ti Yebus.”

Currently Selected:

Tongo nda ti aye 15: MNF2010

Highlight

Copy